മാലിന്യസംസ്‌കരണ സംവിധാനങ്ങളില്ലാത്ത വ്യാപാര സ്ഥാപനങ്ങള്‍ക്കെതിരെ കര്‍ശന നടപടിയുണ്ടാകുമെന്ന് ജില്ലാ കളക്ടര്‍ അമിത് മീണ. തദ്ദേശസ്വയംഭരണ സ്ഥാപനങ്ങള്‍ ഇത് ഉറപ്പാക്കണം. ഇക്കാര്യത്തില്‍ നടപടി ആവശ്യപ്പെട്ട് തദ്ദേശ സ്വയംഭരണ സ്ഥാപനങ്ങളിലെ സെക്രട്ടറിമാര്‍ക്ക് സര്‍ക്കുലര്‍ അയക്കുമെന്നും കളക്ടര്‍ പറഞ്ഞു. പകര്‍ച്ചവ്യാധികള്‍ തടയുന്നതിനുള്ള ആരോഗ്യജാഗ്രതാ പരിപാടിയുടെ ഭാഗമായി കലക്ടറേറ്റില്‍ ചേര്‍ന്ന യോഗത്തില്‍ സംസാരിക്കുകയായിരുന്നു അദ്ദേഹം.

അന്താരാഷ്ട്ര വനിതാദിനമായ മാര്‍ച്ച് എട്ടിന് രാവിലെ 6.23 മുതല്‍ രാത്രി 10 വരെ ആകാശവാണി മഞ്ചേരി എഫ്.എം 102.7ലെ പരിപാടികള്‍ വനിതാമയം. സ്ത്രീകള്‍ അവതരിപ്പിക്കുന്നതോ, അവരെക്കുറിച്ചുള്ളതോ ആയ പരിപാടികള്‍ മാത്രമാകും ഇവിടെ നിന്നുള്ള പ്രക്ഷേപണത്തില്‍ മുഴുവനും. പ്രഭാഷണങ്ങള്‍ മുതല്‍ തത്സമയ ഫോണ്‍ ഇന്‍ പരിപാടികള്‍ വരെ സ്ത്രീകള്‍ തന്നെ അവതരിപ്പിക്കുന്നത് മഞ്ചേരി നിലയത്തില്‍ ഇത് ആദ്യം.

കോഴിക്കോട് വിമാനത്താവളത്തിന് സമീപമുള്ള ലോഡ്ജിനുമുകളില്‍ നിന്ന് ചാടി ഗുരുതരമായി പരിക്കേറ്റ വിദ്യാര്‍ഥിനിക്ക് പട്ടികജാതി വികസന വകുപ്പില്‍ നിന്ന് ഒരു ലക്ഷം രൂപ ധനസഹായം അനുവദിച്ചു. സഹപാഠികള്‍ അപവാദം പ്രചരിപ്പിക്കുകയും കയ്യേറ്റത്തിന് മുതിരുകയും ചെയ്തതിനെ തുടര്‍ന്നാണ് പട്ടികജാതി വിഭാഗത്തില്‍പ്പെട്ട വിദ്യാര്‍ഥിനി കെട്ടിടത്തിനുമുകളില്‍ നിന്ന് ചാടിയത്. പട്ടികജാതി വികസനം-അതിക്രമം തടയല്‍ നിയമം - ജില്ലാതല വിജിലന്‍സ് ആന്‍ഡ് മോണിറ്ററിംഗ് സമിതി യോഗത്തിലാണ് തീരുമാനം.

    ജില്ലയിലെ ഗ്രാമ പഞ്ചായത്തുകളില്‍ തീര്‍പ്പാകാതെ കിടക്കുന്ന കെട്ടിട നിര്‍മ്മാണ അപേക്ഷകളില്‍ തീരുമാനമെടുക്കുന്നതിന് ജില്ലാ ടൗണ്‍ പ്ലാനറുടെ നേതൃത്വത്തില്‍ അദാലത്ത് നടത്തും. ജില്ലയിലെ വിവിധ താലൂക്ക് കേന്ദ്രങ്ങളില്‍ ഏപ്രില്‍ മാസത്തിലാണ് അദാലത്ത് നടത്തുക.  ഗ്രാമ പഞ്ചായത്തുകളില്‍ തീരുമാനത്തിന് കാലതാമസം നേരിടുന്ന അപേക്ഷകളില്‍ സത്വര പരിഹാരമുണ്ടാകണമെന്ന സര്‍ക്കാര്‍ തീരുമാനത്തിന്റെ അടിസ്ഥാനത്തിലാണ് നടപടി.    

കൊല്ലം ഇന്‍ഡസ്ട്രിയല്‍ ട്രിബ്യൂണല്‍ സുനിത വിമല്‍ മാര്‍ച്ച് 24ന് പീരുമേട് സിറ്റിംഗ് നടത്തും. തൊഴില്‍ തര്‍ക്ക കേസുകളും എംപ്ലോയീസ് ഇന്‍ഷുറന്‍സ് കേസുകളും കോമ്പന്‍സേഷന്‍ കേസുകളും പരിഗണിക്കും.

മനുഷ്യാവകാശ കമ്മീഷന്‍ സിറ്റിംഗ് മാര്‍ച്ച് 22ന് കോട്ടയത്ത് റസ്റ്റ് ഹൗസില്‍ നടക്കും. കമ്മീഷനംഗം കെ മോഹന്‍കുമാര്‍ പരാതികള്‍ പരിഗണിക്കും.