കൊച്ചി: ലഹരിക്കെതിരെ കായിക ലഹരി എന്ന ആശയവുമായി സഹസ്രം 2019 പ്രദര്‍ശനത്തില്‍ ശ്രദ്ധയാകര്‍ഷിച്ച് എക്‌സൈസ് വകുപ്പിന്റെ സ്റ്റാള്‍. വോളീബോള്‍ കോര്‍ട്ട്, കാരം ബോര്‍ഡ്, ഡാര്‍ട്ട് ബോര്‍ഡ് എന്നിങ്ങനെ മനസിനും ശരീരത്തിനും ഉന്മേഷം നല്‍കുന്ന ഗെയിമുകളാണ് സ്റ്റാളില്‍ ഒരുക്കിയിട്ടുള്ളത്. ഒരാള്‍ക്ക് ഓരോ ഗെയിമുകളും മൂന്ന് തവണ വീതം സൗജന്യമായി കളിക്കാം. വിജയികള്‍ക്ക് സമ്മാനമായി മിഠായികളും നല്‍കും.

അങ്കമാലി: അങ്കമാലി ബ്ലോക്ക് പഞ്ചായത്തിന്റെ 2018-19 സാമ്പത്തികവര്‍ഷത്തെ ഭിന്നശേഷിക്കാര്‍ക്കുള്ള  മുച്ചക്ര വാഹനത്തിന്റെ  വിതരണം നടത്തി.  അങ്കമാലി ബ്ലോക്ക് പഞ്ചായത്ത് പ്രസിഡന്റ് പി. ടി. പോള്‍ വിതതരണോദ്ഘാടനം നടത്തി. ബ്ലോക്ക് പഞ്ചായത്ത് വൈസ് പ്രസിഡന്റ് വത്സ സേവ്യര്‍ വിതരണം നടത്തി. ബ്ലോക്ക് പഞ്ചായത്തിന് കീഴിലുള്ള എട്ട്  ഗ്രാമപഞ്ചായത്തുകളില്‍ നിന്ന് അര്‍ഹരായ പതിനൊന്ന് പേര്‍ക്കാണ് മുച്ചക്രവാഹനം ലഭിച്ചത്.  12 ലക്ഷം രൂപയാണ് ഇതിനായി വകയിരുത്തിയത്.  

ഭവന നിർമ്മാണ ബോർഡ് തിരുവനന്തപുരം ജില്ലാ വായ്പാ കുടിശ്ശിക നിവാരണ അദാലത്ത് ഫെബ്രുവരി 28 ന് രാവിലെ 9.30 മുതൽ 5 മണിവരെ വെള്ളയമ്പലം കനകക്കുന്ന്‌കൊട്ടാരത്തിന് എതിർവശമുള്ള കേരള ഗ്രാമ പഞ്ചായത്ത് അസോസിയേഷൻ ഹാളിൽ നടത്തും.

പി.എൻ.എക്സ്. 721/19

2018 നവംബറിൽ നടന്ന ഡി.എഡ്/ഡി.എൽ.എഡ്. ഒന്ന്, മൂന്ന് സെമസ്റ്റർ പരീക്ഷകളുടെ ഫലം പ്രസിദ്ധീകരിച്ചു. ഫലം പരീക്ഷാഭവന്റെ വെബ്‌സൈറ്റിൽ www.keralapareekshabhavan.in ലഭ്യമാണ്. പുനർമൂല്യനിർണയത്തിന് മാർച്ച് അഞ്ച് വരെ അപേക്ഷിക്കാം.

പി.എൻ.എക്സ്. 720/19

2018 ജൂൺ, ജൂലൈ, സെപ്റ്റംബർ, ഒക്‌ടോബർ,നവംബർ, ഡിസംബർ മാസങ്ങളിൽ തിരുവനന്തപുരം, തൃശൂർ കേന്ദ്രങ്ങളിൽ റവന്യൂ ജീവനക്കാർക്കുവേണ്ടി നടത്തിയ ചെയിൻ സർവേ പരീക്ഷാഫലം പ്രസിദ്ധീകരിച്ചു. സർവേ ഡയറക്ടറേറ്റിലും സർവേ വകുപ്പിന്റെ വെബ്‌സൈറ്റിലും (www.dslr.kerala.gov.in) ഫലം പരിശോധനയ്ക്ക് ലഭിക്കും.

പി.എൻ.എക്സ്. 719/19

കെൽട്രോൺ ഐ.ടി.ബിസിനസ്സ് ഗ്രൂപ്പിന്റെ അടിസ്ഥാന സൗകര്യങ്ങൾ വിപുലീകരിക്കുന്നതിനായി തിരുവനന്തപുരം വെള്ളയമ്പലം കെൽട്രോൺ ക്യാമ്പസ്സിൽ പുതിയ ഐ.ടി.ഹബ്ബ് 27 ന് ഉച്ചയ്ക്ക് 12 ന് വ്യവസായ മന്ത്രി ഇ.പി.ജയരാജൻ ഉദ്ഘാടനം ചെയ്യും.

ക്ലൗഡ് കമ്പ്യൂട്ടിംഗ്, സൈബർ സെക്യൂരിറ്റി, ആർട്ടിഫിഷ്യൽ ഇന്റലിജൻസ് തുടങ്ങിയ നവീന സാങ്കേതികവിദ്യ ഉപയോഗിച്ചുള്ള ഐ.ടി. പദ്ധതികൾക്കായുള്ള മികച്ച സജ്ജീകരണങ്ങളാണ് ഐ.ടി.ഹബ്ബിൽ ഒരുക്കിയിരിക്കുന്നത്. അറുപതോളം പ്രൊഫഷണലുകൾക്ക് ജോലി ചെയ്യുന്നതിനുള്ള ക്യാബിനുകൾ, കോൺഫറൻസ് ഹാൾ എന്നിവ ഉൾപ്പെടെയുള്ള സൗകര്യങ്ങൾ ഇവിടെയുണ്ട്.

സൗദി അറേബ്യ ആരോഗ്യമന്ത്രാലയത്തിന്റെ കീഴിലുള്ള വിവിധ ആശുപത്രികളിലേക്ക് നിയമനത്തിന് കൺസൾട്ടന്റ്‌സ്, സ്‌പെഷ്യലിസ്റ്റ് ഡോക്ടർമാരിൽനിന്ന് അപേക്ഷ ക്ഷണിച്ചു. രണ്ട് വർഷം പ്രവൃത്തി പരിചയം ഉള്ളവരാകണം അപേക്ഷകർ. 2019 മാർച്ച് മാസം 4, 5, 6 തിയതികളിൽ ഡൽഹിയിലും 7, 8, 9 തിയതികളിൽ ബാംഗ്ലൂരിലുമാണ് ഇന്റർവ്യു. അപേക്ഷകൾ മാർച്ച് രണ്ടിന് മുമ്പ്  gcc@odepc.in എന്ന മെയിലിൽ അയയ്ക്കണം. കൂടുതൽ വിശദ വിവരങ്ങൾക്ക്  www.odepc.kerala.gov.in ഫോൺ: +91-471-2329440/41/42/43/45. 

പി.എൻ.എക്സ്. 716/19

മുന്നാക്ക സമുദായങ്ങളിലെ സാമ്പത്തികമായി പിന്നാക്കം നിൽക്കുന്ന വിഭാഗങ്ങൾക്ക് സർക്കാർ ഉദ്യോഗങ്ങളിലും വിദ്യാഭ്യാസ സ്ഥാപനങ്ങളിലെ പ്രവേശനത്തിലും നിശ്ചിത ശതമാനം സംവരണം ഉൾപ്പെടെയുള്ള ആനുകൂല്യങ്ങൾ ലഭ്യമാക്കണമെന്ന ശുപാർശകളും നിർദ്ദേശങ്ങളുമടങ്ങിയ റിപ്പോർട്ട് സംസ്ഥാന മുന്നാക്ക കമ്മീഷൻ മുഖ്യമന്ത്രി പിണറായി വിജയന് സമർപ്പിച്ചു.

ജസ്റ്റിസ് എ.വി.രാമകൃഷ്ണപിള്ള ചെയർമാനും ഡോ.വി.എം.ഗോപാലമേനോൻ മെമ്പർ സെക്രട്ടറിയും ഡോ.കുര്യാസ് കുമ്പളക്കുഴി അംഗവുമായ കമ്മീഷനാണ് റിപ്പോർട്ട് നൽകിയത്. കമ്മീഷന്റെ കാലാവധി ഫെബ്രുവരി 24 ന് അവസാനിച്ചു.

പി.എൻ.എക്സ്. 715/19

ട്രഷറി ഡയറക്‌ട്രേറ്റിന്റെ ശിലാസ്ഥാപനം ഇന്ന് (ഫെബ്രുവരി 26) വൈകിട്ട് 3 ന് പട്ടം വില്ലേജ് ഓഫീസിന് സമീപം ധനമന്ത്രി ഡോ.ടി.എം.തോമസ് ഐസക്ക് നിർവ്വഹിക്കും. കെ.മുരളീധരൻ എം.എൽ.എ. അധ്യക്ഷത വഹിക്കും. ഡോ.ശശി തരൂർ എം.പി., മേയർ വി.കെ.പ്രശാന്ത്, അഡീഷണൽ ചീഫ് സെക്രട്ടറി മനോജ് ജോഷി, ധനകാര്യ പ്രിൻസിപ്പൽ സെക്രട്ടറി സഞ്ജീവ് കൗശിക്, വാർഡ് കൗൺസിലർ രമ്യാ രമേശ്, ട്രഷറി ഡയറക്ടർ എ.എം.ജാഫർ എന്നിവർ പങ്കെടുക്കും.

പി.എൻ.എക്സ്. 714/19