പിന്നാക്ക വിഭാഗങ്ങളില്‍പ്പെട്ട ഉദേ്യാഗാര്‍ത്ഥികള്‍ക്കും വിദ്യാര്‍ത്ഥികള്‍ക്കും കേന്ദ്ര സംസ്ഥാന പൊതുമേഖലാ സ്ഥാപനങ്ങളില്‍ ജോലി ലഭിക്കുന്നതിനുള്ള വിവിധ മത്സര പരീക്ഷാ പരിശീലനത്തിന് ധനസഹായം നല്‍കുന്ന എംപ്ലോയബിലിറ്റി എന്‍ഹാന്‍സ്‌മെന്റ് പ്രോഗ്രാം പദ്ധതിയിലേക്ക് അപേക്ഷ ക്ഷണിച്ചു.    മെഡിക്കല്‍/എഞ്ചിനീയറിംഗ് എന്‍ട്രന്‍സ്, ബാങ്കിംഗ് സര്‍വീസ് തുടങ്ങിയ വിവിധ മത്സര പരീക്ഷകള്‍ക്കുള്ള പരിശീലനത്തിന് മികച്ച സ്ഥാപനങ്ങളില്‍ പ്രവേശനം നേടിയിട്ടുള്ള വിദ്യാര്‍ത്ഥികള്‍ക്കും ഉദേ്യാഗാര്‍ത്ഥികള്‍ക്കും അപേക്ഷിക്കാം.  വിശദ വിവരങ്ങള്‍ www.bcdd.kerala.gov.in ലും 0495 2377786 ലും ലഭിക്കും.

    കണ്ണൂര്‍ ഗവ.പോളിടെക്‌നിക്കിനു കീഴിലുള്ള കമ്മ്യൂണിറ്റി ഡവലപ്‌മെന്റ് ത്രൂ പോളിടെക്‌നിക് സ്‌കീമില്‍ വനിതകള്‍ക്കായി ആരംഭിക്കുന്ന അഡ്വാന്‍സ്ഡ് കട്ടിംഗ് & ടെയ്‌ലറിംഗ് ആന്റ് ഫാഷന്‍ ടെക്‌നോളജി കോഴ്‌സിന്റെ സൗജന്യ പരിശീലനത്തിന് അപേക്ഷ ക്ഷണിച്ചു.  അപേക്ഷകര്‍ ആധാര്‍കാര്‍ഡിന്റെ പകര്‍പ്പ്, വയസ്, ജാതി, വരുമാനം എന്നിവ തെളിയിക്കുന്നതിനുള്ള രേഖകള്‍ സഹിതം 18 ന് രാവിലെ 11 മണിക്ക് സി ഡി ടി പി ഓഫീസില്‍ ഹാജരാക്കണം.  ഫോണ്‍: 9446014968.

    'ഓഖി' ദുരന്തത്തിന്റെ പശ്ചാത്തലത്തില്‍ മത്സ്യത്തൊഴിലാളികളുടെ സുരക്ഷയ്ക്കായി പുറത്തിറക്കിയ ആന്‍ഡ്രോയിഡ് ആപ്ലിക്കേഷനായ 'സാഗര'യ്ക്ക് മത്സ്യത്തൊഴിലാളികള്‍ക്കിടയില്‍ മികച്ച പ്രതികരണം. ആധുനിക സാങ്കേതിക വിദ്യകളുടെ സഹായത്തോടെ സുരക്ഷാ മുന്നറിയിപ്പ് നല്‍കല്‍, അപകട സാധ്യത ഒഴിവാക്കല്‍, രക്ഷാപ്രവര്‍ത്തനം ഏകോപിപ്പിക്കല്‍ എന്നീ ആവശ്യങ്ങള്‍ക്കായാണ് 'സാഗര' രൂപകല്‍പ്പന ചെയ്തത്. 

    കടാശ്വാസം ശുപാര്‍ശ ചെയ്ത കേസുകളില്‍ കടാശ്വാസ തുക അനുവദിക്കുന്നതിനുള്ള നടപടികള്‍ ത്വരിതപ്പെടുത്തണമെന്ന് സംസ്ഥാന മത്സ്യത്തൊഴിലാളി കടാശ്വാസ കമ്മീഷന്‍. എത്രയും വേഗം തുക ബന്ധപ്പെട്ട ബാങ്കിന് നല്‍കാനും രണ്ടു കേസുകള്‍ സംബന്ധിച്ച പരാതികള്‍ പരിഗണിച്ചുകൊണ്ട് കമ്മീഷന്‍ നിര്‍ദ്ദേശിച്ചു. കമ്മീഷന്‍ ചെയര്‍മാന്‍ ജസ്റ്റിസ് പി എസ് ഗോപിനാഥന്റെ അധ്യക്ഷതയില്‍ കണ്ണൂര്‍ ഗവ. ഗസ്റ്റ് ഹൗസില്‍ നടത്തിയ സിറ്റിംഗിലാണ് ഇക്കാര്യങ്ങള്‍ പറഞ്ഞത്.

    സംസ്ഥാനം ഇന്നേവരെ കണ്ടിട്ടില്ലാത്ത പ്രളയത്തെ തുടര്‍ന്ന് ജില്ലയില്‍ നഷ്ടപ്പെട്ട സസ്യസമ്പത്ത് വീണ്ടെടുക്കാന്‍ ജില്ലാ പഞ്ചായത്തിന്റെയും ജൈവ വൈവിദ്ധ്യ ബോര്‍ഡിന്റെയും സംയുക്ത പദ്ധതിവരുന്നു. ഔഷധ സസ്യങ്ങള്‍, പൂമ്പാറ്റകള്‍ ഉള്‍പ്പെടെയുള്ള ചെറുജീവികളുടെ ആവാസ വ്യവസ്ഥയായ സസ്യങ്ങള്‍, നശിച്ചു പോയ മറ്റ് അപൂര്‍വ്വ സസ്യങ്ങള്‍ എന്നിവ വീണ്ടെടുക്കുക എന്ന ലക്ഷ്യമാണ് പദ്ധതിക്ക്. പ്രളയത്തെ തുടര്‍ന്ന് വിവിധ മേഖലകളില്‍ സസ്യസമ്പത്ത് വന്‍തോതില്‍ നശിച്ചിട്ടുണ്ട്. ഇത് നമ്മുടെ ആവാസ് വ്യവസ്ഥക്ക് വലിയ വെല്ലുവിളിയാവുമെന്നാണ് വിദഗ്ധ അഭിപ്രായം.

    നവകേരളത്തിനായുള്ള ധനസമാഹരണ യജ്ഞത്തില്‍ സ്‌കൂള്‍ വിദ്യാര്‍ഥികളുടെ സംഭാവനയായി ജില്ലയില്‍ നിന്ന് ലഭിച്ചത് 1,53,32,526 രൂപ. സപ്തംബര്‍ 11, 12 തിയ്യതികളിലായാണ് ജില്ലയിലെ പ്രൈമറി മുതല്‍ ഹയര്‍ സെക്കണ്ടറി വരെയുള്ള വിദ്യാലയങ്ങളില്‍ നിന്ന് മുഖ്യമന്ത്രിയുടെ ദുരിതാശ്വാസ നിധിയിലേക്ക് ധനസമാഹരണം നടത്തിയത്. പ്രൈമറി മുതല്‍ ഹൈസക്കൂള്‍ വരെയുള്ള വിദ്യാലയങ്ങളില്‍ നിന്ന് 1,16,97,162 രൂപയാണ് ലഭിച്ചത്. കണ്ണൂര്‍ വിദ്യാഭ്യാസ ജില്ല-27,67,075 രൂപ, തളിപ്പറമ്പ്- 41,63,747 രൂപ, തലശ്ശേരി- 47,66,340 രൂപ.

    നൂറ്റാണ്ടിലെ ഏറ്റവും വലിയ പ്രളയത്തിനു ശേഷം സംസ്ഥാനത്തെ വീണ്ടെടുക്കാന്‍ കേരള സമൂഹം നടത്തുന്ന കൂട്ടായ പ്രവര്‍ത്തനങ്ങള്‍ ലോകത്തിന് മാതൃകയാവുകയാണെന്ന് ആരോഗ്യ വകുപ്പ് മന്ത്രി കെ.കെ ശൈലജ ടീച്ചര്‍. നവകേരള നിര്‍മാണത്തിനായുള്ള വിഭവ സമാഹരണത്തിന്റെ ഭാഗമായി പിണറായിയില്‍ നടന്ന ഫണ്ട് ശേഖരണത്തിന് ശേഷം സംസാരിക്കുകയായിരുന്നു മന്ത്രി. 

പ്രളയക്കെടുതിയെ തുടര്‍ന്ന് ജില്ലയില്‍ തുടങ്ങിയ ദുരിതാശ്വാസ ക്യാമ്പുകളില്‍ ഇനിയുള്ളത് 41 കുടുംബങ്ങളിലായി 152 പേര്‍ മാത്രം. നിലമ്പൂര്‍ കുറുമ്പലങ്ങോട് വില്ലേജ് പരിധിയിലെ അകംമ്പാടം എരഞ്ഞിമങ്ങാട് യത്തീംഖാന, പൊന്നാനി ഈഴവതിരുത്തി വില്ലേജിലെ ചമ്രവട്ടം പ്രൊജക്ട് ഓഫീസിലുമായി നിലവിലുള്ള രണ്ട് ക്യാമ്പുകള്‍ മാത്രമാണ് ഇപ്പോള്‍ പ്രവര്‍ത്തിക്കുന്നത്.

പ്രളയക്കെടുതിയെ തുടര്‍ന്ന് ജില്ലയില്‍ നടക്കുന്ന ദുരിതാശ്വാസ പ്രവര്‍ത്തനങ്ങളില്‍ വിഭാഗീയമായും സ്വജനപക്ഷപാതപരമായും പെരുമാറുന്ന സംഘടനാ നേത്യത്വത്തിനെതിരെയും വ്യക്തികള്‍ക്കെതിരെയും നിയമനടപടിയെടുക്കാന്‍ ജില്ലാ പോലീസ് മേധാവിയെ ചുമതലപ്പെടുത്തി ജില്ലാകലക്ടര്‍ അമിത്മീണ ഉത്തരവിട്ടു. ഡിസാസ്റ്റര്‍മാനേജ്‌മെന്റ് ആക്ട് സെക്ഷന്‍ (61) പ്രകാരം ദുരിതബാധിതര്‍ക്ക് നഷ്ടപരിഹാരവും ദുരിതാശ്വാസ സഹായവും നല്‍കുന്ന കാര്യത്തില്‍ ലിംഗപരമോ ജാതിപരമോ മതപരമോ സാമുദായികപരമോ വിവേചനങ്ങള്‍ കാട്ടുന്നത് നിരോധിച്ചുള്ളതാണെന്നും കുറ്റകരമാണന്നും കലക്ടര്‍അറിയിച്ചു.