അനെര്‍ട്ട് മുഖേന സ്ഥാപിച്ചതും പ്രകൃതിക്ഷോഭം മൂലം തകരാര്‍ സംഭവിച്ചതുമായ സൗരോര്‍ജ്ജ ഉപകരണങ്ങള്‍, ബയോഗ്യാസ് പ്ലാന്റുകള്‍, മെച്ചപ്പെട്ട വിറക് അടുപ്പുകള്‍ എന്നിവ സര്‍വ്വീസ് ചെയ്യുന്നതിന് ആവശ്യമായ വിവരശേഖരണം അനെര്‍ട്ട് നടത്തുന്നു. ഇത്തരത്തില്‍ തകരാര്‍ സംഭവിച്ച ഉപകരണങ്ങളെപ്പറ്റിയുള്ള വിവരങ്ങള്‍ സെപ്തംബര്‍ 26നുള്ളില്‍ അനെര്‍ട്ടിന്റെ ജില്ലാ ഓഫീസില്‍ ഫോണ്‍ മുഖേനയോ മെയില്‍ മുഖേനയോ എസ്.എം.എസ് മുഖേനയോ അറിയിക്കേണ്ടതാണെന്ന് ജില്ലാ എഞ്ചിനീയര്‍ അറിയിച്ചു. ഫോണ്‍ 04862 235152, 9188119406, ടോള്‍ഫ്രീ നമ്പര്‍ 18004251803, ഇമെയില്‍ idukki@anert.in.

ജില്ലയിലെ ഓഫ് റോഡ് ജീപ്പ് സഫാരി ജില്ലാ ടൂറിസം പ്രൊമോഷന്‍ കൗണ്‍സിലിന്റെ മേല്‍നോട്ടത്തില്‍ നടത്തുന്നതിന് ഡി.റ്റി.പി.സി സബ് കമ്മിറ്റി യോഗം തീരുമാനിച്ചു. ഇതിനായി ഓഫ് റോഡ് സഫാരി നടത്തുന്ന വാഹനങ്ങള്‍ സെപ്തംബര്‍ 19ന് മുമ്പായി സമീപ പ്രദേശത്തെ ജോയിന്റ് ആര്‍.ടി.ഒ ഓഫീസുകളില്‍ അപേക്ഷ സമര്‍പ്പിച്ച് ഓഫ് റോഡ് സര്‍വ്വീസിനുള്ള അനുമതിയും സ്റ്റിക്കറും വാങ്ങണം. ആര്‍.ടി.ഒയുടെ സ്റ്റിക്കറുകള്‍ പതിക്കാത്ത വാഹനങ്ങള്‍ ഇനിമുതല്‍ ഓഫ് റോഡ് സര്‍വ്വീസിന് അനുവദിക്കുന്നതല്ലെന്ന് ഡി.റ്റി.പി.സി  സെക്രട്ടറി അറിയിച്ചു.

സംസ്ഥാനത്ത് പ്രളയത്തിനുശേഷം പകര്‍ച്ചവ്യാധികള്‍ക്കെതിരെ നടക്കുന്ന പ്രതിരോധ പ്രവര്‍ത്തനങ്ങള്‍ ശക്തമാക്കുന്നതിന് ജില്ലാഭരണകൂടം നടപടികളാരംഭിച്ചു.  പ്രജനന കേന്ദ്രങ്ങളും ഉറവിടങ്ങളും നശിപ്പിക്കുന്നതിലൂടെ കൊതുകുകളുടെ സാന്ദ്രത കുറക്കുന്നതിനുള്ള പ്രവര്‍ത്തനങ്ങള്‍ കലക്ടറേറ്റ് അങ്കണത്തില്‍ ജില്ലാകലക്ടര്‍ ജീവന്‍ ബാബു ഉദ്ഘാടനം ചെയ്തു. എല്ലാ സ്ഥാപനങ്ങളിലും പൊതുസ്ഥലങ്ങളിലും കൊതുക് വളരുന്ന സാഹചര്യങ്ങള്‍ ഇല്ലാതാക്കുന്നതിനുള്ള പ്രവര്‍ത്തനങ്ങളില്‍ ഓരോരുത്തരും വ്യക്തിപരമായും സാമൂഹികമായും ഏറ്റെടുക്കണമെന്ന് ജില്ലാകലക്ടര്‍ അഭ്യര്‍ത്ഥിച്ചു.

പ്രളയവും മണ്ണിടിച്ചിലും മൂലം വീടുകള്‍ തകര്‍ന്നവര്‍ക്കും മാറിതാമസിക്കേണ്ടിവന്നവര്‍ക്കും 10,000 രൂപയുടെ സര്‍ക്കാര്‍ അടിയന്തര ആശ്വാസ ധനസഹായ വിതരണം ജില്ലയില്‍ പൂര്‍ത്തിയായി. ദേവികുളം താലൂക്കില്‍ 914 പേര്‍ക്കും ഇടുക്കി താലൂക്കില്‍ 562 പേര്‍ക്കും പീരുമേട് താലൂക്കില്‍ 818 പേര്‍ക്കും തൊടുപുഴ താലൂക്കില്‍ 599 പേര്‍ക്കും ഉടുമ്പന്‍ചോല താലൂക്കില്‍ 391 പേര്‍ക്കും ഉള്‍പ്പെടെ ജില്ലയില്‍ 3284 പേര്‍ക്കാണ് 10,000  രൂപവീതം ധനസഹായം  ഗുണഭോക്താക്കളുടെ ബാങ്ക് അക്കൗണ്ട് മുഖേന നല്‍കിയത്. 

--