*വിവിധ സംസ്ഥാനങ്ങളില്‍ നിന്ന് 50 ഓളം എം. എല്‍. എമാര്‍ പങ്കെടുക്കും
    കേരള നിയമസഭയുടെ വജ്രജൂബിലി ആഘോഷങ്ങളുടെ ഭാഗമായി നടത്തുന്ന ഫെസ്റ്റിവല്‍ ഓണ്‍ ഡെമോക്രസി രാഷ്ട്രപതി രാംനാഥ് കോവിന്ദ് ഇന്ന് (ആഗസ്റ്റ് ആറ്) രാവിലെ 11ന് നിയമസഭയില്‍ ഉദ്ഘാടനം ചെയ്യും. ഗവര്‍ണര്‍ പി. സദാശിവം, മുഖ്യമന്ത്രി പിണറായി വിജയന്‍, സ്പീക്കര്‍ പി. ശ്രീരാമകൃഷ്ണന്‍, മന്ത്രി എ. കെ. ബാലന്‍, പ്രതിപക്ഷ നേതാവ് രമേശ് ചെന്നിത്തല, ഡെപ്യൂട്ടി സ്പീക്കര്‍ വി. ശശി എന്നിവര്‍ പങ്കെടുക്കും. ഉദ്ഘാടന ചടങ്ങിനു മുന്‍പ് രാഷ്ട്രപതി നിയമസഭാ വളപ്പില്‍ വൃക്ഷത്തൈ നടും. 

നിയമസഭാ സമുച്ചയത്തില്‍ ഇന്ന് (ആഗസ്റ്റ് ആറ്) നടക്കുന്ന 'ഫെസ്റ്റിവല്‍ ഓണ്‍ ഡെമോക്രസി' ഉദ്ഘാടനചടങ്ങ് പി.ആര്‍.ഡി ലൈവ് ആപ്പില്‍ തത്‌സമയം കാണാം. രാഷ്ട്രപതി രാംനാഥ് കോവിന്ദാണ് രാവിലെ 11 മണിക്ക് ചടങ്ങിന്റെ ഉദ്ഘാടനം നിര്‍വഹിക്കുന്നത്. ഇതിനുപുറമേ, 'ഫെസ്റ്റിവല്‍ ഓണ്‍ ഡെമോക്രസി'യുടെ ഭാഗമായി നടക്കുന്ന പ്രധാന സെഷനുകളും പി.ആര്‍.ഡി ലൈവ് ആപ്പില്‍ കാണാം. ഗൂഗില്‍ പ്ലേ സ്‌റ്റോറില്‍ നിന്ന് പി.ആര്‍.ഡി ലൈവ് ആപ്പ് ഡൗണ്‍ലോഡ് ചെയ്യാം.

പി.എന്‍.എക്‌സ്.3430/18

ന്യൂനപക്ഷ വിഭാഗത്തിലെ യുവതി-യുവാക്കള്‍ക്കായി സംസ്ഥാനത്ത് വിവാഹപൂര്‍വ കൗണ്‍സലിംഗ് ന്യൂനപക്ഷക്ഷേമ ഡയറക്ടറേറ്റിന്റെ നേതൃത്വത്തില്‍ 14 ജില്ലകളിലും ആരംഭിക്കുന്നു. സംസ്ഥാനത്ത് 33 സെന്ററുകളാണ് പ്രവര്‍ത്തിക്കുക. സെന്ററുകളുടെ എണ്ണം കൂട്ടാന്‍ ശ്രമിക്കുന്നുണ്ട്. ശനി, ഞായര്‍ മറ്റു അവധി ദിവസങ്ങള്‍ എന്നിവയില്‍ നാലുദിവസങ്ങളിലായിട്ടാണ് പ്രോഗാം ഉണ്ടാവുക. ഒരു ക്ലാസ്സില്‍ 30 പേര്‍ക്കാണ് പ്രവേശനം. 

സാങ്കേതിക വിദ്യാഭ്യാസ വകുപ്പിന്റെ കീഴിലുള്ള പോളിടെക്‌നിക്കുകളില്‍ ഒഴിവുള്ള സീറ്റുകളിലേക്കുള്ള അവസാനത്തെ സ്‌പോട്ട് അഡ്മിഷന്‍ ആഗസ്റ്റ് എട്ടിന് അതത് പോളിടെക്‌നിക്കുകളില്‍ നടക്കും.

ഇടുക്കി ജില്ലയിലെ മുട്ടം, പുറപ്പുഴ, നെടുങ്കണ്ടം, വണ്ടിപ്പെരിയാര്‍, പയ്യന്നൂര്‍ റെസിഡന്‍ഷ്യല്‍ വനിതാ പൊളിടെക്‌നിക്, കളമശ്ശേരി വനിതാ പോളിടെക്‌നിക് എന്നിവിടങ്ങളിലാണ് ഇപ്പോള്‍ ഒഴിവുകള്‍ ഉള്ളത്. ഒഴിവുകളെക്കുറിച്ചുള്ള കൂടുതല്‍ വിവരങ്ങള്‍ക്ക് അതതു സ്ഥാപനങ്ങളുമായി ബന്ധപ്പെടണം. നേരത്തെ സ്‌പോട്ട് അഡ്മിഷനില്‍ പങ്കെടുത്ത് ഇഷ്ടപ്പെട്ട ബ്രാഞ്ച് കിട്ടാത്തവര്‍ക്ക് ഈ സ്‌പോട്ട് അഡ്മിഷനില്‍ പങ്കെടുക്കാം.

കുട്ടനാട് പാക്കേജ് പൂര്‍ണമായും നടപ്പാക്കാനുള്ള തുടര്‍നടപടി സ്വീകരിക്കാന്‍ സംസ്ഥാനം കേന്ദ്രസര്‍ക്കാരിനെ സമീപിക്കും. കുട്ടനാട് ദുരിതാശ്വാസ നടപടികള്‍ അവലോകനം ചെയ്യാന്‍ ആലപ്പുഴ മെഡിക്കല്‍ കോളേജ് ഓഡിറ്റോറിയത്തില്‍ വിളിച്ച ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് ഇക്കാര്യമറിയിച്ചത്. 

ജലസ്രോതസുകളുടെ സംരക്ഷണത്തോടൊപ്പം ഇവ ആഴംകൂട്ടി സംരക്ഷിക്കല്‍, പഞ്ചായത്തുകളില്‍ സംഭരണകേന്ദ്രങ്ങള്‍ തുടങ്ങിയവ നിര്‍മിക്കുക എന്നിവയ്ക്കായുള്ള രൂപരേഖ തയ്യാറാക്കിയാകും സംസ്ഥാന സര്‍ക്കാര്‍ കേന്ദ്രത്തെ  സമീപിക്കുക.

കേരള ഹൈക്കോടതി ചീഫ് ജസ്റ്റിസ് ആയി  ജസ്റ്റിസ് ഹൃഷികേശ് റോയ് ഓഗസ്റ്റ് എട്ടിന് സത്യപ്രതിജ്ഞ ചെയ്യും. കേരള രാജ് ഭവന്‍ ഓഡിറ്റോറിയത്തില്‍ രാവിലെ 11 ന് നടക്കുന്ന ചടങ്ങില്‍ ഗവര്‍ണര്‍  പി. സദാശിവം സത്യവാചകം ചൊല്ലിക്കൊടുക്കും.

പി.എന്‍.എക്‌സ്.3426/18

ആലപ്പുഴ: ശാസ്ത്രീയമായും സമഗ്രമായും ദുരിതാശ്വാസ പ്രവർത്തനം നടത്താൻ കഴിഞ്ഞതാണ് കുട്ടനാട്ടിലെ ദുരിതാശ്വാസ പ്രവർത്തനങ്ങളെ വ്യതിരിക്തമാക്കുന്നതെന്ന്  പൊതുമരാമത്തുമന്ത്രി ജി. സുധാകരൻ. മെഡിക്കൽ കോളേജ് ഓഡിറ്റോറിയത്തിൽ നടന്ന ദുരിതാശ്വാസ അവലോകന യോഗത്തിൽ അധ്യക്ഷ പ്രസംഗം നടത്തുകയായിരുന്നു മന്ത്രി. 

ആലപ്പുഴ: കുട്ടനാട്ടിൽ വീണ മടകൾ ആഗസ്ത് 10നകം പുനസ്ഥാപിക്കുമെന്ന് കൃഷിമന്ത്രി വി.എസ്.സുനിൽകുമാർ വ്യക്തമാക്കി. മെഡിക്കൽ കോളേജ് ഓഡിറ്റോറിയത്തിൽ നടന്ന ദുരിതാശ്വാസ അവലോകനയോഗത്തിലാണ് അദ്ദേഹം ഇക്കാര്യമറിയിച്ചത്. 54 പാടങ്ങളിലെ മടകൾ പുനസ്ഥാപിക്കുന്നതിനായി 20ശതമാനം മുൻകൂർ തുകയായി 56.91 ലക്ഷം രൂപ ഇതിനകം അനുവദിച്ചു. ആകെ 71 മടകൾ കെട്ടുന്നതിനായി നാലു കോടി രൂപ വേണ്ടിവരുമെന്ന് അദ്ദേഹം യോഗത്തിൽ അറിയിച്ചു.  

ദുരിതാശ്വാസം ഏകോപിപ്പിക്കാൻ വകുപ്പുകളിൽ സ്‌പെഷൽ ഓഫീസർമാർ

-നഷ്ടമായ രേഖകൾ നൽകാൻ പഞ്ചായത്ത്, താലൂക്കുതല അദാലത്ത്

-അധ്യയന നഷ്ടം പരിഹരിക്കാൻ രൂപരേഖ തയ്യാറാക്കും

-ദുരിതബാധിതർക്ക് വായ്പ ലഭ്യമാക്കാൻ ബാങ്കുകളുടെ സഹായം തേടും

-കാർഷികവായ്പയ്ക്ക് മൊറട്ടോറിയം മന്ത്രിസഭ പരിഗണിക്കും

-ചെറുകിട വ്യാപാരികൾക്ക് പ്രത്യേക വായ്പയ്ക്ക് ശ്രമിക്കും

-കുടിവെള്ളം ശുദ്ധമെന്നുറപ്പാക്കണം

-മടവീഴ്ച ശാശ്വതമായി പരിഹരിക്കാൻ നടപടി

-വിവിധോദ്ദേശ്യ കെട്ടിടങ്ങൾ നിർമിക്കും

-അടഞ്ഞുപോയ നീർചാലുകൾ അടിയന്തരമായി തുറക്കണം