താനൂര്‍ ഗവ. റീജിയനല്‍ ഫിഷറീസ് ടെക്നിക്കല്‍ വൊക്കേഷനല്‍ ഹയര്‍സെക്കന്‍ഡറി സ്‌കൂളിലെ ആധുനിക ഹോസ്റ്റല്‍ ഫിഷറീസ്-ഹാര്‍ബര്‍ എഞ്ചിനീയറിങ്-കശുവണ്ടി വ്യവസായ വകുപ്പ് മന്ത്രി ജെ.മേഴ്സിക്കുട്ടിയമ്മ വിദ്യാര്‍ഥികള്‍ക്ക് സമര്‍പ്പിച്ചു. സ്‌കൂളിലെ ഓഡിറ്റോറിയം നിര്‍മാണോദ്ഘാടനവും മന്ത്രി നിര്‍വഹിച്ചു. ഓണ്‍ലൈന്‍ ഉദ്ഘാടന ചടങ്ങില്‍ അധ്യക്ഷനായ വി.അബ്ദുറഹ്‌മാന്‍ എം.എല്‍.എ ശിലാഫലകം അനാച്ഛാദനം ചെയ്തു. തീരദേശ വികസന കോര്‍പ്പറേഷന്‍ മാനേജിങ് ഡയറക്ടര്‍ പി.ഐ ഷെയ്ക്ക് പരീത് റിപ്പോര്‍ട്ട് അവതരിപ്പിച്ചു.

കാസര്‍കോട് ജില്ലാ പോലീസ് കംപ്ലയിന്റ് അതോറിറ്റിയുടെ നേതൃത്വത്തില്‍  കളക്ടറേറ്റ്  കോണ്‍ഫറന്‍സ് ഹാളില്‍ പരാതി പരിഹാര അദാലത്ത് നടത്തി.  ലഭിച്ച 48 പരാതികളില്‍ 22 എണ്ണം തീര്‍പ്പാക്കി. 26 പരാതികള്‍ തുടര്‍ നടപടികള്‍ക്കായി മാറ്റിവച്ചു.  പോലീസ് കംപ്ലയിന്റ് അതോറിറ്റി ചെയര്‍മാന്‍ റിട്ട. ജില്ലാ ജഡ്ജ് പി എസ് ദിവാകരന്‍ അദാലത്തിന് നേതൃത്വം നല്‍കി. സീനിയര്‍ സിവില്‍ പോലീസ് ഓഫീസര്‍ അബൂബക്കര്‍, സിവില്‍ പോലീസ് ഓഫീസര്‍ സുജിത്ത് എന്നിവര്‍ സംബന്ധിച്ചു.

സംസ്ഥാനത്തെ വാഹന പരിശോധനകള്‍ പരിഷ്‌കൃത രാജ്യങ്ങള്‍ക്ക് യോജിക്കുന്ന വിധം ആധുനിക വത്കരിച്ചതായി ഗതാഗത വകുപ്പ് മന്ത്രി എ.കെ. ശശീന്ദ്രന്‍. റോഡ് സുരക്ഷ നിയമങ്ങള്‍ കാറ്റില്‍പ്പറത്തി വാഹനമോടിക്കുന്നവരെ പിടികൂടാന്‍ വഴിയില്‍ കാത്തു നില്‍ക്കുന്ന ഉദ്യോസ്ഥര്‍ നേരിടുന്ന വിമര്‍ശനങ്ങള്‍ക്ക് ആധുനിക സംവിധാനങ്ങള്‍ ഉപയോഗിക്കുന്നതിലൂടെ പരിഹാരമാകുമെന്നും മന്ത്രി പറഞ്ഞു.

ജില്ലാ ഇന്‍ഫര്‍മേഷന്‍ ഓഫീസിന്റെ നേതൃത്വത്തില്‍ മലപ്പുറം ടൗണ്‍ ഹാളില്‍ ആരംഭിച്ച 'മുന്നേറുന്ന മലപ്പുറം' വികസന ഫോട്ടോ പ്രദര്‍ശനം ശ്രദ്ധേയമായി. മലപ്പുറം നഗരസഭ ചെയര്‍മാന്‍ മുജീബ് കാടേരി ഫോട്ടോ പ്രദര്‍ശനം ഉദ്ഘാടനം ചെയ്തു. കഴിഞ്ഞ അഞ്ച് വര്‍ഷങ്ങളില്‍ സര്‍ക്കാര്‍ മലപ്പുറം ജില്ലയില്‍ നടപ്പാക്കിയ വികസന പ്രവര്‍ത്തനങ്ങള്‍  കോര്‍ത്തിണക്കിയ ചിത്രങ്ങളാണ് പ്രദര്‍ശനത്തില്‍ ഉള്‍പ്പെടുത്തിയിരിക്കുന്നത്.  സര്‍ക്കാരിന്റെ ജനക്ഷേമകരമായ പ്രവര്‍ത്തനങ്ങളും വികസനപദ്ധതികളും ചേര്‍ത്തുതയ്യാറാക്കിയ 100ല്‍ പരം ഫോട്ടോകളാണ് പ്രദര്‍ശനത്തിലുള്ളത്.

വീട്ടിലെ ആവശ്യങ്ങള്‍ക്കും മറ്റും ഇനി തൊഴിലാളികളെ കണ്ടെത്താന്‍ ഇനി പ്രയാസപ്പെടേണ്ടി വരില്ല. പൊതുജനങ്ങള്‍ക്ക് ഗാര്‍ഹികവും വാണിജ്യപരവുമായ ആവശ്യങ്ങള്‍ക്കായി വിദഗ്ധ തൊഴിലാളികളുടെ സേവനം ലഭ്യമാക്കുന്നതിന് സ്‌കില്‍ രജിസ്ട്രി മൊബൈല്‍ ആപ്പ് സജീവമാവുന്നു. കാസര്‍കോട് ജില്ലയില്‍ പുതുതായി ആരംഭിക്കുന്ന ബേഡഡുക്ക കൗശല്‍ കേന്ദ്രയുടെ നിര്‍മാണോദ്ഘാടനത്തിന്റെ ഭാഗമായി കുണ്ടംകുഴിയില്‍ സ്‌കില്‍ രജിസ്‌ട്രേഷന്‍ കാമ്പെയിന്‍ സംഘടിപ്പിക്കും. 

മുഖ്യമന്ത്രിയുടെ സാന്ത്വന സ്പര്‍ശം അദാലത്തില്‍ പെരുമ്പള സ്വദേശിനി സരോജിനിക്ക് റവന്യൂ മന്ത്രി ഇ ചന്ദ്രശേഖരന്‍ ഉറപ്പ് നല്‍കിയ പട്ടയം തിങ്കളാഴ്ച കൈമാറി. കാസര്‍കോട് കലക്ടറേറ്റ് കോണ്‍ഫറന്‍സ് ഹാളില്‍ നടന്ന പട്ടയ മേളയില്‍ സരോജിനി മകള്‍ സ്നേഹിതയ്ക്കൊപ്പം എത്തി പട്ടയം കൈപ്പറ്റി. ഭൂരഹിതരായ ഇവര്‍ക്ക് ബെണ്ടിച്ചാല്‍ അനുവദിച്ചിരുന്ന അഞ്ച് സെന്റ് ഭൂമിക്കാണ് പട്ടയം ലഭിച്ചത്. രോഗിയായ സരോജിനിക്ക് മുഖ്യമന്ത്രിയുടെ ദുരിതാശ്വാസനിധിയില്‍ നിന്ന്  ചികിത്സ സഹായം ലഭ്യമാക്കാനുള്ള നടപടികള്‍ പുരോഗമിക്കുന്നു.

കഴിഞ്ഞ നാലര വര്‍ഷത്തിനുള്ളില്‍ സര്‍ക്കാര്‍ ജില്ലയില്‍ അനുവദിച്ചത് 26561   പട്ടയങ്ങള്‍. 2016 മെയ് 22 മുതല്‍ 2021 ജനുവരി 31 വരെ ജില്ലയില്‍ 24946  പട്ടയങ്ങളും ഇന്നലെ   1615 പട്ടയങ്ങളും വിതരണം ചെയ്തു. ജനുവരി 31 വരെ വിതരണം ചെയ്ത 24946 പട്ടയങ്ങളില്‍  1088 പട്ടയങ്ങള്‍ ഭൂരഹിതരായ വ്യക്തികള്‍ക്ക് സര്‍ക്കാര്‍ ഭൂമി പതിച്ച് നല്‍കിയവയാണ്. അവശേഷിക്കുന്ന 23,858 പട്ടയങ്ങള്‍ കേരള ഭൂപരിഷ്‌കരണ നിയമ പ്രകാരം കൈവശക്കുടിയാന്മാര്‍ക്ക് അവരുടെ കൈവശ ഭൂമിക്ക് സമ്പൂര്‍ണ ഉടമസ്ഥാവകാശം അനുവദിച്ചു കൊണ്ടുള്ളവയായിരുന്നു.