കുമ്പള കൃഷിഭവനില്‍ നിന്നും കാര്‍ഷികാവശ്യത്തിന് സൗജന്യ വൈദ്യുതി ലഭിച്ചുവരുന്ന കര്‍ഷകര്‍ക്ക് തുടര്‍ന്നും ആനുകൂല്യം ലഭിക്കുന്നതിന് മാര്‍ച്ച് 20 നകം അപേക്ഷ പുതുക്കി നല്‍കണം. 2020-21 വര്‍ഷത്തെ നികുതി രസീത്, കൈവശാവകാശ സര്‍ട്ടിഫിക്കറ്റ്, അവസാനമായി വന്ന കറന്റ് ബില്ലിന്റെ പകര്‍പ്പ് എന്നിവ സഹിതമാണ് അപേക്ഷിക്കേണ്ടത്. ഫോണ്‍: 9383472315.

കേരള നിയമസഭാ തിരഞ്ഞെടുപ്പുമായി ബന്ധപ്പെട്ട് വാഹനങ്ങള്‍ക്ക് 50 എണ്ണം ജി പിഎസ് ട്രാക്കിങ് സിസ്റ്റം ഘടിപ്പിക്കാന്‍ വിദഗ്ധരുടെ സേവനം ഉള്‍പ്പെടെ ലഭ്യമാക്കുന്നതിന് ക്വട്ടേഷന്‍ ക്ഷണിച്ചു. മാര്‍ച്ച് ഒന്നിന് ഉച്ചയ്ക്ക് 12നകം ക്വട്ടേഷനുകള്‍ കാസര്‍കോട് ജില്ലാ കളക്ടര്‍ക്ക് ലഭ്യമാക്കണം.

ജില്ലയിൽ ഇന്നലെ (02 മാർച്ച്) 2,604 പേർക്കു കൂടി കോവിഡ് വാക്‌സിൻ നൽകി. ഇതിൽ 1,225 പേർ മുതിർന്ന പൗരന്മാരാണ്.

12 വാക്‌സിനേഷൻ സെഷനുകളാണ് ഇന്നലെ ജില്ലയിൽ നടന്നത്. മുതിർന്ന പൗരന്മാർക്കു പുറമേ 525 മുന്നണി പ്രവർത്തകർക്കും 144 ആരോഗ്യ പ്രവർത്തകർക്കും വാക്‌സിൻ നൽകി. 710 പേർ രണ്ടാം ഘട്ട വാക്‌സിനും സ്വീകരിച്ചു.

ജില്ലയിലെ സെക്ടര്‍ ഓഫീസര്‍മാര്‍ക്കള്ള പരിശീലനം മാര്‍ച്ച് രണ്ട്, മൂന്ന് തീയ്യതികളില്‍  കളക്ട്രേറ്റ് കോണ്‍ഫറന്‍സ് ഹാളില്‍ നടക്കും. മാര്‍ച്ച് രണ്ടിന് രാവിലെ 10 മുതല്‍ മഞ്ചേശ്വരം,കാസര്‍കോട് മണ്ഡലങ്ങളിലെ  സെക്ടര്‍ ഓഫീസര്‍മാര്‍ക്കും ഉച്ചയ്ക്ക് ശേഷം രണ്ട് മണി മുതല്‍ ഉദുമ, തൃക്കരിപ്പൂര്‍  മണ്ഡലങ്ങളിലെ സെക്ടര്‍ ഓഫീസര്‍മാര്‍ക്കുമാണ് പരിശീലനം. മാര്‍ച്ച് മൂന്നിന് രാവിലെ 10 മുതല്‍ കാഞ്ഞങ്ങാട് മണ്ഡലത്തിലെ സെക്ടര്‍ ഓഫീസര്‍മാര്‍ക്കുള്ള പരിശീലനം നടക്കും.

തിരുവനന്തപുരത്ത് ഇന്ന് (02 മാർച്ച് 2021) 190 പേർക്കു കൂടി കോവിഡ് 19 സ്ഥിരീകരിച്ചു. 298 പേർ രോഗമുക്തരായി. നിലവിൽ 2,764 പേരാണു രോഗം സ്ഥിരീകരിച്ചു ചികിത്സയിൽ കഴിയുന്നത്. ഇന്നു രോഗം സ്ഥിരീകരിച്ചവരിൽ 124 പേർക്കു സമ്പർക്കത്തിലൂടെയാണു രോഗബാധയുണ്ടായത്. 

രോഗലക്ഷണങ്ങളെത്തുടർന്നു ജില്ലയിൽ 1,297 പേരെക്കൂടി നിരീക്ഷണത്തിലാക്കി. ഇവരടക്കം ആകെ 20,357 പേർ വീടുകളിലും 48 പേർ സ്ഥാപനങ്ങളിലും ക്വാറന്റൈനിൽ കഴിയുന്നുണ്ട്. ഇന്നലെവരെ നിരീക്ഷണത്തിലുണ്ടായിരുന്ന 1,837 പേർ രോഗലക്ഷണങ്ങളില്ലാതെ നിരീക്ഷണകാലം പൂർത്തിയാക്കി.

തെരഞ്ഞെടുപ്പിന്റെ ഭാഗമായി സ്ഥാനാര്‍ത്ഥികളുടെ ചെലവുകള്‍ നിരീക്ഷിക്കുന്നതിനായി ജില്ലാ തലത്തില്‍ സ്റ്റാറ്റിക് സര്‍വൈലന്‍സ് സംഘം രൂപീകരിച്ചു. ഒരു മജിസ്‌ട്രേറ്റ്, ഒരു വീഡിയോഗ്രാഫര്‍, നാല് പോലീസ് ഉദ്യോഗസ്ഥര്‍ എന്നിവടങ്ങുന്ന 20  സംഘങ്ങള്‍ ജില്ലയിലെ  ചെക്ക് പോസ്റ്റുകളില്‍ പരിശോധന നടത്തും. പണം, അനധികൃത മദ്യം, ആയുധങ്ങള്‍, തുടങ്ങിയ സംശയാസ്പദമായ രീതിയില്‍ കടത്തുന്നവയാണ് സംഘം പരിശോധിക്കുക. സ്റ്റാറ്റിക് സര്‍വൈലന്‍സ് സംഘങ്ങളുടെ ചുമതലയുള്ള മജിസ്‌ട്രേറ്റുമാര്‍ക്കുള്ള പരിശീലനം മാര്‍ച്ച് നാലിന് രാവിലെ 10.30 ന് കളക്ടറേറ്റ് കോണ്‍ഫറന്‍സ് ഹാളില്‍ നടക്കും.

കാഞ്ഞങ്ങാട് ജില്ലാ ആശുപത്രിയില്‍ എച്ച് എം സി മുഖേന സെക്യൂരിറ്റി കം ഡ്രൈവര്‍ തസ്തികയിലേക്ക് മാര്‍ച്ച് നാലിന് രാവിലെ 10.30 ന് നടത്താനിരുന്ന  അഭിമുഖം തെരഞ്ഞെടുപ്പ് പെരുമാറ്റ ചട്ടം നിലവില്‍ വന്നതിനാല്‍ മാറ്റി വെച്ചു. പുതുക്കിയ തീയ്യതി പിന്നീട് അറിയിക്കും. 

മാര്‍ച്ച് രണ്ടിന് നടത്താനിരുന്ന സെക്ടര്‍ ഓഫീസര്‍മാര്‍ക്കുള്ള പരിശീലനം മാര്‍ച്ച് അഞ്ചിന് കളക്ടറേറ്റ് കോണ്‍ഫറന്‍സ് ഹാളില്‍ നടക്കും. മാര്‍ച്ച് മൂന്നിന് നടത്താനിരുന്ന പരിശീലനത്തിന് മാറ്റമില്ല.

നിയമസഭാ തെരഞ്ഞെടുപ്പിന് മുന്നോടിയായി  സമ്മതിദായര്‍ക്കുള്ള ബോധവത്കരണ പ്രവര്‍ത്തനങ്ങളുടെ  സ്വീപ് കാഞ്ഞങ്ങാട് മണ്ഡലതല പ്രവര്‍ത്തനങ്ങള്‍ക്ക് തുടക്കമായി.   ഹൊസ്ദുര്‍ഗ് തഹസിലര്‍ദാര്‍  പി പ്രേംരാജ് ഉദ്ഘാടനം ചെയ്തു.   കാഞ്ഞങ്ങാട് സി ഡി പി ഒ ബേബി പി അധ്യക്ഷയായി.സ്‌കൂള്‍ കൗണ്‍സിലേഴ്സായ  അനിത, അമൃത, ഗൗരി എന്നിവര്‍ സംസാരിച്ചു.  എന്‍ എന്‍ എം ബ്ലോക്ക് കോ-ഓര്‍ഡിനേറ്റര്‍  അശ്വത്ത് സ്വാഗതവും ഐ സി ഡി എസ് കാഞ്ഞങ്ങാട് സീനിയര്‍ ക്ലാര്‍ക്ക് ആശാലത നന്ദിയും പറഞ്ഞു. വോട്ടര്‍ ലിസ്റ്റില്‍ പേര് ഇല്ലാത്തവരുടെ പേരുകള്‍ ലിസ്റ്റില്‍ ഉള്‍പ്പെടുത്തി.  ബാക്കിയുള്ളവരെ അക്ഷയ കേന്ദ്രങ്ങളിലേക്ക് അയച്ചു.