കഴിഞ്ഞ മൂന്ന് അധ്യയന വര്‍ഷങ്ങളില്‍ (2017-18, 2018-19, 2019-20) പാലക്കാട് ഗവ. പോളിടെക്‌നിക് കോളേജില്‍ പഠിച്ച വിദ്യാര്‍ഥികളില്‍ (ഒന്നാം വര്‍ഷം മുതല്‍ അവസാന വര്‍ഷം ഉള്‍പ്പെടെ) ഇ - ഗ്രാന്റ്‌സ് സ്‌കോളര്‍ഷിപ്പിന് അപേക്ഷിച്ചിട്ടും ഏതെങ്കിലും സാഹചര്യത്തില്‍ ഡിപ്ലോമ ഫീസ്, എക്‌സാമിനേഷന്‍ ഫീസ് എന്നിവ മുഴുവനായി അടച്ചവര്‍ കോളേജുമായി ഉടനെ ബന്ധപ്പെടണമെന്ന് പ്രിന്‍സിപ്പാള്‍ അറിയിച്ചു. ഫോണ്‍: 0491-2572640.

വനിത ശിശുവികസന വകുപ്പ് ഗാര്‍ഹിക അതിക്രമങ്ങള്‍ക്ക് ഇരയായ വനിതകള്‍ക്ക് ആവശ്യമായ സേവനങ്ങള്‍ നല്‍കുന്നതിന് സന്നദ്ധ സംഘടനകളില്‍ നിന്ന് സര്‍വീസ് പ്രൊവൈഡിംഗ് സെന്ററായി രജിസ്റ്റര്‍ ചെയ്യുന്നതിന് താത്പ്പര്യപത്രം ക്ഷണിച്ചു. നിശ്ചിത മാതൃകയിലുള്ള അപേക്ഷ www.wcd.kerala.gov.in ലും ജില്ലാ വനിത ശിശുവികസന ഓഫീസിലും ലഭിക്കും. പൂരിപ്പിച്ച അപേക്ഷ മാര്‍ച്ച് ആറിനകം ജില്ലാ വനിത ശിശുവികസന ഓഫീസര്‍, സിവില്‍ സ്റ്റേഷന്‍, പാലക്കാട്, പിന്‍ 678 001 വിലാസത്തില്‍ സമര്‍പ്പിക്കണമെന്ന് ജില്ലാ വനിത ശിശുവികസന ഓഫീസര്‍ അറിയിച്ചു. ഫോണ്‍: 9188969209.

പാലക്കാട് വ്യാവസായിക ട്രൈബ്യൂണലും ഇന്‍ഷൂറന്‍സ് കോടതി ജഡ്ജിയും എംപ്ലോയീസ് കോമ്പന്‍സേഷന്‍ കമ്മീഷണറുമായ സാബു സെബാസ്റ്റ്യന്‍ മാര്‍ച്ച് 1,2,8,9,15,16,22,23,29,30 ദിവസങ്ങളില്‍ പാലക്കാട് റവന്യൂ ഡിവിഷണല്‍ മജിസ്ട്രേറ്റ് കോടതി ഹാളില്‍ തൊഴില്‍ തര്‍ക്ക കേസുകളും ഇന്‍ഷൂറന്‍സ് കേസുകളും എംപ്ലോയീസ് കോമ്പന്‍സേഷന്‍ കേസുകളും വിചാരണ ചെയ്യുമെന്ന് വ്യാവസായിക ട്രൈബ്യൂണല്‍ സെക്രട്ടറി അറിയിച്ചു.

കൊട്ടേക്കാട് റെയില്‍വേ സ്റ്റേഷന് സമീപമുള്ള മലമ്പുഴ കനാലില്‍ യുവാവിന്റെ ജഡം കണ്ടെത്തിയ സാഹചര്യത്തില്‍ ഇയാളെ കുറിച്ച് എന്തെങ്കിലും വിവരമറിയുന്നവര്‍ മലമ്പുഴ പൊലീസ് സ്റ്റേഷനിലോ 9497941931, 0491-2815284 നമ്പറുകളിലോ അറിയിക്കണമെന്ന് മലമ്പുഴ പൊലീസ് സ്റ്റേഷന്‍ ഹൗസ് ഓഫീസര്‍ അറിയിച്ചു. മരണപ്പെട്ടയാള്‍ ഈ പ്രദേശങ്ങളില്‍ രണ്ട് ദിവസം മുമ്പ് അലഞ്ഞുതിരിഞ്ഞ് നടന്നതായി പൊലീസ് സ്ഥിരീകരിച്ചിട്ടുണ്ട്.

മാര്‍ച്ച് ഒന്ന് മുതല്‍ അഞ്ച് വരെ നടക്കുന്ന 25-മത് അന്താരാഷ്ട്ര ചലച്ചിത്രമേളയില്‍ മൂന്നു ദിവസങ്ങളിലായി ഓപ്പണ്‍ ഫോറം നടക്കും. മാര്‍ച്ച് രണ്ട്, മൂന്ന്, നാല് തീയതികളിലാണ് ഓപ്പണ്‍ ഫോറം സംഘടിപ്പിച്ചിട്ടുള്ളത്. മേളയ്‌ക്കെത്തുന്നവര്‍ക്ക് അവരുടെ അഭിപ്രായങ്ങളും വിമര്‍ശനങ്ങളും നിര്‍ഭയത്വത്തോടെ തുറന്ന അവതരിപ്പിക്കാന്‍ ഓപ്പണ്‍ ഫോറം വേദിയാകും. അതിഥികളായെത്തുന്ന സംവിധായകരും അഭിനേതാക്കളും സാങ്കേതിക പ്രവര്‍ത്തകരും മറ്റുമായി മേളയില്‍ എത്തുന്നവര്‍ക്ക് സംവദിക്കാനാകും. ഇന്ത്യയിലെ ചലച്ചിത്ര മേളകളുടെ അവിഭാജ്യ ഘടകമാണ് ഓപ്പണ്‍ ഫോറം. എഫ്.എഫ്.എസ്.ഐ ആണ് ഓപ്പണ്‍ ഫോറമെന്ന ആശയം രൂപപ്പെടുത്തിയത്.

ഏറെ നാളത്തെ കാത്തിരിപ്പിനു ശേഷം തോലന്നൂര്‍ ഗവ. ആര്‍ട്‌സ് & സയന്‍സ് കോളേജിന് സ്വന്തമായ കെട്ടിടം  യാഥാര്‍ത്ഥ്യമാവുന്നു. 14 ഏക്കര്‍ ഭൂമി കോളേജിനായി റവന്യൂ വകുപ്പ് ഉന്നതവിദ്യാഭ്യാസ വകുപ്പിന് കൈമാറിയതായി മന്ത്രി എ കെ ബാലന്‍ അറിയിച്ചു. തരൂര്‍ നിയമസഭാ മണ്ഡലത്തിലെ കുത്തന്നൂര്‍ ഗ്രാമപഞ്ചായത്തിലുള്ള മുപ്പുഴയിലാണ് കോളേജിനായി ഭൂമി നല്‍കിയിരിക്കുന്നത്. ഇതുമായി ബന്ധപ്പെട്ട മാസ്റ്റര്‍ പ്ലാന്‍ തയ്യാറാക്കുന്നതിന് പൊതുമരാമത്ത് കെട്ടിടം വിഭാഗത്തിന് നിര്‍ദ്ദേശം നല്‍കിക്കഴിഞ്ഞു. ആദ്യഘട്ടമായി 10 കോടി വകയിരുത്തി കോളേജിന്റെ അഡ്മിനിസ്‌ട്രേഷന്‍ ബ്ലോക്ക് നിര്‍മിക്കും.