സംസ്ഥാനത്ത് മഴക്കെടുതിയില്‍ ദുരിതമനുഭവിക്കുന്നവര്‍ക്കുള്ള ആശ്വാസ പ്രവര്‍ത്തനങ്ങള്‍ക്കായി 113.19 കോടി രൂപ അനുവദിച്ചതായി റവന്യു മന്ത്രി ഇ.ചന്ദ്രശേഖരന്‍ അറിയിച്ചു.  സംസ്ഥാന ദുരന്തപ്രതികരണ നിധിയില്‍ നിന്നുള്ള ഈ തുക അടിയന്തരമായി വിതരണം ചെയ്യാന്‍ ജില്ലാ കലക്ടര്‍മാര്‍ക്ക് നിര്‍ദ്ദേശം നല്കിയതായും മന്ത്രി വ്യക്തമാക്കി.  അടിയന്തര സാഹചര്യങ്ങള്‍ നേരിടാന്‍ ദേശീയ ദുരന്തപ്രതികരണ സേനയുടെ രണ്ട് സംഘത്തെകൂടി കേരളത്തിലേക്ക് അയക്കണമെന്ന് കേന്ദ്ര സര്‍ക്കാരിനോട് ആവശ്യപ്പെട്ടിട്ടുണ്ടെന്നും മന്ത്രി പറഞ്ഞു.

    കൊച്ചിയില്‍ സംഘടിപ്പിക്കുന്ന പത്താമത് കേരള ട്രാവല്‍ മാര്‍ട്ടിന് സെപ്തംബര്‍ 27 ന് ബോള്‍ഗാട്ടിയിലെ ഗ്രാന്റ് ഹയാട്ടില്‍ തുടക്കമെന്ന് ടൂറിസം മന്ത്രി കടകംപളളി സുരേന്ദ്രന്‍ വാര്‍ത്താസമ്മേളനത്തില്‍ അറിയിച്ചു.  മുഖ്യപ്രമേയം  മലബാര്‍ ടൂറിസത്തിന്റെ പ്രചാരണം ആയിരിക്കും.സെപ്തംബര്‍ 28 മുതല്‍ 30 വരെ ബയര്‍ സെല്ലര്‍ മീറ്റ് നടക്കും.വിദഗ്ധര്‍ പങ്കെടുക്കുന്ന നാലു സെമിനാറുകളുമുണ്ട്. കൊച്ചിയിലെ വെല്ലിംഗ്ടണ്‍ ഐലന്‍ഡിലെ സാമുദ്രിക ആന്‍ഡ് സാഗരാ കണ്‍വെന്‍ഷന്‍ സെന്ററിലാണ് ബിസിനസ് ടു ബിസിനസ് മീറ്റുകള്‍ നടക്കുന്നത്.

    ജലസേചന വകുപ്പിലെ മെക്കാനിക്കല്‍ വിഭാഗം ഗ്രേഡ് - 2 ഓവര്‍സിയര്‍മാരുടെ 2013 സെപ്തംബര്‍ ഒന്നു മുതല്‍ 2017 ഡിസംബര്‍ 31 വരെയുളള മുന്‍ഗണനാ പട്ടിക പ്രസിദ്ധീകരിച്ചു.  വകുപ്പിന്റെ ഔദ്യോഗിക വെബ്‌സൈറ്റിലും കേരളാ ഗസറ്റിലും ലഭ്യമാണ്.
 പി.എന്‍.എക്‌സ്.3013/18

    കേരള സര്‍ക്കാര്‍ തൊഴിലും നൈപുണ്യ വകുപ്പിന് കീഴിലുള്ള കേരള സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് ഡിസൈനില്‍ പോസ്റ്റ് ഗ്രാജുവേറ്റ് ഡിപ്ലോമ ഇന്‍ ഐ.ടി ഇന്റഗ്രേറ്റഡ് കമ്മ്യൂണിക്കേഷന്‍ ഡിസൈന്‍, ടെക്സ്റ്റയില്‍ ആന്‍ഡ് അപ്പാരല്‍ ഡിസൈന്‍ എന്നീ കോഴ്സുകളില്‍ ഏതാനും ഒഴിവുകളുണ്ട്.

    സംസ്ഥാന സ്‌പോര്‍ട്‌സ് കൗണ്‍സിലിന്റെ നിയന്ത്രണത്തിലുളള പിരപ്പന്‍കോട് അന്താരാഷ്ട്ര സ്വിമ്മിംഗ് പൂളില്‍ ലൈഫ് ഗാര്‍ഡ് തസ്തികകളില്‍ ദിവസവേതന അടിസ്ഥാനത്തില്‍ ജീവനക്കാരെ നിയമിക്കുന്നതിന് ജൂലൈ 20 ന് രാവിലെ  11 മണിക്ക് വാക്ക് - ഇന്‍-ഇന്റര്‍വ്യൂ നടത്തുന്നു. എസ്. എസ്. എല്‍. സി.യാണ്  കുറഞ്ഞ യോഗ്യത. വയസ് : 40 ല്‍ താഴെ. സായ് / സ്വിമ്മിംഗ് ഫെഡറേഷന്‍ ഓഫ് ഇന്ത്യ, ഡിഫന്‍സ് സര്‍വ്വീസ് എന്നിവിടങ്ങളില്‍ നിന്ന് ജീവന്‍ രക്ഷാ കോഴ്‌സില്‍ സര്‍ട്ടിഫിക്കറ്റ് നേടിയിരിക്കണം.  ഉദ്യോഗാര്‍ത്ഥികള്‍ക്ക് പ്രാക്ടിക്കല്‍ ടെസ്റ്റ് നടത്തും.

 ദുരിതാശ്വാസ ക്യാമ്പുകളിലെ ആഹാരത്തിനായി വകയിരുത്തിയിട്ടുള്ള തുകയിലെ കുറവും, രോഗങ്ങളും മറ്റും മൂലം ക്യാമ്പുകളില്‍ വരാന്‍ കഴിയാതെ വീടുകളില്‍ കഴിയുന്നവര്‍ക്കും സഹായം ലഭ്യമാക്കണമെന്ന ആവശ്യവും ഇന്നു ചേരുന്ന മന്ത്രിസഭയുടെ ശ്രദ്ധയില്‍ കൊണ്ടുവരുമെന്ന് ജലവിഭവ വകുപ്പ് മന്ത്രി മാത്യു ടി തോമസ് പറഞ്ഞു. ജില്ലയിലെ വിവിധ ദുരിതാശ്വാസ ക്യാമ്പുകള്‍ സന്ദര്‍ശിച്ച ശേഷം സംസാരിക്കുകയായിരുന്നു അദ്ദേഹം. 

    കൊല്ലം ജില്ലയിലെ തെന്മല പരപ്പാര്‍ ഡാമിന്റെ വൃഷ്ടിപ്രദേശത്ത് മഴ സമൃദ്ധമായതിനാ ല്‍ പരപ്പാര്‍ ഡാം തുറക്കാന്‍ സാധ്യതയുണ്ട്. കല്ലടയാറിന്റെ തീരങ്ങളിലും കല്ലട ജലസേചന പദ്ധതിയുടെ കനാലുകളുടെ തീരങ്ങളില്‍ താമസിക്കുന്നവരും ജാഗ്രത പാലിക്കണമെന്ന് കൊല്ലം ജില്ലാ കളക്ടര്‍ അറിയിച്ചു.                       

    പമ്പയില്‍ ഒഴുക്കില്‍പ്പെട്ട് മുങ്ങിമരിച്ച ചേര്‍ത്തല സ്വദേശിയായ ഗോപകുമാറിന്റെ ആശ്രിതര്‍ക്ക് ദേവസ്വം ബോര്‍ഡ് നല്‍കുന്ന ഇന്‍ഷുറന്‍സ് തുകയായ ഒരു ലക്ഷം രൂപയ്ക്ക് പുറമേ സംസ്ഥാന സര്‍ക്കാര്‍ കാലവര്‍ഷക്കെടുതികളില്‍ മരണമടയുന്നവരുടെ ആശ്രിത ര്‍ക്ക് അനുവദിക്കുന്ന നഷ്ടപരിഹാരതുകയായ നാല് ലക്ഷം രൂപയും അനുവദിക്കുമെന്ന് ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍ അറിയിച്ചു.