കുടുംബശ്രീ ജില്ലാമിഷന്റെയും പന്ന്യന്നൂര്‍ സി ഡി എസിന്റെയും സംയുക്താഭിമുഖ്യത്തില്‍ 'ഞങ്ങളും സ്ത്രീകള്‍' എന്ന വിഷയത്തില്‍ ട്രാന്‍സ്‌ജെന്‍ഡര്‍ പ്രതിനിധികളുടെ സെമിനാര്‍  നടന്നു.  ലിംഗ സമത്വവും നീതിയും എന്ന വിഷയത്തെ അധികരിച്ച് പാനൂര്‍ ബ്ലോക്ക് പഞ്ചായത്ത് ഹാളില്‍ നടന്ന സെമിനാര്‍ കുടുംബശ്രീ ജില്ലാ മിഷന്‍ കോ ഓര്‍ഡിനേറ്റര്‍ ഡോ എം സുര്‍ജിത് ഉദ്ഘാടനം ചെയ്തു.

കാത്തിരിപ്പിനൊടുവില്‍ കുറുമാത്തൂര്‍ ഗവ. ഐടിഐക്ക് സ്വന്തം കെട്ടിടമെന്ന സ്വപ്നം യാഥാര്‍ഥ്യമാകുന്നു. പത്ത് വര്‍ഷമായി താല്‍ക്കാലിക കെട്ടിടത്തില്‍ പ്രവര്‍ത്തിച്ചുവരുന്ന ഐടിഐക്ക് പന്നിയൂര്‍ കൂനത്താണ് പുതിയ കെട്ടിടം നിര്‍മ്മിച്ചത്. ലൈബ്രറി, സ്റ്റാഫ് റൂം, ഓഫീസ്, വിസിറ്റേഴ്സ് റൂം എന്നിവയുള്‍പ്പെടെയുള്ള സൗകര്യങ്ങളോടു കൂടിയാണ് ഐടിഐ സജ്ജമാക്കിയിരിക്കുന്നത്. കെട്ടിടത്തിന്റെ ഉദ്ഘാടനം മാര്‍ച്ച് 11 ന് രാവിലെ 10 മണിക്ക് തൊഴില്‍ നൈപുണ്യ എക്സൈസ് വകുപ്പ് മന്ത്രി ടി പി രാമകൃഷ്ണന്‍ നിര്‍വഹിക്കും.

പഴയങ്ങാടി ഗവ. താലൂക്ക് ആശുപത്രിയിലെ മാതൃ-ശിശു പരിചണ ബ്ലോക്ക് കെട്ടിടത്തിന്റെ ശിലാസ്ഥാപനം ടി വി രാജേഷ് എംഎല്‍എ നിര്‍വഹിച്ചു. ഒമ്പത് കോടി രൂപയുടെ പദ്ധതിയാണ് ആശുപത്രി നവീകരണത്തിനായി സര്‍ക്കാറില്‍ സമര്‍പ്പിച്ചത്. ആദ്യഘട്ടത്തില്‍ ആധുനിക നിലവാരത്തിലുള്ള കെട്ടിടം നിര്‍മ്മിക്കുന്നതിന് മൂന്ന് കോടി രൂപ അനുവദിച്ചു. 

ആധുനിക വാര്‍ഡ്, ഓപ്പറേഷന്‍ തീയേറ്റര്‍, ഒബ്‌സര്‍വേഷന്‍ റൂം, പ്രസവവാര്‍ഡ്, കുട്ടികളുടെ വാര്‍ഡ്, മരുന്ന് സൂക്ഷിപ്പ് കേന്ദ്രം, ഫാര്‍മസി, നഴിസിംഗ് റൂം എന്നിവയും പദ്ധതിയുടെ ഭാഗമാവും.

സ്ത്രീകള്‍ വീട്ടിലും സമൂഹത്തിലും നേരിടുന്ന അതിക്രമങ്ങള്‍ വരച്ചുകാട്ടുന്ന സ്ത്രീ പര്‍വ്വം സംഗീത ശില്‍പവുമായി വിദ്യാര്‍ഥിനികള്‍. പയ്യാമ്പലം ഗവ.വനിതാ അധ്യാപക പരിശീലന കേന്ദ്രത്തിലെ വിദ്യാര്‍ഥിനികളാണ് സ്ത്രീ ശാക്തീകരണം പ്രമേയമാക്കി അന്താരാഷ്ട്ര വനിതാ ദിനത്തില്‍ സംഗീത ശില്‍പം അവതരിപ്പിച്ചത്. നൃത്താവിഷ്‌കാരത്തിലൂടെ അധ്യാപക വിദ്യാര്‍ഥിനികള്‍ ഇന്നത്തെ സമൂഹത്തെ വരച്ചു കാട്ടിയപ്പോള്‍ നാനാതുറയിലുള്ളവര്‍ പിന്തുണയുമായെത്തി.

ജലസ്രോതസ്സുകളില്‍ ഓരോ സമയത്തും ഉള്ള ജലത്തിന്റെ അളവ്‌ അറിയുന്നതിനും അതനുസരിച്ച്‌ പ്രവര്‍ത്തനങ്ങള്‍ ആസൂത്രണം ചെയ്യുന്നതിനുമായി ഹരിതകേരളം മിഷന്റെ നേതൃത്വത്തില്‍ എല്ലാ ജലസ്രോതസ്സുകളിലും സ്‌കെയിലുകള്‍ സ്ഥാപിക്കുന്ന പ്രവര്‍ത്തനങ്ങള്‍ക്ക്‌ തുടക്കമായി. മുഖ്യമന്ത്രിയുടെ അധ്യക്ഷതയില്‍ ചേര്‍ന്ന ഹരിതകേരളം മിഷന്‍ യോഗത്തിലെ തീരുമാനപ്രകാരമാണ്‌ ഈ നടപടി. സ്‌കെയിലിലെ അളവ്‌ നോക്കി ഓരോ സമയത്തും കുളത്തില്‍ എന്തുമാത്രം ജലം ലഭ്യമാണ്‌ എന്ന്‌ പൊതുജനങ്ങള്‍ക്കു കൂടി അറിയാന്‍കഴിയുന്ന രീതിയിലുള്ള പട്ടിക ഉള്‍പ്പെടുന്ന ഒരു ബോര്‍ഡ്‌ കൂടി സ്‌കെയിലിന്‌ സമീപം സ്ഥാപിക്കുന്നുണ്ട്‌.

കാലാവസ്ഥാ വിള ഇന്‍ഷ്വറന്‍സ്‌ പദ്ധതിയില്‍ മുന്‍ സീസണുകളില്‍ നഷ്‌ടപരിഹാരത്തിനര്‍ഹമാകുകയും എന്നാല്‍ ബാങ്ക്‌ അക്കൗണ്ട്‌ വിവരങ്ങള്‍, അഡ്രസ്സ്‌ വിവരങ്ങള്‍ തുടങ്ങിയവയിലെ പിഴവുകള്‍ കാരണം നഷ്‌ടപരിഹാരം ലഭ്യമാകാത്തവരുമായ കര്‍ഷകരുടെ പേരുവിവരങ്ങള്‍ ബന്ധപ്പെട്ട കൃഷിഭവനുകളില്‍ ലഭ്യമാണ്‌. ആയതിനാല്‍ പ്രസ്‌തുത ലിസ്റ്റില്‍ ഉള്‍പ്പെട്ട കര്‍ഷകര്‍ മാര്‍ച്ച്‌ 15 നകം ആധാര്‍ കാര്‍ഡിന്റേയും, ബാങ്ക്‌ പാസ്സ്‌ബുക്ക്‌ ആദ്യപേജിന്റേയും പകര്‍പ്പുകള്‍ ബന്ധപ്പെട്ട കൃഷിഭവനില്‍ നല്‍കണം. പോളിസി നമ്പര്‍ പകര്‍പ്പില്‍ എടുത്തെഴുതാന്‍ പ്രത്യേകം ശ്രദ്ധിക്കേണ്ടതാണ്‌.

കോടതി കുടിശ്ശിക ഈടാക്കുന്നതിന്‌ പെരുമ്പിലാവ്‌ വില്ലേജ്‌ സര്‍വെ 770/2 ല്‍ ഉള്‍പ്പെട്ട 0.0162 ഹെക്‌ടര്‍ ഭൂമി മാര്‍ച്ച്‌ 27 രാവിലെ 11 ന്‌ കരിക്കാട്‌ വില്ലേജ്‌ ഓഫീസില്‍ ലേലം ചെയ്യും. കൂടുതല്‍ വിവരങ്ങള്‍ക്ക്‌ ഫോണ്‍ : 0487-2433469.

ഫയര്‍ ആന്‍ഡ്‌ റസ്‌ക്യൂ വകുപ്പ്‌ ഹോംഗാര്‍ഡ്‌ തസ്‌തികയില്‍ നിയമനം നടത്തുന്നു. താല്‍പര്യമുളളവര്‍ മാര്‍ച്ച്‌ 30 നകം എറണാകുളം ഫയര്‍ ആന്‍ഡ്‌ റസ്‌ക്യൂ സര്‍വീസസ്‌ ജില്ലാ ഓഫീസില്‍ അപേക്ഷ നല്‍കണം. അപേക്ഷഫോറത്തിന്റെ മാതൃകയും കൂടുതല്‍ വിവരങ്ങളും എറണാകുളം ഫയര്‍ ആന്‍ഡ്‌ റസ്‌ക്യൂ സര്‍വീസസ്‌ ജില്ലാ ഓഫീസില്‍ നിന്നും ലഭിക്കും. കൂടുതല്‍ വിവരങ്ങള്‍ക്ക്‌ ഫോണ്‍ 0484-2205550, 2207710, 9497920154.

തൃശൂര്‍-പാലക്കാട്‌ ദേശീയ പാതയിലെ മുളയം, മുടിക്കോട,്‌ പട്ടിക്കാട്‌ എന്നിവിടങ്ങളിലെ അറ്റകുറ്റപണികള്‍ വേഗത്തില്‍ പൂര്‍ത്തിയാക്കാന്‍ നിര്‍മ്മാണ ചുമതലയുളള കെഎംസി കമ്പനിക്ക്‌ മനുഷ്യാവകാശ കമ്മീഷന്റെ നിര്‍ദ്ദേശം. പൊതുമരാമത്ത്‌ വകുപ്പ്‌ റസ്റ്റ്‌ ഹൗസില്‍ നടന്ന സിറ്റിങ്ങിലാണ്‌ കമ്മീഷന്റെ നിര്‍ദ്ദേശം. ഇത്‌ സംബന്ധിച്ച ഷാജി കോടങ്കണ്ടത്ത്‌ സമര്‍പ്പിച്ച പരാതിയില്‍ കമ്മീഷന്‍ ദേശീയപാത അതോറിറ്റി, സംസ്ഥാന പൊതുമരാമത്ത്‌ റോഡ്‌ വിഭാഗം, നിര്‍മ്മാണ ചുമതലയുളള കമ്പനി എന്നിവരില്‍ നിന്നും വാദം കേട്ടു. പണി ഉടന്‍ ആരംഭിക്കണമെന്നാവശ്യപ്പെട്ട്‌ ഈ ആഴ്‌ച തന്നെ ഉത്തരവിറക്കും.

ചേലക്കര ഗവണ്‍മെന്റ്‌ ആര്‍ട്‌സ്‌ ആന്‍ഡ്‌ സയന്‍സ്‌ കോളേജില്‍ 2018-19 വര്‍ഷത്തെ കോളേജ്‌ മാഗസിന്‍ അച്ചടിച്ച്‌ വിതരണം ചെയ്യുന്നതിന്‌ ക്വട്ടേഷന്‍ ക്ഷണിച്ചു. ക്വട്ടേഷന്‍ സ്വീകരിക്കുന്ന അവസാന തീയതി മാര്‍ച്ച്‌ 21. കൂടുതല്‍ വിവരങ്ങള്‍ക്ക്‌ ഫോണ്‍ : 04884-253090.