പരപ്പ ബ്ലോക്ക് പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തി ഫെബ്രുവരി 16 മുതല്‍ 18 വരെ സംഘടിപ്പിക്കുന്ന 'ചലനം' ചലച്ചിത്ര നിര്‍മാണ പരിശീലന ക്യാമ്പിലേക്ക് അപേക്ഷ ക്ഷണിച്ചു. പരപ്പ ബ്ലോക്ക് പഞ്ചായത്ത് പരിധിയില്‍ താമസക്കാരായ ചലച്ചിത്ര തത്പരരായ 18നും 40നും ഇടയില്‍ പ്രായമുള്ള യുവതി യുവാക്കള്‍ക്കാണ് അവസരം. അപേക്ഷകര്‍ സിനിമാമേഖലയിലുള്ള താല്പര്യം വെളിപ്പെടുത്തുന്നതും സ്വയം പരിചയപ്പെടുത്തുന്നതുമായ ഒരു മിനിറ്റ് ദൈര്‍ഘ്യമുള്ള ഒരു വീഡിയോ chalanamparappa@gmail.com എന്ന മേല്‍വിലാസത്തിലേക്ക് അയക്കണം. അവസാന തീയതി ഫെബ്രുവരി 14. ഫോണ്‍ 8848087253.

കാസര്‍കോട് റീജിയണല്‍ ട്രാന്‍സ്‌പോര്‍ട്ട് ഓഫീസില്‍ ഫെബ്രുവരി 9, 9 തീയതികളില്‍ നടത്താന്‍ സാധിക്കാതിരുന്ന ലേണേഴ്‌സ് ടെസ്റ്റ് ഫെബ്രുവരി 14ന് നടത്തുമെന്ന് കാസര്‍കോട് റീജിയണല്‍ ട്രാന്‍സ്‌പോര്‍ട്ട് ഓഫീസര്‍ അറിയിച്ചു. ഫോണ്‍ 04994 2793499.

ജില്ലയിലെ എല്ലാ പഞ്ചായത്തുകളിലും പ്ലാസ്റ്റിക്കിന് ബദലായ ഉത്പന്നങ്ങളുടെ മേളയൊരുക്കുകയാണ് കുടുംബശ്രി ജില്ലാമിഷന്‍. ജില്ലയിലെ 42 കുടുംബശ്രീ സി.ഡി.എസിന്റെ ആഭിമുഖ്യത്തില്‍ എല്ലാ പഞ്ചായത്തുകളിലും പ്ലാസ്റ്റിക് ബദല്‍ ഉത്പന്ന പ്രദര്‍ശന വിപണന മേള  നടന്നു വരുന്നു. മുള, ചിരട്ട, പേപ്പര്‍, തുടങ്ങിയ  വസ്തുക്കളുപയോഗിച്ചാണ് ബദലുത്പന്നങ്ങള്‍ നിര്‍മ്മിച്ചിരിക്കുന്നത്. പാള പ്ലേറ്റ്, തുണി ബാഗ്, പേപ്പര്‍ പേന, ചിരട്ടതവി, അപ്പച്ചട്ടി തുടങ്ങി തുണി കൊണ്ടുള്ള ഡയപ്പര്‍ വരെ മേളയില്‍ ഉണ്ട്.

ജൈവ പച്ചക്കറിയില്‍ സ്വയം പര്യാപ്തത എന്ന ലക്ഷ്യവുമായി കുടുംബശ്രീ ജില്ലാ മിഷന്‍ നടത്തുന്ന കണി നടീല്‍ ഉത്സവത്തിന്റെ ജില്ലാതല മോഡല്‍ പ്ലോട്ട് ഉദ്ഘാടനം ചെയ്തു. ഭക്ഷ്യ സുരക്ഷ ഉറപ്പ് വരുത്തുക, വിഷുവിന് ആവശ്യമായ പഴങ്ങളും പച്ചക്കറികളും ജില്ലയില്‍ തന്നെ ലഭ്യമാക്കുക എന്ന ലക്ഷ്യത്തോടെയാണ് കണി നടീല്‍ ഉത്സവം നടത്തുന്നത്. കണി നടീല്‍ ജില്ലാതല മോഡല്‍ പ്ലോട്ട് കാസര്‍കോട് അസിസ്റ്റന്റ് കളക്ടര്‍ ദിലീപ് കെ കൈനിക്കര ഉദ്ഘാടനം ചെയ്തു.

കാസര്‍കോട് ജില്ലയിലെ എന്‍ഡോസള്‍ഫാന്‍ ദുരിതബാധിത മേഖലയിലെ നാലു ബഡ്‌സ് സ്‌കൂളുകള്‍ കൂടി സാമൂഹ്യനീതി വകുപ്പ് ഏറ്റെടുത്ത് കേരള സാമൂഹ്യ സുരക്ഷാ മിഷന് കൈമാറുന്നതിന് അനുമതി നല്‍കി. എന്‍ഡോസള്‍ഫാന്‍ ദുരിത ബാധിത പഞ്ചായത്തുകളായ എന്‍മകജെ, പനത്തടി, ബദിയടുക്ക, കള്ളാര്‍ എന്നീ പഞ്ചായത്തുകളിലെ നാല് ബഡ്സ് സ്‌കൂളുകളാണ് സാമൂഹ്യനീതി വകുപ്പ് ഏറ്റെടുത്ത് കേരള സാമൂഹ്യ സുരക്ഷാ മിഷന് കൈമാറാന്‍ ഉത്തരവായത്. 1,86,15,804 രൂപയാണ് പദ്ധതിക്കായി അനുവദിച്ച തുക.

ജില്ലാ നിര്‍മ്മിതി കേന്ദ്രത്തിന്റെ വാര്‍ഷിക ബജറ്റിന് നിര്‍മ്മിതി കേന്ദ്രം ജനറല്‍ ബോഡിയോഗം അംഗീകാരം നല്‍കി. 5410ലക്ഷം രൂപയുടെയാണ് വാര്‍ഷിക ബജറ്റ്. സബ്കളക്ടര്‍ സൂഫിയാന്‍ അഹമ്മദിന്റെ അദ്ധ്യക്ഷതയില്‍ കളക്ടറേറ്റ് മിനി കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ നിര്‍മ്മിതി കേന്ദ്ര ജനറല്‍ മാനേജര്‍ ഇ.പി.രാജ്‌മോഹന്‍' റിപ്പോര്‍ട്ട് അവതരിപ്പിച്ചു. കെട്ടിട നിര്‍മാണത്തിനുളള ത്രിഡി പ്രിന്റിംഗ് ടെക്‌നോളജി നടപ്പിലാക്കുന്നതിനും നിര്‍മ്മിതി കേന്ദ്രം വളപ്പിലെ ഉപേക്ഷിച്ച കെട്ടിടം പുതുക്കി പണിത് മെറ്റീരിയല്‍ പ്രൊഡക്ഷന്‍ യൂണിറ്റിനായി ഉപയോഗിക്കുന്നതിനും 10 ലക്ഷം രൂപാവീതം വകയിരുത്തി.

കിഫ്ബി പ്രവൃത്തികളില്‍ ഉള്‍പ്പെടുത്തി പുരോഗമിച്ചു വരുന്ന ചെറുവത്തൂര്‍-ചീമേനി-ഐ.ടി പാര്‍ക്ക് റോഡിന്റെ മൂന്നാമത്തെ ഭാഗമായ ചിറ്റാരിക്കല്‍ ഭീമനടി റോഡില്‍, ചിറ്റാരിക്കല്‍ മുതല്‍ നര്‍ക്കിലക്കാട് വരെയുള്ള ഭാഗത്തെ ഫസ്റ്റ് ലൈയര്‍ ടാറിംഗ് പ്രവൃത്തികള്‍ ആരംഭിക്കുന്നതിന്റെ ഭാഗമായി ഈ പ്രദേശത്ത് കൂടിയുള്ള ഗതാഗതം ഫെബ്രുവരി 13   വരെ ഭാഗികമായി പ്രവൃത്തി പൂര്‍ത്തീകരിക്കുന്നത് വരെ പതിനഞ്ച് ദിവസത്തേക്ക് നിയന്ത്രിക്കും. പ്രവൃത്തി മേഖലയില്‍ ഈ വഴി മുഖേന സഞ്ചരിക്കുന്ന പ്രദേശവാസികള്‍ സഹകരിക്കണമെന്ന്
കെ.ആര്‍.എഫ്.ബി പി.എം.യു ഡിവിഷന്‍ കാസര്‍കോട് എക്‌സിക്യൂട്ടീവ് എഞ്ചിനീയര്‍ അറിയിച്ചു.

പരപ്പ ബ്ലോക്ക്‌ പഞ്ചായത്തിന്റെ വാർഷിക പദ്ധതിയുടെ ഭാഗമായി കേരള സാംസ്കാരിക വകുപ്പിന്റെ വജ്രജൂബിലി ഫെല്ലോഷിപ്പ് പദ്ധതിയുടെ സഹായത്തോടെ ചായോത്ത്‌ എൻ. ജി.സ്മാരക കലാവേദിയിൽ വച്ച് വജ്രജൂബിലി ഫെല്ലോഷിപ്പ് വഴി കലാപഠനം പൂർത്തിയാക്കിയ കലാകാരന്മാരുടെ അരങ്ങേറ്റവും സാംസ്കാരിക സമ്മേളനവും കലാ പരിപാടികളും നടത്തി. വിവിധ പഞ്ചായത്തുകളിലെ 11കേന്ദ്രങ്ങളിൽ വച്ചു വജ്ര ജൂബിലി ഫെല്ലോഷിപ് നേടിയ കലാ പ്രവർത്തകരുടെ നേതൃത്വത്തിൽ സംഗീതം, നാടകം, ചിത്രകല, നാടൻ പാട്ട് എന്നീ ഇനങ്ങളിൽ പരിശീലനം നൽകിയ 250 കലാപ്രവർത്തകരുടെ അരങ്ങേറ്റമാണ് നടന്നത്.

കോട്ടയം: ജില്ലാ നെഹ്റു യുവകേന്ദ്രയുടെ ആഭിമുഖ്യത്തിൽ 18 വയസിനും 25 വയസിനും ഇടയിൽ പ്രായമുള്ളവർക്കായി ജില്ലാ-സംസ്ഥാന-ദേശീയതലത്തിൽ ' നാഷണൽ യൂത്ത് പാർലമെന്റ് ഫെസ്റ്റിവൽ 2024 ' വിഷയത്തിൽ പ്രസംഗമത്സരം നടത്തുന്നു. ജില്ലയിലെ ഒന്നും രണ്ടും സ്ഥാനക്കാരാണ് സംസ്ഥാനതലത്തിൽ മത്സരിക്കുക. സംസ്ഥാനതലത്തിലെ ആദ്യ മൂന്നു സ്ഥാനക്കാർക്ക് ദേശീയതലത്തിൽ പങ്കെടുക്കാം. ദേശീയതലത്തിലെ വിജയികൾക്ക് യഥാക്രമം രണ്ടു ലക്ഷം, ഒന്നര ലക്ഷം,ഒരു ലക്ഷം രൂപ സമ്മാനം ലഭിക്കും. മലയാളം, ഹിന്ദി, ഇംഗ്ളീഷ് എന്നീ ഭാഷകളിൽ മത്സരം നടത്തും. അപേക്ഷ സമർപ്പിക്കുന്നതിനുള്ള അവസാനതീയതി: ഫെബ്രുവരി 19.