മൃഗചികിത്സാ രംഗത്ത് ആധുനിക ശാസ്ത്ര സാങ്കേതിക മികവോടെ രോഗനിർണ്ണയത്തിയായി ജില്ലയിൽ പുതിയ ക്ലിനിക്കൽ ലബോറട്ടറി. പുതുവർഷത്തിൽ മൃഗ കർഷകർക്കുള്ള സമ്മാനമായാണ് ലാബ് സമർപ്പിക്കുന്നത്.  കെട്ടിടത്തിൻ്റെ ഉദ്ഘാടനം 2021ജനുവരി ഒന്നിന് വൈകീട്ട് 4.30ന് മൃഗസംരക്ഷണ വകുപ്പ് മന്ത്രി അഡ്വ കെ രാജു ഉദ്ഘാടനം ചെയ്യും. കൃഷി മന്ത്രി വി എസ് സുനിൽകുമാർ അധ്യക്ഷത വഹിക്കുന്ന ചടങ്ങിൽ ഗവ ചീഫ് വിപ്പ് കെ. രാജൻ മോളിക്യുലർ ബയോളജി ഡിവിഷൻ ഉദ്ഘാടനം ചെയ്യും.

കേരള കള്ള് വ്യവസായ തൊഴിലാളി ക്ഷേമനിധി ബോർഡ് 2020-21  അധ്യായന വർഷത്തെ സ്കോളർഷിപ്പിനുള്ള അപേക്ഷ സ്വീകരിക്കുന്ന അവസാന തീയതി 2021 ജനുവരി 15 വരെ നീട്ടി.  ഫോൺ: 0487- 2364900

വെറുമ്പാട്ടാവകാശഭൂമിക്ക് ജന്മം അനുവദിച്ച്  പട്ടയം നൽകുന്നതുമായി ബന്ധപ്പെട്ട്  തൃശൂർ ലാന്റ് ട്രെബ്യൂണൽ ആന്റ് ഡെപ്യൂട്ടി കലക്ടർ ഡിസംബർ 31ന് തൃശൂർ കലക്ടറേറ്റിൽ നിശ്ചയിച്ചിരുന്ന എല്ലാ എസ് എം കേസുകളുടെയും വിചാരണ ജനുവരി 17ലേക്ക് മാറ്റി.

നവീകരണപ്രവർത്തനങ്ങൾ പൂർത്തീകരിച്ച രാമനിലയം ഹെറിട്ടേജ് ബ്ലോക്കിന്റെ  ഉദ്ഘാടനം ജനുവരി  ഒന്നിന് വൈകീട്ട് 6ന്  ടൂറിസം  വകുപ്പ് മന്ത്രി കടകംപള്ളി സുരേന്ദ്രൻ നിർവ്വഹിക്കും. കൃഷി വകുപ്പ് മന്ത്രി അഡ്വ വി എസ് സുനിൽകുമാർ അധ്യക്ഷത വഹിക്കും.

കാലപ്പഴക്കത്താൽ കേടുപാടുകൾ സംഭവിച്ച കെട്ടിടത്തിന്റെ  പൂർണമായ പുനരുദ്ധാരണ പ്രവർത്തനങ്ങൾക്ക് 2017ലാണ്  ഭരണാനുമതി ലഭിച്ചത്. തുടർന്ന് പഴമയും പാരമ്പര്യവും നിലനിർത്തി, വിനോദസഞ്ചാര വകുപ്പിന്റെ ആഭിമുഖ്യത്തിൽ നവീകരണ പ്രവർത്തനങ്ങൾക്കായി 3.41 കോടി രൂപ ചെലവഴിച്ച് പൊതുമരാമത്ത് വകുപ്പാണ് പദ്ധതി ഏറ്റെടുത്ത് നടപ്പിലാക്കിയത്.

വികസന പദ്ധതികളുടെ തുടർച്ചയെന്നോണം കുന്നംകുളം നഗരസഭയിൽ രണ്ടു പദ്ധതികൾ ആരംഭിച്ചതായി നഗരസഭ ചെയർപേഴ്സൺ സീതാരവീന്ദ്രൻ അറിയിച്ചു. പി എം എ വൈ പദ്ധതിയുടെ തുടർച്ചയായി അഞ്ചാം ഡി പി ആറിൽ ഉൾപ്പെടുത്തി 257 കുടുംബങ്ങൾക്ക് ആനുകൂല്യം നൽകുന്ന പദ്ധതി തുടരാൻ ചെയർപേഴ്സൺ നിർദേശം നൽകി.

പട്ടികജാതി വിഭാഗത്തിലെ 50 പേർക്ക് ലാപ്ടോപ് നൽകുന്ന പദ്ധതിയും മുന്നോട്ടു കൊണ്ടുപോകാൻ ചെയർമാൻ നിർദ്ദേശം നൽകി. 2021 ജനുവരി 9ന് ലാപ്ടോപ്പ് വിതരണത്തിൻ്റെ ഉദ്ഘാടനം നടക്കും.

മാള ബ്ലോക്ക് പഞ്ചായത്തിന്റെ പുതിയ പ്രസിഡന്റായി സന്ധ്യ നൈസനെ തിരഞ്ഞെടുത്തു. കല്ലേറ്റുംകര ഡിവിഷനിൽ നിന്നാണ് സന്ധ്യ നൈസൻ ബ്ലോക്ക്‌ പഞ്ചായത്തിലേക്ക് തിരഞ്ഞെടുക്കപ്പെട്ടത്.13 അംഗങ്ങളുള്ള ഭരണ സമിതിയിൽ ഒൻപത് വോട്ടിന്റെ ഭൂരിപക്ഷത്തിലാണ് സന്ധ്യ നൈസനെ ബ്ലോക്ക് പഞ്ചായത്ത്‌ പ്രസിഡന്റായി തിരഞ്ഞെടുത്തത്. ജോസ് മാഞ്ഞൂരാൻ സന്ധ്യ നൈസന്റെ പേര് നിർദ്ദേശിച്ചു. രേഖ ഷാന്റി ജോസഫ് പിൻതാങ്ങി.

വെള്ളാങ്ങല്ലൂർ ബ്ലോക്ക് പഞ്ചായത്ത് പ്രസിഡന്റായി വിജയലക്ഷ്മി വിനയചന്ദ്രനെ തിരഞ്ഞെടുത്തു. മുൻ വെള്ളാങ്ങല്ലൂർ പഞ്ചായത്ത് പ്രസിഡന്റ് പ്രസന്ന അനിൽകുമാർ, പഞ്ചായത്തംഗം ഉണ്ണികൃഷ്ണൻ കുറ്റിപ്പറമ്പിൽ എന്നിവർ പിന്താങ്ങി. 2015 മുതൽ കല്ലംകുന്ന് ഡിവിഷനിലെ മെമ്പറായിരുന്നു വിജയലക്ഷ്മി. ഈ വർഷവും അതേ ഡിവിഷനിൽ നിന്നാണ് വിജയിച്ചത്. ബ്ലോക്ക് പഞ്ചായത്ത് ഹാളിൽ നടന്ന സത്യപ്രതിജ്ഞാ ചടങ്ങിൽ വരണാധികാരിയായ പട്ടികജാതി വികസന ഓഫീസർ സന്ധ്യ സത്യവാചകം ചൊല്ലിക്കൊടുത്തു.