അഭ്യസ്തവിദ്യരായിട്ടും ആഗ്രഹിച്ച മേഖലയില്‍ തൊഴില്‍ നേടാന്‍ കഴിയാത്ത ചെറുപ്പക്കാര്‍ക്ക് സഹായകരമാകുന്ന കുടുംബശ്രീയുടെ ‘കണക്റ്റ് ടു വര്‍ക്ക്’ പദ്ധതി ഇനി കൊടുങ്ങല്ലൂരിലും. കൊടുങ്ങല്ലൂർ നഗരസഭ ഓഫീസിനോട് ചേർന്ന് പുനർനിർമ്മിച്ച 'കണക്റ്റ് ടു വർക്ക് ട്രെയ്നിങ് സെൻ്റർ ' ഹാൾ പരിശീലനത്തിനായി തുറന്നുകൊടുത്തു. മതിലകം ബ്ലോക്കിലെയും കൊടുങ്ങല്ലൂർ നഗരസഭയിലെയും അഭ്യസ്തവിദ്യരായ യുവതീ- യുവാക്കൾക്ക് വിവിധ മത്സര പരീക്ഷകളിൽ പരിശീലനം നൽകുന്നതിനായാണ് ട്രെയ്നിങ് സെൻ്റർ ഹാൾ പരിശീലനത്തിനായി തുറന്നുകൊടുത്തത്.  പരിശീലനം നടത്തുന്നതിനായി ടെലിവിഷൻ, ലാപ്ടോപ്, മൈക്ക്, ഫാനുകൾ, ലൈറ്റ് , ഫർണീച്ചറുകൾ എന്നിവ സജ്ജീകരിച്ചിട്ടുണ്ട്.

സംസ്ഥാന സര്‍ക്കാരിന്റെ സ്മാര്‍ട്ട് വില്ലേജ് ഓഫീസ് പദ്ധതിയിലുള്‍പ്പെടുത്തി തൃശൂര്‍ ജില്ലയിലെ 14 വില്ലേജ് ഓഫീസുകള്‍ സ്മാര്‍ട്ടാകുന്നു. എരവ്, ശ്രീനാരായണപുരം, പുല്ലൂറ്റ്, അഴീക്കോട്, കാക്കുളിശ്ശേരി, ആളൂര്‍, കല്ലേറ്റുംകര, ചാലക്കുടി ഈസ്റ്റ്, വടക്കേക്കാട്, കണിയാര്‍ക്കോട്, കൊണ്ടാഴി, അഞ്ഞൂര്‍ ഗ്രൂപ്പ്, ഒല്ലൂര്‍ക്കര, നടത്തറ എന്നീ വില്ലേജ് ഓഫീസുകളാണ് സ്മാര്‍ട്ടാകുന്നത്. ഇവയുടെ നിര്‍മാണോദ്ഘാടനം മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വ്വഹിച്ചു. റവന്യൂ വകുപ്പ് മന്ത്രി ഇ ചന്ദ്രശേഖരന്‍ അധ്യക്ഷത വഹിച്ചു. തദ്ദേശസ്വയംഭരണ വകുപ്പ് മന്ത്രി എ സി മൊയ്തീന്‍ മുഖ്യാതിഥിയായി. 

തദ്ദേശ സ്വയംഭരണ  സ്ഥാപനങ്ങളുടെ ഭരണ സമിതി കാലാവധി അവസാനിയ്ക്കുന്ന വേളയിൽ ഹരിത കേരള മിഷന്റെ നിർദ്ദേശാനുസരണം കുന്നംകുളം നഗരസഭയിലെ കൗൺസിലർമാർ മരങ്ങൾ നട്ട് മാതൃകയായി.  തൃശ്ശൂർ റോഡിൽ ഗവ. ബോയ്സ്  ഹൈസ്കൂളിന് മുൻഭാഗത്ത് ഫുട്പാത്തിനോട് ചേർന്നാണ് നഗരസഭ കൗൺസിലർമാരെല്ലം മരത്തൈകൾ നട്ടുപിടിപ്പിച്ചത്.'ഓർമ്മ തുരുത്ത് 'എന്ന് പേരിട്ടിട്ടുള്ള ഈ പദ്ധതി നഗരസഭ ചെയർപേഴ്സൺ സീതാ രവീന്ദ്രൻ ഉൽഘാടനം ചെയ്തു. വൈസ് ചെയർമാൻ പി.എം സുരേഷ്, സ്റ്റാന്റിങ് കമ്മിറ്റി ചെയർമാൻമാരായ ഗീത ശശി, സുമ ഗംഗാധരൻ, കെ.കെ.ആനന്ദൻ,  മിഷ സെബാസ്റ്റ്യൻ എന്നിവരും കൗൺസിലർമാരും സന്നിഹിതരായി.

ചാലക്കുടി മുനിസിപ്പല്‍ ഇന്‍ഡോര്‍ സ്‌റ്റേഡിയം ഉദ്ഘാടനം  നവംബര്‍ 5ന് രാവിലെ 10 മണിക്ക് വ്യവസായ കായിക യുവജന കാര്യ വകുപ്പ് മന്ത്രി ഇ പി ജയരാജന്‍ നിര്‍വഹിക്കും. ബി ഡി ദേവസ്സി എം എല്‍ എ അധ്യക്ഷത വഹിക്കും. ബെന്നി ബെഹനാന്‍ എം പി മുഖ്യാതിഥിയാകും. കായിക യുവജന കാര്യാലയം ചീഫ് എന്‍ജിനിയര്‍ എസ് രാജീവ് റിപ്പോര്‍ട്ട് അവതരിപ്പിക്കും. 

കേരളത്തിലെ ആദ്യത്തെ സർക്കാർ ആയുർവേദ നേത്രരോഗ സ്‌പെഷ്യാലിറ്റി ആശുപത്രി ചാലക്കുടിക്ക് സ്വന്തം. പത്മഭൂഷൺ വൈദ്യഭൂഷണം രാഘവൻ തിരുമുൽപ്പാടിന്റെ സ്മരണക്കായി ആയുഷ് വകുപ്പിന് കീഴിലാണ് മികച്ച സൗകര്യങ്ങളോടെ ആശുപത്രിയിയൊരുങ്ങുന്നത്. നഗരസഭ വിട്ട് നൽകിയ 60 സെൻറ് സ്ഥലത്ത് 9 കോടി രൂപ ചിലവിലാണ് ആയുർവേദ രംഗത്തെ മികച്ച ചികിത്സാ കേന്ദ്രം പണി പൂർത്തീകരിക്കുക. ആകെ 50 കിടക്കകളുള്ള ആയുഷ് ആശുപത്രിയിൽ നേത്ര വിഭാഗമായ ശാലാക്യ തന്ത്രത്തിന് 30 കിടക്കകൾ, പഞ്ചകർമ്മ ചികിത്സക്കായി 10 കിടക്കകളുള്ള ജനറൽ വാർഡുകൾ, യോഗ, പ്രകൃതി ചികിത്സാ സൗകര്യങ്ങക്കായി 10 കിടക്കകൾ എന്നീ സൗകര്യങ്ങൾ ഉണ്ടാകും.

ചാലക്കുടി വൈദ്യഭൂഷണം രാഘവൻ തിരുമൂൽപ്പാട് സ്മാരക ആയുഷ് ആയുർവേദ ആശുപത്രി നിർമ്മാണോദ്ഘാടനം ആരോഗ്യ വകുപ്പ് മന്ത്രി കെ കെ ശൈലജ ടീച്ചർ ഓൺലൈനായി നിർവഹിച്ചു. നഗരസഭ ജൂബിലി ഹാളിൽ നടന്ന പരിപാടിയിൽ ബി ഡി ദേവസ്സി എം എൽ എ അധ്യക്ഷത വഹിച്ചു. ബെന്നി ബെഹനാൻ എം പി മുഖ്യാതിഥിയായി. നാഷണൽ ആയുഷ് മിഷൻ സ്റ്റേറ്റ് മിഷൻ ഡയറക്ടർ എ ആർ അജയ കുമാർ മുഖ്യപ്രഭാഷണം നടത്തി. ഐ എസ് എം ഡയറക്ടർ കെ എസ് പ്രിയ പദ്ധതി വിശദീകരണം നടത്തി.

മുല്ലശ്ശേരി ബ്ലോക്ക് പഞ്ചായത്തിന് കീഴിലെ സാമൂഹികാരോഗ്യ കേന്ദ്രത്തിൽ ഡിജിറ്റൽ എക്‌സ്‌റേ യൂനിറ്റിന്റെ ഉദ്ഘാടനം മുരളി പെരുനെല്ലി എം എൽ എ നിർവഹിച്ചു. 2019 -20 സാമ്പത്തിക വർഷത്തെ എം എൽ എ യുടെ ആസ്തി വികസന ഫണ്ടിൽ നിന്നും വകയിരുത്തിയ 25 ലക്ഷം രൂപ വിനിയോഗിച്ചാണ് ഡിജിറ്റൽ എക്‌സ്‌റേ യൂനിറ്റ് സ്ഥാപിച്ചത്. എക്‌സ്‌റേ മെഷീനും കമ്പ്യൂട്ടർ റേഡിയോഗ്രാഫി സിസ്റ്റവും ഉൾക്കൊള്ളുന്ന ഡിജിറ്റൽ യൂനിറ്റിന്റെ വരവോടെ എക്‌സ്‌റേ റിസൾട്ട് ഷീറ്റിന്റെ വാഷിംഗ്, ഡ്രൈയിംഗ് ഘട്ടങ്ങൾക്ക് കാത്ത് നിൽക്കാതെ അതിവേഗം ഡിജിറ്റൽ രൂപേണ എക്‌സ്‌റേ റിസൾട്ട് ഷീറ്റ് രോഗികൾക്ക് ലഭ്യമാക്കാനാകും.

ഐ സി യു, വെന്റിലേറ്റർ, ഡയാലിസിസ് ബെഡുകൾ എന്നിവയിൽ 25 ശതമാനം കോവിഡ് പോസിറ്റീവ് രോഗികൾക്കായി മാറ്റിവച്ചതിന്റെ റിപ്പോർട്ട് രണ്ട് ദിവസത്തിനുള്ളിൽ സ്വകാര്യ ആശുപത്രി പ്രതിനിധികൾ കലക്ടർക്ക് നൽകണം. ജില്ലാ കലക്ടർ എസ് ഷാനവാസിന്റെ നേതൃത്വത്തിൽ സ്വകാര്യ ആശുപത്രി പ്രതിനിധികളുമായി ഓൺലൈനായി നടത്തിയ യോഗത്തിലാണ് തീരുമാനം. കോവിഡ് ബാധിച്ച രോഗികൾക്ക് ഡയാലിസ് ആവശ്യമായി വരുമ്പോൾ സ്വകാര്യ ആശുപത്രികളിൽ നിന്ന് നേരെ ഗവ. മെഡിക്കൽ കോളേജ് ആശുപത്രിയിലേക്ക് മാറ്റുകയാണ്. ഇതിനെ തുടർന്ന് ഗവ. മെഡിക്കൽ കോളേജ് ആശുപത്രിയിലുണ്ടായ ബുദ്ധിമുട്ട് അധികൃതർ കലക്ടറുടെ ശ്രദ്ധയിൽ പെടുത്തിയതിനെ തുടർന്നാണ് യോഗം വിളിച്ചത്.

മാള ബ്ലോക്ക് പഞ്ചായത്ത് പരിധിയിലെ കുഴൂർ പഞ്ചായത്ത് പോർക്കുളത്തിന്റെയും അന്നമനട പഞ്ചായത്ത് കുട്ടൻകുളത്തിന്റെയും നവീകരണ നിർമ്മാണോദ്ഘാടനം കൃഷി വകുപ്പ് മന്ത്രി വി.എസ്. സുനിൽ കുമാർ ഓൺലൈനായി നിർവഹിച്ചു. ഈ സർക്കാർ അധികാരത്തിൽ വന്ന ശേഷം കാർഷിക മേഖലയിൽ ഉണ്ടായ വളർച്ച മുമ്പത്തേക്കാളും വലുതാണെന്ന് മന്ത്രി പറഞ്ഞു. കാർഷിക ക്ഷേമ ബോർഡിന്റെ പ്രവർത്തനം കർഷകർക്ക് ഗുണകരമായി മാറി. കാർഷിക ഉൽപ്പന്നങ്ങൾക്ക് മികച്ച വില കിട്ടാവുന്ന സാഹചര്യം ഓരോ കർഷകനും ഉറപ്പാക്കാനും കഴിഞ്ഞതായി മന്ത്രി കൂട്ടിച്ചേർത്തു.

21 ദിവസമായി അടഞ്ഞുകിടന്നിരുന്ന ചേറ്റുവ ഹാർബർ തുറന്നു പ്രവർത്തിക്കാൻ തീരുമാനം. എങ്ങണ്ടിയൂർ ഗ്രാമപഞ്ചായത്ത് പ്രസിഡന്റ് പി.എൻ ജ്യോതി ലാലിന്റെ അധ്യക്ഷതയിൽ ചേർന്ന യോഗത്തിലാണ് തീരുമാനം. കണ്ടെയ്ൻമെൻറ് സോണിൽ ഉള്ളവർ മത്സ്യബന്ധനത്തിന് പോകാൻ പാടില്ല. വള്ളങ്ങളിൽ ആർക്കെങ്കിലും കോവിഡ് സ്ഥിരീകരിച്ചാൽ ആ വള്ളത്തിലെ എല്ലാ തൊഴിലാളികളും നിരീക്ഷണത്തിൽ കഴിയണമെന്നും യോഗം തീരുമാനിച്ചു. വള്ളം ഉടമകളുടെ കോഡിനേഷൻ കമ്മിറ്റി രൂപീകരിച്ച് ഹാർബർ കോഡിനേഷൻ കമ്മിറ്റിയായി ചേർന്ന് പ്രവർത്തിക്കും.