സ്വച്ഛതാ ദ്വൈവാരാചരണത്തിന്റെ ഭാഗമായി നെഹ്‌റു യുവകേന്ദ്രയുമായി അഫിലിയേറ്റ് ചെയ്ത് പ്രവര്‍ത്തിക്കുന്ന എല്ലാ യൂത്ത് ക്ലബ് പ്രവര്‍ത്തകരും ആഗസ്റ്റ് ഒമ്പതിന് രാവിലെ 9.30 ന് കണ്ണൂര്‍ എ കെ ജി ആശുപത്രിക്ക്  സമീപത്തെ ഡോ.രാജേന്ദ്ര പ്രസാദ് പാര്‍ക്കില്‍ എത്തിച്ചേരണമെന്ന് ജില്ലാ യൂത്ത് കോ ഓര്‍ഡിനേറ്റര്‍ അറിയിച്ചു.

കണ്ണൂര്‍ ഐ ടി ഐ യില്‍ കാര്‍പെന്റര്‍ ട്രേഡില്‍ ജനറല്‍/ഈഴവ/ഒ ബി എച്ച് വിഭാഗത്തില്‍ സീറ്റുകള്‍ ഒഴിവുണ്ട്.  ഇന്‍ഡക്‌സ് മാര്‍ക്ക് 200 - 195 ഇടയിലുള്ള താല്‍പര്യമുള്ള അപേക്ഷകര്‍ ആഗസ്റ്റ് എട്ടിന് രാവിലെ ഒമ്പത് മണിക്ക് കണ്ണൂര്‍ ഐ ടി ഐ യില്‍ ഹാജരാകേണ്ടതാണെന്ന് പ്രിന്‍സിപ്പല്‍ അറിയിച്ചു.

    കണ്ണൂര്‍ ജില്ലാ എംപ്ലോയ്‌മെന്റ് എക്‌സ്‌ചേഞ്ചില്‍ രജിസ്റ്റര്‍ ചെയ്ത ഉദ്യോഗാര്‍ത്ഥികള്‍ക്കായി 25 ദിവസത്തെ മത്സര പരീക്ഷാ പരിശീലനം സംഘടിപ്പിക്കുന്നു. താല്‍പര്യമുള്ള ഉദ്യോഗാര്‍ഥികള്‍ നിശ്ചിത മാതൃകയിലുള്ള അപേക്ഷ ആഗസ്റ്റ് എട്ടിന്  മുമ്പ് ജില്ലയിലെ ഏതെങ്കിലും എംപ്ലോയ്‌മെന്റ് എക്‌സ്‌ചേഞ്ചില്‍ സമര്‍പ്പിക്കേണ്ടതാണ്.  അപേക്ഷയുടെ മാതൃക എല്ലാ എംപ്ലോയ്‌മെന്റ് എക്‌സ്‌ചേഞ്ചുകളിലും ലഭിക്കും.

    അന്യമാവുന്ന അപൂര്‍വ സസ്യങ്ങളുടെ കലവറയൊരുക്കി തങ്ങള്‍ നട്ടുനനച്ച ജൈവവൈവിധ്യ പാര്‍ക്കിലേക്ക് സന്ദര്‍ശകരെ ആകര്‍ഷിക്കുകയാണ് ശ്രീകണ്ഠാപുരം ഗവ. ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥികള്‍. കോട്ടൂര്‍ പന്നിയോട്ടുമൂലയിലുള്ള ജൈവവൈവിധ്യ കലവറയായ ഈ പാര്‍ക്ക് 2007-08 വര്‍ഷത്തെ പദ്ധതിയില്‍ ഉള്‍പ്പെടുത്തി ശ്രീകണ്ഠാപുരം ഗ്രാമപഞ്ചായത്ത് ആരംഭിച്ചത് മുതല്‍ ഇതിന്റെ മുഴുവന്‍ ഉത്തരവാദിത്വവും ഏറ്റെടുത്തിരിക്കുന്നത് സ്‌കൂളിലെ എന്‍.എസ്.എസ് യൂണിറ്റാണ്. വിവിധയിനം ചിത്രശലഭങ്ങളാലും പക്ഷിയിനങ്ങളുടെ വൈവിധ്യത്താലും സമ്പന്നമാണ് കോട്ടുര്‍ ജൈവവൈവിധ്യ പാര്‍ക്ക്.

പാലിന്റെ ഗുണനിലവാരത്തെക്കുറിച്ച് ബോധവത്കരിക്കുന്നതിനും വിപണിയില്‍ മെച്ചപ്പെട്ട പാലിന്റെ ലഭ്യത ഉറപ്പുവരുത്തുന്നതിനുമായി പാല്‍ ഉപഭോക്തൃ മുഖാമുഖവും സൗജന്യ പാല്‍ പരിശോധന ക്യാമ്പും ആഗസ്റ്റ് എട്ടിന് രാവിലെ 10 മണിക്ക് തളിപ്പറമ്പ് ക്ഷീര വ്യവസായ സഹകരണ സംഘത്തില്‍ ജെയിംസ് മാത്യു എം എല്‍ എ ഉദ്ഘാടനം ചെയ്യും. 

    സാമൂഹ്യ സുരക്ഷാ മിഷനില്‍ സ്‌റ്റേറ്റ് ലെയ്‌സണ്‍ ഓഫീസര്‍ തസ്തികയിലേക്കുള്ള വാക് ഇന്‍ ഇന്റര്‍വ്യു ആഗസ്റ്റ് ഒമ്പതിന് രാവിലെ പത്തിന് തിരുവനന്തപുരം പൂജപ്പുരയിലെ സാമൂഹ്യ സുരക്ഷാ മിഷന്‍ ഓഫീസില്‍ നടക്കും. 

    ജയിംസ് മാത്യു എം.എല്‍.എയുടെ പ്രത്യേക വികസനനിധിയില്‍നിന്ന് 7,80,000 രൂപ വിനിയോഗിച്ച് പുളിപ്പറമ്പ് മാന്തംകുണ്ട് റോഡ് റീടാറിംഗ് നടത്തുന്നതിന് തളിപ്പറമ്പ് നഗസരഭാ സെക്രട്ടറിക്ക് ജില്ലാ കലക്ടര്‍ ഭരണാനുമതി നല്‍കി. ഭരണാനുമതി ഉത്തരവ് ലഭിച്ച് ആറ് മാസത്തിനകം പ്രവൃത്തി പൂര്‍ത്തീകരിക്കേണ്ടതാണെന്ന് നിര്‍ദേശിച്ചു.

കണ്ണൂര്‍ താലൂക്ക് എടക്കാട് അംശം കുറ്റിക്കകം ദേശം റി സ 25/9ല്‍ പെട്ട ആറ് സെന്റ് ഭൂമി അവകാശമുള്ള ഉടമസ്ഥനാല്‍ ഉപേക്ഷിക്കപ്പെട്ടതാണെന്നു പ്രഥമദൃഷ്ട്യാ ബോധ്യപ്പെട്ടതിനാല്‍ ഇക്കാര്യത്തില്‍ ആക്ഷേപമുണ്ടെങ്കില്‍ ആറുമാസത്തിനകം കണ്ണൂര്‍ ജില്ലാ കലക്ടര്‍ മുമ്പാകെ ഉടമസ്ഥത തെളിയിക്കുന്ന രേഖകള്‍ സഹിതം ബോധിപ്പിക്കണം. അല്ലാത്ത പക്ഷം 1964 ലെ കേരള അന്യം നിന്നതും നഷ്ടപ്പെട്ടതുമായ വസ്തുക്കള്‍ സംബന്ധിച്ച നിയമത്തിലെ 11 എഫ് വകുപ്പ് പ്രകാരം മേല്‍ വസ്തു ജില്ലാ കലക്ടര്‍ കൈവശപ്പെടുത്തും.

ഓണം ബക്രീദ് ഉത്സവാഘോഷത്തോടനുബന്ധിച്ച് ഉപഭോക്തൃ സംരക്ഷണാര്‍ത്ഥം ലീഗല്‍ മെട്രോളജി വകുപ്പിന്റെ കണ്‍ട്രോള്‍ റൂം പ്രവര്‍ത്തനം ആരംഭിച്ചു.  ഉല്‍പന്നങ്ങള്‍ അളവിലും തൂക്കത്തിലും കുറവ് കാണപ്പെടുകയോ പായ്ക്ക് ചെയ്ത ഉല്‍പന്നത്തിന്‍മേല്‍ ആവശ്യമായ രേഖപ്പെടുത്തലുകള്‍ ഇല്ലാതെ വില്പന നടത്തുന്നത് ശ്രദ്ധയില്‍പ്പെടുകയോ ചെയ്താല്‍ ഉപഭോക്താക്കള്‍ക്ക് 0497 2706503, 0497 2706504 എന്നീ നമ്പറുകളില്‍ പരാതിപ്പെടാം.  കണ്‍ട്രോള്‍ റൂമിന്റെ പ്രവര്‍ത്തനം 24 മണിക്കൂറും ലഭ്യമാണെന്ന് അസി.കണ്‍ട്രോളര്‍ അറിയിച്ചു.

    പയ്യന്നൂര്‍ ഗവ. റസിഡന്‍ഷ്യല്‍ വിമന്‍സ് പോളിടെക്‌നിക് കോളേജിലെ ഒന്നാം വര്‍ഷ പ്രവേശനത്തിന് വിവിധ ബ്രാഞ്ചുകളില്‍ ഒഴിവുളള 73 സീറ്റുകളിലേക്ക് സ്‌പോട്ട് അഡ്മിഷന്‍ ആഗസ്റ്റ് എട്ടിന് കോളജില്‍ നടക്കും.