ജില്ലയില്‍ പ്രശ്ന സാധ്യത ബൂത്തുകളില്‍ സ്വതന്ത്രവും നിര്‍ഭയവുമായ വോട്ടെടുപ്പ് ഉറപ്പാക്കാന്‍ പ്രത്യേക ക്രമീകരണങ്ങളും സുരക്ഷാ സംവിധാനങ്ങളും ഒരുക്കിയതായി ജില്ലാ കലക്ടര്‍ അറിയിച്ചു. ഏറ്റവുമധികം പ്രശ്നങ്ങള്‍ ഉണ്ടാകാന്‍ സാധ്യതയുള്ള വൈകിട്ട് നാല് മണി മുതല്‍ ആറ് മണിവരെയുളള്ള സമയം പ്രശ്നസാധ്യത ബൂത്തുകള്‍ പ്രത്യേക സ്‌ക്വാഡിന്റെ നിരീക്ഷണത്തിലായിരിക്കും. വെബ്കാസ്റ്റ്, വീഡിയോ ചിത്രീകരണം എന്നിവക്ക് പുറമെയാണ് പ്രത്യേക നിരീക്ഷണ സ്‌ക്വാഡിനെയും നിയോഗിച്ചിട്ടുള്ളത്. 

ലോക്സഭാ തെരഞ്ഞെടുപ്പിനുള്ള വോട്ടെടുപ്പിന് ജില്ലയില്‍ എല്ലാ ഒരുക്കങ്ങളും പൂര്‍ത്തിയായി. സ്വതന്ത്രവും സമാധാനപരവുമായ വോട്ടെടുപ്പ് ഉറപ്പാക്കാനാവശ്യമായ എല്ലാ ക്രമീകരണങ്ങളും ഒരുക്കിയതായി ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ മീര്‍ മുഹമ്മദലി അറിയിച്ചു. ഏപ്രില്‍ 23 രാവിലെ 7 മണി മുതല്‍ വൈകിട്ട് 6 മണി വരെയാണ് പോളിംഗ്. 

ജില്ലയില്‍ 11 നിയമസഭാ മണ്ഡലങ്ങളിലായി പ്രവാസി വോട്ടര്‍മാരടക്കം ആകെ 1964454 പേരാണുള്ളത്. 10,40,028 സ്ത്രീകളും 9,24,421 പുരുഷന്‍മാരും 5 ട്രാന്‍സ്ജെന്ററുമാണ്. 6494 സര്‍വ്വീസ് വോട്ടര്‍മാരുമുണ്ട്. ഇതില്‍ 6278 പുരുഷന്‍മാരും 216 സ്ത്രീകളുമാണ്.

 
ഭിന്നശേഷിക്കാര്‍ക്ക് പോളിംഗ് ബൂത്തുകളില്‍ എത്തുന്നതിന് വാഹനസൗകര്യം ഏര്‍പ്പെടുത്തുന്നത് റൂട്ട് ഓഫീസര്‍മാരും പി.ഡബ്ലു.ഡി വെല്‍ഫെയര്‍ ഓഫീസര്‍മാരും വഴിയാണ്. നേരത്തെ വാഹനസൗകര്യത്തിന് അപേക്ഷിച്ചവര്‍ക്ക് ഇതിനകം വാഹനം ഏര്‍പ്പാട് ചെയ്തിട്ടുണ്ട്. ഇനി വാഹന സൗകര്യം ആവശ്യമുള്ള ഭിന്നശേഷിക്കാരുണ്ടെങ്കില്‍ അതത് ബൂത്ത് ലെവല്‍ ഓഫീസര്‍മാരെ ബന്ധപ്പെട്ട് പി.ഡബ്ലു.ഡി വെല്‍ഫെയര്‍ ഓഫീസര്‍മാരുടെയും റൂട്ട് ഓഫീസര്‍മാരുടെയും നമ്പര്‍ ലഭ്യമാക്കി വിളിച്ചറിയിച്ചാല്‍ വാഹന സൗകര്യം ഏര്‍പ്പെടുത്തുമെന്ന് ജില്ലാ തെരഞ്ഞെടുപ്പ് ഓഫീസര്‍ അറിയിച്ചു. 

കെ.എസ്.ആർ.ടി.സി സർവീസുകൾ റദ്ദുചെയ്തുവെന്ന വാർത്ത അടിസ്ഥാനരഹിതമാണെന്ന് എക്‌സിക്യൂട്ടീവ് ഡയറക്ടർ (ഓപ്പറേഷൻസ്) അറിയിച്ചു.  നിലവിൽ ഓടിക്കൊണ്ടിരിക്കുന്ന എല്ലാ ഷെഡ്യൂളുകളും കൃത്യമായി സർവീസ് നടത്തുന്നതായിരിക്കും.  യാത്രക്കാർക്ക് കൂടുതൽ പ്രയോജനം ലഭിക്കുന്ന രീതിയിൽ ചില ഷെഡ്യൂളുകളുടെ സമയക്രമം ചിട്ടപ്പെടുത്തുന്ന ജോലി മാത്രമാണ് നടത്തിയിട്ടുള്ളത്.  നിലവിൽ കാട്ടാക്കടയിൽ നിന്നും ഗുരുവായൂരിലേക്ക് സർവീസ് നടത്തുന്ന സൂപ്പർഫാസ്റ്റ് നിർത്തലാക്കി എന്ന ചില കേന്ദ്രങ്ങളിൽ നിന്നുള്ള പ്രചരണവും സത്യവിരുദ്ധമാണെന്ന് അദ്ദേഹം വാർത്താക്കുറിപ്പിൽ അറിയിച്ചു.

പി.എൻ.എക്സ്. 1149/19

ലോക്സഭാ തെരഞ്ഞെടുപ്പിനോടനുബന്ധിച്ച് പരസ്യപ്രചാരണം അവസാനിക്കുന്ന ഇന്ന് (ഏപ്രില്‍ 21) വൈകീട്ട് ആറ് മുതല്‍ വോട്ടെടുപ്പ് കഴിയുന്നത് വരെ ജില്ലയില്‍ പൊതുപരിപാടികളോ റാലികളോ സംഘടിപ്പിക്കുന്നത് വിലക്കി ജില്ലാ കലക്ടര്‍ ഉത്തരവായി. ഇത് കര്‍ശനമായി പാലിക്കപ്പെടുന്നുണ്ടോ എന്ന് പരിശോധിക്കാന്‍ ജില്ലാ പൊലീസ് മേധാവിമാര്‍, ഫ്ളെയിങ് സ്‌ക്വാഡുകള്‍, സ്റ്റാറ്റിക് സര്‍വലന്‍സ് ടീമുകള്‍ എന്നിവര്‍ക്ക് കലക്ടര്‍ നിര്‍ദ്ദേശം നല്‍കി.

സമാധാനാന്തരീക്ഷം ഉറപ്പാക്കുന്നതിനായി ലോക്സഭാ തെരഞ്ഞെടുപ്പ് ദിവസമായ ഏപ്രില്‍ 23 ന് വൈകീട്ട് ആറ് മുതല്‍ 24 ന് രാത്രി 10 വരെ വടകര നഗരസഭ, ഒഞ്ചിയം, നാദാപുരം, പേരാമ്പ്ര, കുന്നുമ്മല്‍ ഗ്രാമപഞ്ചായത്തുകള്‍ എന്നിവിടങ്ങളില്‍ ക്രിമിനല്‍ നടപടി ചട്ടം 144 പ്രകാരം ജില്ലാ കലക്ടര്‍ സാംബശിവ റാവു നിരോധനാജ്ഞ പ്രഖ്യാപിച്ചു. ജനങ്ങള്‍ സംഘം ചേരുകയോ കൂട്ടംകൂടുകയോ ചെയ്യാന്‍ പാടില്ല.
 

കണ്ണൂര്‍ കെഎപി നാലാം ബറ്റാലിയനില്‍ ക്യാമ്പ് ഫോളോവര്‍ തസ്തികയില്‍ നിലവിലുള്ള ഒഴിവുകളിലേക്ക് ദിവസവേതനാടിസ്ഥാനത്തില്‍ നിയമനം നടത്തുന്നതിനായി ഏപ്രില്‍ 25 ന് രാവിലെ 11 മണി മുതല്‍ കെഎപി ബറ്റാലിയനില്‍ കൂടിക്കാഴ്ച നടത്തും.  കുക്ക്, ധോബി, ബാര്‍ബര്‍, വാട്ടര്‍ കാരിയര്‍ എന്നീ തസ്തികളിലാണ് നിയമനം.  മുന്‍പരിചയം ഉള്ള പുരുഷന്‍മാര്‍ രാവിലെ 10.30 ന് മാങ്ങാട്ടുപറമ്പ് കെഎപി നാലാം ബറ്റാലിയന്‍ ആസ്ഥാനത്ത് ആധാര്‍ കാര്‍ഡിന്റെ പകര്‍പ്പ് സഹിതം ഹാജരാകണം.

ലോക്സഭ തെരഞ്ഞെടുപ്പിന് മുന്നോടിയായി ജില്ലയിലെ സെക്ടര്‍/ സോണല്‍ മജിസ്ട്രേറ്റുമാര്‍ക്ക് പരിശീലനം നല്‍കി. ജില്ലാപഞ്ചായത്ത് കോണ്‍ഫറന്‍സ് ഹാളില്‍ നടന്ന പരിപാടിയില്‍ മുഴുവന്‍ മണ്ഡലങ്ങളിലേയും സെക്ടര്‍ മജിസ്ട്രേറ്റുമാരായി നിയോഗിക്കപ്പെട്ട ഉദ്യോഗസ്ഥര്‍ പങ്കെടുത്തു. തെരഞ്ഞെടുപ്പ് കമ്മീഷന്റെ സംസ്ഥാനതല മാസ്റ്റര്‍ ട്രെയിനര്‍ പി പ്രേംരാജ് ക്ലാസെടുത്തു.