സര്‍ക്കാരിന്റെ 100 ദിന കര്‍മ്മദിന പരിപാടിയുടെ ഭാഗമായുള്ള ജില്ലയിലെ     പട്ടയ വിതരണോദ്ഘാടനം മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിച്ചു.  സര്‍ക്കാര്‍ ഇച്ഛാശക്തിയോടെ നടത്തിയ ഭരണ നടപടികളും ചട്ടഭേദഗതികളുമാണ് ഇത്രയും പേര്‍ക്ക് പട്ടയം നല്‍കാന്‍ സാധ്യമാക്കിയതെന്ന് മുഖ്യമന്ത്രി  സംസ്ഥാന തല പട്ടയ വിതരണോദ്ഘാടനവും സ്മാര്‍ട്ട് വില്ലേജ് ഓഫീസുകളുടെ കെട്ടിടോദ്ഘാടനവും നിര്‍വഹിച്ച് പറഞ്ഞു. സര്‍ക്കാര്‍ ഏറ്റെടുത്ത വലിയൊരു ജനകീയ ആവശ്യങ്ങളിലൊന്നായിരുന്നു അര്‍ഹതപ്പെട്ടവര്‍ക്കെല്ലാം പട്ടയം നല്‍കുകയെന്നത്.

കഴിഞ്ഞ അഞ്ചു വര്‍ഷത്തിനിടെ സംസ്ഥാനത്ത് രണ്ട് ലക്ഷത്തോളം പട്ടയങ്ങളുടെ വിതരണം പൂര്‍ത്തിയാക്കാന്‍ കഴിഞ്ഞതായും ഇത് സര്‍വകാല റെക്കോഡാണെന്നും മുഖ്യമന്ത്രി പിണറായി വിജയന്‍ പറഞ്ഞു. നൂറുദിന കര്‍മ്മ പദ്ധതിയില്‍ റവന്യു വകുപ്പ് പൂര്‍ത്തിയാക്കുന്ന പദ്ധതികളുടെ ഉദ്ഘാടനവും 13,320 പേര്‍ക്ക് പട്ടയവിതരണവും ഓണ്‍ലൈനായി നിര്‍വഹിച്ച് സംസാരിക്കുകയായിരുന്നു മുഖ്യമന്ത്രി. 

ജില്ലയില്‍ ഇന്നലെ(ഫെബ്രുവരി 15) 801 പേര്‍  രോഗമുക്തരായി. 192 പേര്‍ക്ക് കോവിഡ് സ്ഥിരീകരിച്ചു. സമ്പര്‍ക്കം വഴി 190 പേര്‍ക്കും ഉറവിടം വ്യക്തമല്ലാത്ത രണ്ടുപേര്‍ക്കും രോഗം സ്ഥിരീകരിച്ചു.
കൊല്ലം കോര്‍പ്പറേഷനില്‍ 35 പേര്‍ക്കാണ് രോഗബാധ. കടവൂര്‍-നാല്, മുണ്ടയ്ക്കല്‍, അയത്തില്‍, കാവനാട്, പള്ളിമുക്ക്, രാമന്‍കുളങ്ങര ഭാഗങ്ങളില്‍ മൂന്നുവീതവുമാണ് രോഗബാധിതരുള്ളത്.
മുനിസിപ്പാലിറ്റികളില്‍ പരവൂര്‍, പുനലൂര്‍ ഭാഗങ്ങളില്‍ നാലുവീതവും കൊട്ടാരക്കര, കരുനാഗപ്പള്ളി പ്രദേശങ്ങളില്‍ മൂന്നുവീതവുമാണ് രോഗബാധിതര്‍.

സര്‍വ്വീസില്‍ പുതിയതായി വന്ന ക്ലര്‍ക്കുമാര്‍ക്ക് നല്‍കുന്ന ഐ എം ജി പരിശീലനം സബ് കലക്ടര്‍ ശിഖാ സുരേന്ദ്രന്‍ കൊട്ടിയം ക്രിസ്തു ജ്യോതി അനിമേഷന്‍ സെന്ററില്‍ ഉദ്ഘാടനം ചെയ്തു. തന്റെ മുന്‍പില്‍ വരുന്ന സാധാരണക്കാരുടെ പ്രശ്‌നങ്ങള്‍ പരിഹരിക്കുന്നതില്‍ കരുതല്‍േ വേണമെന്നും അവര്‍ക്ക് അനുകമ്പയല്ല വേണ്ടത്, അവരുടെ അവകാശമാണ്   അപേക്ഷകളില്‍ പ്രതിഫലിക്കുന്നതെന്നും അര്‍ഹിക്കുന്ന പരിഗണന സാധാരണക്കാര്‍ക്ക് ലഭിക്കണമെന്നും  സബ് കലക്ടര്‍ ജീവനക്കാരെ ഓര്‍മിപ്പിച്ചു.   പരിശീലനം 27 ന് അവസാനിക്കും. ആധുനിക സിവില്‍ സര്‍വ്വീസിനാവശ്യമായ വിവിധ വിഷയങ്ങളെക്കുറിച്ച് ക്ലാസുകള്‍ പ്രഗല്‍ഭരായ  അധ്യാപകര്‍ ക്ലാസെടുക്കും.

സംസ്ഥാന സര്‍ക്കാരിന്റെ തൊഴിലും നൈപുണ്യവും വകുപ്പിനു കീഴില്‍ പ്രവര്‍ത്തിക്കുന്ന പൊതുമേഖലാ സ്ഥാപനമായ ഭവനം ഫൗണ്ടേഷന്‍ കേരള, ഫെഡറേഷന്‍ ഓഫ് കേരള  അസോസിയേഷന്‍ ഇന്‍ നോര്‍ത്ത് അമേരിക്കയുടെയും(ഫൊക്കാന) സഹകരണത്തോടെ നടപ്പിലാക്കുന്ന ഭവന പദ്ധതിയുടെ ആദ്യഘട്ട നിര്‍മ്മാണം പൂര്‍ത്തീകരിച്ച വീടുകളുടെ താക്കോല്‍ദാനം തൊഴിലും  നൈപുണ്യവും വകുപ്പ് മന്ത്രി ടി പി രാമകൃഷ്ണന്‍  ചൊവ്വാഴ്ച ഓണ്‍ലൈനായി നിര്‍വഹിക്കും.

ജില്ലയില്‍ ഇലക്‌ട്രോണിക് വോട്ടിംഗ് മെഷീനുകള്‍ സുരക്ഷിതമായി സൂക്ഷിക്കുന്നതിനായി നിര്‍മിച്ച ഇലക്‌ട്രോണിക് വോട്ടിംഗ് മെഷീന്‍ വെയര്‍ ഹൗസിന്റെ ഉദ്ഘാടനം ചീഫ് ഇലക്ട്രല്‍ ഓഫീസര്‍ ടീക്കാ റാം മീണ നിര്‍വഹിക്കും.

കാനനഭംഗി ആവോളം  ആസ്വദിക്കാന്‍ സംസ്ഥാനത്തെ ഏറ്റവും വലിയ വന മ്യൂസിയം കുളത്തൂപ്പുഴയില്‍ ഒരുങ്ങുന്നു.  മ്യൂസിയത്തിന്റെ ഒന്നാംഘട്ട പൂര്‍ത്തീകരണ ഉദ്ഘാടനം വനം വന്യജീവി വകുപ്പ് മന്ത്രി  കെ രാജു ഓണ്‍ലൈനായി നിര്‍വഹിച്ചു.

ഉള്‍നാടന്‍ ജലഗതാഗത വകുപ്പിന്റെ ആഭിമുഖ്യത്തില്‍ തീരപ്രദേശത്തിന് സമാന്തരമായി കായലുകളെയും പുഴകളെയും ബന്ധിപ്പിച്ച് രൂപപ്പെടുത്തിയ പശ്ചിമതീര ജലപാതയുടെ ഭാഗമായ കൊല്ലം തോടിലൂടെ ബോട്ടില്‍  ആദ്യയാത്ര നടത്തി മന്ത്രി ജെ മേഴ്സിക്കുട്ടിയമ്മയും എം എല്‍ എ മാരായ എം നൗഷാദും എം മുകേഷും മേയര്‍ പ്രസന്ന ഏണസ്റ്റും. ഉള്‍നാടന്‍ ജലഗതാഗത ഉദ്യോഗസ്ഥരും ആദ്യയാത്രയില്‍ ഒപ്പം കൂടി.

ജില്ലാ പഞ്ചായത്തിന്റെ 2021-22 വാര്‍ഷിക പദ്ധതിയുമായി ബന്ധപ്പെട്ട വികസന സെമിനാര്‍ ഇന്ന്(ഫെബ്രുവരി 16) രാവിലെ 10.30 ന് ജില്ലാ പഞ്ചായത്തില്‍ ചേരും. മുല്ലക്കര രത്‌നാകരന്‍ എം എല്‍ എ ഉദ്ഘാടനം ചെയ്യും. ഗ്രാമ, ബ്ലോക്ക് പഞ്ചായത്ത് പ്രസിഡന്റുമാര്‍, ജില്ലാ പഞ്ചായത്ത് അംഗങ്ങള്‍, വര്‍ക്കിംഗ് ഗ്രൂപ്പ് അംഗങ്ങള്‍, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുക്കുമെന്ന് സെക്രട്ടറി കെ പ്രസാദ് അറിയിച്ചു.
 (പി.ആര്‍.കെ നമ്പര്‍.441/2021)

കേരള കെട്ടിട നിര്‍മാണ തൊഴിലാളി ക്ഷേമ ബോര്‍ഡില്‍ നിന്നും വിവിധ പെന്‍ഷനുകള്‍ ലഭിക്കുന്നവര്‍ക്ക് ലൈഫ് സര്‍ട്ടിഫിക്കറ്റ് ഹാജരാക്കേണ്ട അവസാന തീയതി ഫെബ്രുവരി 28 വരെ നീട്ടി.
(പി.ആര്‍.കെ നമ്പര്‍.440/2021)