പുരാവസ്‌തു വകുപ്പ്‌ ശക്തന്‍ തമ്പുരാന്‍ കൊട്ടരത്തില്‍ 1.75 കോടി രൂപ വിനിയോഗിച്ച്‌ പൂര്‍ത്തീകരിച്ച പദ്ധതികളുടെ സമര്‍പ്പണവും 5 കോടി രൂപയുടെ പുതിയ പ്രവര്‍ത്തനോദ്‌ഘാടനം ഫെബ്രുവരി 25 രാവിലെ 10 ന്‌ പുരാരേഖ-മ്യൂസിയം വകുപ്പ്‌ മന്ത്രി രാമചന്ദ്രന്‍ കടന്നപ്പളളി നിര്‍വഹിക്കും. കൃഷി വകുപ്പ്‌ മന്ത്രി അഡ്വ. വി എസ്‌ സുനില്‍കുമാര്‍ നിര്‍വഹിക്കും. മേയര്‍ അജിത വിജയന്‍, സി എന്‍ ജയദേവന്‍ എംപി എന്നിവര്‍ മുഖ്യാതിഥിയാകും. ഡെപ്യൂട്ടി മേയര്‍ പി റാഫി ജോസ്‌, സ്റ്റാന്‍ഡിങ്‌ കമ്മിറ്റിയംഗങ്ങളായ ഷീബ ബാബു, എം എല്‍ റോസി, ഫ്രാന്‍സിസ്‌ ചാലിശ്ശേരി, ഷീന ചന്ദ്രന്‍, പി സുകുമാരന്‍, ലാലി ജെയിംസ്‌ തുടങ്ങിയവര്‍ ആശംസ നേരും.

  വിനോദ സഞ്ചാരികളെ ഉത്തരമലബാറിലേക്ക് ആകർഷിക്കുന്ന ഏറ്റവും വലിയ വിനോദസഞ്ചാര വികസന പദ്ധതിയായി മലനാട് - മലബാർ റിവർ ക്രൂയിസ് പദ്ധതിയെ മാറ്റുമെന്ന് ടൂറിസം വകുപ്പ് മന്ത്രി കടകംപള്ളി സുരേന്ദ്രൻ. മംഗലശ്ശേരി ബോട്ട് റേസ് പവലിയന്റെയും, പഴയങ്ങാടി റിവർവ്യൂ പാർക്കിന്റെയും ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. ലോകത്തിലെ തന്നെ ഏറ്റവും നീളം കൂടിയ ജലയാത്ര വിനോദ സഞ്ചാര പദ്ധതിയാണ് മലനാട് - മലബാർ റിവർ ക്രൂയിസ് പദ്ധതിയെന്നും മന്ത്രി പറഞ്ഞു. 

വിധവകളായ സ്‌ത്രീകളുടെ കുടുംബത്തിന്റെ ഭാവി സുരക്ഷിതമാക്കുന്നതിനായി അവരുടെ കുട്ടികള്‍ക്ക്‌ പഠനധനസഹായം നല്‍കുന്ന 'പടവുകള്‍' പദ്ധതിയുടെ ജില്ലാതല കമ്മിറ്റി യോഗം ഫെബ്രുവരി 25 വൈകീട്ട്‌ 4 ന്‌ ജില്ലാ കളക്‌ടറുടെ ചേമ്പറില്‍ ചേരും.

ഒല്ലൂക്കര ബ്ലോക്ക്‌ പഞ്ചായത്തിന്റെ കമ്മ്യൂണിറ്റി കം ഡേ കെയര്‍ സെന്ററിലേക്ക്‌ ആവശ്യമായ ഉപകരണങ്ങള്‍ വാങ്ങുന്നതിന്‌ ടെണ്ടര്‍ ക്ഷണിച്ചു. ടെണ്ടര്‍ സ്വീകരിക്കുന്ന അവസാന തീയതി ഫെബ്രുവരി 28. കൂടുതല്‍ വിവരങ്ങള്‍ക്ക്‌ ഫോണ്‍ : 0487-2375756.

കോള്‍ നിലങ്ങളിലെ ജലം ക്രമാതീതമായി താഴ്‌ന്നതുകൊണ്ട്‌ കുറുമാലി പുഴയിലും കരുവന്നൂര്‍ പുഴയിലും കോള്‍നിലങ്ങളിലും പ്രവര്‍ത്തിച്ചുകൊണ്ടിരിക്കുന്ന ലിഫ്‌റ്റ്‌ ഇറിഗേഷന്‍ പദ്ധതികള്‍ അടിയന്തിരമായി നിര്‍ത്തിവെക്കണമെന്ന്‌ തൃശൂര്‍ ഇറിഗേഷന്‍ ഡിവിഷന്‍ എക്‌സിക്യൂട്ടീവ്‌ എഞ്ചീനിയര്‍ അറിയിച്ചു.

സംസ്ഥാനത്തെ തെരുവ് വീഥികൾ സൗഹൃദ വീഥികളാക്കി സംരക്ഷിക്കുമെന്ന് ടൂറിസം വകുപ്പ് മന്ത്രി കടകംപള്ളി സുരേന്ദ്രൻ പറഞ്ഞു. കേരള വിനോദ സഞ്ചാര വകുപ്പ് നടപ്പിലാക്കുന്ന പദ്ധതിയിൽ ഉൾപ്പെടുത്തി  ധർമ്മശാല മുതൽ പറശ്ശിനിക്കടവ് വരെ നവീകരിച്ച സൗഹൃദ വീഥയുടെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. 

പരിശീലനം പൂര്‍ത്തിയാക്കിയ അസിസ്റ്റന്റ്‌ മോട്ടോര്‍ വെഹിക്കിള്‍ ഇന്‍സ്‌പെക്‌ടര്‍മാരുടെ പാസിങ്‌ ഔട്ട്‌ പരേഡ്‌ ഫെബ്രുവരി 25 രാവിലെ 7.30 ന്‌ രാമവര്‍മ്മപുരം കേരള പോലീസ്‌ അക്കാദമിയില്‍ നടക്കും. ഗതാഗത വകുപ്പ്‌ മന്ത്രി എ കെ ശശീന്ദ്രന്‍ സല്യൂട്ട്‌ സ്വീകരിക്കും. പരിശീലന കാലയളവില്‍ മികച്ച പ്രകടനം കാഴ്‌ചവച്ചവര്‍ക്കുളള പുരസ്‌ക്കാരങ്ങളും മന്ത്രി വിതരണം ചെയ്യും. ട്രാന്‍സ്‌പോര്‍ട്ട്‌ കമ്മീഷണര്‍ എ.ഡി.ജി.പി. സൂധേഷ്‌കുമാര്‍, കേരള പോലീസ്‌ അക്കാദമി ഡയറക്‌ടര്‍ ആന്‍ഡ്‌ എ.ഡി.ജി.പി. ട്രെയിനിങ്ങ്‌ ഡോ.ബി.സന്ധ്യ എന്നിവരും അഭിവാദ്യം സ്വീകരിക്കും. പോലീസ-മോട്ടോര്‍ വാഹന വകുപ്പ്‌ ഉദ്യോഗസ്ഥര്‍ പങ്കെടുക്കും.

സംസ്ഥാന സര്‍ക്കാരിന്റെ 1000 ദിനാഘോഷത്തോടനുബന്ധിച്ച്‌ കുട്ടനെല്ലൂര്‍ ഗവ. കോളേജില്‍ ഫെബ്രുവരി 25 മുതല്‍ 27 വരെ അതിജീവനം ഡോക്യുമെന്ററി ഫെസ്റ്റ്‌ നടത്തും. ഇന്‍ഫര്‍മേഷന്‍ പബ്ലിക്‌ റിലേഷന്‍സ്‌ വകുപ്പ്‌, ജില്ലാ ഭരണകൂടം, ലൈബ്രറി കൗണ്‍സില്‍, സി. അച്യുതമേനോന്‍ ഗവ. കോളേജ്‌, ചേതന മീഡിയ ഇന്‍സ്‌റ്റിറ്റിയൂട്ട, നവചിത്ര ഫിലിം സൊസൈറ്റി എന്നിവയുടെ ആഭിമുഖ്യത്തിലാണ്‌ ഡോക്യുമെന്ററി ഫെസ്റ്റ്‌ സംഘടിപ്പിക്കുന്നത്‌. 25 ന്‌ രാവിലെ 10 ന്‌ കോളേജ്‌ സെമിനാര്‍ ഹാളില്‍ മേയര്‍ അജിത വിജയന്‍ ഉദ്‌ഘാടനം ചെയ്യും. കൗണ്‍സിലര്‍ എം.എന്‍. ശശിധരന്‍ അധ്യക്ഷത വഹിക്കും.

പെരിങ്ങോട്ടുകര ശ്രീ. സോമശേഖര ക്ഷേത്രത്തിലെ പൂരാഘോഷത്തോടനുബന്ധിച്ച്‌ തെക്ക്‌ വിഭാഗത്തിന്റെ വെടിക്കെട്ട്‌ പൊതുപ്രദര്‍ശനത്തിന്‌ അനുമതിയില്ലെന്ന്‌ ജില്ലാ കളക്‌ടര്‍ അറിയിച്ചു. അപേക്ഷയനുസരിച്ചുളള അവശ്യവിവരങ്ങല്‍ നല്‍കാന്‍ അപേക്ഷകന്‌ കഴിയാത്തതിനെ തുടര്‍ന്നാണ്‌ അപേക്ഷ നിരസിച്ചത്‌. നിയമാനുസൃത അനുമതിയില്ലാത്ത വെടിക്കെട്ട്‌ നടത്തുന്നത്‌ നിരോധിതവും ശിക്ഷാര്‍ഹവുമാണ്‌. വെടിക്കെട്ട്‌ പൊതുപ്രദര്‍ശനം നടക്കാതെ നോക്കാന്‍ നടപടിയെടുക്കണമെന്നും റൂറല്‍ ജില്ലാ പോലീസ്‌ മേധാവിക്ക്‌ ജില്ലാ കളക്‌ടര്‍ നിര്‍ദ്ദേശം നല്‍കി.

സംസ്ഥാന സര്‍ക്കാരിന്റെ ആയിരം ദിന കര്‍മ്മ പരിപാടികളുടെ ഭാഗമായി വെള്ളാങ്കല്ലൂര്‍ ബ്ലോക്ക്‌ പഞ്ചായത്തിനു കീഴിലെ പൂമംഗലം മാരാത്ത്‌ കോളനിയില്‍ പട്ടികജാതി പട്ടികവര്‍ക്ഷ വിഭാഗത്തില്‍ പെട്ടവര്‍ക്കായി വിജ്ഞാനവാടി പ്രവര്‍ത്തനമാരംഭിക്കുന്നു. സംസ്ഥാന പട്ടികജാതി വകുപ്പാണ്‌ പോലീസ്‌ കണ്‍സ്‌ട്രക്ഷന്‍ കോര്‍പ്പറേഷന്‍ വഴി വിജ്ഞാനവാടിക്ക്‌ തുടക്കമിടുന്നത്‌. പട്ടികജാതി വിഭാഗത്തില്‍പ്പെട്ട വിദ്യാര്‍ത്ഥികളുടെയും യുവജനങ്ങളുടെയും വിദ്യാഭ്യാസ വൈജ്ഞാനിക മേഖലയിലെ മുന്നേറ്റമാണ്‌ ഇതുകൊണ്ട്‌ ലക്ഷ്യമിടുന്നത്‌.