പിലാത്തറ -ചന്തപുര മാതമംഗലം റോഡിന്റെ നവീകരണ പ്രവൃത്തി സെപ്റ്റംബർ 22 ന് 
വൈകിട്ട് അഞ്ചിന് പൊതുമരാമത്ത് ടൂറിസം വകുപ്പ് മന്ത്രി പി എ മുഹമ്മദ് റിയാസ് ഓൺലൈനായി ഉദ്ഘാടനം ചെയ്യുമെന്ന് എം വിജിൻ എം എൽ എ അറിയിച്ചു.

കേരള എക്‌സൈസ് വകുപ്പ് വിമുക്തി മിഷന്റ നേതൃത്വത്തില്‍ നടത്തുന്ന അറിവാണ് ലഹരി സ്വാതന്ത്ര്യദിന  ക്വിസ് മത്സരത്തിന്റെ കൂത്തുപറമ്പ് എക്‌സൈസ് സര്‍ക്കിള്‍ തല മത്സരത്തില്‍ തൊക്കിലങ്ങാടി കെ എച്ച് എസ് സ്‌കൂളിലെ ഇ ശ്രീലക്ഷ്മി, കെ ഹരിനന്ദ സുരേഷ് എന്നിവര്‍ ഒന്നാം സ്ഥാനം നേടി. പിണറായി എ കെ ജി എം എച്ച് എസ് എസിലെ കെ ശ്രീനന്ദ്, കെ.പി യദുനന്ദ് എന്നിവര്‍ രണ്ടാം സ്ഥാനവും മമ്പറം ഹൈസ്‌കൂളിലെ അദ്വൈത് ടി സുഷാജ്, കെ ദിയ എന്നിവര്‍ മൂന്നാം സ്ഥാനവും കരസ്ഥമാക്കി.

കൂത്തുപറമ്പ് ബ്ലോക്ക് പഞ്ചായത്തിന്റെ ഭിന്നശേഷി കലാമേള പ്രസിഡന്റ് ആര്‍ ഷീല ഉദ്ഘാടനം ചെയ്തു. ചിറ്റാരിപ്പറമ്പ് ഗവ. ഹയര്‍സെക്കന്‍ഡറി സ്‌കൂളില്‍ നടന്ന പരിപാടിയില്‍ ഗ്രാമപഞ്ചായത്ത് പ്രസിഡന്റ് വി ബാലന്‍ അധ്യക്ഷനായി.

പതിനാല് ഇനങ്ങളിലായിരുന്നു മത്സരം നടന്നത്. ഭിന്നശേഷിക്കാരായ കുട്ടികളും മുതിര്‍ന്നവരും ഉൾപ്പെടെ അറുപത് പേർ പങ്കെടുത്തു. വിജയികൾക്ക് സമ്മാനങ്ങളും   പങ്കെടുത്ത മുഴുവന്‍ പേര്‍ക്കും പ്രോത്സാഹന സമ്മാനവും നല്‍കി. 

സംസ്ഥാനത്തെ തദ്ദേശസ്ഥാപന പൊതുതിരഞ്ഞെടുപ്പിൽ മത്സരിക്കുന്നതിന് രാഷ്ട്രീയപാർട്ടികൾക്ക് ചിഹ്നം അനുവദിച്ച് സംസ്ഥാന തിരഞ്ഞെടുപ്പ് കമ്മീഷൻ കരട് വിജ്ഞാപനം പുറപ്പെടുവിച്ചു. അതു സംബന്ധിച്ച ആക്ഷേപങ്ങൾ വിജഞാപന തീയതി മുതൽ 15 ദിവസത്തിനകം കമ്മീഷൻ സെക്രട്ടറിക്ക് രേഖാമൂലം സമർപ്പിക്കാമെന്ന് സംസ്ഥാന തിരഞ്ഞെടുപ്പ് കമ്മീഷണർ എ. ഷാജഹാൻ അറിയിച്ചു.
കരട് വിജ്ഞാപനം www.sec.kerala.gov.in വെബ് സൈറ്റിൽ പരിശോധിക്കാം. 2025 ലെ പൊതുതിരഞ്ഞെടുപ്പിന് മുന്നോടിയായിട്ടാണ് രാഷ്ട്രീയപാർട്ടികൾക്ക് ചിഹ്നം അനുവദിച്ച് വിജ്ഞാപനം പുറപ്പെടുവിച്ചത്.
 

ആയുർവേദ മെഡിക്കൽ വിദ്യാഭ്യാസ വകുപ്പിന് കീഴിൽ, കണ്ണൂർ കല്യാട് നിർമ്മാണ പ്രവർത്തനങ്ങൾ നടന്നുവരുന്ന അന്താരാഷ്ട്ര ആയുർവേദ ഗവേഷണ കേന്ദ്രത്തിൽ ഔഷധസസ്യ നഴ്സറി സ്ഥാപിക്കുന്നതിനുള്ള പ്രോജക്ട് പ്രൊപ്പോസലിന് സർക്കാരിന്റെ അംഗീകാരം. 2025-26 സാമ്പത്തിക വർഷത്തിൽ ഗവേഷണ പ്രവർത്തനങ്ങൾക്കായി വകയിരുത്തിയിട്ടുള്ള ഒന്നര കോടി രൂപയിൽ നിന്ന് ആദ്യ വർഷത്തെ നഴ്സറി പദ്ധതിക്കായി 62,60,000 രൂപ വിനിയോഗിക്കാനാണ് അനുമതി ലഭിച്ചിരിക്കുന്നത്.

കേരള എക്‌സൈസ് വകുപ്പ് വിമുക്തി മിഷൻ ഹൈസ്‌കൂൾ വിദ്യാർഥികൾക്കായി നടത്തുന്ന 'അറിവാണ് ലഹരി' സ്വാതന്ത്ര്യ ദിന ക്വിസ് കണ്ണൂർ താലൂക്ക് തല മത്സരത്തിൽ പെരളശ്ശേരി എകെജിഎസ് ജിഎച്ച്എസ്എസിലെ എൻഎ അക്ഷിത്, പികെ ആദിദേവ് എന്നിവർ ഒന്നാം സ്ഥാനം നേടി. കൊട്ടില ജിഎച്ച്എസ്എസിലെ അഭിവദ് എ നാഥ്, ടിവി അക്ഷജ് എന്നിവർ രണ്ടാം സ്ഥാനവും, കണ്ണൂർ സിറ്റി ജിഎച്ച്എസ്എസിലെ വി നവാർ, കെ പി റിയ ഫാത്തിമ എന്നിവർ മൂന്നാം സ്ഥാനവും നേടി.

പിലാത്തറ ഇൻഡോർ സ്റ്റേഡിയം വീരാണ്ടികുളം നബാർഡ് റോഡ് എം വിജിൻ എം എൽ എ  ഉദ്ഘാടനം ചെയ്തു. ചെറുതാഴം പഞ്ചായത്ത് പ്രസിഡന്റ് എം ശ്രീധരൻ അധ്യക്ഷത വഹിച്ചു.
മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയിൽ ഉൾപ്പെടുത്തി സംസ്ഥാന സർക്കാർ 20 ലക്ഷം രൂപയാണ് റോഡ് നവീകരണത്തിനായി അനുവദിച്ചത്.

വോട്ടർ പട്ടിക സ്‌പെഷൽ ഇൻറൻസീവ് റിവിഷനുമായി (എസ്‌ഐആർ 2025) ബന്ധപ്പെട്ട് അംഗീകൃത രാഷ്ട്രീയ പാർട്ടികളുടെ ജില്ലാതല പ്രതിനിധികളുടെ യോഗം കലക്ടറേറ്റ് കോൺഫറൻസ് ഹാളിൽ ചേർന്നു. എല്ലാ രാഷ്ട്രീയപാർട്ടികളെയും വിശ്വാസത്തിലെടുത്ത് മാത്രമെ എസ് ഐ ആർ സംബന്ധിച്ച നടപടികൾ സ്വീകരിക്കൂവെന്ന് യോഗത്തിൽ അധ്യക്ഷനായ ജില്ലാ കലക്ടർ അരുൺ കെ വിജയൻ പറഞ്ഞു. ജില്ലയിലെ മുഴുവൻ പോളിങ്ങ് സ്റ്റേഷനുകളിലും രാഷ്ട്രീയ പാർട്ടികളുടെ പ്രതിനിധികളായ ബൂത്ത് ലെവൽ ഏജൻറുമാരെ നിയമിക്കണം.  

പേരാവൂർ ബ്ലോക്ക് പഞ്ചായത്തിന്റെ വാർഷിക പദ്ധതിയിൽ ഉൾപ്പെടുത്തി സംഘടിപ്പിച്ച വയോജന സംഗമം ബ്ലോക്ക് പഞ്ചായത്ത് വൈസ് പ്രസിഡന്റ് പ്രീത ദിനേശൻ ഉദ്ഘാടനം ചെയ്തു. തൊണ്ടിയിൽ നടന്ന പരിപാടിയിൽ പേരാവൂർ ഗ്രാമപഞ്ചായത്ത് പ്രസിഡന്റ് പി.പി വേണുഗോപാലൻ അധ്യക്ഷനായി.

അറിവിന്റെ ജനകീയവത്കരണവും സ്വതന്ത്ര വിനിമയവും സാധ്യമാക്കുക എന്ന ലക്ഷ്യത്തോടെ കൈറ്റ് സംസ്ഥാനത്തുടനീളം സംഘടിപ്പിച്ച സ്വതന്ത്രസോഫ്റ്റ് വെയർ ദിനാചരണത്തിന്റെ ഉദ്ഘാടനം പൊതുവിദ്യാഭ്യാസ തൊഴിൽ വകുപ്പ് മന്ത്രി വി ശിവൻകുട്ടി ഓൺലൈനായി നിർവഹിച്ചു. കൈറ്റ് സി ഇ ഒ കെ അൻവർ സാദത്ത് ആമുഖ പ്രഭാഷണം നടത്തി.