പൊന്നാനി ബ്ലോക്ക് പഞ്ചായത്ത് ജനകീയാസൂത്രണം 2022-23 വാർഷിക പദ്ധതികളുടെ ഭാഗമായി നടപ്പാക്കുന്ന 'പൊന്ന് വിളയും പൊന്നാനി വളം' എന്ന പദ്ധതിയുടെ ഉദ്ഘാടനം ഡോ. കെ.ടി. ജലീൽ എം.എൽ.എ നിർവഹിച്ചു. നടുവട്ടം ക്ഷീരസംഘത്തിന്റെ സഹകരണത്തോടെയാണ് 'ജൈവാമൃതം' എന്ന പേരിൽ നടുവട്ടം കരുവാട്ട്മന എസ്‌റ്റേറ്റ് പരിസരത്ത് ജൈവവള നിർമാണ യൂണിറ്റ് സ്ഥാപിച്ചത്. ക്ഷീരകർഷകർക്ക് പാലിന് പുറമെ ചാണകത്തിൽ നിന്നും അധിക വരുമാനം ലഭ്യമാക്കുക, മണ്ണിന്റെ ഗുണമേന്മ നഷ്ടപ്പെടുത്തുന്ന രാസവളങ്ങൾക്ക് പകരം പ്രാദേശികമായി ജൈവവളം ലഭ്യമാക്കുക എന്നീ ഉദ്ദേശത്തോടെയാണ് പദ്ധതി നടപ്പാക്കുന്നത്.

കോട്ടയം: കേരള പട്ടികജാതി പട്ടികവർഗ്ഗ വികസന കോർപറേഷൻ നടപ്പാക്കുന്ന കുറഞ്ഞ പലിശ നിരക്കുള്ള 50,000 രൂപ മുതൽ 5,00,000 വരെയുള്ള വിവിധ സ്വയം തൊഴിൽ വായ്പ പദ്ധതികളിലേക്ക് അപേക്ഷ ക്ഷണിച്ചു. അപേക്ഷകർ പട്ടികജാതി/ പട്ടികവർഗ്ഗ വിഭാഗത്തിൽപ്പെട്ട 18 വയസിനും 55 വയസിനും മധ്യേ പ്രായമുള്ളവരാകണം. കുടുംബ വാർഷിക വരുമാനം 3,50,000 രൂപയിൽ താഴെയായിരിക്കണം.  
 കുടുംബശ്രീ അയൽ കൂട്ടങ്ങളുടെ ആക്ടിവിറ്റി ഗ്രൂപ്പുകൾക്ക് ജാമ്യരഹിതമായി അഞ്ച് ശതമാനം പലിശനിരക്കിൽ  അഞ്ച് ലക്ഷം രൂപ നൽകും. അപേക്ഷാ ഫോം കോട്ടയം നാഗമ്പടത്തുള്ള ജില്ലാ ഓഫീസിൽ ലഭിക്കും. വിശദ വിവരത്തിന് ഫോൺ: 0481 2562532, 9400068505

അജൈവ മാലിന്യ ശേഖരണം കൂടുതല്‍ സുതാര്യമാക്കാന്‍ ഹരിതകര്‍മ സേനക്ക് ഇലക്ട്രിക് ഓട്ടോറിക്ഷ നല്‍കി ആറന്മുള ഗ്രാമപഞ്ചായത്ത്. ഹരിതകര്‍മ സേനാംഗങ്ങള്‍ക്ക് താക്കോല്‍ കൈമാറി ഇലക്ട്രിക് ഓട്ടോറിക്ഷ വിതരണ ഉദ്ഘാടനം പഞ്ചായത്ത് പ്രസിഡന്റ്  ഷീജ ടി ടോജി  നിര്‍വഹിച്ചു. 2022-23 വാര്‍ഷിക പദ്ധതിയില്‍ ഉള്‍പ്പെടുത്തി 4,48,407 രൂപ ചെലവഴിച്ചാണ് പുതിയ വാഹനം വാങ്ങിയത്.

കോട്ടയം: ജലജീവൻ മിഷൻ കുടിവെള്ളപദ്ധതിയിലൂടെ കോട്ടയം ജില്ലയിലെ ഏഴു ഗ്രാമപഞ്ചായത്തുകളിൽ നൂറുശതമാനം കുടിവെള്ള കണക്ഷൻ നൽകി. ആർപ്പൂക്കര, കുമരകം, തലയാഴം, വെച്ചൂർ, ടി.വി. പുരം, തലയോലപ്പറമ്പ്, ഉദയനാപുരം ഗ്രാമപഞ്ചായത്തുകളിൽ മുഴുവൻ വീടുകളിലും കുടിവെള്ള കണക്ഷൻ ലഭ്യമാക്കാനായെന്നു ജില്ലാ കളക്ടർ ഡോ. പി.കെ. ജയശ്രീയുടെ അധ്യക്ഷതയിൽ ചേർന്ന  പതിനാറാമത് ജില്ലാ ജല ശുചിത്വ മിഷൻ (ഡി.ഡബ്‌ള്യൂ.എസ്.എം) യോഗം വ്യക്തമാക്കി. ഏപ്രിൽ 18 വരെയുള്ള കണക്കനുസരിച്ച് ജില്ലയിലെ 2,024,69 വീടുകളിലാണ് കുടിവെള്ള കണ്ഷൻ നൽകാനായിട്ടുള്ളത്; 46.36 ശതമാനം.

മെഴുവേലി ഗ്രാമപഞ്ചായത്തില്‍ നിലവിലുളള കെട്ടിടങ്ങളുടെ  വിവരശേഖരണത്തിനും ഡേറ്റ എന്‍ട്രിക്കുമായി താത്കാലിക അടിസ്ഥാനത്തില്‍ ആളെ നിയമിക്കുന്നതിലേക്കായി  ഡിപ്ലോമ (സിവില്‍ എഞ്ചിനീയറിംഗ്), ഐടിഐ ഡ്രാഫ്റ്റ്സ്മാന്‍ സിവില്‍, ഐടിഐ സര്‍വെയര്‍ എന്നിവയില്‍ കുറയാത്ത യോഗ്യതുളളവരില്‍ നിന്നും അപേക്ഷ ക്ഷണിച്ചു. അപേക്ഷകര്‍ ഏപ്രില്‍ 26 ന് മുമ്പായി പഞ്ചായത്ത് ഓഫീസില്‍ യോഗ്യത തെളിയിക്കുന്ന രേഖകള്‍ സഹിതം അപേക്ഷ സമര്‍പ്പിക്കണമെന്ന് മെഴുവേലി ഗ്രാമപഞ്ചായത്ത് സെക്രട്ടറി അറിയിച്ചു.  ഫോണ്‍ : 0468 2257228.

2021-22, 2022-23 എന്നീ അധ്യയന വർഷങ്ങളിൽ എഞ്ചിനീയറിങ്, എം.ബി.ബി.എസ്, ബി.എസ്.സി അഗ്രികൾച്ചർ, വെറ്റിനറി സയൻസ്, ബി.എ.എം.എസ്, ബി.എച്ച്.എം.എസ്, എം.സി.എ, എം.ബി.എ,  ബി.എസ്.സി നഴ്‌സിങ്, എം.എസ്.സി നഴ്‌സിങ് എന്നീ പ്രൊഫഷണൽ കോഴ്‌സുകൾക്ക് ദേശീയ, സംസ്ഥാന തലത്തിൽ നടത്തുന്ന പൊതുപ്രവേശന പരീക്ഷയുടെ അടിസ്ഥാനത്തിൽ മെറിറ്റിൽ പ്രവേശനം ലഭിച്ച കേരള മോട്ടോർ തൊഴിലാളി ക്ഷേമനിധി പദ്ധതിയിൽ സജീവാംഗങ്ങളായ തൊഴിലാളികളുടെ കുട്ടികൾക്ക് സൗജന്യമായി ലാപ്‌ടോപ് വിതരണത്തിനും സർക്കാർ, എയ്ഡഡ് സ്‌കൂളുകളിൽ 2023-24 അധ്യയന വർഷത്തിൽ ഒന്ന് മുതൽ ഏഴ് വരെ ക്ലാസുകളിൽ പഠിക്കുന്ന കുട്ടികൾക്ക് സൗജന്യ പഠന കിറ്റ് വിതരണത്തിനും അപേക്ഷ ക്ഷണിച്ചു.

ചെന്നീര്‍ക്കര ഗ്രാമപഞ്ചായത്തില്‍ ആരോഗ്യ ശുചിത്വ കൗണ്‍സില്‍ യോഗം ഊന്നുകല്‍ വനിത കമ്മ്യുണിറ്റി ഹാളില്‍ ഗ്രാമപഞ്ചായത്ത് പ്രസിഡന്റ്  ജോര്‍ജ്ജ് തോമസ് ഉദ്ഘാടനം ചെയ്തു. നിര്‍മ്മല ഗ്രാമം നിര്‍മ്മല നഗരം നിര്‍മ്മല ജില്ല എന്ന ലക്ഷ്യം കൈവരിക്കുന്നതിലേക്ക് പഞ്ചായത്ത് തലത്തിലും തുടര്‍ന്ന് വാര്‍ഡ് തലത്തിലും യോഗം കൂടി മെയ് 30 നകം സമ്പൂര്‍ണ ലക്ഷ്യം കൈവരിക്കുന്നതിനുള്ള തീരുമാനം യോഗം കൈക്കൊണ്ടു.

വൈദ്യർ മഹോത്സവം 2023ന്റെ ഭാഗമായി മെയ് 15ന് മഹാകവി മോയിൻകുട്ടി വൈദ്യർ മാപ്പിളകലാ അക്കാദമി കൊണ്ടോട്ടിയിൽ 'വൈദ്യർ രാവ്' റിയാലിറ്റി ഷോ സംഘടിപ്പിക്കുന്നു. പങ്കെടുക്കാൻ ആഗ്രഹിക്കുന്ന 15നും 25നും ഇടയിൽ പ്രായമുള്ള ഗായകർ മെയ് രണ്ടിനകം 7902711432 എന്ന വാട്സാപ്പ് നമ്പറിൽ പേര് രജിസ്റ്റർ ചെയ്യണമെന്ന് അക്കാദമി സെക്രട്ടറി ബഷീർ ചുങ്കത്തറ അറിയിച്ചു.

യൂണിവേഴ്‌സിറ്റി കടക്കാട്ടുപ്പാറ-ഒലിപ്രംകടവ്-മുക്കത്ത കടവ് റോഡിൽ കലുങ്ക് പുതുക്കി പണിയുന്ന പ്രവൃത്തി നടക്കുന്നതിനാൽ ഇന്ന് (എപ്രിൽ 18) മുതൽ ഏപ്രിൽ 25 വരെ ഗതാഗതം നിരോധിച്ചു. വാഹനങ്ങൾ കടലുണ്ടി-ചെട്ടിയാർമാട് റോഡ് വഴിയോ, ചേളാരി-മാതപ്പുഴ റോഡ് വഴിയോ തിരിഞ്ഞ് പോകണമെന്ന് അസിസ്റ്റന്റ് എക്‌സിക്യുട്ടീവ് എൻജിനീയർ അറിയിച്ചു.