കേരള സംസ്ഥാന യുവജനക്ഷേമബോര്‍ഡ്,  കേരളോത്സവം 2018 ന്റെ ഭാഗമായി  ജില്ലയിലെ മുഴുവന്‍ യൂത്ത് ക്ലബ്ബ്, യുവ ക്ലബ്ബ്  പ്രതിനിധികളുടെ  യോഗം ഈ മാസം 14 ന് ഉച്ചക്ക് രണ്ടിന്് ജില്ലാ പഞ്ചായത്ത് കോണ്‍ഫറന്‍സ് ഹാളില്‍ വെച്ച് ചേരും. യോഗത്തില്‍ ക്ലബ്ബ് പ്രതിനിധികള്‍പങ്കെടുക്കണം. 

കോഴിക്കോട് ഗവ. വനിതാ പോളിടെക്‌നിക്കില്‍ ഇലക്ട്രോണിക്‌സ് എഞ്ചിനീ യറിങ്ങ് ബ്രാഞ്ചില്‍ മുസ്ലിം (ബി.എച്ച്)ക്വാട്ടയില്‍ റാങ്ക് ലിസ്റ്റില്‍ ഉള്‍പ്പെട്ട റാങ്ക് നമ്പര്‍ 48 വരെയുള്ള വിദ്യാര്‍ത്ഥിനികളും ബാക്ക് വേഡ് ഹിന്ദു (ബി.എച്ച്) ക്വാട്ടയിലുള്ള എല്ലാ വിദ്യാര്‍ത്ഥിനികളും ഇന്ന് (ആഗസ്റ്റ് 10) രാവിലെ 10 മണിക്ക് ഓഫീസില്‍ എത്തണമെന്ന്  പ്രിന്‍സിപ്പാള്‍ അറിയിച്ചു.
    

കെല്‍ട്രോണ്‍ എസ്.എസ്.എല്‍.സി, പ്ലസ് ടു വിദ്യാര്‍ത്ഥികള്‍ക്ക് ഒരു വര്‍ഷത്തെ അഡ്വാന്‍സ് ഡിപ്ലോമ ഇന്‍ ഡിജിറ്റല്‍ മീഡിയ ഡിസൈനിംഗ് ആന്റ് ആനിമേഷന്‍ ഫിലിംമേയ്ക്കിംഗ് കോഴ്‌സ് തുടങ്ങും. താല്‍പ്പര്യമുള്ളവര്‍ ഓഫീസുമായി ബന്ധപ്പെടുക. ഫോണ്‍ : 0495 2301772. 
 

സിറ്റി റേഷനിംഗ് ഓഫീസ് (നോര്‍ത്ത്) ന്റെ പരിധിയിലുള്ള പ്രദേശങ്ങളിലെ മുന്‍ഗണനാ വിഭാഗത്തില്‍പ്പെട്ട അനര്‍ഹരായ കാര്‍ഡുടമകളെ കണ്ടെത്താനുള്ള നടപടികള്‍ ശക്തമാക്കി.  കഴിഞ്ഞ ദിവസം നടത്തിയ സ്‌ക്വാഡ് പരിശോധനയില്‍ ഒരു എ.എ.വൈ കാര്‍ഡ് ഉള്‍പ്പെടെ അനര്‍ഹമായി മുന്‍ഗണനാ വിഭാഗത്തില്‍ ഉള്‍പ്പെട്ട എട്ട് റേഷന്‍ കാര്‍ഡുകള്‍ പിടിച്ചെടുത്തു. റേഷനിംഗ് ഓഫീസില്‍ സ്വമേധയാ നിരവധി പേര്‍ അനര്‍ഹമായ കാര്‍ഡുകള്‍ ഹാജരാക്കി. ഇത്തരത്തില്‍ ഒഴിവാക്കുന്ന അനര്‍ഹരുടെ എണ്ണത്തിനനുസരിച്ച് അര്‍ഹതപ്പെട്ട കാര്‍ഡുടമകളെ മുന്‍ഗണനാ വിഭാഗത്തില്‍ ഉള്‍പ്പെടുത്തും. 

       സപ്ലൈകോ ഓണം - ബക്രീദ് ഫെയര്‍ ഇ.എം.എസ് കോര്‍പ്പറേഷന്‍ സ്റ്റേഡിയ ത്തില്‍ നാളെ (ആഗസ്റ്റ് 11) തുടങ്ങും. രാവിലെ 10 ന് തൊഴില്‍ എക്സൈസ് വകുപ്പ് മന്ത്രി ടി.പി രാമകൃഷ്ണന്‍ ഉദ്ഘാടനം നിര്‍വ്വഹിക്കും. 14 വരെ നടക്കുന്ന മേളയ്ക്ക്  പുറമെ ഓരോ താലൂക്കുകളിലും മേളകളും അഞ്ച് വീതം ഓണം മാര്‍ക്കറ്റുകളും 25 ഓണം മിനി ഫെയറുകളും ആരംഭിക്കും. ഫെയറുകളുടെ പ്രവര്‍ത്തനസമയം രാവിലെ 9.30 മണി മുതല്‍ വൈകീട്ട് 8 മണി വരെയായിരിക്കും. 

സിവില്‍ സ്റ്റേഷനില്‍ ജോലി ചെയ്യുന്ന 2000 ത്തിലധികം ജീവനക്കാര്‍ക്കും ദിവസേന വിവിധ ആവശ്യങ്ങള്‍ക്കായി എത്തുന്ന പൊതു ജനങ്ങള്‍ക്കും പ്രാഥമിക വൈദ്യസഹായം നല്‍കുന്നതിന് ചികിത്സ സൗകര്യം ഉറപ്പു വരുത്തി താലൂക്ക് ഓഫീസില്‍ എമര്‍ജന്‍സി കെയര്‍ ക്ലിനിക്ക് ആരംഭിച്ചു. സബ് കലക്ടര്‍ വി.വിഘ്‌നേശ്വരി ക്ലിനിക്ക് ഉദ്ഘാടനം ചെയ്തു. ചടങ്ങില്‍ അഡി തഹസില്‍ദാര്‍ ഇ അനിതകുമാരി അധ്യക്ഷത വഹിച്ചു. 

കനത്ത മഴയില്‍ ഉരുള്‍പൊട്ടലുണ്ടായ പുതുപ്പാടി മട്ടിക്കുന്നില്‍ ഒഴുക്കില്‍പെട്ട യുവാവ് മരിച്ചു. പുതുപ്പാടി, തിരുവമ്പാടി, കൂടരഞ്ഞി ഗ്രാമപഞ്ചായത്തുകളിലായി  ദുരിതാശ്വാസ ക്യാമ്പുകള്‍ ആരംഭിച്ചു. മട്ടികുന്ന് പരപ്പന്‍പാറ മാധവിയുടെ മകന്‍ റിജിത്താ(25)ണ് മരിച്ചത്. ബുധനാഴ്ച വൈകിട്ട് ഏഴുമണിയോടെയാണ് മട്ടിക്കുന്ന് എടുത്തവെച്ചകല്ല് വനഭൂമിയില്‍ ആദ്യം ചെറിയ തരത്തില്‍ ഉരുള്‍പൊട്ടലുണ്ടായത്. പിന്നീട് രാത്രി പതിനൊന്ന് മണിയോടെയുണ്ടായ ഉരുള്‍പൊട്ടലാണ് പ്രദേശത്ത് നാശം വിതച്ചത്. 

കാലവര്‍ഷക്കെടുതി നിരീക്ഷിക്കാന്‍ ജില്ലയിലെത്തിയ കേന്ദ്രസംഘം ദുരിതബാധിത പ്രദേശങ്ങള്‍ സന്ദര്‍ശിച്ചു. ഹൈദരാബാദ്  ഡിഒഡി ഡയറക്ടര്‍ ഇന്‍ ചാര്‍ജ് ബി കെ ശ്രീവാസ്തവയുടെ നേതൃത്വത്തിലുള്ള സംഘമാണ് സന്ദര്‍ശനം നടത്തിയത്. സെന്‍ട്രല്‍ ഇലക്ട്രിസിറ്റി അതോറിറ്റി ഡപ്യൂട്ടി ഡയറക്ടര്‍ നര്‍സി റാം മീണ, ഉപരിതല ഗതാഗത മന്ത്രാലയം റീജ്യണല്‍ ഓഫീസര്‍ വി.വി ശാസ്ത്രി എന്നിവരാണ് സംഘത്തിലുള്ളത്. കേന്ദ്ര സംഘത്തിനു മുന്നില്‍ ജില്ലാ കലക്ടര്‍ യു വി ജോസ് മേയ് മാസം മുതല്‍  ജില്ലയിലുണ്ടായ മഴക്കെടുതികള്‍, ഉരുള്‍പൊട്ടല്‍, കടലാക്രമണം, വെള്ളപ്പൊക്കം, കൃഷി നാശം തുടങ്ങിയവ വിശദീകരിച്ചു.