കണ്ണൂർ ജില്ലാ ആശുപത്രിയിൽ കരാർ അടിസ്ഥാനത്തിൽ ഇലക്ട്രിക്കൽ സൂപ്പർവൈസറെ നിയമിക്കുന്നു. ഇലക്ട്രിക്കൽ എഞ്ചിനീയറിങ്ങിൽ ഡിഗ്രി /ഡിപ്ലോമ, മോട്ടോർ വെഹിക്കിൾ ലൈസൻസ്, രണ്ട് വർഷ പ്രവൃത്തി പരിചയം എന്നിവയുള്ളവർക്ക് അപേക്ഷിക്കാം. ഉദ്യോഗാർഥികൾ യോഗ്യത, മേൽവിലാസം എന്നിവയുടെ അസ്സൽ രേഖകൾ, ബയോഡാറ്റ, ഐഡന്റിറ്റി രേഖ സഹിതം ഏപ്രിൽ 29 രാവിലെ 10.30 ന് ജില്ലാ ആശുപത്രി സൂപ്രണ്ടിന്റെ ഓഫീസിൽ അഭിമുഖത്തിന് എത്തണം.  

 വിജ്ഞാന കേരളം ജനകീയ ക്യാമ്പയിന്റെ ഭാഗമായി തൃശ്ശൂരിൽ സംഘടിപ്പിക്കുന്ന മെഗാ ജോബ് ഫെയർ ഇന്ന് (26-04-2025) ഗവ എഞ്ചിനീയറിങ് കോളേജ്, വിമല കോളേജ് എന്നിവിടങ്ങളിലായി നടക്കും. 25000 ത്തിലധികം പേരാണ് ഡിജിറ്റൽ വർക്ക് ഫോഴ്സ് മാനേജ്മെന്റ് സിസ്റ്റത്തിലൂടെ ഇതുവരെ രജിസ്ട്രേഷൻ പൂർത്തീകരിച്ചത്. 151 തൊഴിൽ ദാദാക്കളിൽ നിന്നും 577 വ്യത്യസ്ത തരം മേഖലകളിലായി 35000  തൊഴിലുകൾ വിജ്ഞാന തൃശ്ശൂരിലൂടെ നൽകാനാണ് ലക്ഷ്യമിടുന്നത്. മേളയുടെ രജിസ്‌ട്രേഷൻ  തൃശ്ശൂർ ഗവ.എഞ്ചിനീയറിംഗ് കോളേജ് ഗ്രൗണ്ടിൽ ഇന്ന് രാവിലെ 8.30 ന് ആരംഭിക്കും.

കിലെ ഐ.എ.എസ് അക്കാദമിയുടെ 2025-26 വർഷത്തെ പ്രവേശനത്തിന് രജിസ്‌ട്രേഷൻ ആരംഭിച്ചു. ഒരു വർഷം ദൈർഘ്യമുള്ള കോഴ്‌സിന്റെ ക്ലാസ്സുകൾ ജൂൺ ആദ്യവാരം ആരംഭിക്കും. ബിരുദമാണ് അടിസ്ഥാന യോഗ്യത. അവസാന വർഷ ബിരുദ വിദ്യാർഥികൾക്കും അപേക്ഷിക്കാം. ക്ഷേമനിധി ബോർഡിൽ രജിസ്റ്റർ ചെയ്ത അംഗങ്ങളുടെ മക്കൾക്ക് ഫീസിൽ 50 ശതമാനം സബ്സിഡി ലഭിക്കും. കേരള സംസ്ഥാന അസംഘടിത തൊഴിലാളി സാമൂഹ്യ സുരക്ഷാ ബോർഡ് പദ്ധതിയിൽ കണ്ണൂർ കാസർഗോഡ് ജില്ലകളിൽ അംഗത്വമുള്ള, കൃത്യമായി അംശാദായം അടക്കുന്ന അംഗങ്ങൾക്ക് ഈ സൗകര്യം ഉപയോഗപ്പെടുത്താം.

മാനവിക വിഷയങ്ങളിൽ യുജിസി നെറ്റ് പരീക്ഷയ്ക്ക് തയ്യാറെടുക്കുന്നവർക്കായി കണ്ണൂർ യൂണിവേഴ്‌സിറ്റി എംപ്ലോയ്മെന്റ് ഇൻഫർമേഷൻ ആന്റ് ഗൈഡൻസ് ബ്യൂറോയുടെ ആഭിമുഖ്യത്തിൽ പരിശീലന പരിപാടി സംഘടിപ്പിക്കുന്നു. ജനറൽ പേപ്പറിനായി മെയ് മാസത്തിൽ ആരംഭിക്കുന്ന 12 ദിവസത്തെ പരിശീലന പരിപാടിയിലേക്ക് ആദ്യം രജിസ്റ്റർ ചെയ്യുന്ന 35 പേർക്കാണ് അവസരം. താൽപര്യമുള്ളവർ കണ്ണൂർ യൂണിവേഴ്‌സിറ്റിയുടെ താവക്കര ആസ്ഥാന മന്ദിരത്തിൽ പ്രവർത്തിക്കുന്ന എംപ്ലോയ്മെന്റ് ഇൻഫർമേഷൻ ആന്റ് ഗൈഡൻസ് ബ്യൂറോയിൽ ഏപ്രിൽ 30 നകം നേരിട്ട് ഹാജരായി പേര് രജിസ്റ്റർ ചെയ്യണം.ഫോൺ: 04972703130

 തൃശ്ശൂരിന്റെ വിജ്ഞാന സമ്പത്ത് ഘടന ശക്തിപ്പെടുത്തുന്നതിനായി സംഘടിപ്പിക്കുന്ന മെഗാ തൊഴിൽ മേളയുടെ മുന്നൊരുക്ക പ്രവർത്തനങ്ങൾ വിലയിരുത്തുന്നതിന്  ജനപ്രതിനിധികളുടെയും ഉദ്യോഗസ്ഥരുടെ നേതൃത്വത്തിൽ സന്ദർശനം നടത്തി. തൃശ്ശൂർ ഗവ. എഞ്ചിനീയറിങ് കോളേജിലും വിമല കോളേജിലുമായി സംഘടിപ്പിക്കുന്ന മെഗാ ജോബ് ഫെയർ കേരള വികസന മാതൃകകളിൽ പുതിയ ചരിത്രം രചിക്കുമ്പോൾ വിപുലമായ സജ്ജീകരണങ്ങളാണ് മേളയിൽ ഒരുക്കിയിട്ടുള്ളത്.

തളിപ്പറമ്പ് അഡീഷണൽ ഡിസ്ട്രിക്റ്റ് ആൻഡ് സെഷൻസ് കോടതിയിൽ അഡീഷണൽ ഗവ. പ്ലീഡർ ആന്റ് അഡീഷണൽ പബ്ലിക് പ്രോസിക്യൂട്ടറുടെ തസ്തികയിലേക്ക് അപേക്ഷ ക്ഷണിച്ചു. ഏഴ് വർഷം പ്രവൃത്തി പരിചയമുള്ള അഭിഭാഷകർക്ക് അപേക്ഷിക്കാം. ഉദ്യോഗാർഥികൾ ബയോഡാറ്റ, ജനന തീയതി തെളിയിക്കുന്ന രേഖ, എന്റോൾമെന്റ് സർട്ടിഫിക്കറ്റ് എന്നിവയുടെ സാക്ഷ്യപ്പെടുത്തിയ പകർപ്പുകൾ, പ്രവൃത്തി പരിചയ സർട്ടിഫിക്കറ്റ് എന്നിവ സഹിതം മെയ് 12 ന് വൈകുന്നേരം അഞ്ചിനകം ജില്ലാ കലക്ടറുടെ കാര്യാലയത്തിലെ സീക്രട്ട് സെക്ഷനിൽ നേരിട്ട് എത്തിക്കണം. ഫോൺ: 0497 2700645

രണ്ടാം പിണറായി സർക്കാരിൻ്റെ  നാലാം വാർഷികത്തോടനുബന്ധിച്ച് നടക്കുന്ന എന്‍റെ കേരളം മെഗാ പ്രദർശന-വിപണന മേളയുടെ പോസ്റ്ററിന്‍റെയും പ്രചരണ വീഡിയോയുടേയും പ്രകാശനം ജില്ലാ കളക്ടർ അർജുൻ പാണ്ഡ്യൻ നിർവഹിച്ചു. മാർച്ച് 29 ന് ചേർന്ന സംഘാടക സമിതി യോഗത്തിലെ തീരുമാനപ്രകാരം രൂപീകരിച്ചിരുന്ന വിവിധ സബ് കമ്മിറ്റികളുടെ പ്രവർത്തനങ്ങളുടെ അവലോകന യോഗവും ഇതോടനുബന്ധിച്ച് നടന്നു.

പ്രദർശന-വിപണന മേളയോട് അനുബന്ധിച്ച് നടക്കുന്ന കലാ-സാംസ്കാരിക പരിപാടികളുടെ മുന്നൊരുക്കങ്ങൾ,  പ്രദർശന മേളയിലെ സ്റ്റാളുകളുടെ വിന്യാസം സംബന്ധിച്ച ഒരുക്കങ്ങൾ യോഗം വിലയിരുത്തി.

ഏപ്രിൽ 21 ന് കണ്ണൂർ പൊടിക്കുണ്ടിൽ അപകടകരമായ രീതിയിൽ ബസ്സോടിച്ച് ലോറിയുമായി അപകടമുണ്ടാക്കി ലോറി ഡ്രൈവറുടെ മരണത്തിനിടയാക്കിയ സംഭവത്തിൽ ബസ് ഡ്രൈവർ വി. കെ. റിബിന്റെ ലൈസൻസ് ആറ് മാസത്തേക്ക് മരവിപ്പിച്ചതായും ഐഡിടിആർ പരിശീലനത്തിനായി നിർദേശിക്കുകയും ചെയ്തതായി ആർടിഒ അറിയിച്ചു.

കേരള സ്റ്റേറ്റ് ലൈബ്രറി കൗൺസിൽ കണ്ണൂർ ഗവ. എഞ്ചിനിയറിംഗ് കോളേജിൽ സംഘടിപ്പിക്കുന്ന സംസ്ഥാന വായനാ മത്സരത്തിന്റെ ഭാഗമായി സ്ഥാപിച്ച സെൽഫി പോയിന്റ് വിസ്മയ പാർക്ക് ചെയർമാൻ പി.വി. ഗോപിനാഥ് ഉദ്ഘാടനം ചെയ്തു. സംസ്ഥാന ലൈബ്രറി കൗസിൽ പ്രസിഡന്റ് കെ.വി. കുഞ്ഞികൃഷ്ണൻ അധ്യക്ഷനായി.  സംസ്ഥാന സെക്രട്ടറി വി.കെ. മധു, ജില്ലാ സെക്രട്ടറി പി.കെ. വിജയൻ, മനയത്ത് ചന്ദ്രൻ, പി.വി.കെ. പനയാൽ, എം.കെ. രമേഷ്‌കുമാർ തുടങ്ങിയവർ പങ്കെടുത്തു. സെൽഫി പോയിന്റ് ഒരുക്കിയിരിക്കുന്നത് വിസ്മായ പാർക്കാണ്. ഏപ്രിൽ 25, 26, 27 തീയതികളിലാണ് വായനാമത്സരം നടക്കുന്നത്

ചിറക്കൽ ഗ്രാമപഞ്ചായത്തിന്റെയും ഐസിഡിഎസിന്റെയും സംയുക്താഭിമുഖ്യത്തിൽ പോഷൺ അഭിയാൻ 2.0 ദമ്പതി സംഗമം സംഘടിപ്പിച്ചു. ചിറക്കൽ ഫോക് ലോർ അക്കാദമിയിൽ ചിറക്കൽ ഗ്രാമപഞ്ചായത്ത് വൈസ് പ്രസിഡന്റ് പി. അനിൽകുമാർ ഉദ്ഘാടനം ചെയ്തു. കുടുംബ ജീവിതത്തെക്കുറിച്ച് ബോധവത്കരണം നടത്തുക എന്നതാണ് ദമ്പതി സംഗമം പരിപാടിയിലൂടെ ലക്ഷ്യമിടുന്നത്. ഗ്രാമപഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ എൻ ശശീന്ദ്രൻ അധ്യക്ഷനായി. 'ഗർഭകാല സംരക്ഷണവും ദാമ്പത്യ ജീവിതവും' എന്ന വിഷയത്തിൽ ഡോ. മനോജ് കുമാർ ക്ലാസെടുത്തു.