ലൈഫ് - പി എം എ വൈ പദ്ധതിയില്‍ ഉള്‍പ്പെടുത്തി കൊടുങ്ങല്ലൂര്‍ നഗരസഭയില്‍ പട്ടികജാതി വിഭാഗത്തില്‍പ്പെട്ട 59 പേര്‍ക്ക് കൂടി വീട് നിര്‍മ്മിച്ച് നല്‍കും. സ്വന്തമായി സ്ഥലമുള്ളവര്‍ക്കാണ് പദ്ധതിയില്‍ ഉള്‍പ്പെടുത്തി വീട് നല്‍കുന്നത്. നഗരസഭ ചെയര്‍മാന്‍ കെ ആര്‍ ജൈത്രന്റെ അധ്യക്ഷതയില്‍ ചേര്‍ന്ന നഗരസഭ കൗണ്‍സില്‍ യോഗത്തിലാണ് തീരുമാനം. നഗരസഭ ബസ് സ്റ്റാന്റില്‍ യാത്രക്കാര്‍ക്ക് മൈക്കിലൂടെ അറിയിപ്പുകള്‍ നല്‍കുന്നതിന് നെന്മാറ ലേബര്‍ കോണ്‍ട്രാക്റ്റ് വെല്‍ഫെയര്‍ സൊസൈറ്റിക്ക് അനുമതി നല്‍കി. ബസ്സുകളുടെ സമയവും സര്‍ക്കാരിന്റെ പ്രധാനപ്പെട്ട അറിയിപ്പുകളും അനൗണ്‍സ് ചെയ്യും.

ഹരിത കേരള മിഷന്‍ പദ്ധതിയുടെ ഭാഗമായി വിവിധ കേന്ദ്രങ്ങളില്‍ പച്ചത്തുരുത്തുകള്‍ സൃഷ്ടിച്ച് മികച്ച പരിസ്ഥിതി പ്രവര്‍ത്തനങ്ങള്‍ നടത്തിയതിന് കൊടുങ്ങല്ലൂര്‍ നഗരസഭയ്ക്ക് സംസ്ഥാന സര്‍ക്കാരിന്റെ പുരസ്‌കാരം. നഗരത്തിലെ വിവിധ സ്ഥലങ്ങളില്‍ ഫലവൃക്ഷ തൈകള്‍ വെച്ച് പിടിപ്പിച്ച് പച്ചത്തുരുത്തുകള്‍ നിര്‍മിക്കുകയും മാതൃകാപരമായി പരിസ്ഥിതി പുനസ്ഥാപന പ്രവര്‍ത്തനങ്ങള്‍ ഏറ്റെടുത്ത് നടപ്പിലാക്കുകയും ചെയ്ത നഗരസഭയെ ഹരിത കേരള മിഷന്‍ വൈസ് ചെയര്‍പേഴ്‌സണ്‍ ഡോ ടി എന്‍ സീമ അനുമോദനപത്രം നല്‍കി അഭിനന്ദിച്ചു.

പഴം പച്ചക്കറി കാര്‍ഷിക സംഭരണ-വിപണന കേന്ദ്രം ചെമ്പൂക്കാവിലും ആരംഭിക്കും. കോവിഡ് മഹാമാരിയുടെ പശ്ചാത്തലത്തില്‍ കേരളത്തിലെ കര്‍ഷകര്‍ ഉല്‍പാദിപ്പിക്കുന്ന ഉല്‍പന്നങ്ങള്‍ക്ക് ന്യായവില ലഭ്യമാക്കുന്നതിന് നിരവധി പദ്ധതികള്‍ കേരള കാര്‍ഷിക വികസന കര്‍ഷക ക്ഷേമ വകുപ്പ് ആരംഭിച്ചിട്ടുണ്ട്. ഇതിന്റെ ഭാഗമായി തൃശൂര്‍ ജില്ലയിലെ കര്‍ഷകര്‍ ഉത്പാദിപ്പിക്കുന്ന പഴങ്ങള്‍, പച്ചക്കറികള്‍, മറ്റ് കാര്‍ഷിക വിഭവങ്ങള്‍ തുടങ്ങിയ ഉത്പന്നങ്ങള്‍ ചെറുകിട നാമമാത്ര കര്‍ഷകരില്‍ നിന്നും സംഭരിച്ച് വിതരണം ചെയ്യുന്നതിനായാണ് ചെമ്പൂക്കാവില്‍ സംഭരണ-വിപണന കേന്ദ്രം ആരംഭിക്കുന്നത്.

പഠനത്തോടൊപ്പം വിദ്യാര്‍ത്ഥികള്‍ക്ക് നീന്തല്‍ അഭ്യസിപ്പിക്കാന്‍ സ്‌കൂളില്‍ നീന്തല്‍ക്കുളമെന്ന വ്യത്യസ്തമായ ആശയവുമായി ജിഎംഎല്‍പി സ്‌കൂള്‍. നീന്തലറിയാത്തത് മൂലം നിരവധി കുട്ടികളാണ് കുളത്തിലും മറ്റും മരണത്തിന് കീഴടങ്ങുന്നത്. നീന്തല്‍ പഠിക്കുന്നതിനാവശ്യമായ സൗകര്യങ്ങളുടെ അഭാവമാണ് ഇന്നത്തെ കുട്ടികള്‍ നേരിടുന്നത്. വിദ്യാര്‍ഥികള്‍ക്ക് നീന്തല്‍ പരിശീലനത്തിന് വേണ്ട സൗകര്യമൊരുക്കുന്നതിനായി ചാവക്കാട് നഗരസഭയുടെ പദ്ധതിയാണ് സ്‌കൂളിലെ നീന്തല്‍ കുളം.

കോൾ നില വികസന ഏജൻസി  എക്‌സിക്യൂട്ടിവ് കമ്മിറ്റി യോഗം ചേർന്നു. കോൾ നില വികസന ഏജൻസി അംഗത്വത്തിനുള്ള അപേക്ഷകൾ അംഗീകരിച്ച 11 പടവ് കമ്മിറ്റികൾ അംഗത്വ ഫീസ് അടയ്ക്കുകയും അവർക്ക് അംഗത്വ സർട്ടിഫിക്കറ്റ് നൽകുകയും ചെയ്തു.

വിശപ്പ് രഹിത കേരളം പദ്ധതിയുടെ ഭാഗമായി സുഭിക്ഷ കേരളം മിഷൻ നടപ്പിലാക്കുന്ന ജനകീയ ഹോട്ടൽ പുന്നയൂർക്കുളത്ത് ആരംഭിച്ചു. കുടുംബശ്രീയുടെ നേതൃത്വത്തിൽ 20 രൂപയ്ക്ക് ഉച്ചയൂണ് ലഭ്യമാക്കുന്ന ജനകീയ ഹോട്ടൽ പഞ്ചായത്തിലെ ആൽത്തറ തടാകം ബിൽഡിംഗിൽ കെ വി അബ്ദുൾ ഖാദർ എംഎൽഎ ഉദ്ഘാടനം ചെയ്തു. ഊണ് കഴിക്കാൻ പണമില്ലാത്ത നിർധനരായവർക്കും ഇവിടെ നിന്ന് ഭക്ഷണം കഴിക്കാം. ഇതിനായി ഷെയർ മീൽസ് നടപ്പിലാക്കും. ഭക്ഷണം കഴിക്കാൻ വരുന്ന ആർക്കും ഒരാൾക്കോ അതിൽ കൂടുതൽ ആളുകൾക്കോ ഭക്ഷണം സ്പോൺസർ ചെയ്യാം. അതിനുള്ള ടോക്കൺ എടുത്ത് വയ്ക്കുന്നതിനുള്ള സൗകര്യം ഇവിടെ ഏർപ്പെടുത്തിയിട്ടുണ്ട്.

കല്ലേറ്റുംകര സബ് രജിസ്ട്രാർ ഓഫീസ് പുതിയ മന്ദിരത്തിന്റെ ഉദ്ഘാടനം പൊതുമരാമത്ത് രജിസ്‌ട്രേഷൻ വകുപ്പ് ജി സുധാകരൻ നിർവഹിച്ചു. രജിസ്‌ട്രേഷൻ വകുപ്പിന് കീഴിൽ വരുന്ന എല്ലാ സേവനങ്ങളും ഡിജിറ്റൽ ഫോർമാറ്റിലേക്ക് മാറുന്ന കാലം വിദൂരമല്ലെന്ന് മന്ത്രി പറഞ്ഞു. ഇ പേയ്മെന്റ്, ഓൺലൈൻ രജിസ്‌ട്രേഷൻ, ഡിജിറ്റൽ ഇമേജ് തുടങ്ങിയ സൗകര്യങ്ങൾ ഇതിന്റെ ഭാഗമായി ലഭ്യമാക്കുമെന്നും മന്ത്രി കൂട്ടിച്ചേർത്തു.

ചാവക്കാട് നഗരസഭയുടെ മുതുവട്ടൂരിലുള്ള വായനശാല ആധുനികവൽക്കരിച്ചു. നഗരസഭാ ജനകീയാസൂത്രണ പദ്ധതി പ്രകാരം 19 ലക്ഷം ചെലവഴിച്ചാണ് വായനശാല കെട്ടിടം നവീകരിച്ചത്. വായനക്കാർക്ക് പുസ്തകങ്ങൾ സൗകര്യപൂർവം തിരഞ്ഞെടുക്കുന്നതിനായി അലമാരയും റഫറൻസ് പുസ്തകങ്ങൾ പ്രയോജനപ്പെടുത്തുന്നതിന് ഫർണിച്ചർ സൗകര്യങ്ങളോടുകൂടിയ റഫറൻസ് വിഭാഗവും സജ്ജീകരിച്ചിട്ടുണ്ട്. നവീകരിച്ച വായനശാല കെട്ടിടത്തിന്റെ ഉദ്ഘാടനം കെ വി അബ്ദുൽ ഖാദർ എംഎൽഎ നിർവഹിച്ചു.

നഗരസഭയിലെ വനിതാ ജീവനക്കാരുടെ താമസ സൗകര്യത്തിനായി ചാവക്കാട് നഗരസഭ ഹോസ്റ്റൽ സംവിധാനം ഏർപ്പെടുത്തി. കോവിഡും മറ്റ് യാത്രാ അസൗകര്യങ്ങളുമായി ബുദ്ധിമുട്ടുന്ന നഗരസഭയിലെ വനിതാ ഉദ്യോഗസ്ഥർക്ക് ഇനി ഇവിടെ താമസിച്ച് ജോലി ചെയ്യാം. നഗരസഭ ഓഫീസിനോട് ചേർന്ന് ആർ കെ ഉമ്മർ സ്മാരക കെട്ടിടത്തിന്റെ രണ്ടാം നിലയിലാണ് വനിതാ ജീവനക്കാർക്ക് വേണ്ടിയുള്ള ഹോസ്റ്റലിന്റെ നിർമാണം പൂർത്തീകരിച്ചത്. ജനകീയാസൂത്രണ പദ്ധതി പ്രകാരം 35 ലക്ഷം രൂപയാണ് നിർമ്മാണച്ചെലവ്. ചാവക്കാട് നഗരസഭ വനിതാ ഹോസ്റ്റലിലെ ഉദ്ഘാടനം കെ വി അബ്ദുൽ ഖാദർ എംഎൽഎ നിർവഹിച്ചു.

നെൽവയൽ ഉടമകൾക്കുള്ള  റോയൽറ്റി വിതരണോദ്ഘാടനം നവംബർ 5 ന് രാവിലെ 10 മണിക്ക് ജില്ലാ പ്ലാനിംഗ് ഹാളിൽ മുഖ്യമന്ത്രി പിണറായി വിജയൻ ഓൺലൈനിൽ നിർവഹിക്കും. കൃഷി വകുപ്പ് മന്ത്രി അഡ്വ വി എസ് സുനിൽകുമാർ അധ്യക്ഷത വഹിക്കും. നെൽ കൃഷി ചെയ്യാവുന്ന നെൽവയലുകൾ രൂപ മാറ്റം വരുത്താതെ  നിലനിർത്തി സംരക്ഷിക്കുകയും  കൃഷിക്കായി ഉപയുക്തമാക്കുകയും ചെയ്യുന്ന നെൽവയലുകളുടെ ഉടമകൾക്കാണ് ഹെക്ടറിന് ഓരോ സാമ്പത്തിക വർഷവും 2000 രൂപ നിരക്കിൽ റോയൽറ്റി അനുവദിക്കുന്നത്. കൃഷി വകുപ്പ് സെക്രട്ടറി ഡോ രത്തൻ ഖേൽക്കർ പദ്ധതി വിശദീകരിക്കും. എ ഐ എം എസ് പോർട്ടൽ റിപ്പോർട്ട്‌ എൻ ഐ സി ഡി ഡി ജി, എസ് ഐ ഒ മോഹൻദാസ് അവതരിപ്പിക്കും.