ജില്ലാ ആസൂത്രണ സമിതി യോഗം മാര്‍ച്ച് ആറിന് വൈകിട്ട് നാലിന് ജില്ലാ പഞ്ചായത്ത് സമ്മേളന ഹാളില്‍ ചേരുമെന്ന് ജില്ലാ കലക്ടര്‍ അറിയിച്ചു.

ജില്ലാ പഞ്ചായത്ത് യോഗം  മാര്‍ച്ച് എട്ടിന് രാവിലെ 11ന് ജില്ലാ പഞ്ചായത്ത് ഓഫീസില്‍ ചേരുമെന്ന് പ്രസിഡന്റ് അറിയിച്ചു.

ജില്ലയിലെ ചരക്ക് സേവന നികുതി രജിസ്‌ട്രേഷനുള്ള  കരാര്‍, ബില്‍ഡര്‍, കോമ്പൗണ്ട് ചെയ്ത സ്വര്‍ണ്ണ വ്യാപാരികള്‍ അടക്കമുള്ള വ്യാപാരികളുടെ 2011 മുതല്‍ 2017 വരെയുള്ള നികുതി നിര്‍ണ്ണയം അന്തിമമായി തീര്‍പ്പാക്കാനുള്ള നടപടികള്‍ അതത് ഓഫീസുകളില്‍ ആരംഭിച്ചതായി ജില്ലാ ഡെപ്യൂട്ടി കമ്മീഷണര്‍ അറിയിച്ചു. റിട്ടേണുകള്‍, ആഡിറ്റ് റിപ്പോര്‍ട്ട്, ലാഭ/നഷ്ട കണക്കുകള്‍, ബാലന്‍സ് ഷീറ്റ്, മറ്റു നികുതി ഒഴിവുകളും ബാധ്യതകളും തെളിയിക്കുന്ന രേഖകള്‍ എന്നിവ രജിസ്റ്റര്‍ ചെയ്ത ഓഫീസുകളില്‍ സമര്‍പ്പിക്കേണ്ടതാണ്.

         വികലാംഗ ക്ഷേമ കോര്‍പ്പറേഷന്‍  സംഘടിപ്പിക്കുന്ന തവന്നൂര്‍ നിയോജക മണ്ഡലം സഹായോപകരമ വിതരണ മെഡിക്കല്‍ ക്യാമ്പ് ഇന്ന് (മാര്‍ച്ച് മൂന്ന്) കാലടി പഞ്ചായത്തിലെ നരിപ്പറമ്പ് താജ് ഓഡിറ്റോറിയത്തില്‍ നടക്കും.  രാവിലെ എട്ടിന് ആരോഗ്യ സാമൂഹ്യ നീതി വകുപ്പ് മന്ത്രി കെ. കെ. ശൈലജ ടീച്ചര്‍ ഉദ്ഘാടനം ചെയ്യും.  ഉപകരണ വിതരണം തദ്ദേശ സ്വയംഭരണ വകുപ്പ് മന്ത്രി കെ.ടി ജലീല്‍ നിര്‍വ്വഹിക്കും.  ചടങ്ങില്‍  കോര്‍പ്പറേഷന്‍ ചെയര്‍മാന്‍ പരശുവക്കല്‍ മോഹനന്‍ അധ്യക്ഷത വഹിക്കും. 

ദേശീയ പാതാ വികസനത്തിന്റെ വിജ്ഞാപനം വന്നാല്‍ ഉടന്‍ ഭൂമി ഏറ്റെടുക്കല്‍ നടപടികള്‍ തുടങ്ങുന്നതിന് ജില്ലാ ഭരണ കൂടത്തിന്റെ നേത്യത്വത്തില്‍ ആക്ഷന്‍ പ്ലാന്‍ തയ്യാറാക്കിയതായി ജില്ലാ കലക്ടര്‍ അമിത് മീണ അറിയിച്ചു.ഭൂമി ഏറ്റെടുക്കല്‍ മുതല്‍ പണി തുടങ്ങുന്നതുവരെയുള്ള ആക്ഷന്‍ പ്ലാനാണ് തയ്യാറാക്കിയിരിക്കുന്നത്. ദേശിയ പാതാ വികസനവുമായി ബന്ധപ്പെട്ട കലക്‌ട്രേറ്റില്‍ നടന്ന അവലോകന യോഗത്തില്‍ അധ്യക്ഷത വഹിച്ചു സംസാരിക്കുകയായിരുന്നു ജില്ലാ കലക്ടര്‍.

പൊതുവിദ്യാലയങ്ങളിലെ വിവിധ മേഖലകളിലെ മികവുകള്‍ അവതരിപ്പിക്കാനായി കേരള ഇന്‍ഫ്രാസ്ട്രക്ചര്‍ ആന്റ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) സംഘടിപ്പിക്കുന്ന ഹരിത വിദ്യാലയം വിദ്യാഭ്യാസ റിയാലിറ്റി ഷോയുടെ ഗ്രാന്‍ഡ് ഫിനാലെ ഇന്ന് (മാര്‍ച്ച് അഞ്ച്)  വൈകിട്ട് ആറു മണിക്ക് തിരുവനന്തപുരം നിശാഗന്ധി ഓഡിറ്റോറിയത്തില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. 2017 ഡിസംബര്‍ നാല് മുതല്‍ കൈറ്റ് വിക്ടേഴ്‌സിലും ദൂരദര്‍ശനിലും സംപ്രേഷണം ചെയ്തു വരുന്ന  'ഹരിതവിദ്യാലയം' അറുപത് എപ്പിസോഡുകള്‍ പിന്നിട്ടു.  

പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി 45000 ക്ലാസ്മുറികള്‍ ഹൈടെക്കാക്കുന്നതിന്റെ  ഭാഗമായി 22402 ക്ലാസ്മുറികള്‍ ഹൈടെക് ആക്കുന്ന നടപടിക്രമങ്ങള്‍ കൈറ്റ് (കേരള ഇന്‍ഫ്രാസ്ട്രക്ചര്‍ & ടെക്‌നോളജി ഫോര്‍ എഡ്യൂക്കേഷന്‍) പൂര്‍ത്തിയാക്കിയതായി എക്‌സിക്യൂട്ടീവ് ഡയറക്ടര്‍ അറിയിച്ചു.  2018 ജനുവരി 22-നാണ് മുഖ്യമന്ത്രി പിണറായി വിജയന്‍ ഹൈടെക് പ്രോഗ്രാം ഉദ്ഘാടനം ചെയ്തത്. 1564 സ്‌കൂളുകളില്‍ മുഴുവന്‍ ക്ലാസ്മുറികളിലും 1079 സ്‌കൂളുകളില്‍ പകുതിയിലധികം ക്ലാസ്മുറികളിലും ഹൈടെക്  സംവിധാനമെത്തി. 

കേരള മീഡിയ അക്കാദമിയുടെ ആഭിമുഖ്യത്തില്‍ വിദ്യാര്‍ത്ഥികള്‍ക്കായി നടത്തിയ ഹരിതകേരളം മത്സരത്തിന്റെ വിജയികളെ പ്രഖ്യാപിച്ചു. ഹ്രസ്വചിത്രം, ഹരിതകേരള മുദ്രാഗാനം എന്നിങ്ങനെ രണ്ട് വിഭാഗങ്ങളിലായാണ് മത്സരം സംഘടിപ്പിച്ചത്. 

സൂക്ഷ്മ വിഷയങ്ങളില്‍ ഒരു ലക്ഷം രൂപ വീതമുള്ള ഫെലോഷിപ്പിന് ഡോ. പി.കെ. രാജശേഖരന്‍ (ന്യൂസ് എഡിറ്റര്‍, മാതൃഭൂമി - മലയാളത്തിലെ ലിറ്റില്‍ മാഗസിന്‍ പ്രസ്ഥാനത്തിന്റെ ചരിത്രം), സാജന്‍ എവുജിന്‍ (ബ്യൂറോ ചീഫ്, ദേശാഭിമാനി - കര്‍ഷക, ദളിത് അവസ്ഥയും മാധ്യമങ്ങളും സമകാലിക ഇന്ത്യയില്‍) എന്നിവര്‍ ഫെലോഷിപ്പിന് അര്‍ഹരായി.

കേരള മീഡിയ അക്കാദമി സംഘടിപ്പിക്കുന്ന രണ്ടാമത് അന്താരാഷ്ട്ര പ്രസ് ഫോട്ടോ ഫെസ്റ്റിവല്‍ മാര്‍ച്ച് എട്ട്, ഒമ്പത്, 10,11 തിയതികളില്‍ തിരുവനന്തപുരത്ത് വിവിധ വേദികളില്‍ നടക്കും. ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പിന്റെ സഹകരണത്തോടെ സംഘടിപ്പിക്കുന്ന ഫോട്ടോ ഫെസ്റ്റിവല്‍ എട്ടിന് വൈകിട്ട് ആറിന് തിരുവനന്തപുരം ടാഗോര്‍ സെന്റിനറി ഹാളില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. മീഡിയ അക്കാദമിയുടെ പ്രഥമ വേള്‍ഡ് പ്രസ് ഫോട്ടോഗ്രാഫര്‍ അവാര്‍ഡ് വിയറ്റ്‌നാം യുദ്ധത്തിന്റെ ഭീകരത പകര്‍ത്തി അന്താരാഷ്ട്ര പ്രശസ്തനായ ഫോട്ടോഗ്രഫര്‍ നിക് ഊട്ടിന് മുഖ്യമന്ത്രി സമ്മാനിക്കും.