വെളിയങ്കോട് ഗ്രാമപ്പഞ്ചായത്തിലെ എരമംഗലം പാലയ്ക്കൽതാഴം പാടത്ത് ആരംഭിച്ച നെൽകൃഷിയുടെ ഉദ്ഘാടനം സ്‌പീക്കർ പി. ശ്രീരാമകൃഷ്‌ണൻ നിർവഹിച്ചു. പതിറ്റാണ്ടുകൾക്ക് ശേഷം കൃഷിയിറക്കുന്ന പാടശേഖരത്ത് ഞാറുനട്ടാണ്  സ്പീക്കർ ഞാറുനടീൽ ഉത്സവത്തിന് തുടക്കം കുറിച്ചത്. 

സംസ്ഥാന പട്ടികജാതി വികസന വകുപ്പ് നടപ്പിലാക്കുന്ന അംബേദ്കർ ഗ്രാമം പദ്ധതിയിൽ ഉൾപ്പെടുത്തി പൊന്നാനി നഗരസഭയിലെ പുഴമ്പ്രം കല്ലിക്കട അംബേദ്കർ കോളനിയിൽ നടപ്പിലാക്കിയ വിവിധ വികസന പ്രവർത്തനങ്ങളുടെ പൂർത്തീകരണ ഉദ്ഘാടനം സ്പീക്കർ പി.ശ്രീരാമകൃഷണൻ നിർവഹിച്ചു. 

കോട്ടക്കല്‍ നഗരസഭയിലെ നാല് റോഡുകളുടെ പ്രവൃത്തി ഉദ്ഘാടനം പ്രൊഫ. ആബിദ് ഹുസൈന്‍ തങ്ങള്‍ എം.എല്‍.എ നിര്‍വഹിച്ചു. എം.എല്‍.എയുടെ ആസ്തി വികസന ഫണ്ടില്‍ നിന്നും 50 ലക്ഷം ചെലവഴിച്ചാണ് റോഡുകളുടെ നിര്‍മാണം.

നേരിട്ടുള്ള സമ്പര്‍ക്കത്തിലൂടെ 333 പേര്‍ക്ക്
ഉറവിടമറിയാതെ ഏഴ് പേര്‍ക്ക്
രോഗബാധിതരായി ചികിത്സയില്‍ 2,885 പേര്‍
ആകെ നിരീക്ഷണത്തിലുള്ളത് 23,627 പേര്‍

മലപ്പുറം ജില്ലയില്‍ ഇന്ന് (ഫെബ്രുവരി 23) 355 പേര്‍ക്ക് കോവിഡ് 19 സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു. 333 പേര്‍ക്ക് നേരിട്ടുള്ള സമ്പര്‍ക്കത്തിലൂടെയും ഏഴ് പേര്‍ക്ക് ഉറവിടമറിയാതെയുമാണ് രോഗബാധ. വിദേശത്ത് നിന്ന് ജില്ലയിലെത്തിയ മൂന്ന് പേര്‍ക്കും ഇതര സംസ്ഥാനത്ത് നിന്നെത്തിയ 12 പേര്‍ക്കും ഇന്ന് വൈറസ് ബാധ സ്ഥിരീകരിച്ചിട്ടുണ്ട്.

കലക്ടറേറ്റിലെ അഡീഷനല്‍ ജില്ലാ മജിസ്‌ട്രേറ്റിന്റെ കെ.എല്‍.10.എ.യു 6591 നമ്പര്‍ മഹീന്ദ്ര സ്‌കോര്‍പ്പിയോ വാഹനത്തിന് ടയര്‍ മാറ്റി പുതിയത് സ്ഥാപിക്കുന്നതിന് അംഗീകൃത ഏജന്‍സികളില്‍ നിന്ന് ക്വട്ടേഷന്‍ ക്ഷണിച്ചു. ക്വട്ടേഷനുകള്‍ ഡെപ്യൂട്ടി കലക്ടര്‍( ജനറല്‍), കലക്ടറേറ്റ്, സിവില്‍ സ്റ്റേഷന്‍, മലപ്പുറം എന്ന വിലാസത്തില്‍ ഫെബ്രുവരി 27ന് വൈകീട്ട് മൂന്നിനകം നേരിട്ടോ തപാല്‍ മുഖേനയോ സമര്‍പ്പിക്കണം.
 

ഇടിമുഴിക്കല്‍ അഗ്രശാല പാറക്കടവ് റോഡില്‍ ഫെബ്രുവരി 25 മുതല്‍ നവീകരണ പ്രവൃത്തികള്‍ നടക്കുന്നതിനാല്‍ പ്രവൃത്തി തീരുന്നതു വരെ റോഡിലൂടെയുള്ള വാഹന ഗതാഗതം നിരോധിച്ചു.  ഇടിമുഴിക്കല്‍ ഭാഗത്തു നിന്ന്  പുല്ലിപ്പറമ്പ് ഭാഗത്തേക്ക് വരുന്ന വാഹനങ്ങള്‍ കൊളക്കുത്ത് റോഡ് വഴിയോ ചക്കുവളവില്‍ നിന്നും  പാറയില്‍ വഴിയോ തിരിഞ്ഞുപോകണം. പുല്ലിപറമ്പുഭാഗത്തുനിന്നും ഇടിമുറിക്കല്‍ ഭാഗത്തേക്ക് വരുന്ന വാഹനങ്ങള്‍ കുറ്റിപ്പാല പള്ളിക്കു സമീപത്തുള്ള കൂനുല്‍ വളവ്  റോഡിലൂടെ കൊളക്കുത്ത് റോഡിലേക്ക് പ്രവേശിക്കണമെന്ന് എക്‌സിക്യൂട്ടീവ് എഞ്ചിനീയര്‍ അറിയിച്ചു.
 

ജില്ലാ സപ്ലൈ ഓഫീസ് പ്രവര്‍ത്തിച്ചുകൊണ്ടിരുന്ന സിവില്‍ സ്റ്റേഷന്‍ കോമ്പൗണ്ടിലെ പഴയ കെട്ടിടം പൊളിച്ചു മാറ്റി നീക്കം ചെയ്യുന്നതിനുള്ള പരസ്യ ലേലം  മാര്‍ച്ച് നാലിന്  രാവിലെ  11ന്  ജില്ലാ സപ്ലൈ ഓഫീസില്‍ നടത്തും. പങ്കെടുക്കുന്നവര്‍ ഉദ്ദേശിക്കുന്നവര്‍ ലേല സമയത്തിന്  ഒരു മണിക്കൂര്‍ മുന്‍പ് ഹാജരായി  9400 രൂപ നിരത ദ്രവ്യമായി അടക്കണം. നിരത ദ്രവ്യം അടക്കംചെയ്ത  ക്വട്ടേഷനുകള്‍ ലേല തീയതിക്ക് തലേദിവസം നാലിനകം ഓഫീസില്‍ ലഭ്യമാക്കണമെന്ന് ജില്ലാസപ്ലൈ ഓഫീസര്‍ അറിയിച്ചു.

മണ്‍കല കമ്പോസ്റ്റ് പദ്ധതി നടപ്പിലാക്കുന്നതിന്റെ ഭാഗമായി നിശ്ചിത അളവിലുള്ള മണ്‍കല കമ്പോസ്റ്റ് പാത്രം (മുച്ചട്ടി) വിതരണം ചെയ്യുന്നതിന് മണ്‍പാത്ര നിര്‍മാതാക്കളില്‍ നിന്നും താല്‍പര്യപത്രം ക്ഷണിച്ചു. കേരള സംസ്ഥാന കളിമണ്‍പാത്ര നിര്‍മാണ വിപണന ക്ഷേമ വികസന കോര്‍പ്പറേഷനില്‍ രജിസ്റ്റര്‍ ചെയ്തിരിക്കുന്ന വ്യക്തികള്‍/സ്ഥാപനങ്ങള്‍ക്ക് താല്‍പര്യപത്രം നല്‍കാം.