പ്രളയ ദുരിതാശ്വാസ പ്രവര്‍ത്തനങ്ങളില്‍ പങ്കാളികളായ ജില്ലയിലെ യൂത്ത് ക്ലബുകളെ നെഹ്‌റു യുവ കേന്ദ്രയുടെ നേതൃത്വത്തില്‍ ആദരിച്ചു. മലപ്പുറം ഡി.ടി.പി.സി ഹാളില്‍ നടന്ന അനുമോദന ചടങ്ങു് ജില്ലാ പഞ്ചായത്ത് പ്രസിഡണ്ട് എ.പി ഉണ്ണികൃഷ്ണന്‍ ഉദ്ഘാടനം ചെയ്തു. ജില്ലാ പോലീസ് മേധാവി പ്രതീഷ്‌കുമാര്‍ ക്ലബുകള്‍ക്ക് പ്രശംസാ പത്രം നല്‍കി. അഡീഷണല്‍ ജില്ലാ മജിസ്‌ട്രേറ്റ് വി. രാമചന്ദ്രന്‍ ചടങ്ങില്‍ അദ്ധ്യക്ഷനായി.നെഹ്‌റു യുവ കേന്ദ്ര ജില്ലാ യൂത്ത് കോര്‍ഡിനേറ്റര്‍ കെ .കുഞ്ഞഹമ്മദ്, ജില്ലാ മെഡിക്കല്‍ ഓഫീസര്‍ ഡോ. കെ സക്കീന ,പി അസ്മാബി എന്നിവര്‍ പ്രസംഗിച്ചു.

കെട്ടിട നിര്‍മ്മാണ തൊഴിലാളി ക്ഷേമനിധി ബോര്‍ഡില്‍ നിന്നും ഓണത്തിന് പെന്‍ഷന്‍ ലഭിക്കാത്ത അംഗങ്ങള്‍ ബാങ്ക് പാസ്ബുക്ക്, ആധാര്‍ കാര്‍ഡ് എന്നിവയുടെ പകര്‍പ്പിനോടൊപ്പം പെന്‍ഷന്‍ നമ്പര്‍ സഹിതം ഈ മാസം 22 ന് മുമ്പായി ഓഫീസില്‍ സമര്‍പ്പിക്കേണ്ടതാണെന്ന് ജില്ലാ എക്സിക്യൂട്ടീവ് ഓഫീസര്‍ അറിയിച്ചു.

മുഖ്യമന്ത്രിയുടെ പ്രളയ ദുരിതാശ്വാസനിധിയിലേക്കുള്ള ധനസമാഹരണാര്‍ഥം താലൂക്ക് തല പ്രത്യേക ക്യാംപ് ഇന്ന് (13.09.2018) തിരൂരിലും തിരൂരങ്ങാടിയിലുമായി നടക്കും. തിരൂരങ്ങാടി താലൂക്ക് ഓഫീസില്‍ രാവിലെ 10.30 മുതല്‍ 12 30 വരെയും തിരൂര്‍ താലൂക്ക് ഓഫീസില്‍ ഉച്ചക്ക് 2.30 മുതല്‍ വൈകിട്ട് അഞ്ച് വരെയുമാണ് ക്യാംപ്.  ഉന്നതവിദ്യാഭ്യാസ വകുപ്പ് മന്ത്രി ഡോ.കെ.ടി ജലീല്‍ നേതൃത്വം നല്‍കും. എം.എല്‍.എമാര്‍, ജില്ലാ കലക്ടര്‍, തദ്ദേശ സ്ഥാപനങ്ങളിലെ പ്രതിനിധികള്‍, ഉദ്യോഗസ്ഥ മേധാവികള്‍ തുടങ്ങിയവരും പങ്കെടുക്കും.

ജില്ലാ എംപ്‌ളോയ്‌മെന്റ് എക്‌സ്‌ചേഞ്ചിന്റെ ഭാഗമായ എംപ്ലോയബിലിറ്റി സെന്ററില്‍ പ്രമുഖധനകാര്യസ്ഥാപനത്തിലേക്ക് ബ്രാഞ്ച്മാനേജര്‍, ലീഗല്‍ഓഫീസര്‍, മാര്‍ക്കറ്റിങ്ങ് എക്‌സിക്യൂട്ടീവ്, വ്യാപാര സ്ഥാപനത്തിലേക്ക് അക്കൗണ്ടന്റ് (സ്ത്രീകള്‍), ഹാര്‍ഡ്വെയര്‍ ടെക്‌നീഷ്യന്‍, സിസിടിവി ടെക്‌നീഷ്യന്‍ തസ്തികകളിലേക്ക് ഉദ്യോഗാര്‍ത്ഥികളെ ആവശ്യമുണ്ട്.
എംപ്ലോയബിലിറ്റി സെന്ററില്‍ സെപ്റ്റംബര്‍ 15 രാവിലെ 10നു നടക്കുന്ന കൂടികാഴ്ചയില്‍ ഡിപ്ലോമ, ഡിഗ്രീ, എല്‍എല്‍ബി യോഗ്യതയുള്ളവര്‍ക്ക് പങ്കെടുക്കാം.  ഫോണ്‍ : 0483 2734737.

താനൂര്‍ ബ്ലോക്ക് പഞ്ചായത്ത് തൂവ്വക്കാട് വാര്‍ഡിലേക്കുള്ള ഉപതെരഞ്ഞെടുപ്പ് വിജ്ഞാപനം പുറത്തിറങ്ങി. ഒക്‌ടോബര്‍ 11നാണ് ഉപതെരഞ്ഞെടുപ്പ്.  മാതൃകാപെരുമാറ്റചട്ടം സെപ്റ്റംബര്‍ 11ന് നിലവില്‍ വന്നു.

ആലപ്പുഴ:സംസ്ഥാന ന്യൂനപക്ഷ ക്ഷേമ വകുപ്പ് ന്യൂനപക്ഷ വിഭാഗത്തിലെ  അവിവാഹിതരായ യുവജനങ്ങൾക്കായി വിവാഹപൂർവ  കൗൺസലിങ് കേന്ദ്രങ്ങൾ ആരംഭിക്കും. കാലിക്കറ്റ് യൂണിവേഴ്‌സിറ്റി സോഷ്യോളജി വിഭാഗവും തിരുവനന്തപുരം ലയോള കോളജ് സൈക്കോളജി വിഭാഗവും ചേർന്ന് തയ്യാറാക്കിയ സിലബസും മൊഡ്യൂളും അനുസരിച്ചാണ് ക്ലാസുകൾ നടക്കുക. മൂന്നു മണിക്കൂർ ദൈർഘ്യമുള്ള എട്ട് സെഷനുകൾ അടങ്ങുന്നതാണ് കോഴ്‌സ്. ശനി, ഞായർ അടക്കമുള്ള അവധി ദിനങ്ങളിലാണ് ക്ലാസുകൾ. ജില്ലയിൽ ന്യൂനപക്ഷ യുവജനതയ്ക്കായുള്ള പരിശീലന കേന്ദ്രത്തിൽ ആരംഭിക്കുന്ന സൗജന്യ കൗൺസിലിങ് കോഴ്‌സുകളിൽ പങ്കെടുക്കാൻ ആഗ്രഹിക്കുന്നവർ ഓഫീസിൽ നേരിട്ടോ, ഫോൺ വഴിയോ രജിസ്റ്റർ ചെയ്യണം.