ബേപ്പൂർ ഫിഷറീസ് റീജ്യണൽ സ്കൂളിൽ പുതിയ ഹോസ്റ്റൽ ബ്ലോക്ക് നിർമിക്കാൻ 5.91 കോടി രൂപയുടെ ഭരണാനുമതി. നിലവിലെ ഹോസ്റ്റൽ കെട്ടിടം പൊളിച്ചുനീക്കി ആധുനിക സൗകര്യങ്ങളോടെയാകും പുതിയ കെട്ടിടം നിർമിക്കുക. സിവിൽ നിർമാണ പ്രവർത്തനങ്ങൾ, വൈദ്യുതി സംവിധാനങ്ങൾ, ഫയർ ഫൈറ്റിംഗ് സംവിധാനങ്ങൾ, ഫർണിച്ചർ തുടങ്ങിയ അനുബന്ധ സൗകര്യങ്ങളും പദ്ധതിയിൽ ഉൾപ്പെടുത്തിയിട്ടുണ്ട്.  പ്രവൃത്തികൾ വേഗത്തിൽ ആരംഭിക്കാൻ പൊതുമരാമത്ത്-ടൂറിസം വകുപ്പ് മന്ത്രി പി എ മുഹമ്മദ് റിയാസ് നിർദ്ദേശം നൽകി.

ജില്ലയിലെ തദ്ദേശ സ്വയംഭരണ സ്ഥാപനങ്ങളുടെ 2025-2026 ഭേദഗതിക്കും 2026-2027 വാര്‍ഷിക പദ്ധതിക്കും അഡ്ഹോക്ക് ജില്ലാ ആസൂത്രണ സമിതി യോഗം അംഗീകാരം നല്‍കി. ആസൂത്രണ ഭവന്‍ കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ ജില്ലാ ആസൂത്രണ സമിതി ചെയര്‍പേഴ്സൺ കൂടിയായ ജില്ലാ പഞ്ചായത്ത് പ്രസിഡന്റ് മേരി തോമസ് അധ്യക്ഷത വഹിച്ചു.

പത്ത് തദേശ സ്വയംഭരണ സ്ഥാപനങ്ങൾ ഉൾപ്പെടുത്തിയാണ് 2025- 26 ഭേദഗതിക്കും മൂന്ന് ഗ്രാമപഞ്ചായത്തുകൾ ഉൾപ്പെടുത്തി 2026- 27 വാർഷിക പദ്ധതിക്കും യോഗം അംഗീകാരം നൽകിയത്. ഇതോടെ തൃശൂർ ജില്ലയിലെ എല്ലാ തദ്ദേശസ്ഥാപനങ്ങളുടെയും 2026-27 വാർഷിക പദ്ധതികൾക്ക് അംഗീകാരം നൽകി.

 സംസ്ഥാന സാക്ഷരതാ മിഷന്‍ അതോറിറ്റിയുടെ നേതൃത്വത്തില്‍ ജില്ലാ പഞ്ചായത്ത് ഉള്‍പ്പെടെയുള്ള തദ്ദേശ സ്വയംഭരണ സ്ഥാപനങ്ങളുടെ സഹകരണത്തോടെ നടത്തിവരുന്ന ദീപ്തി-ബ്രെയില്‍ സാക്ഷരതാ പരിപാടിയുടെ ഭാഗമായി ജില്ലയിലെ കാഴ്ച പരിമിതര്‍ അക്ഷര ലോകത്തേക്ക്. പദ്ധതിയുടെ ഭാഗമായി വിജയിച്ച പഠിതാക്കള്‍ക്ക് സര്‍ട്ടിഫിക്കറ്റ് വിതരണവും പുതിയ ബാച്ചിലേക്കുള്ള പഠിതാക്കളുടെ രജിസ്‌ട്രേഷന്‍ ഉദ്ഘാടനവും നടത്തി. ദീപ്തി- ബ്രെയില്‍ സാക്ഷരതാ പദ്ധതി (രണ്ടാം ഘട്ടം) രജിസ്‌ട്രേഷന്‍ ഉദ്ഘാടനം തൃശ്ശൂര്‍ ജില്ലാ പഞ്ചായത്തില്‍ പഠിതാവ് ലത ജയരാജന് പഠനോപകരണങ്ങള്‍ നല്‍കി റവന്യൂ, ഭവന നിര്‍മ്മാണ വകുപ്പ് മന്ത്രി കെ. രാജന്‍ നിര്‍വഹിച്ചു.

* പള്ളിവാസല്‍ വിപുലീകരണ പദ്ധതി രാഷ്ട്രത്തിന് സമര്‍പ്പിച്ചു

പവര്‍കട്ടും ലോഡ്‌ഷെഡിംഗുമില്ലാത്ത കേരളം എന്ന സ്വപ്‌നം യാഥാര്‍ത്ഥ്യമായെന്ന് മുഖ്യമന്ത്രി പിണറായി വിജയന്‍. പള്ളിവാസല്‍ വിപുലീകരണ പദ്ധതിയുടെയും ഇടുക്കി ജലവൈദ്യുത പദ്ധതിയുടെ സുവര്‍ണ്ണ ജൂബിലി ആഘോഷങ്ങളുടെ ഉദ്ഘാടനവും നിര്‍വഹിക്കുകയായിരുന്നു മുഖ്യമന്ത്രി. ലോഡ്‌ഷെഡിംഗ് ഇല്ലാത്ത, പവര്‍ കട്ട് ഇല്ലാത്ത കേരളം എന്നത് ഒരു സ്വപ്നം മാത്രമായിരുന്നു. പക്ഷേ, ഇന്നത് യാഥാര്‍ത്ഥ്യമായിക്കഴിഞ്ഞു.

വിദ്യാർത്ഥികളുടെ നൂതന ആശയങ്ങൾ ഏറ്റവുമധികം പ്രോത്സാഹിപ്പിക്കപ്പെട്ട കാലഘട്ടമാണിതെന്ന് ഉന്നത വിദ്യാഭ്യാസ സാമൂഹിക നീതി വകുപ്പ് മന്ത്രി ഡോ ആർ ബിന്ദു. ഇരിങ്ങാലക്കുട ഗവൺമെന്റ് മോഡൽ ബോയ്സ് ഹയർസെക്കൻഡറി സ്കൂളിൽ നടന്ന  സ്ട്രീം ഹബ്ബുകളുടെ ജില്ലാതല ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.

പുത്തൂർ ഗവ. വൊക്കേഷണൽ ഹയർ സെക്കന്ററി സ്കൂളിലെ ലിറ്റിൽ കൈറ്റ്സ് യൂണിറ്റിന് ഒരു പുതിയ ക്യാമറ വേണമെന്ന വിദ്യാർത്ഥികളുടെ ആഗ്രഹം സഫലമായി. ജി.വി.എച്ച്.എസ്.എസ്. പുത്തൂരിൽ നടന്ന ചടങ്ങിൽ റവന്യൂ ഭവന നിർമാണ വകുപ്പ് മന്ത്രി അഡ്വ.കെ. രാജൻ,  സ്കൂൾ പ്രധാന അധ്യാപിക പി എം സുനിത ലിറ്റിൽ കൈറ്റ്സ് പ്രതിനിധികളായ കെ. ടി ആദിദേവ്, എയ്സൽ ഡി തോട്ടാൻ, ആരോൺ തിമോത്തി എന്നിവർക്ക് പുതിയ ക്യാമറ കൈമാറി.

തൃശ്ശൂര്‍ ജില്ലയിലെ ലൈഫ് മിഷന്‍ സമ്പൂര്‍ണ്ണ പാര്‍പ്പിട പ്രഖ്യാപനവും നിര്‍വ്വഹണ ഉദ്യോഗസ്ഥര്‍ക്കുള്ള അനുമോദനവും റവന്യു, ഭവന നിര്‍മ്മാണ വകുപ്പ് മന്ത്രി കെ. രാജന്‍ ഉദ്ഘാടനം ചെയ്തു. തൃശ്ശൂര്‍ ജില്ലാ ആസൂത്രണ ഭവന്‍ ഹാളില്‍ നടന്ന ചടങ്ങില്‍ റവന്യു, ഭവന നിര്‍മ്മാണ വകുപ്പ് മന്ത്രി കെ. രാജന്‍ തൃശ്ശൂര്‍ ജില്ലയിലെ ലൈഫ് മിഷന്‍ സമ്പൂര്‍ണ്ണ പാര്‍പ്പിട പ്രഖ്യാപനവും ലൈഫ് പദ്ധതിയുടെ കാര്യക്ഷമായ നിര്‍വ്വഹണം നടത്തിയ വില്ലേജ് എക്‌സ്റ്റന്‍ഷന്‍ ഓഫീസര്‍മാര്‍ക്ക് സര്‍ട്ടിഫിക്കറ്റ് വിതരണവും മന്ത്രി നിര്‍വ്വഹിച്ചു.

കോട്ടയം: വനിത ശിശു വികസന വകുപ്പിനു കീഴിലെ ഐ.സി.ഡി.എസ്. കാഞ്ഞിരപ്പള്ളി അഡീഷണൽ ശിശുവികസന പദ്ധതി ഓഫീസിന്റെ പരിധിയിലുള്ള 118 അങ്കണവാടികൾക്ക് 2025-2026 സാമ്പത്തിക വർഷം കണ്ടിജൻസി സാധനങ്ങൾ വിതരണം ചെയ്യുന്നതിന് താത്പര്യമുള്ള വ്യക്തികളിൽ നിന്നും സ്ഥാപനങ്ങളിൽ നിന്നും ടെൻഡർ ക്ഷണിച്ചു. മാർച്ച് പത്തിന് ഉച്ചകഴിഞ്ഞ് രണ്ടുവരെ ടെൻഡറുകൾ സ്വീകരിക്കും. ഫോൺ: 9447433611.

നാദാപുരം മണ്ഡലത്തിലെ നവീകരിച്ച പയന്തോങ്ങ് -ചീയൂർ നരിപ്പറ്റ റോഡ് പൊതുമരാമത്ത്-ടൂറിസം വകുപ്പ് മന്ത്രി പി എ മുഹമ്മദ്‌ റിയാസ് ഓൺലൈനായി ഉദ്ഘാടനം ചെയ്തു. ഇ കെ വിജയൻ എം.എൽ.എ അധ്യക്ഷനായി. ഒന്നരക്കോടി രൂപ വിനിയോഗിച്ചാണ് റോഡിന്റെ നവീകരണ പ്രവൃത്തികൾ പൂർത്തീകരിച്ചത്.

സംസ്ഥാന എയ്ഡ്‌സ് നിയന്ത്രണ സൊസൈറ്റിയുടെയും ജില്ലാ മെഡിക്കല്‍ ഓഫീസിന്റെയും ആഭിമുഖ്യത്തില്‍ ഐ.എം.എയുടെ സഹകരണത്തോടെ അന്താരാഷ്ട്ര വനിതാദിനാചരണത്തിന്റെ സംസ്ഥാനതല ഉദ്ഘാടനവും സെമിനാറും സംഘടിപ്പിച്ചു. കോഴിക്കോട് ഐ.എം.എ ഹാളില്‍ നടന്ന പരിപാടി കോര്‍പറേഷന്‍ ഡെപ്യൂട്ടി മേയര്‍ ഡോ. എസ് ജയശ്രീ ഉദ്ഘാടനം ചെയ്തു. ജില്ലാ മെഡിക്കല്‍ ഓഫീസര്‍ ഡോ. കെ കെ രാജാറാം അധ്യക്ഷനായി.