ഉദ്യോഗാർഥികളുടെ വിവിധ വിഷയങ്ങളിലെ  സംശയങ്ങൾ അകറ്റാൻ  തൃശ്ശൂർ ജില്ലാ എംപ്ലോയ്മെൻറ് എക്സ്ചേഞ്ചിലെ വൊക്കേഷണൽ ഗൈഡൻസ് വിഭാഗം ഓൺലൈൻ സെമിനാർ നടത്തുന്നു.

കേരള സർക്കാർ - അർദ്ധസർക്കാർ ഒഴിവുകളിലേക്ക് നിയമനം നടത്തുന്ന സർക്കാർ ഏജൻസികളായ കേരള പബ്ലിക് സർവീസ് കമ്മീഷനും  എംപ്ലോയ്മെൻറ് എക്സ്ചേഞ്ചും  നൽകുന്ന സേവനങ്ങൾ സെമിനാറിൽ വിഷയമാകും.

തൃശൂർ ജില്ലാ പി എസ് സി ഓഫീസർ, തൃശൂർ ജില്ലാ എംപ്ലോയ്മെൻറ് ഓഫീസർ എന്നിവരാണ് സെമിനാർ നയിക്കുന്നത്. താല്പര്യമുള്ളവർ  ജനുവരി 6ന് മുൻപായി 9446228282 എന്ന

നമ്പറിലേക്ക് വാട്സ്ആപ്പ് സന്ദേശം അയക്കേണ്ടതാണ്.

ഭവനരഹിതരില്ലാത്ത നഗരസഭയാവാൻ തയ്യാറെടുക്കുകയാണ് കൊടുങ്ങല്ലൂർ നഗരസഭ. സംസ്ഥാന സർക്കാരിൻ്റെ സമ്പൂർണ്ണ ഭവന പദ്ധതിയിൽ ഉൾപ്പെടുത്തി നഗരസഭയിലെ വീടില്ലാത്ത 1253 പേർക്ക് വീടുകൾ നൽകിക്കഴിഞ്ഞു. ഏഴാം ഡി പി ആറിൽ ഇപ്പോൾ 500 പേർ കൂടി അപേക്ഷ  നൽകിയിട്ടുണ്ട്. ഇവർക്ക് കൂടി വീടുകൾ നൽകി കൊടുങ്ങല്ലൂരിനെ ഭവനരഹിതരില്ലാത്ത നഗരസഭയാക്കുമെന്ന് നഗരസഭ ചെയർപേഴ്‌സൺ എം യു ഷിനിജ.

കേരള സർക്കാർ ഫിഷറീസ് വകുപ്പ് നടപ്പിലാക്കുന്ന ജനകീയ മത്സ്യകൃഷി 'ഒരു നെല്ലും ഒരു മീനും' രണ്ടാംഘട്ട പദ്ധതിയുടെ ഭാഗിക വിളവെടുപ്പ് നടന്നു. കാറളം പഞ്ചായത്തിലെ വെള്ളാനി കോൾ പാടശേഖരത്തിൽ നടന്ന ഭാഗിക വിളവെടുപ്പിൽ ഒരു ടൺ മത്സ്യമാണ് ലഭിച്ചത്. 58.46 ഹെക്ടർ പാടശേഖരമാണ് ഇവിടെയുള്ളത്. കട്ല, റൂഹു തുടങ്ങിയ കാർപ്പ് വിഭാഗത്തിൽപ്പെടുന്ന ഏകദേശം 175380 മത്സ്യകുഞ്ഞുങ്ങളെ ഇവിടെ നിക്ഷേപിച്ചിരുന്നു. വിളവെടുപ്പ് ഉദ്ഘാടനം കെ യു അരുണൻ മാസ്റ്റർ എം എൽ എ നിർവഹിച്ചു. 

കൈറ്റ് വിക്ടേഴ്സിലൂടെ സംപ്രേഷണം ചെയ്തുവരുന്ന 'ഫസ്റ്റ്ബെൽ' ഡിജിറ്റൽ ക്ലാസുകളുടെ ഒന്നാം ക്ലാസ് മുതലുള്ള സംപ്രേഷണം പുനരാരംഭിച്ചു. പത്താം ക്ലാസുകാർക്ക് വൈകുന്നേരം 5.30 മുതൽ വൈകീട്ട് 7 വരെയാണ് ക്ലാസുകൾ. ഇതിന്റെ പുനഃസംപ്രേഷണം പിറ്റേദിവസം രാവിലെ 6.30 മുതൽ രാത്രി 8 വരെ അതേ ക്രമത്തിൽ നടത്തും. പ്ലസ് ടു ക്ലാസുകൾ രാവിലെ 8 മുതൽ 11 വരെയും വൈകുന്നേരം 3 മണി മുതൽ 5.30 വരെയും ആയിരിക്കും.  പുനഃസംപ്രേഷണം അതേ ദിവസം വൈകുന്നേരം 7 മണി മുതലും ഇതേ ക്രമത്തിൽ നടത്തും.

ചേറ്റുവ അഴിമുഖത്തിന്റെ തെക്ക് ഭാഗത്തെ തീരശോഷണത്തിന് തടയിടാൻ തുറമുഖ വകുപ്പ്. ഇതിന്റെ ഭാഗമായി ചേറ്റുവ അഴിമുഖത്ത് തുറമുഖ വകുപ്പിന്റെ നേതൃത്വത്തിൽ പുലിമുട്ടുകളുടെ നിർമ്മാണം ആരംഭിച്ചു. 

കേരള സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍

മുസ്ലിം ക്രിസ്ത്യന്‍ മതവിഭാഗക്കാര്‍ക്ക് നല്‍കുന്ന 30 ലക്ഷം രൂപ വരെയുള്ള തൊഴില്‍ വായ്പ പദ്ധതികളെകുറിച്ച്  ക്ലാസ് സംഘടിപ്പിക്കുന്നു. ജനുവരി 5 ചൊവ്വാഴ്ച രാവിലെ 10.15 ന് ഗൂഗിള്‍ മീറ്റ് വഴിയാണ് ക്ലാസ്.

പുതിയ ബിസിനസ് തുടങ്ങുവാനും നിലവിലുള്ള വിപുലീകരിക്കാനും വേണ്ട നിര്‍ദ്ദേശങ്ങള്‍ ക്ലാസില്‍ ഉണ്ടാകും. താല്പര്യമുള്ളവര്‍ക്ക്  https://meet.google.com/kuq-okvs-yzh എന്ന ലിങ്ക് വഴി ഗൂഗിള്‍ മീറ്റില്‍ പങ്കെടുക്കാം .കൂടുതല്‍ വിവരങ്ങള്‍ക്ക് ഫോണ്‍:  9447730011

സംസ്ഥാന പൊലീസ് മേധാവിയുടെ ഓൺലൈൻ പരാതി പരിഹാര പരിപാടി ജനുവരി എട്ടിന് നടക്കും. പരിപാടിയിൽ ക്രൈംബ്രാഞ്ച് ഉദ്യോഗസ്ഥരുടെ പരാതികളാണ് പരിഗണിക്കുന്നത്. പരാതികൾ  spctalks.pol@kerala.gov.in എന്ന വിലാസത്തിൽ അയയ്ക്കണം. ഹെല്പ് ലൈൻ നമ്പർ 9497900243 'SPC talks with cops' എന്ന് നാമകരണം ചെയ്തിരിക്കുന്ന പരിപാടിയിൽ സർവീസിൽ ഉള്ളതും വിരമിച്ചതുമായ പൊലീസ് ഉദ്യോഗസ്ഥരുടെ സർവീസ് സംബന്ധവും വ്യക്തിപരവുമായ പരാതികളാണ് പരിഗണിക്കുന്നത്. ഇവ നേരിട്ട് സംസ്ഥാന പൊലീസ് മേധാവിയുടെ ശ്രദ്ധയിൽപെടുത്തി പരിഹാരം കാണാം.

തിരുവനന്തപുരം ജില്ലയിലെ തമിഴ് ഭാഷാന്യൂനപക്ഷത്തിന്റെ പ്രശ്‌നങ്ങൾ അറിയുന്നതിനും ചർച്ച ചെയ്യുന്നതിനുമായി ഭാഷാന്യൂനപക്ഷം സ്‌പെഷ്യൽ ഓഫീസർ ഡോ. നടുവട്ടം ഗോപാലകൃഷ്ണൻ ചാല ഗവൺമെന്റ് തമിഴ് ഹയർ സെക്കണ്ടറി സ്‌കൂളിൽ ജനുവരി എട്ടിന് രാവിലെ 10 മണി മുതൽ മുഖാമുഖം പരിപാടി നടത്തും. ഭാഷാന്യൂനപക്ഷസമിതി ഭാരവാഹികളും വ്യക്തികളും പൊതുപ്രവർത്തകരും പങ്കെടുക്കണം.