എറണാകുളം: തൃപ്പൂണിത്തുറ ഗവ. ബോയ്സ് ഹൈസ്കൂൾ ഗ്രൗണ്ടിലെ പവലിയനിൽ ഒരുകോടി രൂപ ചെലവിൽ  ജിംനേഷ്യം ഒരുങ്ങും. സംസ്ഥാന കായിക വകുപ്പ് ഒരുക്കുന്ന ഒൻപത് കായികകേന്ദ്രങ്ങളിൽ ഒന്നാണ് തൃപ്പൂണിത്തുറയിൽ വരുന്നത്.

     കായികകേന്ദ്രത്തിന്റെ നിർമ്മാണോദ്ഘാടനം വ്യാഴാഴ്ച രാവിലെ 9.30 ന് കായികവകുപ്പ് മന്ത്രി ഇ.പി. ജയരാജൻ ഓൺലൈനിൽ നിർവ്വഹിക്കും. മൂന്ന് മാസത്തിനുള്ളിൽ ഉന്നത നിലവാരമുള്ള ജിംനേഷ്യം പ്രവർത്തന സജ്ജമാകും. എം. സ്വരാജ് എം.എൽ.എയുടെ ആസ്തി വികസന   ഫണ്ട് ഉപയോഗിച്ച് നിർമിച്ച പവലിയനിൽ 48 ലക്ഷം രൂപ ചെലവിൽ കേന്ദ്രീകൃത എ.സി ഉൾപ്പെടെയുള്ള അടിസ്ഥാന സൗകര്യങ്ങൾ ജിംനേഷ്യത്തിനായി ഒരുക്കും.

സാന്ത്വന സ്പര്‍ശം ഇടുക്കി, തൊടുപുഴ താലുക്ക് തല അദാലത്ത് ഇന്ന് (18) വാഴത്തോപ്പ് സെന്റ് ജോര്‍ജ്ജ് പള്ളി പാരീഷ് ഹാളില്‍ രാവിലെ 10 മിതല്‍ നടക്കും. വൈദ്യുതി വകുപ്പ് മന്ത്രി ശ്രീ എം എം മണി, വിദ്യാഭ്യാസ വകുപ്പ് മന്ത്രി പ്രൊഫ. സി രവീന്ദ്രനാഥ് , ജില്ലാ പഞ്ചായത്ത് പ്രസിഡന്റ് ജിജി കെ ഫിലിപ്പ്, ജില്ലാ കളക്ടര്‍ എച്ച് ദിനേശന്‍ തുടങ്ങിയവര്‍ പങ്കെടുക്കും.

ഇടുക്കി ജില്ലയില്‍ കഴിഞ്ഞ അഞ്ചു വര്‍ഷം സംസ്ഥാന സര്‍ക്കാര്‍ കാഴ്ചവച്ച വികസന മുന്നേറ്റത്തിന്റെ നേര്‍ക്കാഴ്ച ഒരുക്കി  ജില്ല ഇന്‍ഫര്‍മേഷന്‍ ഓഫീസിന്റെ  ഫോട്ടോ പ്രദര്‍ശനം  ഇടുക്കി @ ഹൈടെക് സംഘടിപ്പിച്ചു. തൊടുപുഴ മുനിസിപ്പല്‍ സ്റ്റേഡിയത്തില്‍ ഒരുക്കിയ ഫോട്ടോ പ്രദര്‍ശന സ്റ്റാള്‍ നിരവധി പേരാണ് സന്ദര്‍ശിച്ചത്.

ജില്ലയുടെ സമഗ്ര പുരോഗതിയും വികസനവും ചിത്രീകരിക്കുന്ന നൂറിലേറെ ഫോട്ടോകളാണ് പ്രദര്‍ശനത്തില്‍ ഒരുക്കിയത്.  ജില്ലയിലെ വിവിധയിടങ്ങളില്‍ വ്യത്യസ്ത തീയതികളിലായിട്ടാണ് ഫോട്ടോ പ്രദര്‍ശനം സംഘടിപ്പിക്കുന്നത്.  18 ന് വാഴത്തോപ്പ് സ്വാന്തന സ്പര്‍ശം വേദിയിലും  ഫോട്ടോ പ്രദര്‍ശനം ഉണ്ട്.

ദേശീയ ഭക്ഷ്യ ഭദ്രതാ നിയമം  സംസ്ഥാനത്ത്  നടപ്പിലാക്കിയതിന്റെ   ഭാഗമായി  പൊതുവിതരണ  കേന്ദ്രങ്ങളുടെ  വാതില്‍പടിക്കല്‍ ഭക്ഷ്യവസ്തുക്കള്‍  എത്തിക്കുമ്പോള്‍  കൃത്യത  വരുത്തുന്നതിനും   സുതാര്യത  ഉറപ്പാക്കുന്നതിനുമായി  സപ്ലൈകോ  നടപ്പാക്കുന്ന  വാഹന  ട്രാക്കിങ്  ആന്റ്  മാനേജ്‌മെന്റ്  സംവിധാനത്തിന്റെ  സംസ്ഥാന തല ഉദ്ഘാടനം  ഭക്ഷ്യ  പൊതുവിതരണ  വകുപ്പു മന്ത്രി  പി .തിലോത്തമന്‍  വീഡിയോ  കോണ്‍ഫറന്‍സ്  വഴി  നിര്‍വ്വഹിച്ചു.  സംശുദ്ധമായ  പൊതുവിതരണത്തിന്  വാഹന ട്രാക്കിങ്-  മാനേജ്‌മെന്റ്  സംവിധാനം  നാഴികക്കല്ലായി  മാറും. ഇപ്രകാരം  സപ്ലൈകോ  ഗോഡൗണുകളെ  ശാസ്ത്രീയമാക്കാനാവും.

സംസ്ഥാന പിന്നാക്ക വിഭാഗ കമ്മീഷൻ വെള്ളയമ്പലം അയ്യൻകാളി ഭവനിലുള്ള കമ്മീഷന്റെ കോർട്ട് ഹാളിൽ നാളെ (ഫെബ്രുവരി 25) രാവിലെ 11ന് സിറ്റിംഗ് നടത്തും. സിറ്റിംഗിൽ ശൈവവെള്ളാള സമുദായത്തെ പൂർണ്ണമായും മറ്റ് പിന്നോക്ക വിഭാഗങ്ങളുടെ പട്ടികയിൽ ഉൾപ്പെടുത്തണമെന്ന ആവശ്യം, ഒഇസി ലിസ്റ്റിൽ കളരിക്കുറുപ്പ്, കളരിപ്പണിക്കർ സമുദായത്തെ പുന:ക്രമീകരണം നടത്തണമെന്ന ആവശ്യം എന്നിവ പരിഗണിക്കും. സിറ്റിംഗിൽ കമ്മീഷൻ ചെയർമാൻ ജസ്റ്റിസ് ജി.ശശിധരൻ, മെമ്പർമാരായ ഡോ.എ.വി.ജോർജ്, സുബൈദാ ഇസ്ഹാക്ക്, കമ്മീഷൻ മെമ്പർ സെക്രട്ടറി എന്നിവർ പങ്കെടുക്കും.
പി.എൻ.എക്സ്. 1025/2021

           വേനല്‍ക്കാലം ആരംഭിച്ച സാഹചര്യത്തില്‍ പകല്‍ താപനില ക്രമാതീതമായി ഉയരുന്നതിനാല്‍ കേരളത്തിലെ വിവിധ സ്ഥലങ്ങളില്‍ വെയിലത്ത് പണിയെടുക്കുന്ന  തൊഴിലാളികള്‍ക്ക് സൂര്യാഘാതം ഏല്‍ക്കുന്നതിനാല്‍ വെയിലത്ത് നിന്ന് പണിയെടുക്കുന്ന തൊഴിലാളികളുടെ  ജോലി സമയം ഇന്നലെ (17) മുതല്‍ ഏപ്രില്‍ മാസം 30 വരെ താഴെ പുന:ക്രമീകരിച്ചു.  പകല്‍ സമയം വെയിലത്ത് ജോലി ചെയ്യുന്ന എല്ലാ തൊഴിലാളികള്‍ക്കും ഉച്ചക്ക് 12.00 മണി മുതല്‍ 3.00 മണി വരെ വിശ്രമ വേളയായിരിക്കും. ഇവരുടെ ജോലി സമയം രാവിലെ 7.00 മണി മുതല്‍ വൈകുന്നേരം 7.00 മണി വരെയുള്ള സമയത്തിനുള്ളില്‍ 8 മണിക്കൂറായി നിജപ്പെടുത്തി.

സംസ്ഥാനത്തെ സ്‌കൂളുകളിലെയും, കോളേജുകളിലെയും എൻ.എസ്.എസ് യൂണിറ്റുകളിലെ സ്റ്റേറ്റ് എൻ.എസ്.എസ് ഓഫീസറുടെ നിയമന കാലാവധി അവസാനിച്ചതിനാൽ പുതിയ സ്റ്റേറ്റ് എൻ.എസ്.എസ് ഓഫീസറെ ഡെപ്യൂട്ടേഷൻ വ്യവസ്ഥയിൽ നിയമിക്കുന്നു. കോളേജ് വിദ്യാഭ്യാസ വകുപ്പിന്റെ നിയന്ത്രണത്തിൽ ഉള്ള സർക്കാർ/എയ്ഡഡ് കോളേജുകളിലെ അധ്യാപകർക്ക് അപേക്ഷിക്കാം.

ഇടുക്കി ജില്ലയില്‍ ഏലപ്പാറക്കും സമീപ വില്ലേജുകള്‍ക്കുമായി നടപ്പിലാക്കുന്ന സമഗ്ര ശുദ്ധ ജലവിതരണ പദ്ധതിയുടെ ഭാഗമായി പീരുമേട് ഗ്രാമപഞ്ചായത്തില്‍ 2018 - 19 സംസ്ഥാന പദ്ധതിയില്‍  ഉള്‍പ്പെടുത്തി പൂര്‍ത്തീകരിച്ച ശുദ്ധജല വിതരണ ശൃംഖലയുടെ ഉദ്ഘാടനം വ്യാഴാഴ്ച രാവിലെ 11 മണിക്ക് അഴുത ബ്ലോക്ക് പഞ്ചായത്ത് ഹാളില്‍ വെച്ച് വീഡിയോ കോണ്‍ഫ്രന്‍സ് വഴി സംസ്ഥാന ജലവിഭവ വകുപ്പ് മന്ത്രി കെ കൃഷ്ണന്‍കുട്ടി നിര്‍വഹിക്കും.  

ചടങ്ങില്‍ സംസ്ഥാന വൈദ്യുതി വകുപ്പ് മന്ത്രി എംഎം മണി അധ്യക്ഷത വഹിക്കും. അഡ്വ. ഡീന്‍ കുര്യാക്കോസ് എം.പി. മുഖ്യാതിഥിയാകും. പീരുമേട് എംഎല്‍എ ഇ.എസ്. ബിജിമോള്‍ മുഖ്യപ്രഭാഷണം നടത്തും.

നാഷണൽ സർവ്വീസ് സ്‌കീമിന്റെ ആഭിമുഖ്യത്തിൽ സംസ്ഥാനമൊട്ടാകെ  എല്ലാ സ്‌കൂൾ യൂണിറ്റുകളിലും കോവിഡ് പ്രതിരോധ ജാഗ്രതാ മതിൽ സജ്ജീകരിച്ചു. കോവിഡ് കാലയളവിൽ സമൂഹത്തിന്റെ ജീവിത ശൈലിയിൽ വന്ന മാറ്റം കണക്കിലെടുത്ത്  വിദ്യാലയത്തിന്റെ പ്രവേശന കവാടത്തിൽ 'ജീവിത ശൈലീ' 'ആന്റീ ടുബാക്കോ' സന്ദേശങ്ങൾക്ക് പ്രാമുഖ്യം കൊടുത്ത് പെയിന്റിങ്ങ് ചെയ്താണ് കോവിഡ് പ്രതിരോധ ജാഗ്രതാ മതിൽ  തയ്യാറാക്കിയത്.

ഇടുക്കി ജില്ലയില്‍ പട്ടികജാതി വിഭാഗത്തില്‍പെട്ട ഗുണഭോക്താക്കളില്‍ നിന്ന് പോത്ത് വളര്‍ത്തല്‍ പദ്ധതിയിലേക്ക് അപേക്ഷകള്‍ ക്ഷണിച്ചു. താല്പര്യമുള്ള പട്ടികജാതി വിഭാഗത്തില്‍പെട്ട ഗുണഭോക്താക്കള്‍ ആവശ്യമായ രേഖകള്‍ സഹിതം അതാത് പഞ്ചായത്തിലെ മൃഗാശുപത്രിയില്‍ ഫെബ്രുവരി മാസം 25 ന് മുമ്പ് അപേക്ഷ സമര്‍പ്പിക്കേണ്ടതാണെന്ന് ജില്ലാ മൃഗസംരക്ഷണ ഓഫീസര്‍ അറിയിച്ചു.