പാലച്ചിറമാട് ബസ് അപകടത്തിന്റെ പശ്ചാത്തലത്തില്‍ മോട്ടോര്‍ വാഹനവകുപ്പ് കര്‍ശന പരിശോധനക്കൊരുങ്ങുന്നു. റോഡരികില്‍ നിന്ന് വാഹനം തടഞ്ഞ് പരിശോധന നടത്തുന്നതിന് പകരം യാത്രക്കാരായി ബസുകളില്‍ കയറി അമിത വേഗതയും അപകടകരമായ ഡ്രൈവിംഗും കണ്ടെത്താനാണ് തീരുമാനം. സ്ഥിരം അപകടങ്ങളുണ്ടാകുന്ന തൃശൂര്‍- കോഴിക്കോട് റൂട്ടിലാണ് ആദ്യഘട്ടം ഈ രീതിയില്‍ പരിശോധനകള്‍ നടക്കുക. ഈ മാസം 23 മുതല്‍ പരിശോധനകള്‍ തുടങ്ങും. ആഗസ്ത്  ഒന്നു മുതല്‍ പരിശോധനകള്‍ മറ്റു റൂട്ടുകളിലേക്കും വ്യാപിപ്പിക്കും.

ദേശീയപാത 66 ല്‍ കോട്ടയ്ക്കലിനടുത്ത് പാലച്ചിറമാട് ബസ് മറിഞ്ഞ് ഒരാള്‍ മരിക്കുകയും അമ്പത് പേര്‍ക്ക് പരിക്കേല്‍ക്കാനുമിടയായത് ബസിന്റെ ബ്രേക്കിംഗ് സിസ്റ്റത്തിന്റെ തകരാറും അശ്രദ്ധമായ ഡ്രൈവിംഗും കാരണമെന്ന് അന്വേഷണ റിപ്പോര്‍ട്ട്. മദ്ധ്യമേഖലാ ഡെപ്യൂട്ടി ട്രാന്‍സ്‌പോര്‍ട്ട് കമ്മീഷണര്‍ എം.പി അജിത് കുമാര്‍ അന്വേഷിച്ച് തയ്യാറാക്കിയ റിപ്പോര്‍ട്ടിലാണ് പരാമര്‍ശം. അപകടത്തിന്റെ പശ്ചാത്തലത്തില്‍ ബസ് ഡ്രൈവറുടെ ലൈസന്‍സും ബസിന്റെ പെര്‍മിറ്റും സസ്‌പെന്റ് ചെയ്യാന്‍ തീരുമാനിച്ചിട്ടുണ്ട്.

നാഷണല്‍ ട്രസ്റ്റ് ലോക്കല്‍ ലെവല്‍ കമ്മിറ്റി ഹിയറിംഗില്‍ കൂടുതല്‍ അപേക്ഷകള്‍ ഒരു ദിവസം തന്നെ തീര്‍പ്പാക്കുന്നതിനുള്ള നടപടികള്‍ സ്വീകരിക്കുമെന്ന് ജില്ലാ കളക്ടര്‍  അമിത് മീണ. ഓട്ടിസം, സെറിബ്രല്‍ പാള്‍സി, ബുദ്ധിമാന്ദ്യം, മറ്റ് ബഹുവിധ വൈകല്യങ്ങള്‍ തുടങ്ങിയവയുള്ളവര്‍ക്ക് 1999 ലെ നാഷണല്‍ ട്രസ്റ്റ് ആക്റ്റ് നിഷ്‌കര്‍ശിക്കുന്ന പരിരക്ഷ ഉറപ്പ് വരുത്തുമെന്നും അദ്ദേഹം പറഞ്ഞു. കളക്ടറേറ്റില്‍ നടന്ന നാഷണല്‍ ട്രസ്റ്റ് ലോക്കല്‍ ലെവല്‍ കമ്മിറ്റി ഹിയറിംഗില്‍ സംസാരിക്കുകയായിരുന്നു ജില്ലാ കലക്ടര്‍.

കേരളത്തിന്റെ വികസനത്തിന് സഹകരണപ്രസ്ഥാനങ്ങളും പ്രവാസികളും ഒന്നിച്ച് പ്രവര്‍ത്തിക്കേണ്ടതുണ്ടെന്ന് നിയമസഭാസ്പീക്കര്‍ പി. ശ്രീരാമകൃഷ്ണന്‍.  അന്തര്‍ദേശീയ സഹകരണദിനത്തോടനുബന്ധിച്ച് മലപ്പുറത്ത് സംഘടിപ്പിച്ച സഹകരണപ്രസ്ഥാനവും പ്രവാസി പുനരധിവാസവും എന്ന വിഷയത്തില്‍ നടന്ന സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം.

    പ്രധാനമന്ത്രി വിള ഇന്‍ഷ്വറന്‍സ് പദ്ധതിയുടെയും കാലാവാസ്ഥാധിഷ്ഠിത വിള ഇന്‍ഷ്വറന്‍സ് പദ്ധതിയുടെയും ഖാരിഫ് 2018 ലേക്കുളള സംസ്ഥാന സര്‍ക്കാര്‍ വിജ്ഞാപനമിറക്കി.  പൊതുമേഖലയിലുളള അഗ്രിക്കള്‍ച്ചര്‍ ഇന്‍ഷ്വറന്‍സ്  കമ്പനി ഓഫ് ഇന്ത്യയാണ് പദ്ധതികളുടെ നിര്‍വ്വഹണ ഏജന്‍സി. മലപ്പുറം ജില്ലയില്‍ പ്രധാനമന്ത്രി ഫസല്‍ ഭീമയോജന (ജങഎആഥ) യില്‍ വാഴ, മരച്ചീനി വിളകളും കാലാവസ്ഥാധിഷ്ഠിത വിള ഇന്‍ഷ്വറന്‍സ് പദ്ധതിയില്‍ നെല്ല്, കവുങ്ങ്, മഞ്ഞള്‍, വാഴ എന്നീ വിളകളുമാണ് ഉള്‍പ്പെടുത്തിയിരിക്കുന്നത്.

പെരിന്തല്‍മണ്ണ ഗവ:പോളിടെക്‌നിക്കിന്റെ കീഴില്‍ മങ്കട വേരുംപുലാക്കലില്‍ പ്രവര്‍ത്തിക്കുന്ന ഗവ:ഇന്‍സ്റ്റിറ്റ്യൂട്ട് ഓഫ് ഫാഷന്‍ ഡിസൈനിംഗിലേക്ക് അപേക്ഷ ക്ഷണിച്ചു. പ്രവേശനം ജൂലൈ 21ന്  രാവിലെ 10 ന് പെരിന്തല്‍മണ്ണ ഗവ. പോളിടെക്‌നിക്കില്‍ നടക്കും.

    പോളിടെക്‌നിക്ക് പ്രവേശനത്തിന് മൂന്നാമത്തെ അലോട്ട്‌മെന്റ് പ്രകാരം പെരിന്തല്‍മണ്ണ ഗവ: പോളിടെക്‌നിക്കില്‍  പ്രവേശനം ലഭിച്ചവര്‍ അലോട്ട്‌മെന്റ് സ്ലിപ്,  ടി.സി, അസ്സല്‍ സര്‍ട്ടിഫിക്കറ്റുകള്‍, നിശ്ചിത ഫീസും സഹിതം രക്ഷിതാവുമൊത്ത്  2018 ജൂലൈ 18 ന് രാവിലെ ഒമ്പതിന്  പെരിന്തല്‍മണ്ണ ഗവ. പോളിടെക്‌നിക്ക് കോളേജില്‍ എത്തണം.

    വിജയഭേരി പദ്ധതിയുടെ ഭാഗമായി ഹൈസ്‌കൂള്‍ സോഷ്യല്‍ സയന്‍സ് അധ്യാപകര്‍ക്ക് 'പ്രവര്‍ത്തനാധിഷ്ഠിത ക്ലാസ് റൂം' വിഷയത്തില്‍ ഏകദിന പരിശീലനം നല്‍കുന്നു.   ഹൈസ്‌കൂളില്‍  നിന്നും ഒരാള്‍ക്ക് വീതം പരിശീലനത്തില്‍ പങ്കെടുക്കാം. ജുലൈ 21 ന് രാവിലെ 10 മുതല്‍ വൈകീട്ട് നാല് വരെ ജില്ലാ പഞ്ചായത്ത് ഹാളിലാണ് പരിശീലനം. പാലക്കാട് വിക്ടോറിയ കോളേജിലെ പ്രൊഫസര്‍ അരുണ്‍ കുമാര്‍ നേതൃത്വം നല്‍കും.

പെരിന്തല്‍മണ്ണ ബ്ലോക്കിലെ സാക്ഷരതാ പത്താം തരം, ഹയര്‍സെക്കന്ററി സൗജന്യ തുല്യത ക്ലാസുകളിലേക്ക് അപേക്ഷ ക്ഷണിച്ചു. താല്പര്യമുളളവര്‍ ബന്ധപ്പെടുക. ഫോണ്‍:9847250830.