കാലപഴക്കം കൊണ്ട്‌ ജീര്‍ണ്ണാവസ്ഥയിലായ അക്കിക്കാവ്‌, അണ്ടത്തോട്‌, കല്ലേറ്റുംകര, കുന്നംകുളം, മുണ്ടൂര്‍, പഴയന്നൂര്‍, തൃപ്രയാര്‍ എന്നീ എഴ്‌ സബ്‌ രജിസ്‌ട്രാഫീസുകള്‍ക്ക്‌ പുതിയ കെട്ടിടം നിര്‍മ്മിക്കാനുളള സൈറ്റുകള്‍ കേരള കണ്‍സ്‌ട്രക്ഷന്‍ കോര്‍പ്പറേഷനു കൈമാറി. ഇതിന്റെ നിര്‍മ്മാണോദ്‌ഘാടനം ഉടനെ നടക്കുമെന്ന്‌ ജില്ലാ രജിസ്‌ട്രാര്‍ ജനറല്‍ അറിയിച്ചു. കിഫ്‌ബി പദ്ധതിയില്‍ ഉള്‍പ്പെടുത്തി സംസ്ഥാന സര്‍ക്കാര്‍ നടപ്പിലാക്കുന്നു. കൂടാതെ സബ്‌ രജിസ്‌ട്രാര്‍ ഓഫീസിന്‌ മിനി സിവില്‍ സ്റ്റേഷനില്‍ കൂടുതല്‍ സൗകര്യങ്ങളോടെ പുതിയ കെട്ടിടം നല്‍കി.

കുന്നംകുളത്തെ മാലിന്യ പ്രശ്‌നങ്ങള്‍ക്ക്‌ ശാശ്വത പരിഹാരമായി പ്രവര്‍ത്തിക്കുന്ന കുറുക്കന്‍പാറ ഗ്രീന്‍ പാര്‍ക്കില്‍ ചകിരി യൂണീറ്റിന്റെ നിര്‍മ്മാണം തുടങ്ങി. ബാക്ടീരിയ ഇനോക്കുലം ചേര്‍ത്ത ചകിരിച്ചോറാണ്‌ ഇവിടെ മാലിന്യ സംസ്‌കരണത്തിനായി ഉപയോഗിക്കുന്നത്‌. മാസത്തില്‍ നാലരടണ്‍ ചകിരിച്ചോറാണ്‌ ഇതിനായി ആവശ്യം വരുന്നത്‌. ധനമന്ത്രി ടിഎം തോമസ്‌ ഐസക്ക്‌ ഗ്രീന്‍പാര്‍ക്ക്‌ സന്ദര്‍ശിച്ചപ്പോഴാണ്‌ ചകിരി നിര്‍മ്മാണ യൂണീറ്റ്‌ സ്വന്തമായി തുടങ്ങുന്നതിനുള്ള ആശയം പങ്കുവെച്ചത്‌. മന്ത്രിയുടെ നിര്‍ദ്ദേശത്തെ തുടര്‍ന്ന്‌ കയര്‍ ബോര്‍ഡിന്റെ സഹകരണവും ലഭിച്ചു.

ശാരീരികവും മാനസികവുമായ വെല്ലുവിളികള്‍ നേരിടുന്നവരുടെ സ്വാഭാവിക വളര്‍ച്ചയെ സഹായിക്കുന്ന നയപരിപാടികളാണ്‌ സംസ്ഥാന സര്‍ക്കാര്‍ ആവിഷ്‌കരിക്കുന്നതെന്നു കൃഷി വകുപ്പ്‌ മന്ത്രി അഡ്വ വിഎസ്‌ സുനില്‍കുമാര്‍ പറഞ്ഞു. ഇത്തരം കുട്ടികള്‍ക്ക്‌ അവസരങ്ങള്‍ നല്‍കുവാന്‍ സമൂഹത്തിനു ബാധ്യതയുണ്ടെന്നും അദ്ദേഹം കൂട്ടിച്ചേര്‍ത്തു. മൂന്നാം സംസ്ഥാന തല ബഡ്‌സ്‌ കലോത്സവത്തിന്റെ സമാപന ഉദ്‌ഘാടനം വെള്ളാനിക്കര കാര്‍ഷിക സര്‍വകലാശാല ക്യാമ്പസ്സില്‍ സെന്‍ട്രല്‍ ഓഡിറ്റോറിയത്തില്‍ നിര്‍വഹിച്ച സംസാരിക്കുകയായിരുന്നു അദ്ദേഹം. ബഡ്‌സ്‌ കലോത്സവം രാജ്യത്തിന്‌ തന്നെ മാതൃകയാണെന്നും മന്ത്രി പറഞ്ഞു.

സംസ്ഥാന സര്‍ക്കാരിന്റെ ജനകീയ ഭരണത്തിന്റെ 1000 ദിനങ്ങള്‍ മുഖ്യമന്ത്രി പിണറായി വിജയന്റെ നേതൃത്വത്തില്‍ സംസ്ഥാനത്തൊട്ടാകെ ആഘോഷിക്കുന്ന വേളയില്‍ ഫെബ്രുവരി 20 മുതല്‍ 27 വരെ തൃശൂര്‍ ജില്ലയിലും 1000 ദിനാഘോഷം സംഘടിപ്പിക്കുന്നു. അതിനു മുന്നോടിയായി ജില്ലയില്‍ കഴിഞ്ഞ രണ്ടുവര്‍ഷ കാലമായി നടപ്പാക്കികൊണ്ടിരിക്കുന്ന വികസന പ്രവര്‍ത്തനങ്ങള്‍ ജനങ്ങള്‍ക്കുമുന്നില്‍ സമര്‍പ്പിക്കുന്ന അവസരം കൂടിയാണിത്‌.

സംസ്ഥാന സര്‍ക്കാരിന്‍െ്‌റ ആയിരം ദിനങ്ങള്‍ നവകേരളത്തിന്‌ അടിത്തറയാണെന്ന്‌ കൃഷിവകുപ്പ്‌ മന്ത്രി അഡ്വ. വി.എസ്‌. സുനില്‍കുമാര്‍. സര്‍ക്കാരിന്‍െ്‌റ ആയിരംദിനാഘോഷങ്ങളുടെ ജില്ലാതല പരിപാടികള്‍ വിശദ്ധീകരിച്ച്‌ രാമനിലയത്തില്‍ നടത്തിയ പ്രത്രസമ്മേളനത്തില്‍ സംസാരിക്കുകയായിരുന്നു അദ്ദേഹം. ആയിരം ദിനങ്ങള്‍കൊണ്ട്‌ സര്‍ക്കാര്‍ വലിയ മാറ്റങ്ങള്‍ക്കാണ്‌ തുടക്കമിട്ടിരിക്കുന്നത്‌. വികസനകാര്യത്തിലും സാമൂഹിക ക്ഷേമ കാര്യങ്ങളിലും ഒരേരീതിയില്‍ നേട്ടങ്ങള്‍ സാധ്യമായി. ജനങ്ങള്‍ക്ക്‌ നല്‍കിയ വാഗ്‌ദാനങ്ങള്‍ നിറവേറ്റാനാണ്‌ സര്‍ക്കാര്‍ ശ്രമിക്കുന്നത്‌.

സംസ്ഥാന മുഖ്യമന്ത്രി പിണറായി വിജയന്‍ ഇന്ന്‌ (ഫെബ്രുവരി 18) തൃശൂര്‍ ജില്ലയില്‍ വിവിധ പരിപാടികള്‍ ഉദ്‌ഘാടനം ചെയ്യും. രാവിലെ 10 മണ്ണുത്തി വെറ്റിനറി യൂണിവേഴ്‌സിറ്റി വര്‍ഗ്ഗീസ്‌ കുര്യന്‍ ഇന്‍സ്റ്റിറ്റിയൂട്ട്‌ ഓഫ്‌ ഡയറി ആന്‍ഡ്‌ ഫുഡ്‌ ടെക്‌നോളജി, 11 ന്‌ തൃശൂര്‍ ലുലു കണ്‍വെന്‍ഷന്‍ സെന്ററില്‍ പഞ്ചായത്ത്‌ ദിനാഘോഷം, വൈകീട്ട്‌ 3 ന്‌ പെരിഞ്ഞനം പഞ്ചായത്ത്‌-സോളാര്‍ പദ്ധതി, 4.30 ന്‌ ചാവക്കാട്‌ കുടിവെളള പദ്ധതി, 6 ന്‌ തേക്കിന്‍കാട്‌ മൈതാനത്ത്‌ കൃഷി വകുപ്പിന്റെ മെക്കനൈസേഷന്‍ പദ്ധതി എന്നിവയാണ്‌ മുഖ്യമന്ത്രി ഉദ്‌ഘാടനം ചെയ്യുക.
 

കൊച്ചി: ദിവസ വരുമാനം കൊണ്ട് ജീവിക്കുന്ന ഓട്ടോ തൊഴിലാളികള്‍ക്ക് സഹകരണ സംഘം ഏറെ പ്രയോജനപ്രദമാണെന്ന് മുഖ്യമന്ത്രി പിണറായി വിജയന്‍. സഹകരണ നിയമങ്ങള്‍ക്കും ചട്ടങ്ങള്‍ക്കും അനുകൂലമായി ഓട്ടോറിക്ഷ തൊഴിലാളികളെ പങ്കെടുപ്പിച്ചുകൊണ്ടുള്ള സഹകരണ സംഘ രൂപീകരണം സംസ്ഥാനത്ത് ആദ്യമാണ്. ഇത്തരം ഇടപെടലുകളിലൂടെ തൊഴിലാളികളുടെ ക്ഷേമം, സുരക്ഷ എന്നിവ ആസൂത്രണം ചെയ്യാനാള്ള സാധ്യതയും ആലോചിക്കണം. ജില്ല ഓട്ടോറിക്ഷ ഡ്രൈവേഴ്‌സ് സഹകരണ സംഘത്തിന്റെയും മെട്രോ ഫീഡര്‍ ഓട്ടോ സര്‍വീസിന്റെയും ഉദ്ഘാടനം നിര്‍വഹിച്ചുകൊണ്ട് സംസാരിക്കുകയായിരുന്നു അദ്ദേഹം. 

കൊച്ചി: സംസ്ഥാനത്തെ ആദ്യ മെട്രോ പോലീസ് സ്റ്റേഷനായ കൊച്ചി മെട്രോ പോലീസ് സ്റ്റേഷന്‍ മുഖ്യമന്ത്രി പിണറായി വിജയന്‍ നാടിന് സമര്‍പ്പിച്ചു.  

നീതിനിര്‍വ്വഹണത്തില്‍ പോലീസ് ജനപക്ഷത്തു നില്‍ക്കണമെന്ന് അദ്ദേഹം പറഞ്ഞു. നാട് അഴിമതി മുക്തമാകുന്നതിന് പോലീസ് സേവനം അനിവാര്യമാണ്. സാക്ഷരതയിലും വിദ്യാഭ്യാസ രംഗത്തും തലയെടുപ്പോടെ നില്‍ക്കുന്ന കേരളത്തില്‍ നിന്ന്  അഴിമതിയും സ്വജനപക്ഷപാതവും ഇല്ലാതാക്കണമെന്നും അദ്ദേഹം പറഞ്ഞു.  

കൊച്ചി: കണയന്നൂര്‍ താലൂക്കിന് കീഴിലുള്ള റീ-സര്‍വ്വേ പരാതികള്‍ അടക്കം വിവിധ ലാന്‍ഡ് റെക്കോര്‍ഡ് മെയിന്റെനന്‍സ് (എല്‍.ആര്‍.എം) കേസുകളില്‍ തീര്‍പ്പ് കല്‍പ്പിക്കുന്നു. ഇന്ന് താലൂക്ക് സര്‍വ്വേ വിഭാഗത്തില്‍ നടക്കുന്ന അദാലത്തില്‍ വര്‍ഷങ്ങള്‍ പഴക്കമുള്ള 150ഓളം പരാതികളില്‍ തീര്‍പ്പു കല്‍പ്പിക്കും.

രാവിലെ 11മണിക്ക് ജില്ലാ കളക്ടര്‍ കെ. മുഹമ്മദ് വൈ. സഫീറുള്ള അദാലത്ത് ഉദ്ഘാടനം ചെയ്യും. പഴയ പരാതികളില്‍ തീര്‍പ്പുകല്‍പ്പിക്കുക എന്ന ലക്ഷ്യത്തോടെ നടത്തുന്ന അദാലത്തില്‍ 2014 മുതലുള്ള കേസുകളില്‍ തീര്‍പ്പുകല്‍പ്പിച്ച് അപേക്ഷകര്‍ക്ക് ഉത്തരവ് കൈമാറും.

നിർഭയമായും നിഷ്പക്ഷമായും ആദിവാസികൾ സമ്മതിദാനവകാശം വിനിയോഗിച്ച് രാജ്യത്തിന്റെ ജനാധിപത്യ പ്രക്രിയയിൽ സജീവമായ ഇടപെടൽ നടത്തണമെന്ന് സംസ്ഥാന മുഖ്യതിരഞ്ഞെടുപ്പ് ഓഫീസർ റ്റി.ആർ.മീണ അഭിപ്രായപ്പെട്ടു. പ്രലോഭനങ്ങൾക്ക് വഴങ്ങാതെ ജനാധിപത്യ പ്രക്രിയ ഒരുത്സവം പോലെ ഊരുകളിൽ ആഘോഷിക്കപ്പെടണമെന്നും മുഖ്യതിരഞ്ഞെടുപ്പ് ഓഫീസർ പറഞ്ഞു.