ആലപ്പുഴ: വണ്ടാനം മെഡിക്കൽ കോളജ് ആശുപത്രിയിൽ പ്രവർത്തിക്കുന്ന റീജിയണൽ ഏർലി ഇന്റർവെൻഷൻ സെന്ററിൽ ഭിന്നശേഷിയുള്ള കുട്ടികളുടെ രക്ഷിതാക്കൾക്കുള്ള അവബോധന ക്ലാസ് നടന്നു. ഈ വിഭാഗത്തിൽപ്പെട്ട കുട്ടികൾക്കുള്ള വിവിധ ക്ഷേമ പദ്ധതികളെയും നിയമ സഹായങ്ങളെപ്പറ്റിയും ക്ലാസുകൾ നടന്നു. നാഷണൽ ട്രസ്റ്റന്റെ കൺവീനർ ടി.ടി. രാജപ്പൻ, കേരള സാമൂഹ്യ സുരക്ഷ മിഷന്റെ ജില്ല കോ-ഓർഡിനേറ്റർ എം.സി.ജിൻസ് എന്നിവർ  ക്ലാസുകൾ എടുത്തു. ആർ.ഇ.ഐ.സി മെഡിക്കൽ ഓഫീസർ ഡോ. എ.പി.മുഹമ്മദ് അധ്യക്ഷത വഹിച്ചു. ആരതി ഉദയകുമാർ,മാനേജർ ലിനി ആനി ഗ്രിഗറി എന്നിവര്‍ സംസാരിച്ചു. 

ആലപ്പുഴ:തയ്യൽ തൊഴിലാളി ക്ഷേമനിധി ബോർഡിന്റെ ജില്ല ഓഫീസിൽ നിന്നും ഏപ്രിൽ 2014 മുതൽ 2020 ഡിസംബർ 31 വരെ പ്രസവാനുകൂല്യം കൈപ്പറ്റിയ അംഗങ്ങൾക്ക് അധിക പ്രസവധനസഹായമായ 13000 രൂപ വിതരണം ചെയ്യുന്നതിന് അംഗങ്ങളുടെ ക്ഷേമനിധി തിരിച്ചറിയൽ കാർഡ്, ആധാർ, ബാങ്ക് പാസ് ബുക്ക് എന്നിവയുടെ പകർപ്പുകൾ ഫോൺ നമ്പർ സഹിതം മാർച്ച് 15 നകം ജില്ല ഓഫീസിൽ ഹാജരാക്കണം. ഫോൺ: 0477 2254204.

നിയമസഭാ തെരഞ്ഞെടുപ്പുമായി ബന്ധപ്പെട്ട് ജില്ലയിലെ എല്ലാ ഓഫിസ് മേലധികാരികളും ജീവനക്കാരുടെ പട്ടിക ഇന്നു തന്നെ (06 മാര്‍ച്ച്) താലൂക്ക് ഓഫീസുകളിലോ കളക്ടറേറ്റിലോ നേരിട്ടു സമര്‍പ്പിക്കണമെന്ന് ജില്ലാ കളക്ടര്‍ ഡോ. നവ്‌ജ്യോത് ഖോസ അറിയിച്ചു.  വീഴ്ച വരുത്തുന്ന ഓഫിസ് മേലധികാരികള്‍ക്കെതിരെ ജനപ്രാതിനിത്യ നിയമപ്രകാരം കര്‍ശന നടപടി സ്വീകരിക്കുമെന്നും അറിയിപ്പില്‍ പറയുന്നു.

ആലപ്പുഴ: നിയമസഭ പൊതു തിരഞ്ഞെടുപ്പുമായി ബന്ധപ്പെട്ട് ജില്ലയിലെ വോട്ടെണ്ണൽ കേന്ദ്രങ്ങളിലും സ്‌ട്രോങ് റൂമുകളുടെ പരിസരങ്ങളിലും ഇലക്ട്രിക്കൽ സാമഗ്രികൾ വയറിങ് നടത്തി നിർദ്ദേശിക്കുന്ന സ്ഥലത്ത് സ്ഥാപിച്ചു നൽകുന്നതിന് ഫെബ്രുവരി 22ന് ക്ഷണിച്ചിരുന്ന ക്വട്ടേഷൻ റദ്ദ് ചെയ്തു.

കോവിഡ് വ്യാപനം നിയന്ത്രണവിധേയമായതിനെത്തുടര്‍ന്ന് തിരുവനന്തപുരം കോര്‍പ്പറേഷനു കീഴില്‍ ചെമ്പഴന്തി തുണ്ടത്തില്‍ പ്രദേശത്ത് ഏര്‍പ്പെടുത്തിയിരുന്ന കണ്ടെയിന്‍മെന്റ് സോണ്‍ നിയന്ത്രണങ്ങള്‍ പിന്‍വലിച്ചതായി ജില്ലാ കളക്ടര്‍ ഡോ. നവ്‌ജ്യോത് ഖോസ അറിയിച്ചു.

കോവിഡ് വ്യാപനം നിയന്ത്രിക്കുന്നതിന്റെ ഭാഗമായി തിരുവനന്തപുരം കോര്‍പ്പറേഷനിലെ ചെറുവയ്ക്കലിനെ(ആല്‍ത്തറ ജംങ്ഷന്‍ പ്രദേശം) കണ്ടെയിന്‍മെന്റ് സോണായി ജില്ലാ കളക്ടര്‍ ഡോ. നവ്‌ജ്യോത് ഖോസ പ്രഖ്യാപിച്ചു.  ഇതിനോട് ചേര്‍ന്നുള്ള പ്രദേശങ്ങളിലും ജാഗ്രത പുലര്‍ത്തണം. അടിയന്തര ആവശ്യങ്ങള്‍ക്കല്ലാതെ ആരുംതന്നെ കണ്ടെയിന്‍മെന്റ് സോണിനു പുറത്തു പോകാന്‍ പാടില്ലെന്നും കളക്ടര്‍ അറിയിച്ചു.

തെരഞ്ഞെടുപ്പ് പെരുമാറ്റച്ചട്ടം സംബന്ധിച്ച കാര്യങ്ങള്‍ ചര്‍ച്ച ചെയ്യുന്നതിനായി തിരുവനന്തപുരം മണ്ഡലത്തിലെ രാഷ്ട്രീയ പാര്‍ട്ടി പ്രതിനിധികളുമായി സബ് കളക്ടര്‍ എം.എസ് മാധവിക്കുട്ടിയുടെ അധ്യക്ഷതയില്‍ കളക്ടറേറ്റില്‍ യോഗം ചേര്‍ന്നു.  എല്ലാ പാര്‍ട്ടികളും തെരഞ്ഞെടുപ്പ് പെരുമാറ്റച്ചട്ടങ്ങള്‍ കൃത്യമായും പാലിക്കണമെന്ന് യോഗത്തില്‍ സബ് കളക്ടര്‍ പറഞ്ഞു. ഒരുതരത്തിലുള്ള പെരുമാറ്റച്ചട്ട ലംഘനവും അനുവദിക്കില്ല.  പ്രചരണത്തിനായി ടാക്സി പെര്‍മിറ്റുള്ള വാഹനങ്ങള്‍ മാത്രമേ ഉപയോഗിക്കാന്‍ പാടുള്ളുവെന്നും സബ് കളക്ടര്‍ പറഞ്ഞു.  വിവിധ രാഷ്ട്രീയ പാര്‍ട്ടികളുടെ പ്രതിനിധികള്‍, ഉദ്യോഗസ്ഥര്‍ എന്നിവര്‍ സംബന്ധിച്ചു.

സി-ആപ്റ്റിന്റെ തിരുവനന്തപുരം പരിശീലന കേന്ദ്രത്തിൽ ആരംഭിക്കുന്ന ഒരു വർഷത്തെ ഡിപ്ലോമാ ഇൻ കമ്പ്യൂട്ടർ ഹാർഡ്‌വെയർ ആൻഡ് നെറ്റ്‌വർക്കിംഗ്, ഡിപ്ലോമ ഇൻ മൾട്ടിമീഡിയ എന്നീ ഗവൺമെന്റ് അംഗീകൃത തൊഴിലധിഷ്ഠിത കോഴ്‌സുകളിലേക്ക് അപേക്ഷ ക്ഷണിച്ചു. വിദ്യാഭ്യാസ യോഗ്യത എസ്.എസ്.എൽ.സി.
പട്ടികജാതി/ പട്ടികവർഗ/ മറ്റർഹ വിഭാഗക്കാർക്ക് നിയമാനുസൃത ഫീസ് സൗജന്യമാണ്. പഠന കാലയളവിൽ സ്റ്റൈപ്പന്റും ലഭിക്കും. ഒ.ബി.സി/ എസ്.ഇ.ബി.സി/ മുന്നാക്ക വിഭാഗങ്ങളിലെ സാമ്പത്തികമായി പിന്നാക്കം നിൽക്കുന്ന വിദ്യാർഥികൾക്ക് വരുമാന പരിധിയ്ക്ക് വിധേയമായി ഫീസ്  സൗജന്യമായിരിക്കും.

തിരുവനന്തപുരം മെഡിക്കൽ കോളേജിലെ പീഡ് സെല്ലിനു കീഴിലെ ഡാറ്റാ എൻട്രി ഓപ്പറേറ്റർ, ലാബ് ടെക്‌നീഷ്യൻ തസ്തികകളിലേക്ക് നടത്താനിരുന്ന ഇന്റർവ്യൂ തിരഞ്ഞെടുപ്പ് പെരുമാറ്റച്ചട്ടം നിലവിൽ വന്നതിനെ തുടർന്ന് മാറ്റി വച്ചു.
പി.എൻ.എക്സ്.1139/2021