ഓട്ടോമൊബൈല്‍ വര്‍ക്ക്‌ഷോപ്പ് തൊഴിലാളി ക്ഷേമനിധി പദ്ധതിയില്‍ അംഗമായി അംശാദായം അടവാക്കുന്നതില്‍ കുടിശ്ശിക വരുത്തി അംഗത്വം നടഷ്ടമായിട്ടുള്ള തൊഴിലാളികള്‍ക്ക് പിഴപലിശ സഹിതം കുടിശ്ശിക അടവാക്കി അംഗത്വ മാര്‍ച്ച് 31 വരെ പുതുക്കാമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. 

    സമൂഹത്തിന്റെ ശ്രദ്ധയും പരിചരണവും ആവശ്യമുള്ള കുട്ടികളുടെ സംരക്ഷണത്തിന് നന്മയുടെ പക്ഷത്തുനില്‍ക്കുന്ന എല്ലാവരുടെയും സഹായം തേടുമെന്ന് ഫിഷറീസ് വകുപ്പ് മന്ത്രി ജെ. മെഴ്‌സിക്കുട്ടി അമ്മ പറഞ്ഞു. ശ്രദ്ധയാവശ്യമുള്ള കുട്ടികളുടെ സംരക്ഷണത്തിനായി സംസ്ഥാനസര്‍ക്കാര്‍ ആരംഭിക്കുന്ന ബാലനിധി പദ്ധതിയുടെ ബ്രാന്‍ഡ് അംബാസഡറായി ഗായിക കെ.എസ്. ചിത്രയെ പ്രഖ്യാപിച്ചും വിജ്ഞാനദീപ്തി പദ്ധതി ഉദ്ഘാടനം ചെയ്തും സംസാരിക്കുകയായിരുന്നു മന്ത്രി. ബന്ധുക്കളില്‍ നിന്നുപോലും കുട്ടികള്‍ക്ക് സംരക്ഷണം കിട്ടാത്ത ഇക്കാലത്ത് ചിത്രയുടെ ബ്രാന്‍ഡ് അംബാസഡര്‍ പദവി കുട്ടികളുടെ സംരക്ഷണത്തിന് ഏറെ സഹായകമാവുമെന്നും മന്ത്രി പറഞ്ഞു. 

നാളെ നടക്കാനിരിക്കുന്ന വാഹന പണിമുടക്ക് ഒഴിവാക്കണമെന്ന് മുഖ്യമന്ത്രി പിണറായി വിജയന്‍ കെ.എസ്.ആര്‍.ടി.സി യിലെ വിവിധ തൊഴിലാളി യൂണിയനുകളോട് അഭ്യര്‍ത്ഥിച്ചു. മുഖ്യമന്ത്രിയുടെ ഓഫീസില്‍ വിവിധ തൊഴിലാളി യൂണിയന്‍ നേതാക്കളുമായി നടത്തിയ ചര്‍ച്ചയിലാണ് അഭ്യര്‍ത്ഥന നടത്തിയത്. 

സംസ്ഥാനത്ത് വിവിധ വകുപ്പുകളും ഏജന്‍സികളും നടത്തുന്ന നൈപുണ്യവികസന പരിപാടികള്‍ ഏകോപിപ്പിക്കാന്‍ മുഖ്യമന്ത്രി പിണറായി വിജയന്‍ നിര്‍ദ്ദേശം നല്‍കി. കേരള അക്കാദമി ഫോര്‍ സ്‌കില്‍സ് എക്‌സലന്‍സ്, ഐ.ടി.ഐ., നാഷണല്‍ എംപ്ലോയ്‌മെന്റ് സര്‍വ്വീസ് കേരള, അസാപ്, കുടുംബശ്രീ, കേരള ഇന്‍സ്റ്റിറ്റ്യൂട്ട് ഓഫ് ടൂറിസം ആന്റ് ട്രാവല്‍സ് തുടങ്ങി വിവിധ ഏജന്‍സികളാണ് ഇപ്പോള്‍ സംസ്ഥാനത്ത് നൈപുണ്യവികസന പരിപാടികളും കോഴ്‌സുകളും നടത്തുന്നത്. നൈപുണ്യവികസന പരിപാടികള്‍ മെച്ചപ്പെടുത്തുന്നതിനെക്കുറിച്ച് ആലോചിക്കാന്‍ ചേര്‍ന്ന യോഗത്തിലാണ് മുഖ്യമന്ത്രി ഇത് സംബന്ധിച്ച നിര്‍ദ്ദേശം നല്‍കിയത്.

കിന്‍ഫ്രക്ക് ഭൂമി കൈമാറുന്നതിലൂടെ എഫ്.എ.സി.ടി-ക്ക് ലഭിക്കുന്ന തുക പൂര്‍ണ്ണമായി ആ വ്യവസായ സ്ഥാപനത്തിന്റെ ആധുനികവല്‍ക്കരണത്തിനും വിപുലീകരണത്തിനും ഉപയോഗിക്കണമെന്ന് മുഖ്യമന്ത്രി പിണറായി വിജയന്‍ പ്രധാനമന്ത്രി നരേന്ദ്രമോദിക്ക് അയച്ച കത്തില്‍ ആവശ്യപ്പെട്ടു. 

    വര്‍ഷങ്ങളായി വികസനപ്രവര്‍ത്തനങ്ങള്‍ നടക്കാത്ത വിഴിഞ്ഞം വടക്കുഭാഗത്തെ ജനങ്ങളുടെ ജീവിത നിലവാരം ഉയര്‍ത്താനും വികസന പ്രക്രിയ ത്വരിതപ്പെടുത്താനും പ്രദേശവാസികളുമായി ചര്‍ച്ചചെയ്ത് പദ്ധതി ആവിഷ്‌കരിക്കുമെന്ന് മന്ത്രി ജെ. മെഴ്‌സിക്കുട്ടി അമ്മ പറഞ്ഞു. വിഴിഞ്ഞം ദര്‍ഗ ഷെരീഫില്‍ ചേര്‍ന്ന പ്രദേശവാസികളുടെയും ജമാ അത്ത് കമ്മിറ്റിയുടെയും യോഗത്തില്‍ സംസാരിക്കുകയായിരുന്നു മന്ത്രി. 

കേരള ലളിതകലാ അക്കാഡമിയുടെ നേതൃത്വത്തില്‍ ചിത്രങ്ങള്‍, ശില്‍പങ്ങള്‍, രേഖാചിത്രങ്ങള്‍ എന്നിവ ഉള്‍ക്കൊള്ളിച്ച് ജിജി ജോര്‍ജിന്റെ ഏകാംഗ പ്രദര്‍ശനം 30 ന് നടക്കും.  വൈകിട്ട് 5.30ന് വൈലോപ്പിള്ളി സംസ്‌കൃതി ഭവനില്‍ അടൂര്‍ ഗോപാലകൃഷ്ണന്‍ ഉദ്ഘാടനം ചെയ്യും. 

പി.എന്‍.എക്‌സ്.286/18

സംസ്ഥാന ആര്‍ക്കൈവ്‌സ് വകുപ്പ് സംഘടിപ്പിക്കുന്ന പൈതൃക പഠന യാത്രയ്ക്ക് ഇന്ന് (ജനുവരി 24) തുടക്കമാവും.  രാവിലെ 7.30 ന് പുരാവസ്തു, പുരാരേഖ, മ്യൂസിയം വകുപ്പ് മന്ത്രി രാമചന്ദ്രന്‍ കടന്നപ്പള്ളി ഔദ്യോഗിക വസതിയില്‍ യാത്ര ഫ്‌ളാഗ് ഓഫ് ചെയ്യും.  നിയമസഭാ മ്യൂസിയം, സെന്‍ട്രല്‍ ആര്‍ക്കൈവ്‌സ്, നെടുമങ്ങാട് കോയിക്കല്‍ കൊട്ടാരം, പേപ്പാറ ഡാം, മീന്‍മുട്ടി, പൊന്‍മുടി, വിനോഭാനികേതന്‍ ആശ്രമവും മ്യൂസിയവും തുടങ്ങിയ സ്ഥലങ്ങള്‍ സന്ദര്‍ശിക്കും. ആര്‍കൈവ്‌സ് വകുപ്പ് സംഘടിപ്പിച്ച പ്രശ്‌നോത്തരി മത്സരത്തില്‍ സംസ്ഥാനതലത്തില്‍ മികവ് പ്രകടിപ്പിച്ച സ്‌കൂള്‍ കുട്ടികളെ ഉള്‍പ്പെടുത്തിയാണ് പഠനയാത്ര നടത്തുന്നത്.