നവകേരള സൃഷ്ടിക്കായി മന്ത്രിമാരുടെ നേതൃത്വത്തില്‍ ജില്ലകളില്‍ നടക്കുന്ന ധനസമാഹരണയജ്ഞത്തില്‍ കാസര്‍കോട് ജില്ലയില്‍ ആദ്യ ദിവസം മികച്ച പ്രതികരണം. റവന്യൂ മന്ത്രി ഇ.ചന്ദ്രശേഖരന്റെ നേതൃത്വത്തില്‍ വെള്ളരിക്കുണ്ട്, കാസര്‍കോട് താലൂക്കുകളില്‍ നടന്ന ധനസമാഹരണത്തില്‍ 84,74,127  രൂപയാണ് ആകെ ലഭിച്ചത്. വെള്ളരിക്കുണ്ട് താലൂക്കില്‍ നിന്ന് 33,42,723 രൂപയും കാസര്‍കോട് താലൂക്കില്‍ നിന്ന് 51,31,404 രൂപയുമാണു ലഭിച്ചത്.

ജില്ലയില്‍ പനി ബാധിച്ച് ഇന്നലെ (13) 356 പേര്‍ ചികിത്സ തേടിയതായി ജില്ലാ മെഡിക്കല്‍ ഓഫീസര്‍ അറിയിച്ചു. എലിപ്പനി ലക്ഷണങ്ങളോടെ ചികിത്സ തേടിയ ഏഴ് പേരില്‍ മൂന്ന്  പേര്‍ക്ക് എലിപ്പനി സ്ഥിരീകരിച്ചു. സീതത്തോട്, ചെന്നീര്‍ക്കര എന്നിവിടങ്ങളിലാണ് എലിപ്പനി സ്ഥിരീകരിച്ചത്. വയറിളക്കരോഗങ്ങള്‍ക്ക് 56 പേര്‍ ചികിത്സ തേടി.

        (പിഎന്‍പി 2877/18)

ജില്ലാ വ്യവസായ കേന്ദ്രത്തിന്റെ അധീനതയിലുള്ള അടൂര്‍, പന്തളം, മല്ലപ്പള്ളി എന്നിവിടങ്ങളിലെ വ്യവസായ എസ്റ്റേറ്റുകളില്‍ പട്ടികജാതി വിഭാഗത്തില്‍പ്പെട്ട സംരംഭകര്‍ക്കായി അഞ്ച് ഷെഡുകള്‍ ഒഴിവുണ്ട്. അടൂരിലും മല്ലപ്പള്ളിയിലും രണ്ട് വീതവും പന്തളത്ത് ഒരു ഷെഡുമാണ് ഒഴിവുള്ളത്. താത്പര്യമുള്ളവര്‍ ജാതി സര്‍ട്ടിഫിക്കറ്റ് സഹിതം മാനേജിംഗ് ഡയറക്ടര്‍, എംഐഇ ജില്ലാ വ്യവസായ കേന്ദ്രം, കോഴഞ്ചേരി, പത്തനംതിട്ട എന്ന വിലാസത്തില്‍ അപേക്ഷിക്കണം.                   (പിഎന്‍പി 2875/18)

ജില്ലയിലെ 819 സ്‌കൂളുകളില്‍ നിന്നായി മുഖ്യമന്ത്രിയുടെ ദുരിതാശ്വാസ നിധിയിലേക്ക് 43.21 ലക്ഷം രൂപ ലഭിച്ചു. എല്‍പി മുതല്‍ ഹൈസ്‌കൂള്‍ വരെയുള്ള 702 സ്‌കൂളുകളില്‍ നിന്നും 30.17 ലക്ഷം രൂപയാണ് ലഭിച്ചത്. ഈ വിഭാഗത്തിലുള്ള സര്‍ക്കാര്‍ സ്‌കൂളുകളില്‍ നിന്ന് 8.53 ലക്ഷം രൂപയും എയിഡഡ് സ്‌കൂളുകളില്‍ നിന്ന് 17.77 ലക്ഷം രൂപയും അണ്‍എയിഡഡ് സ്‌കൂളുകളില്‍ നിന്ന് 3.85 ലക്ഷം രൂപയുമാണ് ലഭിച്ചത്. 

ജില്ലയില്‍ പ്രളയത്തിനിരയായവര്‍ക്കുള്ള 10,000 രൂപ ധനസഹായം 40186 കുടുംബങ്ങള്‍ക്ക്  നല്‍കുന്നതിനുള്ള ബില്ല് ട്രഷറിയിലേക്ക് കൈമാറിയെന്ന് ജില്ലാ കളക്ടര്‍ പി.ബി. നൂഹ് അറിയിച്ചു.  തിരുവല്ല താലൂക്കില്‍ 23585 പേരുടേയും കോഴഞ്ചേരി താലൂക്കില്‍ 6861 പേരുടേയും മല്ലപ്പള്ളി താലൂക്കില്‍ 1204 പേരുടേയും റാന്നി താലൂക്കില്‍ 3640 പേരുടേയും കോന്നി താലൂക്കില്‍ 2518 പേരുടേയും അടൂര്‍ താലൂക്കില്‍ 2378 പേരുടേയും ബില്ലുകള്‍ ട്രഷറിയിലേക്കു നല്‍കിയിട്ടുണ്ട്.