മുതുവല്ലൂർ പഞ്ചായത്തിലെ ചുള്ളിക്കോട് മലയിൽ സ്ഥാപിച്ച കുടിവെള്ള സംഭരണിയുടെയും കുടിവെള്ള കണക്ഷൻ നൽകുന്നതിന്റെയും ഉദ്ഘാടനം ടി.വി ഇബ്രാഹീം എം.എൽ.എ നിർവഹിച്ചു. ചീക്കോട് കുടിവെള്ള പദ്ധതിയുടെ ഭാഗമായി ചുള്ളിക്കോട് പ്രദേശത്ത് വലിയ ടാങ്ക് നിർമിച്ചിരുന്നെങ്കിലും ഉയർന്ന പ്രദേശത്തെ വീടുകളിൽ കുടിവെള്ളം ലഭിച്ചിരുന്നില്ല. ഈ പ്രശ്‌നം പരിഹരിക്കാനാണ് എം.എൽ.എയുടെ ഇടപെടലിലൂടെ ചുള്ളിക്കോട് മലയിൽ പുതിയ ടാങ്ക് നിർമിച്ചത്. തൊണ്ണൂറിലധികം കുടുംബങ്ങൾക്ക് കുടിവെള്ളം നൽകുക എന്ന ലക്ഷ്യത്തോടെ ജലജീവൻ മിഷന്റെ കീഴിൽ മുപ്പതിനായിരം ലിറ്റർ സംഭരണശേഷിയുള്ള കുടിവെള്ള സംഭരണിയാണ് നിർമിച്ചത്. 

മലബാറിലെ തനത് പലഹാരങ്ങൾ ബ്രാൻഡ് ഉത്പന്നങ്ങളാക്കാനൊരുങ്ങി കുടുംബശ്രീ. കുറഞ്ഞ ചെലവിൽ സാധാരണക്കാരുടെ വിശപ്പകറ്റുന്ന ജനകീയ ഹോട്ടൽ 'ഒരു ബ്രാൻഡ് ഒരു രുചി' ലക്ഷ്യത്തോടെയാണ് പദ്ധതി നടപ്പിലാക്കുന്നത്. പൂവട, നെയ്യപ്പം, കലത്തപ്പം, കാരോലപ്പം തുടങ്ങിയ തനത് രുചികളാണ് വിപണിയിലെത്തിക്കുക. അടുത്തുള്ള ജനകീയ ഹോട്ടൽ വിവരങ്ങൾ ആവശ്യക്കാരുടെ വിരൽത്തുമ്പിലെത്തിക്കാൻ 'ജനകീയ ഹോട്ടൽ ആപ്പ്' തയ്യാറാക്കുന്നുണ്ട്. ഓരോ പ്രദേശത്തെയും ജനകീയ ഹോട്ടലുകളുടെ ലൊക്കേഷൻ, വിഭവങ്ങളുടെ വിവരങ്ങൾ, വില വിവരങ്ങൾ എന്നിവക്കൊപ്പം ഹോം ഡെലിവറി സംവിധാനവും ഉൾപ്പെടുത്തുകയാണ് ലക്ഷ്യം.

ജീവിത ശൈലി രോഗത്തിന്റെ ഭാഗമായി വർധിച്ചുവരുന്ന മറവിരോഗവും സ്മൃതിനാശവും മുളയിലേ നുള്ളിക്കളയാനുള്ള പദ്ധതിയുമായി പൊന്നാനി ഗവ. ആയുർവ്വേദ ആശുപത്രി രംഗത്ത്.  മറവിരോഗ ലക്ഷണമുള്ളവരെ കണ്ടെത്തി ഇവരെ പൂർണമായും മറവിരോഗത്തിൽ നിന്ന് മുക്തമാക്കുന്നതിന് മെമ്മറി ക്ലിനിക്കിന് തുടക്കമായി. എല്ലാ ചെവ്വാഴ്ചകളിലും ആശുപത്രിയിലെ മാനസികാരോഗ്യ വിഭാഗത്തിന് കീഴിൽ ഡോ. ടി.കെ സുബിനയുടെ നേതൃത്വത്തിൽ ഒ.പിയും പ്രവർത്തിക്കും. ഓർമ്മക്കുറവുണ്ടെന്ന് കണ്ടെത്തുന്നവർക്ക് സൗജന്യ ആയുർവ്വേദ മരുന്നുകളുൾപ്പെടെ നൽകും. 65 വയസ്സിന് മുകളിൽ പ്രായമുള്ളവർക്കാണ് മറവിരോഗം പിടിപെടാൻ സാധ്യതയേറെയെന്നതിനാൽ ഇവർക്ക് മുൻഗണന നൽകുകയും ചെയ്യും.

പൊന്നാനി ഈശ്വരമംഗലം മൃഗാശുപത്രിയുടെ പുതിയ കെട്ടിടത്തിന്റെ

പൊന്നാനി താലൂക്കിലെ പ്രധാന മൃഗാശുപത്രിയായ ഈശ്വരമംഗലം മൃഗാശുപത്രിയുടെ പുതിയ കെട്ടിടത്തിന്റെ ഉദ്ഘാടനം മെയ് 12ന് രാവിലെ ഒമ്പതിന് മൃഗസംരക്ഷണ-ക്ഷീരവികസന വകുപ്പ് മന്ത്രി ജെ.ചിഞ്ചുറാണി നിർവഹിക്കും. മുഖ്യമന്ത്രിയുടെ 100 ദിന കർമ്മ പരിപാടിയിൽ ഉൾപ്പെടുത്തിയാണ് കെട്ടിടം നിർമിച്ചത്. സംസ്ഥാനത്തെ മൃഗാശുപത്രി കെട്ടിടങ്ങളുടെ നവീകരണത്തിനായി മൃഗചികിത്സ സേവനം പദ്ധതി പ്രകാരം 99.90 ലക്ഷം രൂപ ചെലവഴിച്ചാണ് ഈശ്വരമംഗലം മൃഗാശുപത്രിക്ക് പുതിയ കെട്ടിട സമുച്ചയം നിർമിച്ചത്.

ഗവ. റെസ്‌ക്യൂ ഹോമിലെ താമസക്കാരായ കരിഷ്മ ഇനി കുടുംബത്തോടൊപ്പം ജീവിക്കും. ഇന്നലെ (ഏപ്രിൽ 19) ഇവർ കുടുംബത്തോടൊപ്പം നാട്ടിലേക്ക് തിരിച്ചു. 2008 മാർച്ച് 21നാണ് തവനൂർ റെസ്‌ക്യൂ ഹോമിൽ കരിഷ്മ (50) എന്ന മഹാരാഷ്ട്ര പട്വ പ്രവിശ്യയിലെ റോഹാ, റായ്ഗർഹ് സ്വദേശി എത്തിയത്. റോഹാ താലൂക്കിലെ വാങ്ടി ഗ്രാമത്തിൽ അങ്കണവാടി അധ്യാപികയായിരുന്ന കരിഷ്മ മാനസിക അസ്വസ്ഥതയെ തുടർന്ന് പിഞ്ചു മക്കളെ വിദ്യാലയത്തിലേക്ക് അയച്ച് നാടുവിടുകയായിരുന്നു. അഞ്ച് വർഷത്തോളം മറ്റിടങ്ങളിൽ അലഞ്ഞുതിരിഞ്ഞു 2008ൽ പെരിന്തൽമണ്ണ പോലീസ് വഴി തവനൂർ റെസ്‌ക്യൂ ഹോമിൽ എത്തുകയായിരുന്നു.

ജില്ലാ ടി.ബി സെന്ററിലേക്ക് ദിവസ വേതനാടിസ്ഥാനത്തിൽ ലബോറട്ടറി ടെക്‌നീഷ്യനെ നിയമിക്കുന്നു. സർക്കാർ അംഗീകൃത ബി.എസ്.സി എം.എൽ.ടി, ഡി.എം.എൽ.ടി സർട്ടിഫിക്കറ്റ്, പാരാമെഡിക്കൽ കൗൺസിൽ രജിസ്‌ട്രേഷൻ സർട്ടിഫിക്കറ്റ് എന്നിവയാണ് യോഗ്യത. ഒരുവർഷത്തിൽ കുറയാത്ത സർക്കാർ ആരോഗ്യസ്ഥാപനങ്ങളിൽ നിന്നുള്ള പ്രവൃത്തി പരിചയം അഭികാമ്യം. ഉദ്യോഗാർഥികൾക്ക് 40 വയസ്സ് കവിയരുത്. യോഗ്യരായ ഉദ്യോഗാർഥികൾ അസ്സൽ സർട്ടിഫിക്കറ്റുകൾ സഹിതം ഏപ്രിൽ 25ന് രാവിലെ 11ന് മഞ്ചേരി ചെരണിയിലുള്ള ജില്ലാ ടി.ബി സെന്ററിൽ  അഭിമുഖത്തിന് ഹാജരാവണം. ഫോൺ: 7558020661.
 

കേരള സർക്കാർ സ്ഥാപനമായ മങ്കട ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ സൗജന്യ ഹ്രസ്വകാല ഹോട്ടൽ മാനേജ്‌മെന്റ് കോഴ്‌സുകളിലേക്ക് അപേക്ഷ ക്ഷണിച്ചു. കുക്കറി, ഫുഡ് ആന്റ് ബീവറേജ് സർവീസ്, ഹൗസ് കീപ്പിംഗ്, ഫ്രണ്ട് ഓഫീസ് ഓപ്പറേഷൻ എന്നീ കോഴ്‌സുകളിലാണ് പരിശീലനം നൽകുന്നത്. താത്പര്യമുള്ളവർ മെയ് അഞ്ചിന് മുമ്പായി അപേക്ഷ സമർപ്പിക്കണം. ഫോൺ: 0493 3295733, 9645078880.

പെരുന്നാൾ ആഘോഷങ്ങൾ പ്രമാണിച്ച് നിരത്തുകൾ അപകടരഹിതമാക്കാൻ കർശന പരിശോധനയുമായി  മോട്ടോർ വാഹന വകുപ്പ്. ഇരുചക്ര വാഹനങ്ങളുമായി അഭ്യാസപ്രകടനത്തിനും  റൈസിങിനും എത്തുന്നതും നിയമലംഘിച്ച് നിരത്തിലിറങ്ങുന്നതും തടയാൻ വിനോദ കേന്ദ്രങ്ങൾ, പ്രധാന ടൗണുകൾ, ദേശീയ സംസ്ഥാനപാതകൾ, ഗ്രാമീണ റോഡുകൾ എന്നിവ കേന്ദ്രീകരിച്ച് മഫ്തിയിൽ ക്യാമറ ഉപയോഗിച്ചാണ് മോട്ടോർ വാഹന വകുപ്പ് ഉദ്യോഗസ്ഥർ പരിശോധന നടത്തുക. വിനോദ കേന്ദ്രങ്ങളിൽ ഉണ്ടാകുന്ന അപകടങ്ങളുടെ പശ്ചാത്തലത്തിലാണ് പരിശോധന.