ജില്ലയിലെ പ്രളയക്കെടുതിയുടെ നാശനഷ്‌ടങ്ങള്‍ വിലയിരുത്താനും സഹായം അനുവദിക്കുന്നതിനുമായി ലോകബാങ്കിന്റേയും എ.ഡി.ബിയുടേയും പത്തംഗ പ്രത്യേക സംഘം ഇന്ന്‌ (സെപ്‌തംബര്‍ 13) ജില്ലയിലെ വിവിധ പ്രളയബാധിത പ്രദേശങ്ങള്‍ സന്ദര്‍ശിക്കും. രാവിലെ 8.30 ന്‌ തൃശൂര്‍ ലൂസിയ പാലസില്‍ ചേരുന്ന അവലോകന യോഗത്തെ തുടര്‍ന്നാണ്‌ സംഘം വിവിധ പ്രളയബാധിത പ്രദേശങ്ങള്‍ സന്ദര്‍ശിക്കുക. 

വിഭവസമാഹരണ യജ്ഞത്തിന്റെ ഭാഗമായി  ജില്ലാപഞ്ചായത്തിന്റെ  തനത് ഫണ്ടില്‍ നിന്നുള്ള  ഒരുകോടി രൂപ മന്ത്രി ടിപി രാമകൃഷ്ണന് ജില്ലാപഞ്ചായത്ത് പ്രസിഡന്റ് ബാബു പറശ്ശേരി കൈമാറി. കലക്‌ട്രേറ്റ് കോണ്‍ഫറന്‍സ് ഹാളില്‍ നടന്ന ചടങ്ങില്‍ മേയര്‍ തോട്ടത്തില്‍ രവീന്ദ്രന്‍, സ്‌പെഷ്യല്‍ ഓഫീസറായ പൊതു വിദ്യാഭ്യാസ ഡയറക്ടര്‍ കെ.വി മോഹന്‍കുമാര്‍, ജില്ലാകലക്ടര്‍ യു.വി ജോസ് , ജില്ലാപഞ്ചായത്ത് വൈസ് പ്രസിഡന്റ് റീന മുണ്ടേങ്ങാട്, സെക്രട്ടറി പിഡി ഫിലിപ് തുടങ്ങിയവര്‍ സംബന്ധിച്ചു.

കോഴിക്കോട് ജില്ലാ കലക്ടറുടെ ദുരിതാശ്വാസ നിധിയിലേക്ക് വിവിധ മേഖലകളില്‍ നിന്ന് ലഭിച്ച തുക ഉള്‍പ്പെട്ട ഒരു കോടി രൂപയുടെ ചെക്ക് കലക്ടര്‍ യു.വി ജോസ് തൊഴില്‍ എക്‌സൈസ് മന്ത്രി ടി.പി രാമകൃഷ്ണന് കൈമാറി. കലക്ടറേറ്റ് കോണ്‍ഫറന്‍സ് ഹാളില്‍ നടന്ന ചടങ്ങിലാണ് തുക കൈമാറിയത്.  
 

പ്രളയത്തില്‍ നിന്ന് മോചിതമായ കേരളം പുനര്‍നിര്‍മ്മിക്കാന്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് വിഭവ സമാഹരണത്തിന് മന്ത്രി ടി.പി രാമകൃഷ്ണന്റെ നേതൃത്വത്തില്‍ ജനപ്രതിനിധികളും ഉദ്യോഗസ്ഥരും നടത്തിയ സിറ്റിംഗില്‍ നൂറുകണക്കിനാളുകള്‍ സംഭാവനകളുമായെത്തി. കുഷ്ഠരോഗികള്‍ സ്വരൂപിച്ച തുക, വീട്ടു ജോലി ചെയ്ത് കിട്ടിയ പണവും എല്‍.ഡി.സി റാങ്ക് ജേതാക്കള്‍ സ്വരൂപിച്ച തുകയും മെഡിക്കല്‍ കോളേജ് വിദ്യാര്‍ത്ഥികള്‍ സമാഹരിച്ച തുകയുമെല്ലാം ഇതില്‍ ഉള്‍പ്പെടുന്നു.

            കാക്കനാട്: പ്രളയത്തില്‍ നഷ്ടപ്പെട്ട രേഖകള്‍ വീണ്ടെടുക്കുന്നതിനുള്ള അദാലത്തിന് ജില്ലയില്‍ ഇന്ന് (സെപ്റ്റംഹര്‍ 13) പറവൂര്‍ താലൂക്കില്‍ തുടക്കമാകും.  ഐ.ടി.മിഷന്റെ സഹായത്തോടെയാണ് രേഖകള്‍ വീണ്ടെടുക്കുക.  സെപ്റ്റംബര്‍ 15 വരെ  നടത്തുന്ന അദാലത്തില്‍ ആധാര്‍, എസ് എസ്, എല്‍ സി, റേഷന്‍കാര്‍ഡ്, മോട്ടോര്‍ വെഹക്കില്‍ സേവനങ്ങള്‍, ആരോഗ്യ ഇന്‍ഷുറന്‍സ് കാര്‍ഡ്, ആധാരം, പകര്‍പ്പുകള്‍ എന്നിവയാണ് വീണ്ടെടുക്കുക.