കേരളത്തെ വാനോളം പുകഴ്ത്തി യോഗ ഫെഡറേഷന്‍ ഓഫ് ഇന്ത്യയുടെ പ്രസിഡന്റ് അശോക് കുമാര്‍ അഗര്‍വാള്‍. മൂന്നാമത് സംസ്ഥാന യോഗ ചാംപ്യന്‍ഷിപ്പിന്റെ  ഉദ്ഘാടന ചടങ്ങില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം. സ്വന്തം നാടായ ഹരിയാനയാണ് ഇന്ത്യയിലെ മികച്ച സംസ്ഥാനം എന്നാണ് താന്‍ ഉള്‍പ്പെടെയുള്ളവര്‍ കരുതിയത്. എന്നാല്‍ യോഗയുടെ പ്രചാരണം ഉള്‍പ്പെടെ എല്ലാ മേഖലകളിലും കേരളമാണ് രാജ്യത്ത് ഒന്നാം സ്ഥാനത്തുള്ള സംസ്ഥാനമെന്നാണ് ഇനി താന്‍ പറയുകയെന്നും അദ്ദേഹം പറഞ്ഞു. 

    ശാസ്ത്രീയതയുടെ അടിസ്ഥാനത്തില്‍ യോഗയെ കായിക ഇനമായി കണ്ട് അതില്‍ പങ്കാളികളാകാന്‍ ജനങ്ങള്‍ തയ്യാറായിട്ടുണ്ടെന്ന് കായിക-വ്യവസായ-യുവജനക്ഷേമ വകുപ്പ് മന്ത്രി എ.സി മൊയ്തീന്‍. യോഗ അസോസിയേഷന്‍ ഓഫ് കേരളയുടെ ആഭിമുഖ്യത്തില്‍ മുണ്ടയാട് ഇന്‍ഡോര്‍ സ്‌റ്റേഡിയത്തില്‍ നടക്കുന്ന മൂന്നാമത് സംസ്ഥാന യോഗ ചാംപ്യന്‍ഷിപ്പ് ഉദ്ഘാടനം ചെയ്യുകയായിരുന്നു അദ്ദേഹം. വിഭാഗീയതയിലേക്ക് പോകാതെ, യോഗയെ നാടിന്റെ പൊതു സ്വത്തായി കണ്ട് മതനിരപേക്ഷമായ മൂല്യങ്ങള്‍ ഉള്‍ക്കൊണ്ടുകൊണ്ട് മുന്നോട്ടു പോകാന്‍ കേരളത്തിന് കഴിഞ്ഞിട്ടുണ്ടെന്നും അദ്ദേഹം പറഞ്ഞു. 

വിദ്യാലയ പരിസരങ്ങളിലെ മയക്കുമരുന്ന്, ലഹരി വസ്തുക്കളുടെ വില്‍പ്പന തടയാന്‍ വിട്ടുവീഴ്ചയില്ലാത്ത നടപടികള്‍ കൈക്കൊള്ളാന്‍ എക്‌സൈസ് വകുപ്പ് മന്ത്രി ടി പി രാമകൃഷ്ണന്‍ നിര്‍ദേശം നല്‍കി. കണ്ണൂര്‍ ഗസ്റ്റ്ഹൗസില്‍ ചേര്‍ന്ന ജില്ലയിലെ എക്‌സൈസ് ഉദ്യോഗസ്ഥരുടെ അവലോകന യോഗത്തില്‍ സംസാരിക്കുകയായിരുന്നു അദ്ദേഹം. ഒരു കാരണവശാലും സ്‌കൂള്‍, കോളേജ് പരിസരങ്ങളില്‍ ലഹരി വില്‍പ്പന അനുവദിക്കരുത്. ഇങ്ങനെ ചെയ്യുന്നതായി കണ്ടാല്‍ അത്തരം കടകള്‍ അടപ്പിക്കാനാവശ്യമായ വിധത്തിലുള്ള നടപടികളാണ് കൈക്കൊള്ളേണ്ടതെന്ന് മന്ത്രി പറഞ്ഞു.

    കോഴിക്കോട് ഇന്‍ഡസ്ട്രിയല്‍ ട്രൈബ്യൂണലും എംപ്ലോയീസ് കോമ്പന്‍സേഷന്‍ കമ്മീഷണറും എംപ്ലോയീസ് ഇന്‍ഷുറന്‍സ് കോടതി ജഡ്ജിയുമായ കെ.വി. രാധാകൃഷ്ണന്‍ ആഗസ്റ്റ് ഏഴ്, 14 തീയതികളില്‍ കണ്ണൂര്‍ ലേബര്‍ കോടതിയിലും 21ന് തലശ്ശേരി ബാര്‍ അസോസിയേഷന്‍ ബൈസെന്റിനറി ഹാളിലും 16, 17 തീയതികളില്‍ വയനാട് കല്‍പ്പറ്റ ബാര്‍ അസോസിയേഷന്‍ ഹാളിലും 31ന് കാസര്‍കോഡ് ജില്ലാ ലേബര്‍ ഓഫീസിലും ഒന്ന്, രണ്ട്, മൂന്ന്, എട്ട്, ഒന്‍പത്, 10 തീയതികളില്‍ ആസ്ഥാനത്തും തൊഴില്‍ തര്‍ക്ക കേസുകളും എംപ്ലോയീസ് കോമ്പന്‍സേഷന്‍ കേസുകളും എംപ്ലോയീസ് ഇന്‍ഷുറന്‍സ് കേസുകളും വിചാരണ ചെയ്യും.
പി.എന്‍.എക്‌സ്.3237/18

    നന്ദാവനത്ത് പണി പൂര്‍ത്തിയായ പട്ടികജാതി വികസന വകുപ്പ് ഡയറക്ടറുടെ കാര്യാലയത്തിന്റെ പ്രവര്‍ത്തനോദ്ഘാടനം ആഗസ്റ്റ് ഒന്ന് ഉച്ചയ്ക്ക് 12ന് പട്ടികജാതി പട്ടികവര്‍ഗ പിന്നാക്ക വിഭാഗ, നിയമ,  സാംസ്‌കാരിക പാര്‍ലമെന്ററി കാര്യ വകുപ്പ് മന്ത്രി എ.കെ. ബാലന്‍ നിര്‍വഹിക്കും. വി.എസ്.ശിവകുമാര്‍ എം.എല്‍.എ അധ്യക്ഷത വഹിക്കും.
പി.എന്‍.എക്‌സ്.3236/18

സര്‍ക്കാര്‍ സാമ്പത്തിക പ്രതിസന്ധിയിലാണെങ്കിലും പാവപ്പെട്ട ജനങ്ങള്‍ക്ക് ലഭിക്കേണ്ട ക്ഷേമ പെന്‍ഷന്‍ ഓണത്തിനു മുമ്പ് കുടിശ്ശിക തീര്‍ത്ത് വിതരണം ചെയ്യുമെന്ന് തൊഴില്‍- നൈപുണ്യവികസന- എക്‌സൈസ് വകുപ്പ് മന്ത്രി ടി പി രാമകൃഷ്ണന്‍ അറിയിച്ചു. നോട്ട് നിരോധനവും കേന്ദ്ര സര്‍ക്കാര്‍ ഏര്‍പ്പെടുത്തിയ പുതിയ നികുതി പരിഷ്‌കരണമായ ജി.എസ്.ടിയും പോലുള്ള നടപടികള്‍ സംസ്ഥാന സര്‍ക്കാരിന്റെ വരുമാനത്തെ ഗണ്യമായി ബാധിച്ചിട്ടുണ്ട്.

    സ്‌കോള്‍ കേരള മുഖേനയുള്ള 2018 -20 ബാച്ച് ഹയര്‍സെക്കണ്ടറി കോഴ്‌സ് ഒന്നാം വര്‍ഷ പ്രവേശനത്തിന്  ഓണ്‍ലൈന്‍ രജിസ്‌ട്രേഷന്‍ നടത്തിയവര്‍ ഡൗണ്‍ലോഡ് ചെയ്ത അപേക്ഷയും നിര്‍ദ്ദിഷ്ട രേഖകളും അടിയന്തരമായി അതത് ജില്ലാ കേന്ദ്രങ്ങളില്‍ നേരിട്ടോ, സംസ്ഥാന കേന്ദ്രത്തില്‍ സ്പീഡ്/രജിസ്റ്റേര്‍ഡ് തപാല്‍ മാര്‍ഗമോ, നേരിട്ടോ എത്തിക്കണം.
പി.എന്‍.എക്‌സ്.3235/18

    തൃശൂര്‍ ആയുര്‍ധാര ഫാര്‍മസ്യൂട്ടിക്കല്‍സില്‍ കരാര്‍ അടിസ്ഥാനത്തില്‍ ഒരു പ്രൊഡക്ഷന്‍ മാനേജരുടെ ഒഴിവിലേക്ക് പ്രൊഡക്ഷനില്‍ ആയുര്‍വേദ മാസ്റ്റര്‍ ഡിഗ്രി (എം.ഡി) ഉള്ള ഉദേ്യാഗാര്‍ത്ഥികളില്‍ നിന്നും അപേക്ഷ ക്ഷണിച്ചു. 65 വയസിന് താഴെയുള്ള റിട്ടയര്‍ ചെയ്തവരെയും പരിഗണിക്കും. ആഗസ്റ്റ് ഏഴിനകം അപേക്ഷ സമര്‍പ്പിക്കണം.
പി.എന്‍.എക്‌സ്.3234/18
 

    നവകേരളം കര്‍മ്മ പദ്ധതിയുടെ ഭാഗമായി നാലു മിഷനുകളുടെയും വാര്‍ഷിക അവലോകനത്തിനും ഭാവി പരിപാടികള്‍ ആസൂത്രണം ചെയ്യുന്നതിനുമായി  തദ്ദേശഭരണ അധ്യക്ഷന്‍മാര്‍ക്കായി ആഗസ്റ്റ് രണ്ട്, മൂന്ന് തിയതികളില്‍ തിരുവനന്തപുരത്ത് നടത്തുന്ന ശില്പശാല മുഴുവന്‍ ജനപ്രതിനിധികള്‍ക്കും അവരുടെ തദ്ദേശഭരണസ്ഥാപനത്തില്‍ ഇരുന്നു പങ്കെടുക്കാന്‍ കഴിയുന്ന ഡിജിറ്റല്‍ സംവിധാനം കേരള ഇന്‍ഫ്രാസ്ട്രക്ചര്‍ ആന്റ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) ഏര്‍പ്പെടുത്തി.