പ്രളയം മൂലം കൃഷിനാശം സംഭവിച്ച കര്‍ഷര്‍ക്കുളള പ്രകൃതിക്ഷോഭ ദുരിതാശ്വാസ ധനസഹായ വിതരണം കൃഷി വകുപ്പ്‌ മന്ത്രി അഡ്വ. വി എസ്‌ സുനില്‍കുമാര്‍ ഇന്ന്‌ (സെപ്‌തംബര്‍ 14) രാവിലെ 11 ന്‌ ചാലക്കുടി നഗരസഭാ ജൂബിലി ഹാളില്‍ നിര്‍വഹിക്കും. സെപ്‌തംബര്‍ 14, 15 തീയതികളില്‍ ചാലക്കുടി ബ്ലോക്ക്‌ പരിധിയില്‍ 4 സഞ്ചരിക്കുന്ന മണ്ണ്‌ പരിശോധന ലാബോറട്ടറികളുടെ സേവനം ലഭിക്കും. കര്‍ഷകരുടെ കൃഷിയിടത്തിലെ മണ്ണ്‌ പരിശോധിച്ച്‌ അപ്പോള്‍ തന്നെ പരിഹാരം നിര്‍ദ്ദേശിക്കുമെന്ന്‌ പ്രിന്‍സിപ്പല്‍ കൃഷി ഓഫീസര്‍ അറിയിച്ചു.

ഖാദി ഗ്രാമവ്യവസായ ഓഫീസിന്റെ വിവിധ പദ്ധതികള്‍ പ്രകാരം ധനസഹായം സ്വീകരിച്ച യൂണിറ്റുകള്‍ക്ക്‌ പ്രളയക്കെടുതി മൂലം നാശനഷ്‌ടം സംഭവിച്ചിട്ടുണ്ടെങ്കില്‍ വിവരം അറിയിക്കണമെന്ന്‌ പ്രോജക്‌ട്‌ ഓഫീസര്‍ അറിയിച്ചു. കൂടുതല്‍ വിവരങ്ങള്‍ക്ക്‌ ഫോണ്‍ : 0487-2338699.

ജില്ലയില്‍ 23 ഗ്രാമപഞ്ചായത്തുകളിലും 3 മുനിസിപ്പാലിറ്റികളിലും ഇനിയും അവശേഷിക്കുന്ന മെത്ത, തുണി, പ്ലാസ്റ്റിക്‌ തുടങ്ങിയ അജൈവമാലിന്യങ്ങള്‍ അടിയന്തരമായി നീക്കം ചെയ്യുവാന്‍ ജില്ലാ കളക്‌ടറുടെ അദ്ധ്യക്ഷതയില്‍ ചേര്‍ന്ന യോഗത്തില്‍ തീരുമാനമായി. തദ്ദേശഭരണസ്ഥാപനങ്ങളില്‍ ഇപ്പോള്‍ ശേഖരിച്ചിട്ടുളള അജൈവമാലിന്യങ്ങള്‍ ഇനി ക്ലീന്‍കേരള കമ്പനി പ്രാദേശികമായി തന്നെ സംഭരിച്ച്‌ ജില്ലക്ക്‌ പുറത്തുകൊണ്ടുപോയി ശാസ്‌ത്രീയമായി സംസ്‌ക്കരിക്കും. പുനരുപയോഗമുളള വേസ്റ്റുകള്‍ സ്‌ക്രാപ്പ്‌ മര്‍ച്ചന്റസിന്‌ കൈമാറും. ക്ലീന്‍കേരള കമ്പനിയും സ്‌ക്രാപ്പ്‌ മര്‍ച്ചന്റ്‌സ്‌ അസോസിയേഷനും തമ്മില്‍ സംസ്ഥാനതലത്തില്‍ കരാര്‍ ആയിട്ടുണ്ട്‌.

പ്രളയദുരിതാശ്വാസ രണ്ടാം ഘട്ടം ഫണ്ട്‌ സമാഹരണം സെപ്‌തംബര്‍ 15 ന്‌ ജില്ലയിലെ മന്ത്രിമാരായ ഏ സി മൊയ്‌തീന്‍, പ്രൊഫ. സി രവീന്ദ്രനാഥ്‌, അഡ്വ. വി എസ്‌ സുനില്‍കുമാര്‍ എന്നിവരുടെ നേതൃത്വത്തില്‍ നടക്കും. താലൂക്ക്‌, സമയം യഥാക്രമം: തലപ്പിള്ളി : രാവിലെ 9.30-10.00, കുന്നംകുളം : രാവിലെ 10.45-11.15, ചാവക്കാട്‌- രാവിലെ 11.45- ഉച്ചയക്ക്‌ 12.15, കൊടുങ്ങല്ലൂര്‍ (മതിലകം ബ്ലോക്ക്‌ പഞ്ചായത്ത്‌ ഹാള്‍) ഉച്ചയക്ക്‌ 1-1.30, മുകുന്ദപുരം ഉച്ചയക്ക്‌ 2.30- വൈകീട്ട്‌ 3, ചാലക്കുടി വൈകീട്ട്‌ 3.30-4, തൃശൂര്‍ വൈകീട്ട്‌ 5-5.30. 

മഴക്കെടുതിയിലും പ്രളയത്തിലുമായി ജില്ലയിലെ എഴ്‌ താലൂക്കുകളിലായി 3597 വീടുകള്‍ പൂര്‍ണമായും തകര്‍ന്നു. 23172 വീടുകള്‍ ഭാഗികമായി തകര്‍ന്നിട്ടുണ്ട്‌. ജില്ലയിലെ 183033 വീടുകളാണ്‌ പ്രളയത്തില്‍പ്പെട്ടത്‌. ചാലക്കുടി താലൂക്കില്‍ 54710 വീടുകളും, തൃശൂര്‍ താലൂക്കില്‍ 44092 വീടുകളും, കൊടുങ്ങല്ലൂര്‍ താലൂക്കില്‍ 31324 വീടുകളും, ചാവക്കാട്‌ താലൂക്കില്‍ 28301 വീടുകളും മുകുന്ദപുരം താലൂക്കില്‍ 20776 വീടുകളും കുന്നംകുളം താലൂക്കില്‍ 2535 വീടുകളും തലപ്പിള്ളി താലൂക്കില്‍ 1295 വീടുകളുമാണ്‌ പ്രളയത്തില്‍പ്പെട്ടത്‌.

പ്രളയക്കെടുതിയെ തുടര്‍ന്ന്‌ ജില്ലയില്‍ ഏകദ്ദേശം 1392.3 കോടി രൂപയുടെ നാശനഷ്‌ടമുണ്ടായതായി കണക്കുകള്‍. ഇത്‌ പൂര്‍ണ്ണമല്ല. അസംഘടിത മേഖലകളിലെ വ്യക്തിഗത തലത്തിലും മറ്റുമുണ്ടായ നഷ്‌ടങ്ങളുടെ കണക്കെടുക്കുമ്പോള്‍ തുക ഇനിയും ഏറുമെന്നാണ്‌ കണക്കാക്കുന്നത്‌. പല മേഖലകളിലും കണക്കെടുപ്പ്‌ ഇപ്പോഴും തുടരുകയാണ്‌.

* മൂന്നാഴ്ചക്കുള്ളില്‍ കളക്ടര്‍മാര്‍ സര്‍ക്കാരിന് റിപ്പോര്‍ട്ട് നല്‍കണം

ലോകബാങ്കിന്റെയും എ ഡി ബി യുടെയും പ്രത്യേക സംഘം ജില്ലയിലെ പ്രളയബാധിത പ്രദേശങ്ങള്‍ സന്ദര്‍ശിച്ചു. പ്രളയക്കെടുതി മൂലം ജില്ലയിലുണ്ടായ നഷ്‌ടങ്ങള്‍ വിലയിരുത്താനും ആവശ്യമുളള സഹായം നല്‍കുവാനുമാണ്‌ എട്ടംഗസംഘം ജില്ലയിലെത്തിയത്‌. രാവിലെ ഏട്ടരയോടെ ഹോട്ടല്‍ ലൂസിയ പാലസില്‍ ചേര്‍ന്ന പ്രത്യേക അവലോകന യോഗത്തില്‍ പ്രളയക്കെടുതി മൂലം ജില്ലയ്‌ക്കുണ്ടാക്കിയ നാശനഷ്‌ടങ്ങള്‍ സംഘം വിലയിരുത്തി. നാശനഷ്‌ടങ്ങള്‍ സംബന്ധിച്ച പ്രത്യേക പവ്വര്‍ പോയിന്റ്‌ പ്രസേന്റേഷന്‍ ജില്ലാ ഭരണകൂടത്തിന്റെ ആഭിമുഖ്യത്തില്‍ നടന്നു. കെടുതികള്‍ സംബന്ധിച്ച ഏകദേശചിത്രം ജില്ലാ കളക്‌ടര്‍ ടി വി അനുപമ സംഘത്തിന്‌ മുന്‍പാകെ വിവരിച്ചു.

2018-19 അധ്യയനവര്‍ഷം മുതല്‍ കാര്യവട്ടം ഗവണ്‍മെന്റ് കോളേജില്‍ എം.എസ്.സി ഗണിതശാസ്ത്രം കോഴ്‌സ് അനുവദിച്ച് ഉന്നതവിദ്യാഭ്യാസ വകുപ്പ് ഉത്തരവായി. പതിനഞ്ച് വിദ്യാര്‍ത്ഥികള്‍ക്ക് പ്രവേശനം നല്‍കും. ഇതിനായി ഒരു അസോസിയേറ്റ് പ്രൊഫസര്‍ തസ്തികയും സൃഷ്ടിച്ചു.

പി.എന്‍.എക്‌സ്.4054/18

പ്രളയത്തെത്തുടര്‍ന്ന് അധ്യയന ദിവസങ്ങള്‍ നഷ്ടപ്പെട്ട സാഹചര്യത്തില്‍ കോഴ്‌സുകള്‍ സമയബന്ധിതമായി പൂര്‍ത്തിയാക്കുന്നതിന് ശനിയാഴ്ചകള്‍ ഉള്‍പ്പെടെയുള്ള അവധിദിവസങ്ങളില്‍ ആവശ്യമായ ക്രമീകരണങ്ങള്‍ ഏര്‍പ്പെടുത്തി ക്ലാസുകള്‍ നടത്തണമെന്ന് ഉന്നതവിദ്യാഭ്യാസ വകുപ്പ് കോളേജുകള്‍ക്കും സര്‍വകലാശാലകള്‍ക്കും നിര്‍ദേശങ്ങള്‍ നല്‍കി ഉത്തരവിറക്കി.

പി.എന്‍.എക്‌സ്.4053/18