വോട്ടെണ്ണല്‍ ജോലികള്‍ക്കായി 900 ജീവനക്കാരെ നിയോഗിച്ചതായി ജില്ലാ കളക്ടര്‍ ഡോ.ഡി സജിത് ബാബു പറഞ്ഞു.

ലോക്‌സഭാ തെരഞ്ഞെടുപ്പ് വോട്ടണ്ണെലിനോടനുബന്ധിച്ച് കര്‍ശന സുരക്ഷ ഒരുക്കിയതായി ജില്ലാ പോലിസ് മേധാവി ജെയിംസ് ജോസഫ് അറിയിച്ചു. പ്രകടനങ്ങള്‍ക്കു പോലിസിന്റെ മുന്‍കൂട്ടിയുള്ള അനുവാദം വാങ്ങണം.ഗുഡ്‌സ് കാരേജ് വാഹനങ്ങള്‍, ഓപ്പണ്‍ ലോറികള്‍ തുടങ്ങിയവയില്‍ ആള്‍ക്കാരെ കൊണ്ടുപോകുന്നതും പ്രകടനങ്ങള്‍ നടത്തുന്നതും അനുവദനീയമല്ല. അത്തരം വാഹനങ്ങളുടെ പെര്‍മ്മിറ്റ് റദ്ദ് ചെയ്യുന്നതടക്കമുള്ള നിയമ നടപടികള്‍ സ്വീകരിക്കും. ആഹ്‌ളാദപ്രകടനങ്ങള്‍ യാതൊരു കാരണവശാലും അതിരുകവിയരുത്. പ്രകടനത്തിനിടെയോ മറ്റോ ആക്രമണങ്ങളില്‍ ഏര്‍പ്പെടുന്നവര്‍ക്കെതിരെ കര്‍ശനമായ നിയമ നടപടികള്‍ സ്വീകരിക്കും.

വോട്ടെണ്ണല്‍ നടക്കുന്ന പടന്നക്കാട് നെഹ്‌റു ആര്‍ട്‌സ് ആന്റ് സയന്‍സ് കോളജില്‍ വോട്ടെണ്ണല്‍ ഡ്യൂട്ടിക്ക് നാളെ(23) നിയോഗിക്കപ്പെട്ട ഉദ്യോഗസ്ഥര്‍ക്കു കുടുംബശ്രീ  ഭക്ഷണം വിതരണം ചെയ്യും. രാവിലെ ആറിനു പ്രഭാത ഭക്ഷണവും   ഉച്ചയ്ക്ക് 12.30 ന് ഉച്ച ഭക്ഷണവുമാണു നല്‍കുന്നത്.കൂടാതെ രാവിലെ  10 ന് കൗണ്ടിങ് ഏജന്റുള്‍പ്പെടെയുള്ളവര്‍ക്കു ചായയും ബിസ്‌ക്കറ്റും സൗജന്യമായി  വോട്ടെണ്ണല്‍ കേന്ദ്രത്തിനകത്തു നല്‍കും.

ലോക്‌സഭാ തെരഞ്ഞെടുപ്പ് ഫലം തത്സമയം ലഭിക്കാന്‍ നാഷണല്‍ ഇന്‍ഫര്‍മാറ്റിക് സെന്ററിന്റെ ട്രെന്‍ഡ് മൊബൈല്‍ ആപ്പ് ഇനി വിരല്‍ തുമ്പില്‍. നാളെ(23) നടക്കുന്ന വോട്ടെണ്ണലിന്റെ ഫലം ഈ ആപ്പ് വഴി പൊതുജനങ്ങള്‍ക്കു തത്സമയം ലഭിക്കും. ഗൂഗിള്‍ പ്ലേസ്റ്റോറില്‍ നിന്ന് വോട്ടെണ്ണല്‍ ദിവസം ട്രെന്‍ഡ് കേരള എന്ന് സെര്‍ച്ച് ചെയ്ത് ഈ ആപ്പ് ഡൗണ്‍ലോഡ് ചെയ്യാം. വോട്ടെണ്ണല്‍ കേന്ദ്രങ്ങളില്‍ എന്‍ഐസിയുടെ ആഭിമുഖ്യത്തില്‍ പ്രത്യേകം സജ്ജമാക്കിയ ടെക്‌നിക്കല്‍ ടീമാണ് ആപ്പിലേക്ക് വിവരങ്ങള്‍ തത്സമയം അപ്‌ലോഡ് ചെയ്യുന്നത്. 

വോട്ടെണ്ണല്‍ ദിനത്തില്‍ ഓരോ നിയോജക മണ്ഡലത്തിലും അനുവദിച്ചിട്ടുള്ള കൗണ്ടിംങ് ടേബിളുകളില്‍ ഓരോന്നിലും കൗണ്ടിംങ് സൂപ്പര്‍വൈസര്‍, കൗണ്ടിംങ് അസിസ്റ്റന്റ് എന്നിവര്‍ക്കൊപ്പം മൈക്രോ ഒബ്‌സര്‍വര്‍മാരും ഉണ്ടാകും. ഇവിഎം, വിവിപാറ്റ്, പോസ്റ്റല്‍ വോട്ട് എന്നിവയുടെ എണ്ണല്‍ നടപടി ക്രമങ്ങള്‍ സൂക്ഷ്മമായി നിരീക്ഷിച്ച്  അതത് ഉപവരണാധികാരികളുടെയും ഒബ്‌സര്‍വര്‍മാരുടെയും ശ്രദ്ധയില്‍പ്പെടുത്തുന്നത് മൈക്രോ ഒബ്‌സര്‍വര്‍മാരാണ്. ട്രെന്‍ഡ്, ഇ-സുവിധ തുടങ്ങിയ  വെബ്‌സൈറ്റുകളിലേക്ക് വിവരങ്ങള്‍ അപ്‌ലോഡ് ചെയ്യുന്നതിന്റെ കൃത്യതയും ഇവര്‍ ഉറപ്പുവരുത്തും. 

വോട്ടെണ്ണല്‍ നിരീക്ഷിക്കുന്ന മൈക്രോ ഒബ്‌സര്‍വര്‍മാര്‍ക്കുള്ള പരിശീലനം കളക്ടറേറ്റ് കോണ്‍ഫറന്‍സ് ഹാളില്‍ നടന്നു.കേന്ദ്ര ഇലക്ഷന്‍ കമ്മീഷന്‍ നിയോഗിച്ച ജനറല്‍ ഒബ്‌സര്‍വര്‍ എസ്.ഗണേഷ്  കൗണ്ടിംഗ് ഒബ്‌സര്‍വര്‍ ഹിമാചല്‍ പ്രദേശ് സ്വദേശി കൃഷ്ണ ചന്ദ്, വരണാധികാരിയായ ജില്ലാ കളക്ടര്‍  ഡോ.ഡി.സജിത് ബാബു എന്നിവര്‍ സംസാരിച്ചു. ട്രെയിനിങ് നോഡല്‍ ഓഫീസര്‍ കെ വിനോദ് കുമാര്‍ ക്ലാസെടുത്തു. ഇലക്ഷന്‍ വിഭാഗം ജൂനിയര്‍ സൂപ്രണ്ട് ഗോവിന്ദന്‍ എസ് സംസാരിച്ചു. തെരഞ്ഞെടുപ്പ് പ്രക്രിയയില്‍ ഇതുവരെ മണ്ഡലത്തില്‍ മൈക്രോ ഒബ്‌സര്‍വര്‍മാര്‍ നടത്തിയ പ്രവര്‍ത്തനം പ്രശംസനീയമാണെന്ന് ജനറല്‍ ഒബ്‌സര്‍വര്‍ എസ്.ഗണേഷ്  പറഞ്ഞു. 
 

    വോട്ടെണ്ണല്‍ കേന്ദ്രമായ മാര്‍ ഇവാനിയോസ് വിദ്യാനഗറില്‍ പ്രവര്‍ത്തിക്കുന്ന എല്ലാ വിദ്യാഭ്യാസ സ്ഥാപനങ്ങള്‍ക്കും വോട്ടെണ്ണല്‍ ദിനമായ നാളെ (മേയ് 23) ജില്ലാ കളക്ടര്‍ അവധി പ്രഖ്യാപിച്ചു.
(പി.ആര്‍.പി. 580/2019)

    ലോക്‌സഭാ തെരഞ്ഞെടുപ്പിനുള്ള വോട്ടെണ്ണല്‍ കേന്ദ്രത്തിലേക്കുള്ള പ്രവേശനത്തിന് കര്‍ശന നിയന്ത്രണമുണ്ടെന്ന് ജില്ലാ കളക്ടര്‍ ഡോ. കെ. വാസുകി അറിയിച്ചു. വോട്ടെണ്ണല്‍ ജോലിക്കു നിയോഗിച്ചിട്ടുള്ള ഉദ്യോഗസ്ഥര്‍, സ്ഥാനാര്‍ഥി, ചീഫ് കൗണ്ടിങ് ഏജന്റ്, വരണാധികാരിയില്‍നിന്നോ ഉപ വരണാധികാരിയില്‍നിന്നോ അനുമതി പത്രം ലഭിച്ചിട്ടുള്ള കൗണ്ടിങ് ഏജന്റുമാര്‍, തെരഞ്ഞെടുപ്പ് കമ്മിഷന്‍ നല്‍കുന്ന പാസ് ലഭിച്ചിട്ടുള്ള മാധ്യമ പ്രവര്‍ത്തകര്‍ എന്നിവരെ മാത്രമേ വോട്ടെണ്ണല്‍ കേന്ദ്രത്തിലേക്കു പ്രവേശിപ്പിക്കൂ. വോട്ടെണ്ണല്‍ കേന്ദ്രത്തിനുള്ളില്‍ മൊബൈല്‍ ഫോണ്‍ അനുവദിക്കില്ല.