ജില്ലയിലെ പകര്‍ച്ചവ്യാധി പ്രതിരോധ നിയന്ത്രണ പ്രവര്‍ത്തനങ്ങള്‍ വിലയിരുത്തുന്നതിനും ആസൂത്രണം ചെയ്യുന്നതിനും മഴക്കാല പൂര്‍വ്വ പ്രതിരോധ പ്രവര്‍ത്തനങ്ങള്‍ ഏകോപിപ്പിക്കുന്നതിനുമായി ജില്ലാ കലക്ടറുടെ അധ്യക്ഷതയില്‍ ഏപ്രില്‍ 28 ന് ഉച്ചയ്ക്ക് രണ്ടിന് കലക്ടറേറ്റ് കോണ്‍ഫറന്‍സ് ഹാളില്‍ വിവിധ വകുപ്പ് മേധാവികളുടെ യോഗം ചേരുമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു.

മാലിന്യ സംസ്‌കരണം, മഴക്കാലപൂര്‍വ്വ ശുചീകരണം, വൃത്തിയുള്ള നവകേരളം ക്യാമ്പയിന്‍ തുടങ്ങിയ വിവിധ പ്രവര്‍ത്തനങ്ങളുടെ അവലോകനത്തിന് വൈദ്യുതി വകുപ്പ് മന്ത്രി കെ. കൃഷ്ണന്‍കുട്ടിയുടെ അധ്യക്ഷതയില്‍ ഏപ്രില്‍ 29 ന് ഉച്ചയ്ക്ക് രണ്ടിന് ചിറ്റൂര്‍ മിനി സിവില്‍ സ്റ്റേഷനില്‍ യോഗം ചേരും.

പാലക്കാട് ഗവ വിക്ടോറിയ കോളെജില്‍ സൈക്കോളജി വകുപ്പില്‍ ഗസ്റ്റ് അധ്യാപക ഒഴിവ്. യു.ജി.സി നെറ്റ് യോഗ്യത ഉള്ളവര്‍ക്ക് മുന്‍ഗണന. അവരുടെ അഭാവത്തില്‍ ബിരുദാനനന്തര ബിരുദ തലത്തില്‍ 55 ശതമാനത്തില്‍ കുറയാത്ത മാര്‍ക്ക് നേടിയിട്ടുള്ളവരെയും പരിഗണിക്കും. ഉദ്യോഗാര്‍ത്ഥികള്‍ ബയോഡാറ്റയും യോഗ്യത തെളിയിക്കുന്ന സര്‍ട്ടിഫിക്കറ്റുകളും സഹിതം ഏപ്രില്‍ 27 ന് രാവിലെ 10 ന് കോളെജില്‍ എത്തണം. ഇന്റര്‍വ്യൂവില്‍ പങ്കെടുക്കുന്നതിന് മുമ്പ് കോളെജ് വിദ്യാഭ്യാസ വകുപ്പ് ഡെപ്യൂട്ടി ഡയറക്ടറുടെ ഓഫീസില്‍ പേര് രജിസ്റ്റര്‍ ചെയ്യണം. ഫോണ്‍: 0491 2576773

കേരള സ്റ്റേറ്റ് സിവില്‍ സര്‍വീസ് അക്കാദമി പാലക്കാട് സെന്ററില്‍ 2024 ലെ സിവില്‍ സര്‍വീസ് പരീക്ഷാ പരിശീലനത്തിന് ബിരുദധാരികള്‍ക്ക് ഓണ്‍ലൈനായി അപേക്ഷിക്കാം. ഏപ്രില്‍ 28 ന് വൈകിട്ട് അഞ്ചിനകം 200 രൂപ രജിസ്‌ട്രേഷന്‍ ഫീസ് അടച്ച് www.kscsa.org ല്‍ ആണ് അപേക്ഷിക്കേണ്ടതെന്ന് കോ-ഓര്‍ഡിനേറ്റര്‍ അറിയിച്ചു. ഫോണ്‍: 0491 2576100, 8281098869.
 

കോട്ടയം :  സ൦സ്ഥാന സർക്കാരിന്റെ നവകേരള മിഷനില്‍ ഉൾപ്പെടുത്തി ആർദ്രം പദ്ധതിയുടെ ഭാഗമായി നവീകരിച്ച ഇടയിരിക്കപ്പുഴ  കമ്മ്യൂണിറ്റി ഹെല്‍ത്ത് സെന്റര്‍ ബ്ലോക്ക് ആരോഗ്യകേന്ദ്രമായി ഉയർത്തുന്നതിന്റെ ഉദ്ഘാടനം നാളെ (ഏപ്രിൽ 25 )നടക്കും. രാവിലെ 10 മണിക്ക് ആശുപത്രി അങ്കണത്തില്‍ നടക്കുന്ന ചടങ്ങിൽ ആരോഗ്യ വനിത ശിശുവികസന വകുപ്പ് മന്ത്രി വീണാ ജോർജ് ഉദ്ഘാടനം നിർവഹിക്കും
സ൦സ്ഥാന സർക്കാരിന്റെ 37.5 ലക്ഷം രൂപയും വാഴൂര്‍ ബ്ലോക്ക് പഞ്ചായത്തിന്റെ 14 ലക്ഷം രൂപയും മുടക്കിയാണ് കെട്ടിടം നവീകരിച്ചത്. 

തൊഴില്‍ നൈപുണ്യ വികസനത്തിന്റെ ഭാഗമായി വിദ്യാഭ്യാസ സ്ഥാപനങ്ങളും വ്യവസായിക സ്ഥാപനങ്ങളുമായി ചേര്‍ന്ന് കൊച്ചി ശാസ്ത്ര സാങ്കേതിക സര്‍വകലാശാലയില്‍ നൈപുണ്യ വികസന ഹബ്ബ് സ്ഥാപിക്കുമെന്ന് വ്യവസായ വകുപ്പ് മന്ത്രി പി.രാജീവ് പറഞ്ഞു. യുവാക്കള്‍ക്ക് തൊഴില്‍ നേടുന്നതിന് ആവശ്യമായ നൈപുണ്യ പരിശീലനം നല്‍കി തൊഴില്‍ ചെയ്യുന്നതിന് പ്രാപ്തരാക്കുക എന്ന ലക്ഷ്യത്തോടെ മന്ത്രിയുടെ നേതൃത്വത്തില്‍ കളമശ്ശേരി മണ്ഡലത്തില്‍ നടത്തിവരുന്ന സ്‌കൈ പദ്ധതിയുടെ ഭാഗമായി കളമശ്ശേരി ഗവ. ഐ.ടി.ഐയില്‍ നടന്ന പ്ലേസ്‌മെന്റ് ഡ്രൈവ് ഉദ്ഘാടനം ചെയ്യുകയായിരുന്നു അദ്ദേഹം.

വല്ലാര്‍പാടം കണ്ടെയ്‌നര്‍ ടെര്‍മിനല്‍ റോഡ്, സീ പോര്‍ട്ട് -എയര്‍പോര്‍ട്ട് റോഡ്, ഇരുമ്പനം-അമ്പലമുകള്‍ റോഡ്, കുണ്ടന്നൂര്‍-കൊച്ചി ഹാര്‍ബര്‍ റോഡ് എന്നിവിടങ്ങളില്‍ റോഡിന് ഇരുവശവും കണ്ടെയ്‌നര്‍-ടാങ്കര്‍ ലോറികള്‍ ഉള്‍പ്പെടെയുള്ള വലിയ വാഹനങ്ങള്‍ പാര്‍ക്ക് ചെയ്യുന്നത് നിരോധിച്ച് ജില്ലാകളക്ടര്‍ ഉത്തരവിട്ടു. 

കോട്ടയം: ഗ്രാമപഞ്ചായത്തിലെ മുഴുവൻ സ്ത്രീകൾക്കും മെൻസ്ട്രുവൽ കപ്പ് സൗജന്യമായി വിതരണം ചെയ്യാനൊരുങ്ങി വെള്ളൂർ ഗ്രാമപഞ്ചായത്ത്. ഏപ്രിൽ 25 ന് രാവിലെ 11 മണിക്ക് വെള്ളൂർ പ്രാഥമിക ആരോഗ്യകേന്ദ്രത്തിൽ നടക്കുന്ന പരിപാടി ജില്ലാ പഞ്ചായത്ത് പ്രസിഡന്റ് കെ. വി. ബിന്ദു ഉദ്ഘാടനം ചെയ്യും. മൂന്ന് ലക്ഷം രൂപയാണ് പദ്ധതിയ്ക്കായി ചെലവഴിക്കുന്നത്. പദ്ധതിയുടെ ആദ്യ ഘട്ടമെന്നോണം പഞ്ചായത്തിലെ 18നും 40നും ഇടയിൽ പ്രായമുള്ള സ്ത്രീകൾക്കാണ് മെൻസ്ട്രുവൽ കപ്പ് വിതരണം ചെയുന്നത്.