കോട്ടത്തറ ഗവ. ട്രൈബല്‍ സ്പെഷ്യാലിറ്റി ആശുപത്രിയില്‍ കേരള സാമൂഹ്യ സുരക്ഷാ വകുപ്പിന്റെ കാതോരം പദ്ധതിയുടെ ഭാഗമായി എ.എന്‍.എം നഴ്സ് ഒഴിവിലേക്ക് മാര്‍ച്ച് 17 ന് രാവിലെ പത്തിന് കൂടിക്കാഴ്ച നടത്തുന്നു. 179 ദിവസത്തെ കരാര്‍ വ്യവസ്ഥയിലാണ് നിയമനം. കെ.എന്‍.എം.സി രജിസ്ട്രേഷനുള്ളവര്‍ക്കാണ് അവസരം. താല്‍പര്യമുള്ളവര്‍ അസ്സല്‍ സര്‍ട്ടിഫിക്കറ്റുകളുമായി  ഓഫീസില്‍ എത്തണമെന്ന് സൂപ്രണ്ട് അറിയിച്ചു. കൂടുതല്‍ വിവരങ്ങള്‍ക്ക് ഫോണ്‍: 8086251883, 9947584645.

കാഞ്ചിയാര്‍ ജനവാസ മേഖലയില്‍ കൂടി കടന്നുപോകേണ്ടിയിരുന്ന 110 കെ.വി വൈദ്യുത ലൈനിന്റെ റൂട്ട് മാറ്റിയത് കൂട്ടായ പരിശ്രമത്തിന്റെ ഫലമാണെന്ന് ജലവിഭവ വകുപ്പ് മന്ത്രി റോഷി അഗസ്റ്റിന്‍. 110 കെ.വി. വൈദ്യുത ലൈന്‍ റൂട്ട് ജനവാസ മേഖലയില്‍ നിന്ന് മാറ്റി സ്ഥാപിക്കുന്നതുമായി ബന്ധപ്പെട്ട് ചേര്‍ന്ന പ്രഖ്യാപന യോഗത്തില്‍ സംസാരിക്കുകയായിരുന്നു മന്ത്രി. 110 കെ.വി. ഡബിള്‍ സര്‍ക്യൂട്ട് ലൈന്‍ വരുന്നത് മികച്ച തീരുമാനം ആയിരുന്നെങ്കിലും പള്ളി, ക്ഷേത്രങ്ങള്‍, സ്‌കൂളുകള്‍, കൃഷിഭൂമി തുടങ്ങിയവയും 624 കുടുംബങ്ങളും ഉള്‍പ്പെടുന്ന ജനവാസമേഖലയില്‍ കൂടി കടന്ന് പോകുമ്പോഴുള്ള ബുദ്ധിമുട്ടുകളും നഷ്ടങ്ങളും വലുതായിരുന്നു.

കേരളത്തിന്റെ വൈദ്യുതി മേഖലയിൽ, ഉത്പാദന, പ്രസരണ, വിതരണ രംഗങ്ങളിലായി 25,500 കോടി രൂപയുടെ നിക്ഷേപമാണ് സർക്കാർ നടത്തിയതെന്ന് വൈദ്യുതി വകുപ്പ് മന്ത്രി കെ. കൃഷ്ണൻകുട്ടി. പള്ളിവാസൽ വിപുലീകരണ പദ്ധതിയുടെയും ഇടുക്കി ജലവൈദ്യുത പദ്ധതിയുടെ സുവർണ്ണ ജൂബിലി ആഘോഷങ്ങളുടെയും ഉദ്ഘാടന ചടങ്ങിൽ അധ്യക്ഷത വഹിച്ച് സംസാരിക്കുകയായിരുന്നു മന്ത്രി. ഉത്പാദന മേഖലയിൽ കഴിഞ്ഞ 5 വർഷത്തിനിടയിൽ 3275.82 കോടി രൂപയുടെ നിക്ഷേപമാണ് നടത്തിയത്. ഇതിലൂടെ ആകെ 2395 മെഗാവാട്ടിൻ്റെ അധിക ഉത്പാദന ശേഷി സംസ്ഥാനത്തിന് കൈവരിക്കാനായി.

കോട്ടയം: വിമുക്തഭടന്മാരുടെയും ആശ്രിതരുടെയും പുനരധിവാസ ക്ഷേമപദ്ധതികൾ സംബന്ധിച്ചും വിവിധ വെബ്സൈറ്റ്, വെബ്പോർട്ടലുകൾ എന്നിവ വഴിയുള്ള സേവനങ്ങൾ സംബന്ധിച്ചും സൈനികക്ഷേമ വകുപ്പ് വഴി ലഭ്യമാക്കുന്ന മറ്റു സേവനങ്ങൾ സംബന്ധിച്ചുമുള്ള ബോധവൽക്കരണ സെമിനാർ നടത്തും. മാർച്ച് പത്തിന് രാവിലെ പത്തിന് ചങ്ങനാശ്ശേരി തെങ്ങണ ജംഗ്ഷന് സമീപമുള്ള എയർപോർട്ട് അസോസിയേഷൻ കേരള സ്റ്റേറ്റ് സർവീസ് അസംബ്ലി ഹാളിൽ വച്ചാണ് സെമിനാർ.

#നവീകരിച്ച കട്ടക്കാൽ - കൊച്ചനായിക്കോണം റോഡ് തുറന്നുകൊടുത്തു#

പനവൂർ ഗ്രാമപഞ്ചായത്തിലെ വെള്ളാഞ്ചിറ സ്റ്റേഡിയം നാടിന് സമർപ്പിച്ചു. ഡി.കെ മുരളി എംഎൽഎ സ്റ്റേഡിയത്തിന്റെ ഉദ്ഘാടനം നിർവഹിച്ചു. 2024 -25 ആസ്തി വികസന ഫണ്ടിൽ നിന്നും 50 ലക്ഷം രൂപ ചെലവഴിച്ചാണ് അത്യാധുനിക സൗകര്യങ്ങളോടു കൂടിയ സ്റ്റേഡിയം നിർമ്മിച്ചത്.

#പെരുമാതുറ ടൂറിസം ഉൾപ്പെടെ മൂന്ന് പദ്ധതികൾക്ക് തുടക്കമായി#

ചിറയിൻകീഴ് നിയോജക മണ്ഡലത്തിലെ വിവിധ ടൂറിസം പദ്ധതികളുടെ ഉദ്ഘാടനം ടൂറിസം പൊതുമരാമത്ത് വകുപ്പ് മന്ത്രി പി.എ മുഹമ്മദ്‌ റിയാസ് ഓൺലൈനായി നിർവഹിച്ചു.

കോവിഡ് മഹാമാരി ടൂറിസം രംഗത്തെ ബാധിച്ചുവെങ്കിലും ടൂറിസം മേഖല ഇന്ന് നേട്ടങ്ങളുടെ പാതയിലാണെന്നും കോവിഡിന് ശേഷം രണ്ട് കോടിയിലധികം സഞ്ചാരികളാണ് കേരളത്തിൽ വന്നിട്ടുള്ളതെന്നും മന്ത്രി പറഞ്ഞു.

 മേനംകുളത്തെ തീപിടിത്ത ഭീഷണി ഒഴിവാക്കാനും, ഭിന്നശേഷിക്കാർക്ക് തിരിച്ചറിയൽ കാർഡ് വേഗത്തിൽ ലഭ്യമാക്കാനും, പള്ളിത്തുറയിൽ രാത്രികാല ബസ് സർവ്വീസ് ആരംഭിക്കാനും ന്യൂനപക്ഷ കമ്മീഷൻ ഉത്തരവിട്ടു. സംസ്ഥാന ന്യൂനപക്ഷ കമ്മീഷൻ ആസ്ഥാനത്തെ കോർട്ട് ഹാളിൽ നടന്ന സിറ്റിംഗിൽ കമ്മീഷൻ ചെയർമാൻ അഡ്വ. എ.എ റഷീദ് ഹർജികൾ പരിഗണിച്ചു.

വഴയില - പഴകുറ്റി റോഡ് നാലുവരിപ്പാതയാക്കുന്നതിന്റെ ഭാഗമായുള്ള കരകുളം മേൽപ്പാലത്തിന്റെ നിർമാണ പുരോഗതി മന്ത്രി ജി ആർ അനിൽ വിലയിരുത്തി. കരകുളം പാലം ജംഗ്ഷന് സമീപം പുതുതായി നിർമ്മിച്ച പാലം മന്ത്രി താൽക്കാലികമായി   ഗതാഗതത്തിന് തുറന്നു കൊടുത്തു.

 നിലവിലെ നിർമ്മാണ പ്രവർത്തനങ്ങൾ സമയബന്ധിതമായി പൂർത്തിയാക്കുന്നതിനും മേൽപ്പാലത്തിന്റെ പണി  വേഗത്തിലാക്കാനും മന്ത്രി ഉദ്യോഗസ്ഥർക്ക് നിർദ്ദേശം നൽകി.

 കരകുളം പഞ്ചായത്ത് പ്രസിഡന്റ് അജിത് കുമാർ, പൊതുമരാമത്ത് വകുപ്പ് ഉദ്യോഗസ്ഥർ, ജനപ്രതിനിധികൾ തുടങ്ങിയവർ സന്നിഹിതരായിരുന്നു.

തദ്ദേശസ്വയംഭരണ വകുപ്പിൻ്റെയും പട്ടികജാതി - പട്ടികവർഗ വികസന വകുപ്പിൻ്റെയും ആഭിമുഖത്തിൽ  വിദ്യാർത്ഥികളിൽ വായനാശീലം വളർത്തുകയെന്ന ലക്ഷ്യത്തോടെ നടത്തുന്ന  പദ്ധതിയായ അക്ഷരോന്നതിയുടെ  ജില്ലാതല പുസ്തക വിതരണോദ്ഘാടനം അടിമാലി ബ്ലോക്ക്‌ പഞ്ചായത്ത്‌ ഹാളിൽ സംഘടിപ്പിച്ചു. അക്ഷരോന്നതി ജില്ലാ ജോയിന്റ് ഡയറക്ടർ അജേഷ് ടി.ജെ പരിപാടി  ഉദ്ഘാടനം ചെയ്തു. അടിമാലി ബ്ലോക്ക്‌  പഞ്ചായത്ത്‌  പ്രസിഡന്റ്‌ വി.കെ മോഹനൻ നായർ  അധ്യക്ഷത വഹിച്ചു.
വിവിധ ഉന്നതികളിൽ നിന്ന് പരിപാടിയിൽ പങ്കെടുത്ത വിദ്യാർഥികൾക്ക്  പുസ്തകങ്ങളും വിതരണം ചെയ്തു.