കൊടുമണ്‍ അങ്ങാടിക്കല്‍ റോഡിലെ കുളത്തിനാല്‍ പാലം പുനര്‍ നിര്‍മാണം നടക്കുന്നതിനാല്‍ ഗതാഗതം നിരോധിച്ചതായി അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ അറിയിച്ചു. കൊടുമണ്‍- ഒറ്റത്തേക്ക് വഴിയും കുളത്തിനാല്‍ റോഡ് വഴിയും വാഹനം പോകണം

റോഡ് ടാറിംഗ് നടക്കുന്നതിനാല്‍ ഇടക്കെപടി മുതല്‍ വലിയകാവ്  വരെ ഗതാഗത നിയന്ത്രണം ഏര്‍പ്പെടുത്തിയതായി അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ അറിയിച്ചു.

പെരിങ്ങോട്ടുകുറിശ്ശി ഗ്രാമ പഞ്ചായത്തില്‍ അങ്കണവാടികള്‍ക്ക് കളിക്കോപ്പുകളും വാട്ടര്‍ പ്യൂരിഫയറും വിതരണം ചെയ്തു. 2025-26 വാര്‍ഷിക പദ്ധതിയില്‍ ഉള്‍പ്പെടുത്തി 312000 രൂപ ചെലവഴിച്ച് 26 അങ്കണവാടികള്‍ക്കാണ് സാമഗ്രികള്‍ വിതരണം ചെയ്തത്. പെരിങ്ങോട്ടുകുറിശ്ശി ഗ്രാമ പഞ്ചായത്ത് പ്രസിഡന്റ് എ.പി പ്രമോദ് പരിപാടി ഉദ്ഘാടനം ചെയ്തു.ക്ഷേമ കാര്യ സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ കെ. പ്രീതമോള്‍  അധ്യക്ഷയായി.

പൊല്‍പ്പുള്ളി പ്രാഥമികാരോഗ്യ കേന്ദ്രത്തിലേക്ക് 2026-2027 വര്‍ഷം പാലിയേറ്റീവ് പരിചരണ പ്രവര്‍ത്തനങ്ങള്‍ നടത്തുന്നതിനായി വാഹനം ഓടിക്കുന്നതിന് ഡ്രൈവര്‍ സഹിതം ക്വട്ടേഷന്‍ ക്ഷണിച്ചു. അപേക്ഷിക്കേണ്ട അവസാന തീയതി മാര്‍ച്ച് 26 രാവിലെ 11.30 വരെ. കൂടുതല്‍ വിവരങ്ങള്‍ക്ക് ഫോണ്‍: 9995468971.

ജില്ലാ പഞ്ചായത്തിന്റെ 2025- 26 വര്‍ഷത്തെ ഫണ്ട് ഉപയോഗിച്ച് വ്യവസായ വകുപ്പ് നടപ്പിലാക്കുന്ന  പദ്ധതികളിലേക്ക് ഗുണഭോക്താക്കള്‍ക്ക് അപേക്ഷിക്കാം. എസ് സി വിഭാഗക്കാര്‍ക്കായി നടപ്പിലാക്കുന്ന പദ്ധതിയായ  വനിതാ ഗ്രൂപ്പ് തൊഴില്‍ സംരംഭങ്ങള്‍ , പ്രവാസികള്‍ക്കായി നടപ്പിലാക്കുന്ന പ്രവാസിക്കൊപ്പം( ജനറല്‍), ചെറുകിട വ്യവസായം  വനിതാ പ്രൊജക്ട്  എന്നീ പദ്ധതികളിലേക്കാണ് അപേക്ഷ ക്ഷണിച്ചത്. കൂടുതല്‍ വിവരങ്ങള്‍ ജില്ലാ വ്യവസായകേന്ദ്രത്തില്‍ നിന്ന് ലഭിക്കും. ഫോണ്‍: 0491 2505385, 2505408.

ജില്ലയില്‍ വിവിധ പദ്ധതികളില്‍ വരുന്ന ഒഴിവുകളിലേക്ക് താല്ക്കാലികാടിസ്ഥാനത്തില്‍ വെറ്ററിനറി ഡോക്ടര്‍മാരെ നിയമിക്കുന്നതിന് മാര്‍ച്ച് 12 ന് കൂടിക്കാഴ്ച നടത്തും. ഉദ്യോഗാര്‍ഥികള്‍ വെറ്ററിനറി ബിരുദ സര്‍ട്ടിഫിക്കറ്റും , കേരള വെറ്ററിനറി കൗണ്‍സില്‍ രജിസ്റ്റര്‍ ചെയ്ത സര്‍ട്ടിഫിക്കറ്റുമായി രാവിലെ പത്ത് മുതല്‍ 11.30 വരെ പാലക്കാട് വി എച്ച് റോഡിലുള്ള ജില്ലാ മൃഗ സംരക്ഷണ ഓഫീസറുടെ ചേംബറില്‍ എത്തിച്ചേരണം.

ഗവ വിക്ടോറിയ കോളേജ് പൂര്‍വ്വ വിദ്യാര്‍ഥി കൂട്ടായ്മ ഭാരവാഹികളുടെ യോഗം മാര്‍ച്ച് 13 ഉച്ചയ്ക്ക് രണ്ടിന് നടക്കും. കോളേജിന്റെ സമഗ്ര വികസനവും വിദ്യാര്‍ഥികളുടെ ഉന്നമനവും ലക്ഷ്യമാക്കി കോളേജ് അധികൃതര്‍ നടത്തുന്ന യോഗത്തില്‍ കൂട്ടായ്മയുടെ രണ്ട് ഭാരവാഹികള്‍ വീതം പങ്കെടുക്കണമെന്ന് പ്രിന്‍സിപ്പല്‍ അറിയിച്ചു.

പെരുമാട്ടി ഗ്രാമപഞ്ചായത്തിന്റെ വസ്തുക്കള്‍ (വണ്ടിത്താവളം ആഴ്ച്ച ചന്ത നടത്തുന്നതിനുള്ള അവകാശം) 2026-27 സാമ്പത്തിക വര്‍ഷത്തില്‍ കൈവശം വെച്ച് ഉപയോഗിക്കുന്നതിനുള്ള അവകാശം മാര്‍ച്ച് 18 ബുധനാഴ്ച്ച രാവിലെ 11ന് ലേലം ചെയ്യുന്നു. കൂടുതല്‍ വിവരങ്ങള്‍ ഗ്രാമപഞ്ചായത്ത് ഓഫീസില്‍ നേരിട്ടോ  www.tenders.kerala.gov.in  ലോ ലഭിക്കുമെന്ന് ഗ്രാമപഞ്ചായത്ത് സെക്രട്ടറി അറിയിച്ചു.