2022-23 വാര്‍ഷിക പദ്ധതി നിര്‍വഹണത്തില്‍ മികവ് പുലര്‍ത്തിയ തദ്ദേശസ്വയംഭരണ സ്ഥാപനങ്ങള്‍ക്ക് ജില്ലാ ആസൂത്രണ സമിതി യോഗത്തില്‍ പുരസ്‌കാരങ്ങള്‍ വിതരണം ചെയ്തു. നൂറ് ശതമാനം ചെലവ് രേഖപ്പെടുത്തിയ ആദ്യ മൂന്ന് തദ്ദേശസ്വയംഭരണ സ്ഥാപനങ്ങളില്‍ ചെങ്ങോട്ടുകാവ് ഗ്രാമപഞ്ചായത്ത് ഒന്നാമതെത്തി. ബാലുശ്ശേരി, കുറ്റ്യാടി ഗ്രാമപഞ്ചായത്തുകള്‍ രണ്ടും മൂന്നും സ്ഥാനങ്ങള്‍ക്കുള്ള പുരസ്‌കാരം നേടി. ജില്ലാപഞ്ചായത്ത് പ്രസിഡന്റ് ഷീജ ശശി, ജില്ലാ കലക്ടര്‍ എ.ഗീത എന്നിവര്‍ ചേര്‍ന്നാണ് പുരസ്‌കാരങ്ങള്‍ വിതരണം ചെയ്തത്. 

പൊതുജനങ്ങളുടെ പ്രശ്നങ്ങൾക്ക്  പരിഹാരവുമായി മന്ത്രിമാർ നേരിട്ട് ജനങ്ങളിലേക്ക് എത്തുന്നു. സംസ്ഥാന സർക്കാരിന്റെ രണ്ടാം വാർഷികത്തോടനുബന്ധിച്ച് സംഘടിപ്പിക്കുന്ന ‘കരുതലും കൈത്താങ്ങും' താലൂക്ക്തല അദാലത്തുകൾ ജില്ലയിൽ മേയ് രണ്ടു മുതൽ എട്ട് വരെ നടക്കും. അദാലത്തുകളുടെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ ഏപ്രിൽ 30ന് രാവിലെ 11 മണിക്ക് കോഴിക്കോട് മലബാർ ക്രിസ്ത്യൻ കോളേജ് ഗ്രൗണ്ടിൽ നിർവഹിക്കും. 

സംസ്ഥാന മന്ത്രിസഭയുടെ രണ്ടാം വാർഷികാഘോഷ പരിപാടികളുടെ ഭാഗമായി മെയ് 12 മുതല്‍ 18 വരെ കോഴിക്കോട് ബീച്ചിൽ നടക്കുന്ന എന്റെ കേരളം പ്രദർശന വിപണന മേളക്ക് മുന്നോടിയായി ജില്ലയിലെ യൂട്യൂബ് വ്ലോഗർമാരുടെ സംഗമം നടത്തുന്നു.  സംഗമത്തിൽ പങ്കെടുക്കാൻ താല്പര്യമുള്ളവർ പേര്, യൂട്യൂബ് ചാനലിന്റെ പേര്, വിലാസം, ഫോൺ നമ്പർ എന്നിവ സഹിതം entekeralamclt2023@gmail.com എന്ന ഇ മെയിലിൽ രജിസ്റ്റർ ചെയ്യേണ്ടതാണ്. കൂടുതൽ വിവരങ്ങൾക്ക്:  0495-2370225

ലോകത്തിലെ തന്നെ ഏറ്റവും മികച്ച വൈറോളജി സ്ഥാപനമായി തിരുവനന്തപുരം തോന്നക്കൽ ബയോ 360 ലൈഫ് സയൻസ് പാർക്കിലെ ഇൻസ്റ്റിറ്റ്യൂട്ട് ഓഫ് അഡ്വാൻസ്ഡ് വൈറോളജിയെ (ഐ.എ.വി) മാറ്റാനാണ് സർക്കാർ ലക്ഷ്യമിടുന്നതെന്ന് മുഖ്യമന്ത്രി പിണറായി വിജയൻ.

അന്യം നിന്ന് പോകുന്ന കലാരൂപങ്ങളെ നിലനിർത്താൻ സർക്കാർ പ്രതിഞ്ജാബദ്ധമാണെന്ന് സാംസ്‌കാരിക വകുപ്പ് മന്ത്രി സജി ചെറിയാൻ പറഞ്ഞു. കേരള ഫോക്‌ലോർ അക്കാദമി സംഘടിപ്പിച്ച അന്യം നിന്നു പോകുന്ന കലാരൂപങ്ങളുടെ അവതരണം തിരുവനന്തപുരം വൈലോപ്പിള്ളി സംസ്‌കൃതി ഭവനിൽ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. വൈവിധ്യങ്ങളെ ഉൾക്കൊള്ളുന്ന സാമൂഹിക ബോധവും ചരിത്ര ബോധവുമുള്ള സമൂഹത്തെ സൃഷ്ടിക്കുക എന്നതാണ് നവകേരളം എന്നതുകൊണ്ട് സർക്കാർ വിഭാവനം ചെയ്യുന്നത്. അതുകൊണ്ട് തന്നെ കലാകാരന്മാരെ കോവിഡടക്കമുള്ള പ്രതിസന്ധി ഘട്ടത്തിലും സർക്കാർ ചേർത്ത് നിർത്തി.

സംസ്ഥാനസര്‍ക്കാരിന്റെ വികസനക്ഷേമനേട്ടങ്ങളും ജനോപകാരപ്രദമായ പദ്ധതികളും പ്രചരിപ്പിക്കുന്നതിനായി സംഘടിപ്പിക്കുന്ന എന്റെ കേരളം പ്രദര്‍ശന വിപണനമേളയുടെ സോഷ്യല്‍മീഡിയ പ്രചാരണത്തിന് വീഡിയോകള്‍, പോസ്റ്ററുകള്‍, മോഷന്‍ പോസ്റ്ററുകള്‍, അനിമേഷനുകള്‍ എന്നിവ തയ്യാറാക്കി നല്‍കുന്നതിന് ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് അംഗീകരിച്ച ഏജന്‍സികളില്‍ നിന്ന് താല്‍പര്യപത്രം ക്ഷണിച്ചു. ഏപ്രില്‍ 28 മുതല്‍ മെയ് നാല് വരെ വാഴത്തോപ്പ് ഗവ. വി എച്ച് എസ് എസ് മൈതാനത്താണ് പ്രദര്‍ശനമേള ഒരുക്കിയിരിക്കുന്നത്.

ചെറുതോണി ഡാമിന്റെ ഷട്ടറുകളില്‍ കേന്ദ്രജല കമ്മീഷന്റെ നിര്‍ദേശപ്രകാരമുള്ള അറ്റകുറ്റപ്പണി നടക്കുന്നതിനാല്‍ ഇടുക്കി ഡാമിലേക്കുള്ള വിനോദസഞ്ചാരികളുടെ പ്രവേശനം ഏപ്രില്‍ 20 വ്യാഴാഴ്ച മുതല്‍ താല്‍ക്കാലികമായി ഡാമിന്റെ വലത് ഭാഗത്ത് കട്ടപ്പന റോഡിലുള്ള കവാടത്തിലേക്ക് മാറ്റിയിരിക്കുന്നു. ചെറുതോണിയിലെ പ്രധാന കവാടം വഴി ഇനി സഞ്ചാരികളെ പ്രവേശിപ്പിക്കില്ല. കെ. എസ്. ഇ ബി ഡാം സുരക്ഷാ വിഭാഗത്തിന്റെ ആവശ്യപ്രകാരമാണ് പ്രവേശനം മാറ്റിയതെന്ന് കേരള ഹൈഡല്‍ ടൂറിസം സെന്റര്‍ ഡയറക്ടര്‍ അറിയിച്ചു.

ഇടുക്കി ജില്ലയില്‍ നാല് വില്ലേജ് ഓഫീസുകള്‍ കൂടി സ്മാര്‍ട്ട് ആവുന്നു. പീരുമേട്, ഉപ്പുതറ, വണ്ടന്‍മേട്, രാജാക്കാട് വില്ലേജ് ഓഫീസുകളുടെ ഉദ്ഘാടനം ഇന്ന് (20) റവന്യൂ വകുപ്പ് മന്ത്രി കെ രാജന്‍ നിര്‍വഹിക്കും .