സംസ്ഥാന മന്ത്രിസഭയുടെ രണ്ടാം വാര്‍ഷികത്തോടനുബന്ധിച്ച് മന്ത്രിമാരുടെ നേതൃത്വത്തില്‍ ജില്ലയില്‍ നടക്കുന്ന കരുതലും കൈത്താങ്ങും താലൂക്ക്തല പരാതി പരിഹാര അദാലത്തിന്റെ അവലോകന യോഗം വൈദ്യുതി വകുപ്പ് മന്ത്രി കെ. കൃഷ്ണന്‍കുട്ടിയുടെ അധ്യക്ഷതയില്‍ കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്നു. നിലവില്‍ 2407 പരാതികള്‍ ലഭിച്ചതായും 1581 എണ്ണം വിവിധ വകുപ്പുകളിലേക്കും താലൂക്കുകളിലേക്കും നടപടികള്‍ സ്വീകരിക്കുന്നതിന് നല്‍കിയതായും യോഗത്തില്‍ ജില്ലാ കലക്ടര്‍ ഡോ. എസ്. ചിത്ര അറിയിച്ചു.

ജില്ലാതല പട്ടയമേള മെയ് 15 ന് വൈകിട്ട് 3.30 ന് കോട്ടമൈതാനത്ത് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ജില്ലാതല പട്ടയമേളയ്ക്ക് മുന്നോടിയായി കലക്ടറേറ്റ് കോണ്‍ഫറന്‍സ് ഹാളില്‍ വൈദ്യുതി വകുപ്പ് മന്ത്രി കെ. കൃഷ്ണന്‍കുട്ടിയുടെ നേതൃത്വത്തില്‍ യോഗം നടന്നു. പട്ടയമേളയില്‍ വരുന്നവരുടെ എണ്ണത്തിനും വിതരണത്തിനുള്ള സമയത്തിനും അനുസൃതമായി കൗണ്ടറുകള്‍ സ്ഥാപിക്കണമെന്ന് മന്ത്രി യോഗത്തില്‍ നിര്‍ദേശിച്ചു. പട്ടയം ഇല്ലാത്തവര്‍ക്കാണ് അതിന്റെ വിഷമം അറിയുക. പട്ടയം ലഭിക്കുക എന്നത് അവരുടെ സ്വപ്‌നമാണ്. ജീവിതത്തില്‍ ഒരു രേഖ ലഭിക്കുകയാണെന്നതിനാല്‍ എത്ര കഷ്ടപ്പെട്ടാലും അവര്‍ വരും.

ഒറ്റപ്പാലം താലൂക്ക് ആശുപത്രിയിലെ എന്‍.ക്യു.എ.എസ് പ്രവര്‍ത്തനങ്ങളുടെ ഭാഗമായി ആശുപത്രിയിലെ ചുറ്റുമതിലിന്റെ അറ്റകുറ്റപ്പണികള്‍ നടത്തുന്നതിന് അംഗീകൃത വ്യക്തികള്‍/ സ്ഥാപനങ്ങളില്‍ നിന്നും ദര്‍ഘാസ് ക്ഷണിച്ചു. 2000 രൂപയാണ് നിരതദ്രവ്യം. പൂരിപ്പിച്ച ദര്‍ഘാസുകള്‍ ഏപ്രില്‍ 24 ന്  ഉച്ചയ്ക്ക് 12.50 വരെ സ്വീകരിക്കും. അന്നേദിവസം വൈകിട്ട് മൂന്നിന് ദര്‍ഘാസുകള്‍ തുറക്കും. കൂടുതല്‍ വിവരങ്ങള്‍ പ്രവൃത്തി ദിവസങ്ങളില്‍ ഓഫീസില്‍ നിന്നും ലഭിക്കുമെന്ന് സൂപ്രണ്ട് അറിയിച്ചു. ഫോണ്‍: 0466 2344053.

കാരാകുറിശ്ശി ഗവ ഹയര്‍ സെക്കന്‍ഡറി സ്‌കൂളിലെ ഒന്ന് മുതല്‍ എട്ട് വരെയുള്ള ക്ലാസുകളിലെ വിദ്യാര്‍ത്ഥികള്‍ക്ക് യൂണിഫോം വിതരണം ചെയ്യുന്നതിന് അംഗീകൃത വിതരണക്കാര്‍/വ്യാപാരികളില്‍ നിന്നും ടെന്‍ഡര്‍ ക്ഷണിച്ചു. 4026 രൂപയാണ് നിരതദ്രവ്യം. ഏപ്രില്‍ 25 ന് ഉച്ചക്ക് രണ്ട് വരെ ടെന്‍ഡറുകള്‍ സ്വീകരിക്കും. അന്നേദിവസം ഉച്ചക്ക് മൂന്നിന് ടെന്‍ഡറുകള്‍ തുറക്കും. ഫോണ്‍: 9495290349, 04924249040.

പാലക്കാട് താലൂക്കിലെ ലിംഗര്‍പ്പട്ടമഠം ശ്രീ മീനാഷി സുന്ദരേശ്വര സ്വാമി ക്ഷേത്രം, മണ്ണാര്‍ക്കാട് താലൂക്കിലെ തിരുവിഴാംകുന്ന് ശ്രീ ഞെരളത്ത് ക്ഷേത്രം എന്നിവിടങ്ങളില്‍ ട്രസ്റ്റി നിയമനം. താത്പര്യമുള്ളവര്‍ ഏപ്രില്‍ 29 ന് വൈകിട്ട് അഞ്ചിനകം നിശ്ചിത ഫോറത്തില്‍ മലബാര്‍ ദേവസ്വം ബോര്‍ഡ് പാലക്കാട് അസിസ്റ്റന്റ് കമ്മിഷണര്‍ക്ക് അപേക്ഷ നല്‍കണമെന്ന് അസിസ്റ്റന്റ് കമ്മിഷണര്‍ അറിയിച്ചു. അപേക്ഷാ ഫോം അസിസ്റ്റന്റ് കമ്മിഷണറുടെ ഓഫീസില്‍ നിന്നും നേരിട്ടോ www.malabardevaswom.kerala.gov.in ലോ ലഭിക്കും. ഫോണ്‍: 0491 2505777.