ജില്ലയിലെ പൊതുസ്ഥലങ്ങളിലെയും ബസ്സ്‌സ്റ്റാന്റുകളിലെയും സര്‍ക്കാര്‍ ഓഫീസ് കോമ്പൗണ്ടുകളിലെയും എല്ലാ പരസ്യങ്ങളും മാര്‍ച്ച് 21നകം നീക്കം ചെയ്യാന്‍ ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ മീര്‍ മുഹമ്മദലി നിര്‍ദ്ദേശം നല്‍കി. തെരഞ്ഞെടുപ്പ് പെരുമാറ്റച്ചട്ടം കര്‍ശനമായി നടപ്പിലാക്കുന്നതിന്റെ ഭാഗമായാണ് ഈ നടപടി. കലക്ടറുടെ ചേമ്പറില്‍ ചേര്‍ന്ന തെരഞ്ഞെടുപ്പ് ഉദ്യോഗസ്ഥരുടെ യോഗത്തിലാണ് കലക്ടര്‍ ഈ നിര്‍ദേശം നല്‍കിയത്. 

പരീക്ഷാഭവൻ മെയ് 16 മുതൽ 23 വരെ നടത്തുന്ന എൽ.പി/യു.പി. അറബിക്/ഉറുദു/സംസ്‌കൃതം ഭാഷാദ്ധ്യാപക യോഗ്യതാപരീക്ഷയ്ക്ക് ലഭിച്ച അപേക്ഷകളിൽ അപാകത കണ്ടെത്തിയിട്ടുള്ളവരുടെ ലിസ്റ്റ് പരീക്ഷാഭവന്റെ www.keralapareekshabhvan.in എന്ന ഔദ്യോഗിക വെബ്‌സൈറ്റിൽ പ്രസിദ്ധപ്പെടുത്തി. അപാകതകൾ പരിഹരിക്കാനാവശ്യമായ രേഖകൾ പരീക്ഷാകേന്ദ്രം മുഖേന ഏപ്രിൽ 10 വൈകിട്ട് അഞ്ചിനു മുമ്പായി പരീക്ഷാഭവനിൽ ലഭ്യമാക്കണമെന്ന് പരീക്ഷാസെക്രട്ടറി അറിയിച്ചു.

പി.എൻ.എക്സ്. 956/19

കേരളാ സ്റ്റേറ്റ് ഇലക്ട്രിസിറ്റി ലൈസൻസിംഗ് ബോർഡ് കേരളത്തിലെ വിവിധ കേന്ദ്രങ്ങളിൽ മേയിൽ നടത്തുന്ന ഇലക്ട്രിക്കൽ വയർമാൻ എഴുത്തുപരീക്ഷയ്ക്ക് അപേക്ഷ ക്ഷണിച്ചു.  പരീക്ഷയ്ക്കുള്ള അപേക്ഷാഫോറവും വിശദവിവരങ്ങളും സിലബസും ജില്ലാ ഇലക്ട്രിക്കൽ ഇൻസ്പെക്ടറുടെ ഓഫീസിലും www.ceikerala.gov.in ലും ലഭ്യമാണ്.

പൂരിപ്പിച്ച അപേക്ഷകൾ നിശ്ചിതരേഖകളോടെ സെക്രട്ടറി, കേരള സ്റ്റേറ്റ് ഇലക്ട്രിസിറ്റി ലൈസൻസിംഗ് ബോർഡ്, ചീഫ് ഇലക്ട്രിക്കൽ ഇൻസ്പെക്ടറുടെ കാര്യാലയം, ഹൗസിംഗ് ബോർഡ് ബിൽഡിംഗ്, തിരുവനന്തപുരം - 695001 എന്ന വിലാസത്തിൽ മാർച്ച് 31 വൈകിട്ട് അഞ്ചിന് മുമ്പ് ലഭിക്കണം.

മലപ്പുറം വേങ്ങര എ.ആർ. നഗറിലെ ആറ് വയസ്സുള്ള കുട്ടിക്ക് വെസ്റ്റ്‌നൈൽ രോഗബാധ സ്ഥരീകരിച്ച സാഹചര്യത്തിൽ ജില്ലയിൽ കനത്ത ജാഗ്രതാ നിർദ്ദേശം നൽകി. നിലവിൽ ആശങ്കപ്പെടേണ്ട സാഹചര്യമില്ലെന്ന് ആരോഗ്യവകുപ്പ് അറിയിച്ചു.

രോഗം സ്ഥിരീകരിച്ച ഉടൻ ആരോഗ്യവകുപ്പിന്റെ നേതൃത്വത്തിൽ സ്റ്റേറ്റ് എപ്പിഡമിയോളജിസ്റ്റ്, ജില്ലാ വെക്ടർ കൺട്രോൾ യൂണിറ്റ് എന്നിവരുടെ വിദഗ്ദ്ധ സംഘം സ്ഥലം പരിശോധിക്കുകയും രോഗം പകരാതിരിക്കാൻ മുൻകരുതൽ സ്വീകരിക്കുകയും ചെയ്തു. പ്രത്യേക മെഡിക്കൽ സംഘം കോഴിക്കോട് മെഡിക്കൽ കോളേജും കുട്ടിയുടെ വീടും പരിശോധിച്ചു. 

എനര്‍ജി മാനേജ്‌മെന്റ്‌ സെന്ററും ശാസ്‌ത്ര സാങ്കേതിക വകുപ്പിന്‌ കീഴില്‍ പ്രവര്‍ത്തിക്കുന്ന സീ-സ്റ്റെഡും സംയുക്തമായി ചേര്‍ന്ന്‌ അരിമ്പൂര്‍ ഗ്രാമപഞ്ചായത്തില്‍ ഊര്‍ജ്ജ സംരക്ഷണ ബോധവല്‍ക്കരണ പരിപാടി സംഘടിപ്പിച്ചു. കാര്‍ഷിക സര്‍വകലാശാല ഫോറസ്‌ട്രി ഡീന്‍ ഡോ. കെ വിദ്യാസാഗര്‍ ഉദ്‌ഘാടനം ചെയ്‌തു. ഗ്രാമപഞ്ചായത്ത്‌ സെക്രട്ടറി എം ജയന്‍ അദ്ധ്യക്ഷത വഹിച്ചു. കെഎസ്‌ഇബി റിട്ട. അസി. എക്‌സിക്യൂട്ടീവ്‌ എഞ്ചിനീയര്‍ കെ രാജന്‍ ബോധവല്‍ക്കരണ ക്ലാസ്‌ നടത്തി. സ്റ്റെഡ്‌ കോര്‍ഡിനേറ്റര്‍ എസ്‌ പ്രീതി സംസാരിച്ചു.

പ്രളയദുരിതാശ്വാസമായി ബന്ധപ്പെട്ട്‌ ജില്ലാ ദുരന്തനിവാരണ അതോറിറ്റി എടുത്ത തീരുമാനത്തിന്മേല്‍ അപ്പീല്‍ പെര്‍മനന്റ്‌ ലോക്‌ അദാലത്തിനാണ്‌. ജില്ലാതല അതോറിറ്റി പുറപ്പെടുവിക്കുന്ന ഉത്തരവിന്മേല്‍ 60 ദിവസത്തിനുളളില്‍ പെര്‍മനന്റ്‌ ലോക്‌ അദാലത്തിനെ സമീപിക്കണമെന്ന്‌ ജില്ലാ ലീഗല്‍ സര്‍വീസസ്‌ അതോറിറ്റി സെക്രട്ടറി അറിയിച്ചു.
 

അറ്റകുറ്റപണികള്‍ നടക്കുന്നതിനാല്‍ മാര്‍ച്ച്‌ 21, 22, 23 ദിവസങ്ങളില്‍ വാട്ടര്‍ അതോറിറ്റിയുടെ നെല്ലിക്കുന്ന്‌ പമ്പ്‌ ഹൗസില്‍ നിന്ന്‌ ജലവിതരണം നടത്തുന്നതല്ല. നടത്തറ, മൂര്‍ക്കനിക്കര, നെല്ലിക്കുന്ന്‌, അഞ്ചേരി, വളര്‍ക്കാവ്‌ എന്നീ മേഖലകളില്‍ പൂര്‍ണ്ണമായും ജലവിതരണം തടസ്സപ്പെടുമെന്ന്‌ അസിസ്റ്റന്റ്‌ എഞ്ചിനീയര്‍ അറിയിച്ചു.

ലോകസഭ തെരഞ്ഞെടുപ്പിനോടനുബന്ധിച്ച്‌ തൃശൂര്‍ നിയോജകമണ്‌ഡലത്തിലെ രാഷ്‌ട്രീയ പാര്‍ട്ടി പ്രതിനിധികളുടെ യോഗം മാര്‍ച്ച്‌ 20 വൈകീട്ട്‌ 3 ന്‌ തൃശൂര്‍ റവന്യൂ ഡിവിഷണല്‍ ഓഫീസറുടെ ചേമ്പറില്‍ ചേരും. ബന്ധപ്പെട്ട രാഷ്‌ട്രീയ പാര്‍ട്ടികളുടെ പ്രതിനിധികള്‍ യോഗത്തില്‍ പങ്കെടുക്കണമെന്ന്‌ അസിസ്റ്റന്റ്‌ റിട്ടേണിങ്‌ ഓഫീസര്‍ അറിയിച്ചു.

ലോകസഭ തെരഞ്ഞെടുപ്പിനോടനുബന്ധിച്ച്‌ ജില്ലാ ഇന്‍ഫര്‍മേഷന്‍ ഓഫീസില്‍ മീഡിയ സര്‍ട്ടിഫിക്കേഷന്‍ ആന്‍ഡ്‌ മോണിറ്ററിങ്‌ കമ്മിറ്റി (എംസിഎംസി) പ്രവര്‍ത്തിപ്പിക്കുന്നതിന്‌ ദിവസ വാടക അടിസ്ഥാനത്തില്‍ 3 എല്‍ഇഡി ടിവി, വീഡിയോ കാപ്‌ച്ചര്‍ ലഭ്യമാക്കുന്നതിന്‌ ക്വട്ടേഷന്‍ ക്ഷണിച്ചു. ക്വട്ടേഷന്‍ സീല്‍ ചെയ്‌ത്‌ കവറില്‍ ജില്ലാ ഇലക്ഷന്‍ ഓഫീസര്‍ ആന്‍ഡ്‌ ജില്ലാ കളക്‌ടര്‍, തൃശൂര്‍ എന്ന മേല്‍വിലാസത്തില്‍ മാര്‍ച്ച്‌ 25 നകം നേരിട്ട്‌ നല്‍കണം. കവറിന്‌ പുറത്ത്‌ 'ലോകസഭാ തിരഞ്ഞെടുപ്പ്‌ 2019 എംസിഎംസി പ്രവര്‍ത്തിനത്തിനു വേണ്ട ഉപകരണങ്ങള്‍ നല്‍കുന്നതിനുളള ക്വട്ടേഷന്‍' എന്നു സൂചിപ്പിക്കണം.

ലോകസഭ തെരഞ്ഞെടുപ്പുമായി ബന്ധപ്പെട്ട്‌ തൃശൂര്‍ ജില്ലയില്‍ ഇതുവരെ 9704 സാമഗ്രികള്‍ ഡിഫെയ്‌സ്‌മെന്റിലൂടെ നീക്കിയതായി ജില്ലാ തെരഞ്ഞെടുപ്പ്‌ ഓഫീസറായ ജില്ലാ കളക്‌ടര്‍ ടി വി അനുപമ അറിയിച്ചു. പ്ലാസ്റ്റിക്‌ നിര്‍മ്മിത ഫ്‌ളസുകളുടെ ഉപയോഗം ഹൈക്കോടതി നിരോധിച്ചതിനാല്‍ ഇത്തരം സാമഗ്രികള്‍ സ്ഥാപിക്കുന്നത്‌ കോടതിലയക്ഷ്യമായി കണക്കാക്കി നിയമ നടപടി സ്വീകരിക്കും. പൊതുനിരത്തുകളില്‍ ചിഹ്നങ്ങള്‍ വരയ്‌ക്കുന്നതും എഴുതുന്നതും നിയമലംഘനമായി കണക്കാക്കി 1984 ലെ പൊതുസ്വത്ത്‌ നാശനഷ്‌ടപ്പെടുത്തുന്നത്‌ തടയല്‍ നിയമപ്രകാരം നിയമനടപടി സ്വീകരിക്കും.