ആയിരം ദിനാഘോഷങ്ങളുടെ ഭാഗമായി നടക്കുന്ന സെമിനാറുകള്‍ക്ക്‌ തേക്കിന്‍കാട്‌ ലേബര്‍കോണറില്‍ ഫെബ്രുവരി 21 ന്‌ തുടക്കമാകും. രാവിലെ 10 ന്‌ കാര്‍ഷിക വികസനം: തൃശൂരിന്റെ കരുത്തും പ്രതീക്ഷകളും എന്ന സെമിനാര്‍ കൃഷിവകുപ്പു മന്ത്രി അഡ്വ.വി.എസ്‌.സുനില്‍കുമാര്‍ ഉദ്‌ഘാടനം ചെയ്യും. മുരളി പെരുനെല്ലി എം.എല്‍.എ അധ്യക്ഷത വഹിക്കും. സംസ്ഥാന ആസൂത്രണ ബോര്‍ഡംഗം ഡോ.രാംകുമാര്‍.ആര്‍,ഡോ.പി.ഇന്ദിരാദേവി, എസ്‌.എസ്‌,നാഗേഷ്‌ തുടങ്ങിയവര്‍ വിഷയാവതരണം നടത്തും. കെ.എഫ്‌.ആര്‍.ഐ. പ്രിന്‍സിപ്പല്‍ സയന്റിസ്റ്റ്‌ ഡോ.ടി.വി.സജീവ്‌ മോഡറേറ്ററാകും. തുടര്‍ന്ന്‌ പ്രതികരണങ്ങളുണ്ടാകും.

ഹര്‍ത്താല്‍ ദിനത്തിലും വനിതാകമ്മീഷന്‍ സിറ്റിംഗില്‍ പരാതികളുടെ പ്രളയം. തിരുവല്ല  വൈ.എം.സി.എ ഹാളില്‍ വനിതാ കമ്മീഷന്‍ അംഗങ്ങളായ ഡോ.ഷാഹിദ കമാല്‍, ഇ.എം.രാധ എന്നിവര്‍ നടത്തിയ സിറ്റിംഗില്‍ ഹര്‍ത്താല്‍ സംബന്ധമായ ബുദ്ധിമുട്ടുകളൊന്നും വകവെയ്ക്കാതെയെത്തിയ പരാതിക്കാരുടെ വന്‍ തിരക്കാണ് അനുഭവപ്പെട്ടത്. ജില്ലയുടെ വിദൂരസ്ഥലങ്ങളിലുള്ളവരും പരാതിപരിഹാരത്തിനെത്തിയിരുന്നു.

അടൂര്‍ മണ്ഡലത്തില്‍ പതിനാല് കോടി രൂപയുടെ റോഡ് നിര്‍മാണ പ്രവര്‍ ത്തികള്‍ക്കുള്ള ടെന്‍ഡര്‍ നടപടികള്‍ പൂര്‍ത്തിയായതായി ചിറ്റയം ഗോപകുമാര്‍ എംഎല്‍എ അറിയിച്ചു. പറക്കോട്- ഐവര്‍കാല റോഡിന് മൂന്ന് കോടി രൂപയും, പറക്കോട്-ചിരണിക്കല്‍ റോഡിന് മൂന്ന് കോടിയും, കരുവാറ്റ-തട്ട റോഡിന് രണ്ട് കോടിയും, തടത്തില്‍ മണക്കാല റോഡിന് ഒന്നരക്കോടിയും, ഇ.വി റോഡിന് രണ്ട് കോടിയും, പട്ടംതറ- ഒറ്റത്തേക്ക് റോഡിന് ഒന്നരക്കോടിയും, കൊടുമണ്‍-അങ്ങാടിക്കല്‍ റോഡിന് ഒരു കോടി എന്നിങ്ങനെയാണ് തുക അനുവദിച്ചിരിക്കുന്നത്.

ജില്ലാ പഞ്ചായത്ത് നടപ്പാക്കുന്ന പട്ടികജാതി വിഭാഗത്തില്‍പ്പെട്ട വൃദ്ധര്‍ക്ക് ആയുര്‍വേദ മരുന്നുകള്‍ നല്‍കല്‍ പദ്ധതി പ്രകാരം ഓമല്ലൂര്‍ ഗവണ്‍മെന്റ് ആയുര്‍വേദാശുപത്രിയില്‍ മരുന്നുകള്‍ ലഭ്യമാണ്. ആവശ്യമുള്ളവര്‍ ജാതി സര്‍ട്ടിഫിക്കറ്റും ആധാര്‍ കാര്‍ഡും സഹിതം ആശുപത്രിയിലെത്തി മരുന്നുകള്‍ വാങ്ങണമെന്ന് ഓമല്ലൂര്‍ പഞ്ചായത്ത് സെക്രട്ടറി അറിയിച്ചു.           (പിഎന്‍പി 604/19)

സംസ്ഥാന സര്‍ക്കാരിന്റെ ആയിരം ദിനാഘോഷത്തിന്റെ ഭാഗമായി പത്തനംതിട്ട നഗരസഭ ഇടത്താവളത്തില്‍ നടക്കുന്ന ഒരാഴ്ചത്തെ ജില്ലാതല പരിപാടികള്‍ക്കു മുന്നോടിയായുള്ള വിളംബര ജാഥ ഇന്ന്(19) ഉച്ച കഴിഞ്ഞ് മൂന്നിന് പത്തനംതിട്ട സെന്റ് പീറ്റേഴ്സ് ജംഗ്ഷനില്‍ വീണാ ജോര്‍ജ് എംഎല്‍എ ഫ്ളാഗ് ഓഫ് ചെയ്യും. നഗരസഭ ബസ് സ്റ്റാന്‍ഡിലെ ഓപ്പണ്‍ സ്റ്റേജിനു സമീപം വിളംബര ജാഥ സമാപിക്കും. ജില്ലയിലെ എംഎല്‍എമാര്‍, ജനപ്രതിനിധികള്‍, പൊതുജനങ്ങള്‍, ജില്ലാ കളക്ടര്‍, ഉദ്യോഗസ്ഥര്‍ തുടങ്ങിയവര്‍ പങ്കെടുക്കും. 

ജില്ലാ പ്ലാനിംഗ് ഓഫീസില്‍ ഐ.റ്റി.എക്‌സ്‌പെര്‍ട്ട്, ഡാറ്റാ എന്‍ട്രി ഓപ്പറേറ്റര്‍ എന്നിവരെ തെരഞ്ഞെടുക്കുന്നതിന് 18ന് നടത്താനിരുന്ന അഭിമുഖം മാറ്റിവച്ചതായി ജില്ലാ പ്ലാനിംഗ് ഓഫീസര്‍ അറിയിച്ചു. (പിഎന്‍പി 601/19)