നികുതി പിരിവ് ഊര്‍ജ്ജിതപ്പെടുത്തുന്നതിന്റെ ഭാഗമായി  മാര്‍ച്ച് രണ്ടാം ശനിയാഴ്ചയിലും എല്ലാ ഞായറാഴ്ച്ചകളിലും കാസര്‍കോട് നഗരസഭാ നികുതി വിഭാഗം തുറന്ന് പ്രവര്‍ത്തിക്കുമെന്ന് സെക്രട്ടറി അറിയിച്ചു. 

ക്ഷീരവികസന വകുപ്പിന്റെ കാസര്‍കോട് റീജിയണല്‍ ലാബിലേക്ക് ട്രെയിനി അനലിസ്റ്റുകളെ നിയമിക്കുന്നതിന് മാര്‍ച്ച് 18ന് നടത്താനിരുന്ന കൂടിക്കാഴ്ച മാറ്റി വെച്ചു.  തെരഞ്ഞെടുപ്പ് പെരുമാറ്റ ചട്ടം നിലവില്‍ വന്നതിനെ തുടര്‍ന്നാണിത്.

പള്ളിക്കര ഗ്രാമപഞ്ചായത്തിലെ 65-ാം നമ്പര്‍ മഠം കോളനി അങ്കണവാടിയ്ക്കായി അഗസറഹോള ഗവ. യു.പി സ്‌കൂളിന് പിറകുവശത്ത്  അബു ഹാഷിം മഠത്തില്‍ 5.5 സെന്റ് സ്ഥലം നല്‍കി. ജില്ലയിലെ എല്ലാ അങ്കണവാടികള്‍ക്കും സ്വന്തം ഭൂമി എന്ന ലക്ഷ്യത്തോടെ ജില്ലാ ഭരണകൂടത്തിന്റെ നേതൃത്വത്തില്‍ നടക്കുന്ന പ്രവര്‍ത്തനങ്ങള്‍ക്ക് കൈത്താങ്ങായാണിത്.

ജില്ലാ മെഡിക്കല്‍ ഓഫീസ് (ആരോഗ്യം), ദേശീയ ആരോഗ്യ ദൗത്യം,  കാഞ്ഞങ്ങാട് ജില്ലാശുപത്രി എന്നിവയുടെ സംയുക്താഭിമുഖ്യത്തില്‍ നടത്തിയ  ലോക കേള്‍വി ദിനാചരണത്തിന്റെ ജില്ലാതല ഉദ്ഘാടനം കാഞ്ഞങ്ങാട് ജില്ലാ ആശുപത്രിയില്‍  സൂപ്രണ്ട് ഡോ. പ്രകാശ് കെ.വി ഉദ്ഘാടനം ചെയ്തു.  ജില്ലാ ആശുപത്രി ഡെപ്യൂട്ടി സൂപ്രണ്ട് ഡോ ചന്ദ്ര മോഹന്‍ ഇ  അധ്യക്ഷത വഹിച്ചു. 

സാമ്പത്തിക-സ്ഥിതിവിവരണക്കണക്ക് വകുപ്പില്‍ നിലവിലുള്ള സ്റ്റാറ്റിസ്റ്റിക്കല്‍ അസിസ്റ്റന്റ്/ സ്റ്റാറ്റിസ്റ്റിക്കല്‍ ഇന്‍വെസ്റ്റിഗേറ്റര്‍ ഗ്രേഡ്-ടു തസ്തികയിലെ ഡിഎ-എച്ച്‌ഐ കാറ്റഗറിയിലുള്ള ഒഴിവിലേക്ക് മാര്‍ച്ച് അഞ്ചിന് നടത്താനിരുന്ന കൂടിക്കാഴ്ച തെരഞ്ഞെടുപ്പ് പെരുമാറ്റചട്ടം നിലവില്‍ വന്ന സാഹചര്യത്തില്‍ മാറ്റിവച്ചതായി ഡെപ്യൂട്ടി ഡയറക്ടര്‍ അറിയിച്ചു. പുതുക്കിയ തീയതി പിന്നീട് അറിയിക്കും

കുറ്റൂളി എടക്കണ്ടിപ്പറ്റ പന്നിക്കോട് റോഡില്‍ പഴയ ഓവുപാലം നവീകരിക്കുന്ന പ്രവൃത്തി ഇന്ന് (മാര്‍ച്ച് നാല്) മുതല്‍ ആരംഭിക്കുന്നതിനാല്‍ പ്രവൃത്തി തീരുന്നതുവരെ ഗതാഗതം നിരോധിച്ചു. എടക്കണ്ടിപ്പറ്റ ഭാഗത്ത് നിന്നും പന്നിക്കോട് കാവിലട ഭാഗത്തേക്ക് പോകുന്ന വാഹനങ്ങള്‍ എരഞ്ഞിമാവ് വഴിയും തിരിച്ചും പോകണമെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.

ഒന്നാം വര്‍ഷം പ്രാഫഷനല്‍ കോഴ്സിന് ചേര്‍ന്ന് പഠിക്കുന്ന വിമുക്ത ഭടന്മാരുടെ കുട്ടികള്‍ക്കും, യുദ്ധ സമാന സാഹചര്യങ്ങളില്‍ മരിച്ച ജവാന്മാരുടെ വിധവകള്‍ക്കും 2020-21 വര്‍ഷത്ത പ്രധാനമന്ത്രിയുടെ മെറിറ്റ് സ്‌കോളര്‍ഷിപ്പിന് ഓണ്‍ ലൈന്‍ മുഖേന www.ksb.gov.in  അപേക്ഷിക്കാം. അപേക്ഷ ഓണ്‍ലൈനായി സ്വീകരിക്കുന്ന അവസാന തീയതി ഏപ്രില്‍ 30.

ജില്ലാ ടെന്നീക്കൊയ്റ്റ് അസോസിയേഷന്റെ ആഭിമുഖ്യത്തില്‍ 2020-21 വര്‍ഷത്തെ സീനിയര്‍, ജൂനിയര്‍ (ആണ്‍, പെണ്‍) വിഭാഗം ജില്ല ടെന്നീക്കൊയ്റ്റ് ചാമ്പ്യന്‍ഷിപ്പ്   മാര്‍ച്ച് ആറിന് മഞ്ചേരി ഗവ. ബോയ്‌സ് സ്‌കൂള്‍ ഗ്രൗണ്ടില്‍ നടത്തുന്നു.  താത്പര്യമുള്ള ടീമുകള്‍ മാര്‍ച്ച് നാലിനകം 9495094959 എന്ന നമ്പറുമായി ബന്ധപ്പെട്ട് രജിസ്റ്റര്‍ ചെയ്യണം. 2002 ഏപ്രില്‍ ഒന്നിന് ശേഷം ജനിച്ചവര്‍ക്ക് ജൂനിയര്‍ വിഭാഗത്തില്‍ പങ്കെടുക്കാം. കായികതാരങ്ങള്‍ എലിജിബിലിറ്റി ഫോം, ഫോട്ടോ സഹിതം  അന്നേ ദിവസം രാവിലെ 8.30 ന് ഗ്രൗണ്ടില്‍ റിപ്പോര്‍ട്ട് ചെയ്യണം. ഫോണ്‍- 94950 94959.  

നിയമസഭാ തെരഞ്ഞെടുപ്പമായി ബന്ധപ്പെട്ട് മലപ്പുറം നിയമസഭാമണ്ഡലത്തിലെ പോളിങ് ഉദ്യോഗസ്ഥര്‍ക്കുള്ള പരിശീലനം ഇന്ന് (മാര്‍ച്ച് നാല്) മുതല്‍ മഞ്ചേരി, ചുള്ളിക്കാട് ജി.യു.പി.എസില്‍ നടത്തും. മാര്‍ച്ച് നാലിന് രാവിലെ 10നും ഉച്ചയ്ക്ക് രണ്ടിനും മലപ്പുറം നഗരസഭയിലുള്ളവര്‍ക്കും മാര്‍ച്ച് അഞ്ചിന് രാവിലെ 10ന് ആനക്കയം പഞ്ചായത്തിനും ഉച്ചയ്ക്ക് രണ്ടിന് മൊറയൂര്‍ പഞ്ചായത്തിനും മാര്‍ച്ച് ആറിന് രാവിലെ 10ന് കോഡൂര്‍, പൂക്കോട്ടൂര്‍ പഞ്ചായത്തിനും ഉച്ചയ്ക്ക് രണ്ടിന് പുല്‍പ്പറ്റ പഞ്ചായത്തിനുമാണ് പരിശീലനം.