നമ്പ്യാപുറത്ത് റോഡ് ഉദ്ഘാടനം ചെയ്തു

കഴിഞ്ഞ നാലു വർഷത്തിനിടെ 11 കോടിയുടെ വികസന പ്രവർത്തനങ്ങളാണ് സർക്കാർ ചേളന്നൂർ ഗ്രാമപഞ്ചായത്തിൽ നടപ്പിലാക്കിയതെന്ന് വനം-വന്യജീവി സംരക്ഷണ വകുപ്പ് മന്ത്രി എ കെ ശശീന്ദ്രൻ. ചേളന്നൂർ ഗ്രാമപഞ്ചായത്തിലെ നമ്പ്യാപുറത്ത് റോഡിന്റെ ഉദ്ഘാടനം നിർവഹിക്കുകയായിരുന്നു മന്ത്രി.  മാറിവരുന്ന കാലത്തിന്റെ ആവശ്യകത കൂടി പരിഗണിച്ചാണ് സർക്കാർ വികസന പ്രവർത്തനങ്ങൾ ആവിഷ്കരിക്കുന്നതെന്നും മന്ത്രി പറഞ്ഞു. 

നന്മണ്ട ഗ്രാമപഞ്ചായത്തിലെ കൊളത്തൂർ ഇരിങ്ങത്ത് മീത്തൽ അംബേദ്‌കർ ഗ്രാമത്തിലെ വിവിധ വികസന പ്രവൃത്തികളുടെ ഉദ്ഘാടനം വനം-വന്യജീവി സംരക്ഷണ വകുപ്പ് മന്ത്രി എ കെ ശശീന്ദ്രൻ നിർവഹിച്ചു. പട്ടികജാതി വികസന വകുപ്പിന്റെ 2022-23 വർഷത്തെ അംബേദ്കർ ഗ്രാമം പദ്ധതിയിൽ ഉൾപ്പെടുത്തി ഒരു കോടി രൂപ ചെലവിലാണ് നവീകരണ പ്രവർത്തനങ്ങൾ നടത്തുക. 

പൊതുവിദ്യാഭ്യാസ വകുപ്പും സ്കോൾ കേരളയും സംയുക്തമായി നടത്തുന്ന ഡിപ്ലോമ ഇൻ ചൈൽഡ് കെയർ ആൻഡ് പ്രീ സ്കൂൾ മാനേജ്മെന്റ് (ഡി സി പി എം ) കോഴ്സിന്റെ ഭാഗമായി ' 'ശൈശവകാല വിദ്യാഭ്യാസത്തിന്റെ പ്രസക്തി' എന്ന വിഷയത്തിൽ റിട്ട. ഡയറ്റ് പ്രിൻസിപ്പൽ ഡോ. അബ്ബാസ് അലി ക്ലാസ്സ്‌ നയിച്ചു. മലപ്പുറം ഗവൺമെന്റ് എൽ പി സ്കൂളിൽ നടന്ന പരിപാടി സ്കോൾ കേരള ജില്ലാ കോ-ഓഡിനേറ്റർ എം വി വിനോദ് ഉദ്ഘാടനം ചെയ്തു. എം. സിന്ധു അധ്യക്ഷത വഹിച്ചു. സ്കോൾ കേരള എക്‌സിക്യൂട്ടീവ് അസിസ്റ്റന്റ് എം. മുഹമ്മദ്‌, ഇൻസ്ട്രക്റ്റർമാരായപി കെ പ്രേമലത, കെ. സരിത, ടി ഫസീല തുടങ്ങിയവർ സംസാരിച്ചു. ഇ. ജുനൈഫ സ്വാഗതവും ആനന്ദവല്ലി നന്ദിയും പറഞ്ഞു.

താനൂർ മണ്ഡലത്തിൽ ഏഴു റോഡുകൾ നാടിന് സമർപ്പിച്ചു 

 ചെറിയമുണ്ടം- മൂച്ചിക്കൽ-കാന്തള്ളൂർ തോട് റോഡ് ആദ്യഘട്ടം ഉദ്ഘാടനം കായിക- ന്യൂനപക്ഷ ക്ഷേമ- വകുപ്പ് മന്ത്രി വി.അബ്ദുറഹ്മാൻ നിർവഹിച്ചു. താനൂർ മണ്ഡലത്തിലെ ചെറിയമുണ്ടം പറപ്പൂതടം പ്രദേശത്ത് റോഡില്ലാതെ ദുരിതമനുഭവിക്കുന്ന ഇരുപതോളം കുടുംബങ്ങളുടെ ചിരകാല സ്വപ്നമാണ് ഇതോടെ പൂവണിയുക. വികസനം താഴെ തട്ടിലെത്തുമ്പോഴാണ് ജനാധിപത്യം പൂർണത കൈവരിക്കുന്നതെന്ന് ഉദ്ഘാടന പ്രസംഗത്തിൽ മന്ത്രി പറഞ്ഞു. റോഡ് പൂർത്തീകരിക്കാൻ ആവശ്യമായ തുക അടുത്ത ഘട്ടങ്ങളിലായി അനുവദിക്കുമെന്ന് മന്ത്രി ഉറപ്പു നൽകി. 

ഇന്ത്യയില്‍ത്തന്നെ ആദ്യമായി ജല ബജറ്റ് തയാറാക്കുന്ന കോര്‍പ്പറേഷന്‍ എന്ന നേട്ടം ഇനി കണ്ണൂര്‍ കോര്‍പ്പറേഷന് സ്വന്തം. ഹരിത കേരള മിഷന്റെ നേതൃത്വത്തില്‍ തയാറാക്കിയ ജല ബജറ്റ് സെപ്റ്റംബര്‍ 23 ന് മേയര്‍ മുസ്ലിഹ് മഠത്തില്‍ പ്രകാശനം ചെയ്യും. ശുദ്ധജല സ്രോതസുകള്‍ കുറഞ്ഞുവരികയും ജല ഉപഭോഗം വര്‍ധിച്ചുവരികയും ചെയ്യുന്ന സാഹചര്യത്തില്‍, ജലലഭ്യതയെയും ഉപയോഗത്തെയും കുറിച്ചുള്ള ഡാറ്റ അവതരിപ്പിച്ചുകൊണ്ട് പൗരന്മാരെ ജലസാക്ഷരരാക്കുക എന്നതാണ് ജലബജറ്റിന്റെ ലക്ഷ്യം.

അഴീക്കോട് നിയോജകമണ്ഡലം സമഗ്ര വിദ്യാഭ്യാസ പദ്ധതി 'മഴവില്ലിന്റെ' ഭാഗമായി സംഘടിപ്പിച്ച എല്‍ എസ് എസ്, യു എസ് എസ് വിജയികള്‍ക്കുള്ള അനുമോദന പരിപാടി കെ.വി സുമേഷ് എം എല്‍ എ ഉദ്ഘാടനം ചെയ്തു. വിദ്യാര്‍ഥികള്‍ക്ക് ഗുണമേന്മയുള്ള വിദ്യാഭ്യാസം ഉറപ്പാക്കി അവരെ മികവിന്റെ ഉയരങ്ങളിലേക്ക് നയിക്കേണ്ടത് സമൂഹത്തിന്റെ കടമയാണെന്ന് എം എല്‍ എ പറഞ്ഞു. വിദ്യാര്‍ഥികള്‍ക്ക് മാനസികവും കായികവും വൈജ്ഞാനികവുമായ പിന്തുണ ഉറപ്പാക്കുകയാണ് മഴവില്ല് പദ്ധതിയിലൂടെ ലക്ഷ്യമിടുന്നതെന്നും അദ്ദേഹം കൂട്ടിച്ചേര്‍ത്തു. മണ്ഡലം പരിധിയിലുള്ള 350 വിദ്യാര്‍ഥികളെയാണ് അനുമോദിച്ചത്. 

ഗതാഗതം നിരോധിച്ചു

എന്‍ഐടി-വേങ്ങേരിമഠം-ചെട്ടിക്കടവ് റോഡില്‍ നവീകരണം നടക്കുന്നതിനാല്‍ ഇന്ന് (സെപ്റ്റംബര്‍ 22) മുതല്‍ പ്രവൃത്തി പൂര്‍ത്തീകരിക്കുന്നത് വരെ പന്ത്രണ്ടാം മൈല്‍ മുതല്‍ വേങ്ങേരിമഠം ജങ്ഷന്‍ വരെയും വേങ്ങേരിമഠം ജങ്ഷന്‍ മുതല്‍ വെള്ളന്നൂര്‍ വരെയും ഗതാഗതം പൂര്‍ണമായി നിരോധിച്ചതായി എക്സിക്യൂട്ടീവ് എഞ്ചിനീയര്‍ അറിയിച്ചു. 
എന്‍ഐടി ഭാഗത്തുനിന്ന് ചെട്ടിക്കടവ് ഭാഗത്തേക്കും തിരിച്ചുമുള്ള വാഹനങ്ങള്‍ കട്ടാങ്ങല്‍-ചൂലൂര്‍ മുഴാപ്പാലം വഴിയോ ചാത്തമംഗലം ഷാപ്പ്-വെള്ളന്നൂര്‍-കൂഴക്കോട് വഴിയോ പോകണം.