കോട്ടക്കല്‍ ഗവ വനിതാ പോളിടെക്‌നിക് കോളേജില്‍ ഇലക്ട്രോണിക്‌സ് എന്‍ജി നിയറിങ്ങില്‍  ജനറല്‍ മെറിറ്റില്‍  രണ്ട്  സീറ്റുകള്‍ ഒഴിവുണ്ട് . പോളിടെക്‌നിക് റാങ്ക് ലിസ്റ്റില്‍ ഉള്‍പ്പെട്ടവര്‍ നാളെ (സെപ്തംബര്‍ 14) രാവിലെ 10 ന് അസ്സല്‍ രേഖകള്‍ സഹിതം കോളേജില്‍ എത്തണം.

പരപ്പനങ്ങാടി നഗരസഭ ദുരിതാശ്വാസ നിധിയിലേക്ക് നല്‍കിയത് അഞ്ചുലക്ഷത്തി അയ്യായിരത്തി അഞ്ഞൂറു രൂപ. തനത് ഫണ്ടില്‍ നിന്ന് മൂന്നു ലക്ഷം രൂപയും ജീവനക്കാരില്‍ നിന്നും കൗണ്‍സിലര്‍മാരില്‍ നിന്നും സ്ഥാപനങ്ങളില്‍ നിന്നും സമാഹരിച്ച തുകയാണിത്. നഗരസഭാ ചെയര്‍പേഴ്സണ്‍ ജമീല ടീച്ചര്‍, സ്റ്റാന്‍ഡിംഗ് കമ്മിറ്റി ചെയര്‍മാന്‍ എം ഉസ്മാന്‍, കൗണ്‍സിലര്‍ ദേവന്‍ ആലുങ്ങല്‍, നഗരസഭാ സെക്രട്ടറി കെ.ബി വിശ്വനാഥന്‍ എന്നിവര്‍ ചേര്‍ന്നാണ് മന്ത്രി കെടി ജലീലിന് തുക കൈമാറിയത്.

കേരളത്തിന്റെ പ്രളയാനന്തര ആവശ്യങ്ങള്‍ വിലയിരുത്തുന്നതിന് യു. എന്‍. ഉദ്യോഗസ്ഥര്‍ എത്തി. തമിഴ്‌നാട്ടിലെയും കേരളത്തിലെയും യുനിസഫ് ഓഫീസുകളുടെ മേധാവി ജോബ് സക്കറിയ, യുണൈറ്റഡ് നേഷന്‍സ് ഡെവലപ്‌മെന്റ് പ്രോഗ്രാം (യു. എന്‍. ഡി. പി) സംസ്ഥാന കോഓര്‍ഡിനേറ്റര്‍ ആനി ജോര്‍ജ് എന്നിവരാണ് പ്രാഥമിക വിലയിരുത്തലുകള്‍ക്കായി എത്തിയത്. 

പ്രളയ ദുരന്തത്തിനിരയായവര്‍ക്കുള്ള സര്‍ക്കാരിന്റെ അടിയന്തര ധനസഹായമായ പതിനായിരം രൂപ ഇതുവരെ നല്‍കിയത് 527973 കുടുംബങ്ങള്‍ക്ക്. എറണാകുളം ജില്ലയിലാണ് ഏറ്റവും കൂടുതല്‍ പേര്‍ക്ക് സഹായം ലഭിച്ചത്. ഇവിടെ 152228 കുടുംബങ്ങള്‍ക്കാണ് ധനസഹായം ലഭിച്ചത്. സംസ്ഥാനത്താകെ 610802 കുടുംബങ്ങള്‍ക്കാണ് പതിനായിരം രൂപയുടെ ധനസഹായം ലഭിക്കുക.  

കേരളത്തില്‍ പ്രളയത്തിലും മണ്ണിടിച്ചിലിലും ഉരുള്‍പൊട്ടലിലുമുണ്ടായ നാശനഷ്ടങ്ങള്‍ വിലയിരുത്തുന്നതിന് കേന്ദ്ര സംഘം എത്തും. കേന്ദ്ര ആഭ്യന്തരകാര്യ മന്ത്രാലയം സ്‌പെഷ്യല്‍ സെക്രട്ടറി ബി. ആര്‍. ശര്‍മയുടെ നേതൃത്വത്തിലുള്ള സംഘമാണ് എത്തുക. ഊര്‍ജം, ജലവിഭവം, ആഭ്യന്തരം, റോഡ് ഗതാഗത ഹൈവേ, കുടിവെള്ള വിതരണ, ഗ്രാമവികസനം, കാര്‍ഷിക സഹകരണവും കര്‍ഷക ക്ഷേമവും, ധനകാര്യ മന്ത്രാലയങ്ങളിലെ ജോയിന്റ് സെക്രട്ടറിമാര്‍ സംഘത്തിലുണ്ടാവും. കേന്ദ്ര ദുരന്ത നിവാരണ അതോറിറ്റിയുടെ ജോ. സെക്രട്ടറിയും നീതി ആയോഗ് ഉപദേശകനും ഇവര്‍ക്കൊപ്പം എത്തും. ഈ മാസം അവസാനത്തോടെ ഇവര്‍ കേരളത്തിലെത്തുമെന്നാണ് കരുതുന്നത്. 

അരിവാള്‍ കോശ വിളര്‍ച്ച ബാധിതരായ ഒ ബി സി വിഭാഗത്തില്‍പ്പെട്ട രോഗികള്‍ക്ക്‌ / രോഗികളുടെ രക്ഷിതാക്കള്‍ക്ക്‌ സ്വയം തൊഴില്‍ കണ്ടെത്തുന്നതിനുളള പദ്ധതിക്ക്‌ പിന്നോക്ക വിഭാഗ വികസന വകുപ്പ്‌ അപേക്ഷ ക്ഷണിച്ചു. അപേക്ഷഫോറവും വിശദവിവരങ്ങള്‍ക്കും വെബ്‌സൈറ്റ്‌ www.eep.bcdd.kerala.gov.in. ഫോണ്‍ : 0495 -2377786.