ഓരോ പഞ്ചായത്തിലും ഒരു കളിക്കളം എന്നതിൽ നിന്നും ഉയർന്ന് ഓരോ വാർഡ് തലത്തിലും എല്ലാ സൗകര്യങ്ങളുമുള്ള കളിക്കളം ഒരുക്കാൻ കഴിയണമെന്ന് മുഖ്യമന്ത്രി പിണറായി വിജയൻ.സംസ്ഥാന കായിക വകുപ്പിന്റെ 'ഒരു പഞ്ചായത്തിൽ ഒരു കളിക്കളം' പദ്ധതിയുടെ സംസ്ഥാനതല ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.

2024ഓടെ കേരളത്തെ സമ്പൂര്‍ണ മാലിന്യമുക്തമാക്കണമെന്ന് തദ്ദേശസ്വയംഭരണ വകുപ്പ് മന്ത്രി എം.ബി രാജേഷ്. മാലിന്യസംസ്‌കരണം സര്‍ക്കാരിന്റെ മാത്രം ഉത്തരവാദിത്തമാണെന്ന മനോഭാവത്തില്‍ ജനങ്ങള്‍ മാറ്റം വരുത്തണം. ഇതിനായി ജനപ്രതിനിധികള്‍ ശക്തമായ ഇടപെടല്‍ നടത്തണം. ബോധവത്കരണത്തിനൊപ്പം നിയമലംഘകര്‍ക്കെതിരെ മുഖം നോക്കാതെയുള്ള കര്‍ശന നടപടി സ്വീകരിക്കാന്‍ തദ്ദേശസ്ഥാപനങ്ങളും ഉദ്യോഗസ്ഥരും തയ്യാറാകണം. അങ്ങനെ വന്നാല്‍ ശുചിത്വ കേരളമെന്ന ലക്ഷ്യം കൈവരിക്കാന്‍ കഴിയുമെന്നും മന്ത്രി പറഞ്ഞു. ശുചിത്വകേരളമെന്ന ലക്ഷ്യം സാക്ഷാത്കരിക്കാനുള്ള കേരളത്തിന്റെ പോരാളികളാണ് ഹരിത കര്‍മ സേനയെന്നും മന്ത്രി പറഞ്ഞു.

കേരള സ്റ്റേറ്റ് ബീവറേജസ് കോർപ്പറേഷൻ്റെ ഇ-ഓഫീസ്, തദ്ദേശസ്വയംഭരണ എക്സൈസ് വകുപ്പ് മന്ത്രി എം. ബി രാജേഷ് ഉദ്ഘാടനം ചെയ്തു. ബീവറേജസ് കോർപ്പറേഷന്റെ വളർച്ചയുടെയും പുരോഗതിയുടെയും ചരിത്രത്തിൽ വിപ്ലവകരമായ ചുവടുവെപ്പാണ് ഈ ഓഫീസ് എന്ന് മന്ത്രി പറഞ്ഞു. ജീവനക്കാർക്ക് ജോലി അനായാസമാക്കാൻ ഇ -ഓഫീസ് സഹായകരമാകും. ഒരു രൂപ പോലും ചെലവഴിക്കാതെയാണ് ഇ- ഓഫീസ് സംവിധാനം പ്രാവർത്തികമാക്കിയതെന്നും മന്ത്രി കൂട്ടിച്ചേർത്തു. കെ എസ് ബി സി ചെയർമാനും മാനേജിംഗ് ഡയറക്ടറുമായ യോഗേഷ് ഗുപ്ത, ഇ- ഓഫീസ് സൊല്യൂഷൻ നോഡൽ ഓഫീസർ ജാനു മോഹൻ, ബീവറേജസ് കോർപ്പറേഷനിലെ ഉദ്യോഗസ്ഥർ, ജീവനക്കാർ തുടങ്ങിയവർ ചടങ്ങിൽ പങ്കെടുത്തു.

സംസ്ഥാനത്ത് ഇന്നും (ഏപ്രില്‍ 19) നാളെയും ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ മഴയ്ക്കും ഏപ്രില്‍ 21 മുതല്‍ 23 വരെ  ഇടിമിന്നലോട് കൂടിയ മഴയ്ക്കും 30 മുതല്‍ 40 കി.മീ വരെ വേഗത്തില്‍ വീശിയടിക്കാവുന്ന ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.  ഇടിമിന്നല്‍ അപകടകാരികളാണെന്നതിനാല്‍ കാര്‍മേഘം കണ്ടു തുടങ്ങുന്ന സമയം മുതല്‍ തന്നെ മുന്‍കരുതല്‍ സ്വീകരിക്കണം. ഈ സാഹചര്യത്തില്‍ സംസ്ഥാന ദുരന്ത നിവാരണ അതോറിറ്റി പൊതുജനങ്ങള്‍ക്കായി ജാഗ്രതാ നിര്‍ദേശങ്ങള്‍ പുറത്തിറക്കി.

അനർട്ടിന്റെ സാങ്കേതിക സഹായത്തോടെ നാറ്റ്പാക്ക് സ്ഥാപിച്ച 20 കിലോവാട്ട് സൗരോർജ നിലയത്തിന്റെ ഉദ്ഘാടനം വൈദ്യുത വകുപ്പ് മന്ത്രി കെ കൃഷ്ണൻകുട്ടി നിർവഹിച്ചു. സംസ്ഥാനത്ത് സൗരോർജ്ജ മേഖലയിൽ വൻമാറ്റമാണ് വന്നുകൊണ്ടിരിക്കുന്നതെന്ന് മന്ത്രി പറഞ്ഞു. 97 പട്ടികജാതി കോളനികളിൽ സോളാർ വൈദ്യുതി എത്തിക്കാനുള്ള ശ്രമത്തിലാണ് വൈദ്യുതി വകുപ്പ്. കാർഷിക മേഖലയിൽ വൈദ്യുതി എത്താത്ത ഇടങ്ങളിൽ സൗരോർജ്ജ പാനലുകൾ സ്ഥാപിക്കാനുള്ള ശ്രമവും നടക്കുകയാണെന്ന് മന്ത്രി പറഞ്ഞു.

വനിതകൾക്ക് സ്വയം തൊഴിലിലൂടെ വരുമാനം കണ്ടെത്താൻ കുടുംബശ്രീ ടെയ്ലറിംഗ് യൂണിറ്റുമായി ചൂണ്ടൽ ഗ്രാമപഞ്ചായത്ത്. കുടുംബശ്രീയുടെ ആഭിമുഖ്യത്തിൽ എട്ടാം വാർഡിലെ മണലി പ്രദേശത്ത് വനിതാ വ്യവസായ കേന്ദ്രത്തിൽ ടാലന്റ് ടെയ്ലറിംഗ് യൂണിറ്റിന്റെ പ്രവർത്തനം ആരംഭിച്ചു. നൈറ്റി, ചുരിദാറുകൾ,  റെഡിമെയ്ഡ് വസ്ത്രങ്ങൾ, സ്കൂൾ യൂണിഫോമുകൾ തുടങ്ങിയവയുടെ തയ്യലും വില്പനയും ഇവിടെയുണ്ട്. പഞ്ചായത്ത് ജനകീയാസൂത്രണ പദ്ധതിയിൽ ഉൾപ്പെടുത്തി 2022 -2023 നവസംരംഭകർക്കുള്ള സബ്സിഡി എന്ന പദ്ധതിയിൽ ഉൾപ്പെടുത്തി 5.5 ലക്ഷം രൂപയാണ് പദ്ധതിക്ക് വകയിരുത്തിയത്.

പീച്ചി കേരള വന ഗവേഷണ സ്ഥാപനത്തിൽ ജൂനിയർ റിസേർച്ച് ഫെല്ലോയുടെ താത്ക്കാലിക ഒഴിവിലേക്ക് ഓൺലൈനായി അപേക്ഷ ക്ഷണിച്ചു. 2024 മാർച്ച് 26 വരെയാണ് ഗവേഷണ കാലാവധി. കൂടുതൽ വിവരങ്ങൾക്ക് www.kfri.res.in എന്ന വെബ്സൈറ്റ് സന്ദർശിക്കുക.

മുകുന്ദപുരം താലൂക്ക് വികസന സമിതി യോഗം മെയ് ആറിന് രാവിലെ 11 മണിക്ക് മുകുന്ദപുരം താലൂക്ക് ഓഫീസ് കോൺഫറൻസ് ഹാളിൽ ചേരും.

മലമ്പുഴ സർക്കാർ മൃഗസംരക്ഷണ പരിശീലന കേന്ദ്രത്തിന്റെ ആഭിമുഖ്യത്തിൽ മുട്ടക്കോഴി വളർത്തലിൽ 27ന് മലമ്പുഴ മൃഗസംരക്ഷണ പരിശീലന കേന്ദ്രത്തിൽ രാവിലെ 10മുതൽ 4വരെ പരിശീലനം ഉണ്ടായിരിക്കും. 9188522713, 0491 2815454 എന്ന നമ്പറിൽ വിളിച്ച് മുൻകൂട്ടി രജിസ്റ്റർ ചെയ്യണം. പങ്കെടുക്കുന്നവർ ആധാർ കാർഡിൻറെ കോപ്പി കൊണ്ടുവരേണ്ടതാണ്.

കാർഷിക വികസന കർഷക ക്ഷേമ വകുപ്പ് വിവിധ ഇനം നടീൽ വസ്തുക്കൾ ജില്ലയിലെ ഉല്പാദന കേന്ദ്രങ്ങളിലേക്കും വിതരണ കേന്ദ്രങ്ങളിലേക്കും എത്തിക്കുന്നതിന് താല്പര്യമുള്ള ലോറി ഉടമകളിൽനിന്ന് ഇ ടെൻഡർ ക്ഷണിച്ചു. ടെൻഡർ ലഭിക്കേണ്ട അവസാന തിയ്യതി മെയ് 4 വൈകിട്ട് 4 മണി. ഫോൺ: 0487 2333297.