മലപ്പുറം എംപ്ലോയ്മെന്റ് എക്സേഞ്ച്/എംപ്ലോയബിലിറ്റി സെന്ററും പെരിന്തല്‍മണ്ണ എസ്.എന്‍.ഡി.പി. വൈ.എസ്.എസ്. കോളേജും സംയുക്തമായി സംഘടിപ്പിക്കുന്ന നിയുക്തി മെഗാ ജോബ് ഫെയര്‍ സെപ്റ്റംബര്‍ 20-ന് നടക്കും. 1500-ലധികം ഒഴിവുകളാണ് റിപ്പോര്‍ട്ട് ചെയ്തിട്ടുള്ളത്. ബാങ്കിംഗ്, എജ്യൂക്കേഷന്‍, ഓട്ടോമൊബൈല്‍, എഫ്.എംസിജി, റെസ്റ്റോറന്റ് എഞ്ചിനീയറിംഗ്, ഫിനാന്‍ഷ്യല്‍, ആയുര്‍വേദിക്, ഇലക്ട്രോണിക്സ്, മെഡിക്കല്‍ ഫാര്‍മസി, ഫാസ്റ്റ് മൂവിംഗ് കണ്‍സ്യൂമര്‍ ഗുഡ്സ്, മാനുഫാക്ചറിങ്ങും വിതരണവും തുടങ്ങിയ മേഖലകളില്‍ നിന്നുമുള്ള മുപ്പതിലധികം പ്രമുഖസ്ഥാപനങ്ങള്‍ പങ്കെടുക്കും. .

അസാപ് കമ്മ്യൂണിറ്റി സ്‌കില്‍ പാര്‍ക്ക് തവനൂരില്‍ സെപ്റ്റംബറില്‍ സംഘടിപ്പിക്കുന്ന തൊഴില്‍മേളയില്‍ പങ്കെടുക്കുന്നതിനായി വിവിധ കമ്പനികളെ ക്ഷണിച്ചു. താത്പര്യമുള്ള കമ്പനികള്‍ https://docs.google.com/forms/d/e/1FAIpQLSce8F5SPLc1nnqGCaLJedt3FhfSQ79vIhCbHSft-8l78Z_MrQ/viewform എന്ന ലിങ്ക് വഴി രജിസ്റ്റര്‍ ചെയ്യണം. രജിസ്ട്രേഷനുള്ള അവസാന തീയതി സെപ്റ്റംബര്‍ 24. ഫോണ്‍: 9495999658.

ബിസില്‍ ട്രെയിനിംഗ് ഡിവിഷന്‍ നടത്തുന്ന ഒരു വര്‍ഷം ദൈര്‍ഘ്യമുള്ള പി ജി ഡിപ്ലോമ ഇന്‍ ഹോസ്പിറ്റല്‍ അഡ്മിനിസ്ട്രേഷന്‍ (യോഗ്യത-ഡിഗ്രി), പ്രൊഫഷണല്‍ ഡിപ്ലോമ ഇന്‍ ഹോസ്പിറ്റല്‍ അഡ്മിനിസ്ട്രേഷന്‍ (യോഗ്യത-പ്ലസ്ടു), ആറ് മാസം ദൈര്‍ഘ്യമുള്ള ഡിപ്ലോമ ഇന്‍ ഹോസ്പിറ്റല്‍ അഡ്മിനിസ്ട്രേഷന്‍ (യോഗ്യത-എസ് എസ് എല്‍ സി) തുടങ്ങിയ കോഴ്സുകളിലേക്ക് അപേക്ഷ ക്ഷണിച്ചു. ഓണ്‍ലൈന്‍-റെഗുലര്‍-പാര്‍ട്ട്ടൈം ബാച്ചുകളാണുള്ളത്. മികച്ച ഹോസ്പിറ്റലുകളില്‍ ഇന്റേണ്‍ഷിപ്പ് ചെയ്യാന്‍ അവസരവും പ്ലേസ്മെന്റ് അസിസ്റ്റന്‍സും ലഭിക്കും. ഫോണ്‍: 7994449314.

തദ്ദേശസ്വയംഭരണ പൊതുതിരഞ്ഞെടുപ്പ് പൂര്‍ണമായും ഹരിതചട്ടം പാലിച്ചും പരിസ്ഥിതിസൗഹൃദമായും നടത്തുന്നതിന് സംസ്ഥാനതിരഞ്ഞെടുപ്പ് കമ്മിഷന്‍ വിളിച്ചു ചേര്‍ത്ത തദ്ദേശസ്വയംഭരണവകുപ്പിലെ വിവിധ ഏജന്‍സികളുടെ യോഗം തീരുമാനിച്ചു. സംസ്ഥാന തിരഞ്ഞെടുപ്പ് കമ്മിഷണര്‍ എ. ഷാജഹാന്റെ അധ്യക്ഷതയില്‍ നടന്ന യോഗത്തില്‍ ഇതു സംബന്ധിച്ച കര്‍മ്മപരിപാടിക്ക് രൂപം നല്‍കി. പൊതുജനങ്ങള്‍ക്ക് ഇതുമായി ബന്ധപ്പെട്ട നിര്‍ദ്ദേശങ്ങള്‍ ഒക്ടോബര്‍ 10 വരെ സമര്‍പ്പിക്കാം.

താനൂര്‍ ഗവ. റീജണല്‍ ഫിഷറീസ് ടെക്‌നിക്കല്‍ ഹൈസ്‌കൂളിലെ കായിക പരിശീലക തസ്തികയിലേക്കുള്ള അഭിമുഖം സെപ്റ്റംബര്‍ 23ന് രാവിലെ 11ന് പൊന്നാനി ചന്തപ്പടിയിലുളള ഫിഷറീസ് ഡെപ്യൂട്ടി ഡയറക്ടര്‍ ഓഫീസില്‍ നടക്കും. അപേക്ഷകര്‍ ഫുട്‌ബോള്‍ സീനിയര്‍ വിഭാഗത്തില്‍ സ്റ്റേറ്റ് പ്ലേയര്‍ ആയവര്‍ അല്ലെങ്കില്‍  സ്‌പോര്‍ട്‌സ് കൗണ്‍സിലിന്റെ അംഗീകാരമുളള ഫുട്‌ബോള്‍ കോച്ച് ആയിരിക്കണം. സ്‌കൂള്‍ പ്രവൃത്തി സമയത്തിന് ശേഷവും അവധി ദിവസങ്ങളിലും പരിശീലനം നല്‍കണം. താത്പര്യമുളളവര്‍ അസ്സല്‍ രേഖകള്‍ സഹിതം അഭിമുഖത്തിന് ഹാജരാകണം. ഫോണ്‍: 0494 2666428, 9496007031.

കേരള കള്ള് വ്യവസായ തൊഴിലാളി ക്ഷേമനിധി ബോര്‍ഡില്‍ അംഗങ്ങളായ തൊഴിലാളികളുടെ മക്കള്‍ക്കുള്ള 2025 വര്‍ഷത്തെ സ്‌കോളര്‍ഷിപ്പ്, ലാപ്ടോപ്പ് എന്നിവയ്ക്ക് അപേക്ഷ ക്ഷണിച്ചു. ഏട്ടാം ക്ലാസ് മുതല്‍ മുകളിലോട്ടുള്ള ക്ലാസ്സുകളില്‍ പഠിക്കുകയും കഴിഞ്ഞ അധ്യയന വര്‍ഷത്തെ (2024-25) വാര്‍ഷിക പരീക്ഷയില്‍ 70 ശതമാനം മാര്‍ക്ക് നേടി വിജയിച്ചവര്‍ക്കാണ് സ്‌കോളര്‍ഷിപ്പ്. ജില്ലാ വെല്‍ഫെയര്‍ ഫണ്ട് ഇന്‍സ്പെക്ടര്‍ ഓഫീസിലും, യൂണിയന്‍ ഓഫീസുകളിലും അപേക്ഷ ഫോം ലഭ്യമാണ്. അപേക്ഷ സമര്‍പ്പിക്കുന്നതിനുള്ള അവസാന തീയ്യതി ഒക്ടോബര്‍ 15. ഫോണ്‍: 0483 2734827.

നരിപ്പറമ്പ്-പോത്തന്നൂര്‍ റോഡില്‍ ഡ്രൈനേജ് പ്രവൃത്തി നടക്കുന്നതിനാല്‍ ഈ റോഡിലൂടെയുള്ള വാഹന ഗതാഗതം സെപ്റ്റംബര്‍ 18 മുതല്‍ പ്രവൃത്തി തീരുന്നതുവരെ പൂര്‍ണ്ണമായി നിരോധിച്ചു. ചമ്രവട്ടം പാലം വഴി പൊന്നാനിയിലേക്ക് വരുന്ന വാഹനങ്ങള്‍ പഴയ ദേശീയപാത വഴി ചമ്രവട്ടം ജംഗ്ഷനിലേക്കും പൊന്നാനിയില്‍ നിന്നും തിരൂര്‍ ഭാഗത്തേക്ക് വരുന്ന വാഹനങ്ങള്‍ തിരിച്ചും പോകണം.

പേങ്ങാട്-ആലുങ്ങല്‍ റോഡില്‍ പൈപ്പ് ലൈന്‍ ട്രഞ്ച് റീസ്റ്റോറേഷന്‍ പ്രവൃത്തി നടക്കുന്നതിനാല്‍ ഈ റോഡിലൂടെയുള്ള വാഹനഗതാഗതം സെപ്റ്റംബര്‍ 19 മുതല്‍ പ്രവൃത്തി അവസാനിക്കുന്നത് വരെ ഭാഗികമായി നിരോധിച്ചു.

ഉള്‍നാടന്‍ ജലാശയങ്ങളില്‍ ശാസ്ത്രീയമായ രീതിയിലൂടെ മത്സ്യോല്‍പാദനം വര്‍ധിപ്പിച്ച് ഫിഷറീസ് വകുപ്പ്. സാമൂഹിക മത്സ്യകൃഷി, റിസര്‍വോയര്‍ ഫിഷറീസ് പദ്ധതികളിലൂടെ ജില്ലയിലെ മത്സ്യോല്‍പാദനം 2882 മെട്രിക് ടണ്ണില്‍ നിന്ന് 3636 മെട്രിക് ടണ്ണായി വര്‍ധിപ്പിച്ചു. മലിനീകരണത്തിന് പുറമെ അശാസ്ത്രീയവും അനിയന്ത്രിതവുമായ മത്സ്യബന്ധന രീതിയിലൂടെ മത്സ്യസമ്പത്തിലുണ്ടായ ഗണ്യമായ കുറവ് പരിഹരിക്കുന്നതിനാണ് വകുപ്പ് പദ്ധതി നടപ്പാക്കിയത്. ഇതിലൂടെ ഉള്‍നാടന്‍ ജലാശയങ്ങളില്‍ കട്‌ല, റോഹു, മൃഗാള്‍, സൈപ്രിനസ്, നാടന്‍ മത്സ്യങ്ങളായ കല്ലേമുട്ടി, മഞ്ഞക്കൂരി, കാരി, വരാല്‍ കുഞ്ഞുങ്ങളെയാണ് നിക്ഷേപിച്ചത്.